Xiinxallate Kaaꞌlitanno Hedo

Balaxisiisa Hasiissannohere Balaxisiisi

Ninke baalunkura, hojju xiinxallo assiꞌneemmota gari yanna afiꞌra qarra ikkitannonke. Ikkina noonke yanna danchu garinni horoonsiꞌra dandiineemmohu hiittoonniiti? Umihunni, iimi iimi adda nabbabbooti. Iimi iimi adda lowo borro nabbawantenni yanna gaaꞌmite shiima borro xiinxalla kaaꞌlitannohe.

Hakkiinni, hiikkonne coye balaxisiisattoro mixo fushshiꞌri. (Efe. 5:15, 16) Hanni aane noore assate woꞌnaali:

• Qullaawa Maxaafa barru baala nabbawi. (Far. 1:2) Kiristaanu Heeshshonna Soqqansho Gambooshshira gaammoonniti lamalanniti Qullaawu Maxaafi niwaawe pirogiraame tennera kaaꞌlitahera dandaatto.

• Agarooshshu Shae Xiinxalloranna Kiristaanu Heeshshonna Soqqansho Gambooshshira qixxaawi. Qoleno gambooshshunniwa dawaro qolate qixxaawi.—Far. 22:22.

• Qoleno yanna afiꞌrittoro wole ayyaanaamittete sagale yaano, mannaho ellanni metseete, viidiyubbanna jw.org aana fultanno borro nabbawi.

• Baxisinohe birxicho doorte xiinxalli. Lawishshaho, iillinohe qarri daafira, dawaro afiꞌra hasiꞌratto xaꞌmo daafira woy albinni roore huwata hasiꞌroottoha mitto Qullaawu Maxaafi birxicho doorte xiinxalla dandaatto. Kaaꞌlitannohe hedo afiꞌrate, jw.org aana nooha “Qullaawu Maxaafi Xaggenni Ronseemmo Roso” yaanno maxaafa lai.