ဘုရားသခင့်နိုင်ငံတော် ဆိုတာ ဘာလဲ

ကျမ်းစာအဆို

“ကောင်းကင်အုပ်စိုးရှင် ဘုရားသခင်က ဘယ်တော့မှ မပျက်စီးမယ့် နိုင်ငံတစ်ခုကို တည်ထောင်လိမ့်မယ်။” —ဒံယေလ ၂:၄၄၊ ကမ္ဘာသစ်ဘာသာပြန်ကျမ်း။

“ငါတို့အတွက် သားတစ်ယောက်ကို ပေးသနားတယ်။ အုပ်ချုပ်ခွင့်အာဏာက သူ့ပခုံးပေါ် ကျရောက်လာမယ်။” —ဟေရှာယ ၉:၆။

သမ္မာကျမ်းစာကနေ ရရှိနိုင်မယ့် အကျိုးကျေးဇူးများ–

• ဖြောင့်မတ်တဲ့အုပ်ချုပ်မှုကနေ သင်ကိုယ်တိုင် အကျိုးခံစားရနိုင်ပါတယ်။ —ဟေရှာယ ၄၈:၁၇၊ ၁၈။

• ရောက်လာတော့မယ့် ကမ္ဘာသစ်မှာ ပြည့်ဝစုံလင်တဲ့ ကျန်းမာရေးနဲ့ ပျော်ရွှင်မှု ခံစားရမယ်။ —ဗျာဒိတ် ၂၁:၃၊ ၄။

ကျမ်းစာအဆိုကို ယုံကြည်စိတ်ချနိုင်ပါသလား

စိတ်ချနိုင်တဲ့အကြောင်းရင်း အနည်းဆုံး နှစ်ခု ရှိပါတယ်–

• ဘုရားသခင့်နိုင်ငံတော် လုပ်ဆောင်ပေးမယ့် အရာတွေကို ယေရှု ပြသခဲ့တယ်။ ယေရှုက နောက်လိုက်တွေကို ဘုရားသခင့် နိုင်ငံတော် လာဖို့နဲ့ ဘုရားသခင့် အလိုတော် မြေကြီးပေါ်မှာ ပြည့်စုံလာဖို့ ဆုတောင်းကြ ပါလို့ သင်ပေးခဲ့တယ်။ (မဿဲ ၆:၉၊ ၁၀) အဲဒီဆုတောင်းချက် ဘယ်လိုပြည့်စုံလာမယ်ဆိုတာ ယေရှု ပြသခဲ့တယ်။

  ယေရှု ကမ္ဘာပေါ်မှာရှိတုန်းက ဆာလောင်နေသူတွေကို ကျွေးမွေးခဲ့တယ်၊ ဖျားနာသူတွေကို ကျန်းမာစေတယ်၊ သေတဲ့သူတွေကို ပြန်ရှင်အောင်လုပ်ပေးတယ်။ (မဿဲ ၁၅:၂၉-၃၈။ ယောဟန် ၁၁:၃၈-၄၄) အနာဂတ်မှာ ဘုရားသခင့်နိုင်ငံတော်ဘုရင်ဖြစ်လာမယ့် ယေရှုဟာ နိုင်ငံတော်က လုပ်ဆောင်ပေးမယ့်အရာတွေကို အကြိုအနေနဲ့ လုပ်ဆောင်ပေးခဲ့တယ်။—ဗျာဒိတ် ၁၁:၁၅။

• ကမ္ဘာ့အခြေအနေတွေက ဘုရားသခင့်နိုင်ငံတော် မကြာခင် ရောက်လာတော့မယ်ဆိုတာကို အတည်ပြုတယ်။ နိုင်ငံတော်က မြေကြီးပေါ်မှာ ငြိမ်းချမ်းမှုရှိအောင် မလုပ်ပေးခင် ကမ္ဘာပေါ်မှာ စစ်၊ အစာရှားပါးမှုနဲ့ မြေငလျင်လှုပ်တာတွေ ဖြစ်မယ်လို့ ယေရှုကြိုပြောခဲ့တယ်။ —မဿဲ ၂၄:၃၊ ၇။

  အခုချိန်မှာ အဲဒီအခြေအနေတွေကို မြင်တွေ့နေရပြီ။ ဒါကြောင့် မကြာခင်မှာ ဘုရားသခင့်နိုင်ငံတော်က အဲဒီပြဿနာအားလုံးကို ဖယ်ရှားပေးတော့မယ်ဆိုတာ ယုံကြည်စိတ်ချနိုင်ပါတယ်။