QULLAAWU MAXAAFI XAꞌMONNA DAWARO
Alame woꞌma mitte mangiste gashshitanno yanna dagga ikka?
Alame gashshitannoti mitte mangiste daga baala mittoonsitannohu hiittoonniiti?—Isayyaasi 32:1, 17; 54:13
Alame mitte mangiste gashshitannoha ikkoommero mannu mageeshshi horo afiꞌrannoro hanni hedi. Yannankera lowo manni baasa buxino; wolootu kayinni qawaaxxidhe heedhanno. Mannaho hasiisannore affannoti mitte alame gashshitanno mangiste kayinni baalunku manni hasatto wonshitanno. Mannu ooso togoo mangiste kalaqa dandiitannoha lawannohe?—Ermiyaasi 10:23 nabbawi.
Xagge leellishshannonte gede, mangistubba manninsa hasatto, roorenkanni buxanete hasatto wonsha didandiitino. Mite mangiste isenni kaajjadote. (Mekibibi 4:1; 8:9) Duuchanka Dandaanno Magani kayinni kuri mangistubba bayicho wole gashshoote abbara qaale eino. Konni gashshooti Gashshaanchi mannaho addinta assaawannoho.—Isayyaasi 11:4; Daanieeli 2:44 nabbawi.
Maganu Mangiste maa assitanno?
Maganu Yihowa gashshate malinoha Beettosi Yesuusa alamete Gashshaancho asse doorino. (Luq. 1:31-33) Yesuusi mancho ikke uullate aana noo waro manna kaaꞌla baxanno. Isi Nugusa ikkino daafira albillitte daga baala mittoonsanno, hattono mannu qarra baalanka hunanno.—Faarso 72:8, 12-14 nabbawi.
Baalunku manni Yesuusi nugusimma maahoyye yee adhannoyya? Diadhanno. Ikkirono, Yihowa cincaho. (2 Pheexiroosi 3:9) Isi mannu Yesuusa Nugusansa asse adhanno faro fanino. Muli yanna giddo Yesuusi busha manna gude uulla salaame nootanna teense heeꞌnannita assanno.—Mikkiyaasi 4:3, 4 nabbawi.