Albinni Roore Soqqamate Xaanni Iqqide Fushshidhe

1. Qaaggooshshu ayyaani wogga maaho injiitanno? Hakkawotira xaanni qixxaawa dandiineemmohu hiittoonniiti?

¹ Diru dirunku ayirrinseemmohu Qaaggooshshu ayyaani, “Yihowa lowo geeshsha galaxxate” haaro faro fanannonke. (Far. 109:30) Wodote kakkalo qixxeessino Maganira galata qolate, Badheessu aganira albinni roore soqqama dandiitinakka? Xaanni jammartine iqqide fushshidhiniro danchaho.—Law. 21:5.

2. Niro Dotteessu aganira kaaꞌlaancho suwisaancho ikka lainohunni assinoonni qixxaawora kiꞌnera ikko wolootaho mayi macciishshaminoꞌne?

² Kaaꞌlaancho Suwisaancho Ikka: Niro Dotteessu aganira 30 saate callatenni kaaꞌlaancho suwisaancho ikka dandiinanni qixxaawo assinoonnita kulli yannara roduuwu lowo geeshsha hagiidhitino. Mittu rodii togo yee borreessino: “Layinki dirimi roso roseemmo daafira, woꞌma yanna suwisaancho ikka didandoommo. Xa kayinni Dotteessu aganira 30 saate soqqamate forme wonshe, 50 saate soqqamate sharrameemmo.” Barra woꞌma looso loossannoti mitte rodoo qolte, “Ise sajjoo saatella ikkito!” yitino. Bashshoora suwisaancho ikkitinoti mitte 80 diro aleeginose rodoo tenne qixxaawore macciishshituti togo yitino: “Ani wonanni agadhe noommati togoo yannaati! Yihowa bashsho suwisaancho ikkoomma yannara mageeshsha hagiidheemmaro afino!” Hatte yannara suwisaano ikka hoogginori kayinni albinni roore soqqamate mixidhe kaꞌino.

3. Badheessu, Dotteessunna Onkoleessu aganira kaaꞌlaano suwisaano ikkate assaambeemmo gede assannonkeri maati?

³ Tayixeno Badheessu aganira 30 saate woyi 50 saate soqqamme kaaꞌlaano suwisaano ikka dandiineemmo qixxaawo noo daafira Badheessu agani tennera lowonta injiinoho. Qoleno, Dotteessa 5⁠nni (Badheessa 27, 2004) ayirrinseemmohu Qaaggooshshu ayyaanira manna koyisate Badheessa 17⁠nni Qidaamete barra baxxino zamacha jammarreemmo. Batinyu roduuwi albinni roore soqqamansanni lowonta hagiidhitanno daafira, Dotteessunna Onkoleessu aganirano 50 saatenni kaaꞌlaano suwisaano ikka hasidhara dandiitanno.

4. Albinni roore soqqamate maa assa dandiineemmo? Tini mayi atoote abbitanno?

⁴ Aantannote Maatete Magansiꞌraꞌne yannara maateꞌne giddo mittu mittunku Qaaggooshshu ayyaani woggara albinni roore soqqama dandaanno gara hasaabbiniro lowonta danchaho. (Law. 15:22) Yihowa sharroꞌne maassiꞌranno gede huuccidhe. (1 Yo. 3:22) Albinni roore soqqamaꞌne, Yihowara shiqishidhinanni galati lowoha ikkanno gede, hattono kiꞌnerano hagiirru lexxanno gede assitanno.—2 Qor. 9:6.