Qaagooshshu Ayyaanira Qixxaabbinanni Heedhinoonni?

Yanna Niisaani 13, 33 M.D., Yesuusi reyara albaanni lubbora baxanno jaallasi ledo sayisannohu mittu hashshi callu noosita afino. Isi rosaanosi ledo jeefonniha Faasiku ayyaana ayirrisanno; hakkiinnino, Mootichu Hurbaate yinanniha haaro ayyaana xintanno. Konne lowo geeshsha hasiissanno ayyaana ayirrisate qixxaawa hasiissanno. Hakko daafira, Yesuusi Pheexiroosinna Yohaannisi hasiisannore qixxeessitara soyino. (Luq. 22:7-13) Hatte yannanni kayise diru kiiro Qaagooshshu Ayyaana ayirrisanno Kiristaani, konni ayyaani yannara qixxaawansa lowo geeshsha hasiissannote. (Luq. 22:19) Tayixe, Dotteessa 3nni ayirrinsannihu Qaagooshshu Ayyaanira qixxaawate hasiisannonkehu qaru coyi maatiyya?

Cimeeyye Assitanno Qixxaawo:

Mangistete Addaraashe woy wole bayicho horoonsiꞌrate injaanno gede assite qixxeessitanno. Ikkanno geeshshi xarapheezzi, caabbichinna dancha ayyare heedhanno gede assa hasiissanno. Base balanxe seekke feye qixxeessa hasiissanno.
Nigiggire shiqishannohu, liqambarticha ikkannohunna woyinenna tima doyissinanni wote huuccatto assitanno roduuwi temokkiro noonsare ikka hasiissannonsa.
Mitte base lame hinge gamba yaate horoonsidhinanniha ikkiro, gambooshshu yanna dancha gede Keene wossana, base yannante agure fulanna uurrisiꞌnoonni makeena yannantenni kayisa danchate.
Soqqantannore hattono, timanna woyine doyissitannore qixxeessa hasiissanno.
Lawishshu Woyinenna tima, tsuuwa, sayine, kursenna kursete hocco kawajjaamonna mishiishannokki garinni qixxeessa hasiissanno.

Halashshaano assitanno qixxaawo:

Qaagooshshu Ayyaanira zamachunni diinaggaabbine manna koyisate qixxaabbe.
Qullaawa Maxaafa xiinxallissinannire, fiixaꞌne, ledoꞌne rossannore, ledoꞌne loossannorenna affinoonniha wole manna borreessitine amaxxe; hakkiinnino koyissensa.
Qaagooshshu Ayyaani yannata Qullaawu Maxaafi niwaawe nabbabbe hattono hiince.
Qaagooshshu Ayyaana daanno wosina haarate qixxaabbine amme.