AANIIDI QOOLIHA COYI UMO | MAGANU MANGISTE—KAAꞌLITANNOHEHU HIITTOONNIITI?

Maganu Mangiste Atera Kaaꞌlitannohehu Hiittoonniiti?

Yihowa Farciꞌraasine Maganu Mangistera baasa diinaggaabbannota saꞌu birxichuwanni huwatoottoti dihuluullissannote. Qoleno, Maganu Mangiste albillitte abbitanno atooti giddo mitu dhagge ikkinoheha ikkara dandaanno. Tini hexxo haaqete halchooti yite hedoottohano ikkara dandaanno.

Macciishshatto coye baalanka ammana hoogakki busullete. (Lawishsha 14:15) Mitu garinni laꞌniro, qorophokki hunda Beeriyu manni qoropho gedeeti.a Beeriyu mannooti Mangistenniha dancha duduwo umo macciishshitu yannara, macciishshitino coye adhitinohu mulla baxisinonsa daafira calla diꞌꞌikkino. Insa “macciishshitino coyi gara ikkinota buuxate” Qullaawa Borro seekkite xiinxallitino. (Hawaariyaatete Looso 17:11) Wole yaattonni, Beeriyu manni macciishshinoha dancha duduwo Qullaawa Borro yitannori ledo taashshe laino. Hakkuyi gedensaanni insa danchu duduwi addinta Maganu Qaali aana xintaminoha ikkinota ammantino.

Yihowa Farciꞌraasine atino insa gede assattora koyissinohe. Ninke ledo Qullaawa Maxaafa woxe kaffaꞌlittokki xiinxallite, Yihowa Farciꞌraasine Maganu Mangiste daafira ammantannore Qullaawu Maxaafi rosiisannori ledo taashshite lai.

Qullaawa Maxaafa ninke ledo xiinxallakki, Maganu Mangiste daafira afatto gede calla ikkikkinni lowo geeshsha hasiissanno xaꞌmuwara dawaro afiꞌratto gedeno kaaꞌlitannohe.

Mannu ooso heeshshora kaimu mamaati?
Heeshshote alaami maati?
Maganu qarrunna shetto heedhara sammi yiinohu mayiraati?
Reyineemmo wote hiikkineemmo?
Albillitte uulla baꞌakka?
Maate hagiirru noota assiꞌrate kaaꞌlannohu qaru coyi maati?

Konni baalunkunni roore, Qullaawa Maxaafa xiinxallakki ‘Maganunniwa shiqate’ kaaꞌlitannohe. (Yaaqoobi 4:8) Maganunniwa shiqqanni haꞌritto kiiro, Mangistesi xaarano albillittete heeshshokkirano lowore assitannota roore huwatatto. Yesuusi umisi Annisiwa huuccatto assiꞌranni togo yiino: “Hegere heeshsho afidhanno gede, ati callu halaalaancho Magano ikkoottoha atenna soottoha Yesuusi Kiristoosi affanni haꞌra hasiissannonsa.”—Yohaannisi 17:1-3.

Yihowa Farciꞌraasine konne maxaafa horoonsidhe Qullaawa Maxaafa xiinxallissannohe.

Qullaawa Maxaafa mulla xiinxallate, Yihowa Farciꞌraasine shiqqe coyishiishi woy www.jw.org/sid aana noo forme wonshite soyi. (Webisayitenke aana kaimu qoolira nooha QULLAAWA MAXAAFA XIINXALLA HASIꞌRATTO? yaannoha qasi)

a Beeriyu biꞌre Meqedooniyaho noo katamaati.

Ise Maganu Mangiste Baxxannohu Mayiraati?

Muli yannara Folaake yinanniti tonnu diri qaaqqo rosu mine “Tenne Alame Aana Roorse Baxeemma Coye” yaanno birxicho horoonsidhe borro qixxeessitara kulloonnise. Folaake mannaho Maganu Mangistere kula baxxannohu mayiraatiro borreessite shiqisha doodhitino.

Folaake togo yite borreessitino: “Maganu Mangiste umosi dandiino gashshooteeti. Kayinni tini Mangiste wole agurina maxanxare wodhineenna nafa illete dileeltannote!”

Folaake aanchite Maganu Mangiste abbitannoha halchishannose atoote borreessitino. Ise albillitte Maganu Mangiste huntannoha mito qarra kulte togo yite borreessitino: “Galanno mine hooge dooggate heeꞌranno manni” hattono “alamete aana duuchu qooxeessira hudiꞌre reyanno qaaqquulli mararsannoe.” Ledde togo yitino: “Isayyaasi 65:21 nabbaweemma wote kayinni tashshi yaannoe.” Tini xiqise Maganu Mangiste gashshooti hunda heeꞌranno mannire kultanni togo yitanno: “Mannu mine miꞌnanno, hatte minnarano heeꞌranno; qoleno woyinete haqqe kaasiꞌre gumansa itanno.”

Qolteno Folaake Maganu Mangistesi horoonsiꞌre xiwana baalanka hunanno yanna quqquxante agadhitannota kultino. Ise Ajuuja 21:4 yitannore borrose aana qummi assitino; tini xiqise Maganu “hindiiddo baalanta illensa aaninni feyanno, reyono layinkita diheedhanno, wiꞌla woy raare woy xisso higgeno diheedhanno” yitanno. Ise borrose jeefora galagalte, Yihowanna Mangistesire mannaho kula tenne alame aana roorsite baxxanno coye ikkinota xawissino. Addaho, tini qaaqqo Maganu Mangiste lowo geeshsha baxxanno!