Mararannoha Kakkalaanote Biilonke Yesuusa Qaagge

1-2. (a) Yihowa Beettosi uullara soyinohu mayiraati? (b) Konni birxichira maa ronseemmo? (Ibiraawoota 5:7-9)

MITU 2,000 diri albaanni, Maganu Yihowa muxxe Beettosi uullara soyino. Mayira? Mittu korkaati, mannu sircho cubbunna reyote rumonni wolassanno gedeetinna Sheexaanu daafinore biddi assanno gedeeti. (Yoh. 3:16; 1 Yo. 3:8) Qoleno Yihowa, Yesuusi mancho ikke heeꞌranno heeshsho roore mararannohanna shaqqado Kakkalaanote Biilo ikkannonke gede assitannosita afino. Yesuusi Kakkalaanote Biilo ikke soqqama hanafinohu 29 M.D. cuuami woyiteeti.a

² Konni birxichira, Yesuusi uullate aana heeꞌrino heeshsho roore mararannoha Kakkalaanote Biilo ikke soqqamate ikkado ikkanno gede assitinosi gara ronseemmo. Yesuusi tenne soqqanshora ‘guuta ikkino’ gara seekkine huwatanke, cubbinke woy laanfenke hexxo mudhineemmo gede assitunkerono, Yihowawa shiqa shota ikkitannonke gede assitannonke.—Ibiraawoota 5:7-9 nabbawi.

MAGANUNNIHU BAXAMINO BEETTI UULLARA DAYI

3-4. Yesuusi uullara dayi woyite heeshshosi gari lowo geeshsha soorraminohu hiittoonniiti?

³ Ninke giddo batinyeho heeshshonke gari soorramino woyiti no; lawishshaho, banxeemmo qaenkenni agurre haꞌnoommoha woy maatenkenna jaallankewiinni baxxinoommoha ikkara dandaanno. Tini shota diꞌꞌikkitino. Ikkollana, Yesuusi geeshsha heeshshosi gari soorramino manchi dino. Isi iima Yihowate ayyaanaame ooso giddo baalunkunni roore ayirradoho. Yihowa lowo geeshsha baxannosi; qoleno, Maganu ‘qiniiteenni’ soqqamanno daafira woꞌmanka woyite hagiirraamoho. (Fa. 16:11; Law. 8:30) Ikkollana Filiphisiyusi 2:7 kultanno garinni, umisi fajjonni “isonooto mullicho asse” shama maala uddiꞌrino manni ledo uullate aana heeꞌrara yee, iima noosiha ayirrado bayicho agurino.

⁴ Hanni Yesuusi mancho ikke uullate aana ilami taaera ikkinoreno hendo. Yesuusi ilamihu gedensaanni annisinna amasi shiqishinoti shiima kakkalo, isi buxicho maate giddo ilaminota leellishshanno. (Lew. 12:8; Luq. 2:24) Bushu Moote Heroodiisi Yesuusi ilaminota afiti, iso shiishiishate woꞌnaalino. Maatesi iso Heroodiisi anganni gatisate, Gibitse xooqqe yannate geeshsha hakko heedhino. (Mat. 2:13, 15) Tini Yesuusi mancho ikkara albaanni heeꞌrino heeshshonni lowo geeshsha baxxitinote!

5. Yesuusi uullate aana heeꞌre maa laino? Uullate aana heeꞌrino heeshsho Kakkalaanote Biilo ikkanno woyitira qixxeessitinosihu hiittoonniiti? (Misileno lai.)

⁵ Yesuusi uullate aana noo yannara, lowo manni qarramanna laino. Isi umisi shiiꞌre xissiisiꞌrinoti egennantinote; losso annasi Yooseefino shiiꞌrikkinni digatino. Yesuusi uullate aana soqqami yannara, dhiigu dhibbi amadinori, ille ballitinori, laanshaabbinorinna oosonsa shiidhino annuwinna amuuwi ledo xaadino; isi insa mararinonsa. (Mat. 9:2, 6; 15:30; 20:34; Maq. 1:40, 41; Luq. 7:13) Yesuusi iima heeꞌre mannu qarra lainoti egennantinote. Mancho ikke uullate aana heeꞌri woyite kayinni, mannu xisso albinni roore huwata dandiino. (Isa. 53:4) Yesuusi uullate aana heeꞌrasi mannu xissonna dadilli leellannosi gede kaaꞌlitinosi. Wolu manninte gede isi umisi urino, daafurino, hattono lowo geeshsha yaadino.

YESUUSI MANNU QARRA UMISIHU GEDE ASSE HEDANNO

6. Masaalaanchu Isayyaasi horoonsiꞌrino lawishshinni Yesuusi mararro daafira maa ronseemmo? (Isayaasi 42:3)

⁶ Yesuusi uullate aana soqqami yannara dhukiweelootanna gadadaamma lowo geeshsha mararino. Konni garinni masaalo woꞌmitanno gede assino. Ibiraawootu Afiite Qullaawa Borro giddo dureessanna jawaata manna, mito woyite shaqqado baattonninna jajjabba sigiiga haqqenni lawinsoonni. (Fa. 92:12; Isa. 61:3; Erm. 31:12) Buxanenna gadadaamma kayinni, cancanantino shomboqqonna xoara kaino heqichinni lawinsoonni; lamunkuri hakkeya kaaꞌlannori dinooreeti. (Isayaasi 42:3 nabbawi; Mat. 12:20) Masaalaanchu Isayyaasi qullaawu ayyaaninni konne lawishsha coyiꞌrinohu, Yesuusi wolootu woffi assitanno manna baxannotanna mararannonsata masaalotenni kulateeti.

7-8. Yesuusi Isayyaasi masaalo woꞌmitanno gede assinohu hiittoonniiti?

⁷ Wongeellu borreessaanchi Maatewoosi, Isayyaasi “cancanantino shomboqqo dihiiqqanno, xoara kaino heqichano dixoyissanno” yee masaalino masalo Yesuusi aana woꞌmitinota borreessino. Yesuusi loosinoti mite maalale, cancanantino shomboqqo gede hiiqqantinore woy xoe baꞌꞌara kaino heqichi gede hexxo mudhitinore kaaꞌlitinonsa. Togoo manni giddo mittu, biso baala dhiigu gudinosi manchooti. Kuni manchi hure maateꞌyanna jaallaꞌya ledo xaade hagiidheemmo yee hexxannori noosini? (Luq. 5:12, 13) Wolu qole macciiweelonna babbicha manchooti. Kuni manchi wolootu mimmitu ledo hasaabbanno woyite, afiinsa millimillo laꞌꞌannota agurranna mittoreno macciishshannokki daafira hiitto ikkannoro hedi. (Maq. 7:32, 33) Ikkollana qarrinsa konne calla diꞌꞌikkino.

⁸ Yesuusi waro batinyu Ayihudooti, dhiwantinore woy bisu xeꞌne noonsare insa uminsa woy anninsanna amansa loosino cubbira qorichishantanni no yite ammantanno. (Yoh. 9:2) Tini soꞌrote hedo togoo manni ditidhinoommoreeti yee heddanno gede assitinonsa. Yesuusi dhiwantinorenna bisu xeꞌne noonsare hurse, Maganu insa daafira hedannota affanno gede assino; konni garinni Isayyaasi masaalo wonshino. Tini maa addaxxineemmo gede assitannonke?

9. Ibiraawoota 4:15, 16, iima noohu Kakkalaanote Biilinke guuntete xeꞌne noonsare mannu ooso addinta mararannota leellishshannohu hiittoonniiti?

⁹ Ibiraawoota 4:15, 16 nabbawi. Yesuusi woꞌmanka woyite mararannonketa addaxxa dandiineemmo. Hatto yaa mayyaate? Mararanno manchira, wolootu qarrinna xisso leeltannosi. “Marara” yine tirroonnihu Girikete qaali, wolu manchi qarra woy xisso gutama yitanno tiro afiꞌrino. (Qoleno Phaawuloosi Ibiraawoota 10:34 konne Girikete qaale horoonsiꞌrino.) Yesuusi loosino maalale daafira kultanno xaggenni, isira mannu xisso mageeshshi geeshsha leeltinosiro huwata dandiineemmo. Isi manna hursinohu mulla hursa hasiissinosi daafira calla diꞌꞌikkino. Hatto assinohu, godowinta mararannonsahuraatinna kaaꞌlansara hasiꞌranno daafiraati. Lawishshaho dhiigu amadino mancho hursi woyite, hasiꞌroommero xeertote heeꞌre hursa dandaanno; isi kayinni mancho amammade hursino; lowo diro dhiwame heeꞌrinoha konne mancho mite yee kisinohu Yesuusa ikkara dandaanno. Yesuusi macciweelo mancho cancu giddonni fushshe mannu nookkiwa masse hurse mararannosita leellishino. Mitte cubbisenni maaro eꞌino mancho Yesuusi lekka hindiiddosenni hayishshite dananchisenni fiituta mittu Farisichi mishinose; hatte yannara Yesuusi manchote haꞌlino. (Mat. 8:3; Maq. 7:33; Luq. 7:44) Yesuusi dhiwantinore woy cubbaataamma dishalino. Hatteentenni anga fane haaꞌrinonsa; qoleno baxannonsata leellishino. Isi ninkeno mararannonketa addaxxa dandiineemmo.

XAA YANNARA KAKKALAANOTE BIILINKE FAALE HAꞌRA

10. Danqoota woy ille ballitinore kaaꞌlate hiittenne ayyaanaamittete qixxaawo horoonsiꞌra dandiineemmo? (Misillano lai.)

¹⁰ Ammanammoommore Yesuusi haꞌrunsaano ikkinoommo daafira, woloota banxe, qarransa qarrinke gede assine hendenna insa mararre isi faale haꞌrate sharrammeemmo. (1 Ph. 2:21; 3:8) Danqoota woy ille ballitinore hursa dandiineemmokkiha ikkirono, ayyaanaamittetenni kaaꞌlinammonsara dandiineemmo. Lawishshaho, Qullaawu Maxaafi aana xintantino borruwanke 100 saꞌꞌannohu malaatu afiinni afiꞌra dandiinanni. Xunsite laꞌꞌa dandiitannokkire woy ille ballitinore kaaꞌlate, 60 saꞌꞌanno afiinni borruwanke bireeletenni qixxeessinanni; qoleno, qoonqote xawishsha ledo afidhino viidiyubbanke 100 saꞌꞌanno afiinni qixxeessinanni. Tini qixxaawo baala danqootunna ille ballitinori Yihowawanna Beettisiwa shiqqanno gede kaaꞌlitannonsa.

11. Yihowa dirijjite Yesuusi gede duuchunku gari mannira heddannota leellishshanni noohu hiittoonniiti? (Soqqamaasinete Looso 2:5-7, 33) (Misillano lai.)

¹¹ Yihowa dirijjite duuchunku gari manna kaaꞌlate sharrantanno. Yesuusi reyotenni kaihu gedensaanni, Phenxeqosxete ayyaanira gamba yiino manni mittu mittunku dancha duduwo umisi ‘qaalinni’ macciishshanno gede baalunkura qullaawa ayyaana duninota qaango. (Soqqamaasinete Looso 2:5-7, 33 nabbawi.) Dirijjitenke Yesuusi massaganna Qullaawu Maxaafi aana xintantino borro 1,000 saꞌꞌanno afiinni qixxeessitanni no; konni afii giddo mitu, shiimu manni calla coyiꞌrannoho. Lawishshaho, Aliyyenna Wodiidi Ameerikira heeꞌrannohu boodu manni calla coyiꞌrannohu addi addi afii no. Dandaami deerrinni lowo manni dancha duduwo macciishshanno gede kaaꞌlate, kuri giddo 160 saꞌꞌanno afiinni borruwanke qixxeessinanni heeꞌnoonni. Qoleno borruwanke 20 saꞌꞌannohu Roomaaniyu afiinni qixxeessinanni heeꞌnoonni. Lowo kume ikkannohu konne afoo coyiꞌranno manni halaale macciishshe adhino.

12. Yihowa dirijjite manna kaaꞌlate wolere maa assitanni no?

¹² Yihowa dirijjite mannu dancha duduwo rosanno gede kaaꞌlitannotano agurranna, kalaqamu danonni gawajjantinore mitore assite kaaꞌlitanno. Konnira, qarrantino roduuwansa kaaꞌlate lowo kume ikkitanno roduuwi insaneeto uminsa fajjonni shiqishshino. Qoleno Yihowa dirijjite, mannu mitteenni gamba yee Maganu baxannonsata rosanno gede, kawajjaamo magaꞌnote bayicho qixxeessitanno.

KAKKALAANOTE BIILINKE KAAꞌLANNOHE

13. Yesuusi kaaꞌlannonketi mite doogga hiikkuriiti?

¹³ Yesuusi dancha allaalaanchonke ikkino daafira, mittu mittunkura ayyaanaamittete hasiisannonkere seekke haꞌrunsanno. (Yoh. 10:14; Efe. 4:7) Mito woyite heeshshonke giddo tuncu yaannonke coyinni kainohunni, xoara kaino heqichi woy cancanantino shomboqqo gede ikkinoommoha lawankera dandaanno. Buutote dhibbinninna uminke laanfenni kainohunni woy ammanate roduuwinke ledo noonke aante baꞌꞌanno woyite lowo geeshsha hexxo mudhinammora dandiineemmo. Albillittete hexxonke heda agurre, xaa xissonna qarra calla illachinsheemmoha ikkara dandaanno. Ikkirono, Yesuusi qarrakki laꞌꞌannotanna xissokki leeltannosita qaagi. Yesuusi mararannohe daafira, ate kaaꞌlate kaꞌꞌanno. Lawishshaho isi wolqa baꞌꞌatto woyite ate jawaachishate qullaawa ayyaana horoonsiꞌrara dandaanno. (Yoh. 16:7; Tit. 3:6) Qoleno Yesuusi ate jawaachishate, irkisatenna kaaꞌlate, ‘elto ikkino mannanna’ wole ammanate roduuwakki horoonsiꞌrara dandaanno.—Efe. 4:8.

14. Hexxo mudhineemmo woyite maa assa dandiineemmo?

¹⁴ Hexxo mudhoottoha ikkiro, Yesuusi Kakkalaanote Biilonke ikkinotanna tini ate kaaꞌlitannohehu hiittoonniitiro hiinci. Yihowa iso uullara soyinohu heeshshosi ninkera wodo asse aara calla ikkikkinni, guuntete xeꞌne noonsate mannu oosora iillannonsa qarri albinni roore leellannosi gede ikkinota qaagi. Cubbinkenni woy laanfenkenni kainohunni hexxo mudhineemmo woyite, Yesuusi “kaaꞌlo hasiissannonke yannara” ninke kaaꞌlate qixxaawinohonna fajjaameessaho.—Ibi. 4:15, 16.

15. Yihowa hoshshawiinni ballehinoha mitto rodoo songo higanno gede kaaꞌlinoonni gara leellishanno woꞌnaalsha kuli.

¹⁵ Yesuusi Yihowa hoshshawiinni ballekkinore mannisi hase kaaꞌlate sharramanno woyiteno massagannonsa. (Mat. 18:12, 13) Hanni Istefaanob woꞌnaalsha laꞌno. Songotenni fushshinisihunni 12 diri gedensaanni, gambooshshe haꞌrate hedino. Isi togo yiino: “Coyi shota ikka hoogierono, galagale baxillu woꞌminote Yihowa maate miila ikka hasiꞌroommo. Xaadde hasaawissue cimeeyye, huxuxxi yeemmokki gede kaaꞌlitinoe. Ditidhoommoho yee hede hexxo mudhoommo woyiti no. Roduuwu kayinni, Yihowanna Yesuusi hexxo mudhammora hasidhannokkita qaagiissitinoe. Songo higummota, songo woꞌma aneno maateꞌyano anga fante haadhinonke. Gedensoonni galteꞌya Qullaawa Maxaafa xiinxalla hanaffino; xa maatete deerrinni mitteenni Yihowara soqqammanni heeꞌnoommo.” Baxillaanchu Kakkalaanote Biilinke maaro eꞌinori hasiissannonsa kaaꞌlo afidhe songo higganna laꞌꞌanno woyite lowo geeshsha hagiidhanno!

16. Mararannohu Kakkalaanote Biili noohehura galata hasiissannohehu mayiraati?

¹⁶ Yesuusi uullate heeꞌre, kiirre tunqannikki manna kaaꞌlo hasiisse noonsa yannara kaaꞌlino. Techono kaaꞌlo hasiissannonke yanna baalantera kaaꞌlannonketa woꞌmunni woꞌma addaxxa dandiineemmo. Muli yannara daggannote haaro alamerano, hajajantannota mannu ooso cubbunna guuntete xeꞌne abbitinonsa qarri baalunkunni woꞌmunni woꞌma furgaasannonsa. Lowo baxillinninna maaronni kae, Beettosi mararannoha Kakkalaanote Biilo asse shoominonke daafira Maganonke Yihowa lowo geeshsha galaxxineemmosi!