MANNA GIWA AGURA DANDIINANNIHU HIITTOONNIITI?
3 | Manna Giwate Hedo Surrekki Giddonni Buqqisse Hooꞌli
Qullaawu Maxaafi Rosiisannore:
“Maganu hedo dancha, hagiirsiissannotanna guuta ikkitinota affinanni gede, wodaniꞌne haarooꞌmo.”—Roomu Sokka 12:2.
Hatto Yaa Mayyaate?
Hendeemmo gari Maganu hagiidhanno woy dadillanno gede assara dandaanno. (Ermiyaasi 17:10) Manna gimbeemmota leellishannore coyiꞌra woy assa dihasiissannonke; kayinni tini calla diꞌꞌikkitanno. Mittu manchi woloota giwa hanafannohu balaxe surresinniitinna wodanisinniiti. Hakko daafira manna giwate hedo giddonkenni buqqinse hooꞌla hasiissannonke. ‘Wodaninke haarooꞌmannohunna’ manna giwa agura dandiineemmohu hatto assinummoro callaati.
Ati Maa Assa Dandaatto?
Woloota hakko iso wole gaꞌre wido woy gobbare ikkitinore ma garinni laꞌꞌattoro seekkite hedi. Ateneeto togo yite xaꞌmi: ‘Insa ma garinni laeemmo? Insa daafira seekke afoommonso mulla kae giweemmo?’ Finqille nootanna manna gimbanni gede assitannota dagoomittete webisayite, filmenna boohaarsha laꞌꞌattokki gede qorophi.
Maganu Qaali manna giwate hedo wodaninkenninna surrenkenni buqqinse hooꞌlineemmo gede kaaꞌlannonke
Ninkeneeto layiꞌra shota ikkitannonkekki woyiti no. Maganu Qaali kayinni, “Wodanu giddo noo hedonna yorto [fonqolle]” layiꞌneemmo gede kaaꞌlannonke. (Ibiraawoota 4:12) Konnira Qullaawa Maxaafa xiinxalla agurtooti. Hedattori Qullaawu Maxaafi rosiisannori ledo sumuu yaannoronna teꞌee layiꞌri; hattono hedattori Qullaawu Maxaafi rosiisannori ledo sumuu yaanno gede assiꞌrate dandiittore baala assi. Maganu Qaali surrenkenna wodaninke giddo ‘qiishote’ gede ikkitinota manna giwate hedo qeeꞌlineemmo gede kaaꞌlannonke.— 2 Qorontoosi 10:4, 5.