Maatewoosi Wongeella

24 Yesuusi qullaawu mininni fule haˈranni heeˈreenna, rosaanosi qullaawu mini hoola yinoonniha ikkino gara leellishshasira isiwa shiqqi yitu. 2 Isino qole togo yiinsa: “Konne baala laˈinanni? Halaale yeemmoˈnena, kinchu kinchu aana togo ikke duunamino gedeenni horo diigamikkinni diheeˈranno.”

3 Yesuusi Ejedhete Ilaalira ofolle heeˈreenna, rosaanosi calluwinsa isiwa shiqqi yite togo yite xaˈmitusi: “Hanni kulinke, kuni coyi ikkannohu mamarooti? Galagalte higge ledonke heeˈrakkiranna alamete* gumulora malaatu maati?”

4 Yesuusino togo yee qolinsa: “Mittuno soˈrisiisannoˈnekki gede qorophe; 5 korkaatuno batinyu manni ‘Ani Kiristoosaati’ yaanni suˈmiˈyanni daanno; lowo mannano soˈrisiisanno. 6 Olu luulonna olu duduwo macciishshitinanni. Kuni coyi ikkikki gatannokkihona hatte yannara massinoonte; goofimarchu kayinni dirahino.

7 “Qoleno daga dagate aana, gashshootuno gashshootu aana ola kayisanno; addi addi darga hude ubbanno, hattono baatto huxidhanno. 8 Kuni baalu coyi ilate game gede qarraho hanafote.

9 “Hatte yannara mannu buuto qarrisannoˈne, shaannoˈne; suˈmiˈyara yitineenna daga baala gibbannoˈne. 10 Qoleno hatte yannara batinyu manni gufiˈranno; mimmito sayise aanno; kuˈu koˈonne giwanno. 11 Batinye kaphu masaalaano kaˈe lowo manna soˈrisiissanno; 12 qoleno bunshe* lexxitanni hadhanno daafira, lowo manni baxilli qiidanno. 13 Goofimarchu geeshsha kaajje uurrinohu* kayinni gatanno. 14 Daga baalate naqaashshe ikkanno gede, Maganu Gashshootiha dancha duduwo uulla woˈmate dudumbanni; hakkiinni goofimarchu daanno.

15 “Hakko daafira, masaalaanchu Daanieeli coyiˈrino garinni, bao abbannohu battete coyi qullaawa darga nooha laˈinanni woyite nabbawannohu wodancho; 16 hatte yannara Yihudaho noori ilaalla xooqqo. 17 Mineho iimaanni* noo manchi, uduunne adhara minisira dirroonke; 18 gate noo manchi uddano adhara higoonke. 19 Hatte yannara godowii noo meentiranna qansiˈranni noorira aanneˈe! 20 Xooqqinannihu hawado woy Sambatu barra ikkannokki gede woˈmanka woyite huuccidhe; 21 korkaatuno hatte yannara, alamete hanafonni kayise xaa geeshsha daye egenninokkihu, layinkimeeshshono daannokkihu quuxxote qarri daanno. 22 Isinni hatti barruwa haraˈma hooggoommero, mittu manchino* digatanno; ikkollana doorantinorira yineenna hatti barruwa haraˈmitanno.

23 “Hatte yannara aye manchino, ‘Kuneeti Kiristoosi kowiicho no’ woy ‘Kooiicho no’ yiiˈnero ammantinoonte. 24 Korkaatuno kaphunni ninke Kiristoosaati yitannorinna kaphu masaalaano kaˈanno; insa dandiituro doorantinore nafa soˈrisiissara lowo maalalenna dhagge leellishshanno. 25 Ane woyite balaxe qorowisiisoommoˈne. 26 Konnira mannu, ‘Isi halalla no’ yiiˈnero hakkira hadhinoonte; ‘Holge no’ yiiˈnerono ammantinoonte. 27 Korkaatuno banqo soojjaatoonni beleqqe galchimi geeshsha xawissannonte gede, manchi Beetti galagale hige ledoˈne heeˈranno yannano hattoota ikkitanno. 28 Reeshshu noowa baalawa allamuru gamba yaanno.

29 “Hattenne qarru barruwa gedensaanni hakkawoyintenni arrishsho tunsitanno, aganuno dixawanno; beeddahe gordunni ubbanno; iima noorino shafamanno.* 30 Hakkiinni manchi Beetti malaati gordoho leellanno; uullate heedhanno gare baalano lowo geeshsha dadillite gagaso gaˈnitanno; qoleno manchi Beetti wolqatenninna lowo ayirrinyinni gordu gomichinni daanna laˈanno. 31 Isi, sokkaasinesi batiˈra xurumbu huuronni soyanno; insano shoolunku raginni* mitte gordu qasiˈronni wole gordu qasiˈro geeshsha isira doorantinore gamba assitanno.”

32 “Balasete haqqichonni konne lawishsha rosse: Sinnase ciirtannonna darose lattanno woyite arru* rahinota affinanni. 33 Kiˈneno konne coye baala laˈinanni woyite manchi Beetti shiqe waalchoho noota affe. 34 Halaale yeemmoˈnena, kuni coyi baalu woˈma geeshsha tini ilama horonta disaˈanno. 35 Iiminna uulla saˈˈanno; qaaliˈya kayinni horonta disaˈˈanno.

36 “Hakkonne barranna hattenne saate Anna agurranna gordu sokkaasineno ikkito, Beettono ikko, wolu mittuno afinohu dino. 37 Nohi waro ikkinte gede, manchi Beetti galagale hige ledoˈne heeˈranno yannano hattoota ikkitanno. 38 Hakkawaro, Baote Wayi daara albaanni Nohi markaawe ei barri geeshsha mannu itanninna aganni, labballu adhanni, seennuno assiˈranni no; 39 Baote Wayi daye insa baalanka feye guda geeshsha diwodanchitino; manchi Beetti galagale hige ledoˈne heeˈranno yannano hattoota ikkitanno. 40 Hattee yannara lamu manchi gate loossanno; mitto haaˈnanni, mitto agurranni. 41 Lame meenti daammaho daahanno; mitte haaˈnanni, mitte agurranni. 42 Konnira, Mootichiˈne daanno barra affinoonnikki daafira woˈmanka woyite baqqi yitine agadhe.

43 “Kayinni mitto coye wodanche: Qaete anni mooraanchu hashsha hiitte saatera daannoro afoommero, baqqi yee agadhanno; minesi hiiqqe earano diwodhanno. 44 Konnira kiˈneno, manchi Beetti heddinoonnikki saatera daanno daafira baqqi yitine agadhe.

45 “Sagale hasiissanno yannara aannonsa gede, mootichisi minisi manni aana shoominohu ammanaminohunna wodanaamu* borojjichi addinta ayeti? 46 Mootichisi daanno woyite hatto assanna afannosiha ikkiro, hakku borojjichi hagiirraamoho! 47 Halaale yeemmoˈnena, mootichu jajjisi baalu aana shoomannosi.

48 “Ikkollana hakku bushu borojjichi wodanisinni, ‘Mootichiˈya keeshshanno’ yee hede, 49 ledosi loossanno borojjoota ganiro hattono dimbaasinete ledo itironna agiro, 50 mootichisi hedinokki barranna hedinokki saatera daye 51 buuto qorichishannosi;* gawalosino lawisiisaanote ledota assanno. Hakkiicho isi wiˈlanno, hattono hinko gaˈmiˈranno.