Yihowa Lawishsha Haꞌrunsitine Umoꞌne Heeshshi Asse

1. Yihowa umosi heeshshi assannoha ikkasi dhagge ikkitannote yineemmohu mayraati?

XAA yannara silxaane noonsa manna laꞌꞌatto woyte umo heeshshi assate akati qulli yaannohe? Yaannohekkiha ikkara dandaanno. Yihowa woꞌmanka dandaanno Magano ikkirono, isi umosi heeshshi assannoho. (Fa. 113:5-8) Umo heeshshi assate akati Yihowa ayimma xawisanno; isi horonta dibooꞌnanno. Konni birxichira Yihowata kaajja shoole akatta xiinxalla kaaꞌlitannonke garanna tini akatta isi umo heeshshi assannoha ikkinota leellishshanno gara xiinxallineemmo. Qoleno Yesuusi Annisi lawishsha haꞌrunse umosi heeshshi assino gara ronseemmo. Tenne xiinxallanke, Yihowawa albinni roore shinqeemmo gedenna isi lawishsha haꞌrunsine umo heeshshi assineemmore ikkineemmo gede kaaꞌlitannonke.

YIHOWA HUXUXXI YINIKKI SHINQANNIHO

2. Faarso 62:8 Yihowa daafira maa kultanno? ( misileno lai.)

² Naaxxanno manniwa shiqa duucha woyte shota diꞌꞌikkitanno. Naaxxanno manni duucha woyte wolootunni roorinohu gede asse hedanno daafira, wolootu togoo manniwa shiqate hobbi ruxxi yitanno woy horonta shiqa dihasidhanno. Yihowa kay insawiinni horo baxxinoho! Iimi Anninke umosi heeshshi assannoha ikkino daafira isiwa shinqeemmo gedenna surrenkeranna wodaninkera ayirrinonkere isira hasaaphineemmo gede koysinonke. (Faarso 62:8 nabbawi.) Oososi coydhannore macciishshate qixxaawinohu baxillaanchu anni gede Yihowano iso magansidhannori huuccidhanno huuccatto macciishshanno. Isinni, kuri huuccatto giddo batinye Qullaawu Maxaafi giddo borreessantanno gede assino. Tini, isi huxuxxi yinikkinni shinqanniha ikkinota leellishshanno. (Iya. 10:12-14; 1 Sa. 1:10-18) Kayinni mitu korkaatinni kainohunni mito woyte Yihowawa shiqate ikkadda ikkinoommokkihu gede assine hendeemmohalla ikki?

3. Yihowa ganyite huuccattotenni isiwa shiqattora hasiꞌrannota addaxxa dandaattohu mayraati?

³ Yihowa baxannonke gedeere diꞌꞌikkinoommo yine hendeemmoha ikkiro nafa, huuccattotenni isiwa shiqa dandiineemmo. Hatto yineemmohu mayraati? Yesuusi qaetenni fule baino beetti daafira kulino lawishshira Yihowa, maaro einohanna maateꞌyawa higa hasiissannoe gedeeha diꞌꞌikkoommo yee hedino beettosi anga fane haaꞌrinohu shaqqadu anninni lawisino. Beettisi qae higita kuni anni ma assino? Yesuusi kuni anni beettisi daanni xeertote heeꞌreenna laiti ‘dodanni mare hanqafe kimmi asse sunqinosita’ coyiꞌrino. (Luq. 15:17-20) Yihowa konni anni gedeeho. Isi umosi heeshshi assannoha ikkino daafira, insaneeto bushiishshanni woy yaaddanni wodana hiiqqantinori huuccatto assidhanno woyte baychonkonni huuccattonsa seekke macciishshanno. (Erq. 3:19, 20) Yihowa shaqqado ikkino daafira maarosinninna baxillisinni insa sheshifachishate aleenni kulli anni gede insawa dodanno. (Isa. 57:15) Xaa yannara Yihowa ‘ninkewa dodannohu’ ma garinniiti? Isi tenne assannohu duucha woyte songote cimeeyye, Yihowa Farciꞌraasine ikkitino maatenkenna wolu ammanate roduuwinke widoonniiti. (Yaq. 5:14, 15) Yihowa konni garinni kaaꞌlannonkehu isiwa shinqammora hasiꞌranno daafiraati.

4. Yesuusi huxuxxi yinikkinni shinqanniha ikkasi leellishinohu hiittoonniiti?

⁴ Yesuusi Annisi lawishsha haꞌrunsino. Yesuusi Annisi gede umosi heeshshi assannoho. Hakko daafira isi uullate aana noo yannara mannaho isiwa shiqa qarra diꞌꞌikkitinonsa. Mannu Yesuusa xaꞌmo xaꞌma diwaajjanno. (Maq. 4:10, 11) Hakko daafira Yesuusi mittu coyiꞌra may lao noonsaro xaꞌmanno woyte insa macciishshaminonsare maaxxukki kultanno. (Mat. 16:13-16) Insa soꞌro loossanno woyte waajjite qece diytanno; Yesuusi shaqqado maarannohanna cincannoha ikkinota affino. (Mat. 17:24-27) Yesuusi woꞌmunni woꞌma Annisi lawishsha haꞌrunsino daafira harunsaanosi Yihowa seekkite afa dandiitanno. (Yoh. 14:9) Hatte yannara noori ammaꞌnote massagaano kakkachuulleho, naaxitannoreetinna shinqannikkireeti; Yesuusi rosaano Yihowa kayinni horo hattooha ikkinokkita rossino. Hatteentenni isi umosi heeshshi assannohonna huxuxxi yinikkinni shinqanniho.

5. Umonke heeshshi assa huxuxxi yinikki shinqannire ikkineemmo gede kaaꞌlitannonkehu hiittoonniiti?

⁵ Yihowa lawishsha haꞌrunsa dandiineemmohu hiittoonniiti? Albinni roore umonke heeshshi assineemmore ikkine huxuxxi yinikki shinqannire ikka dandiineemmo. Umonke heeshshi assineemmokkire ikka hinaanseemmore, naaxxineemmorenna gatona yineemmokkire ikkineemmo gede assitannonke; togoo akatta wolootu ninkewiinni xeertidhanno gede assitanno. Umonke heeshshi assineemmore ikka kayinni shaqqadda, cincineemmorenna gatona yineemmore ikkineemmo gede kaaꞌlitannonke; togoo akatta wolootu ninkewa shiqqanno gede assitanno. (Qol. 3:12-14) Roorenkanni songote cimeeyye huxuxxi yinikkinni shinqannire ikkate sharrama hasiissannonsa. Hige huxuxxi yinikkinni shinqannire ikkate insa roduuwunniwa aana hasiissannonsa. Togo yaa insa gambooshshe hasiisikkinni viidiyote widoonni eantenni gambooshshu addaraashe hadhe assiꞌrate sharrantanno yaate. Insa dandiitu deerrinni roduuwu ledo minunni mine hadhe soqqantanno. Roduuwu songote cimeeyye ledo dancha gede egennanturo hasiisanno woyte insara giddonsata fushshite hasaapha qarra diꞌꞌikkitannonsa.

YIHOWA QUWA DISAꞌꞌANNOHO

6-7. Yihowa soqqamaanosi huuccatto macciishshe hedinore agurinota leellishanno lawishsha kuli.

⁶ Naaxxanno manni duucha woyte woyyinore anfoommori ninkeeti yee hedanno daafira hedonsa disoorranno. Kayinni Yihowa umosi heeshshi assannoha ikkino daafira quwa disaꞌꞌanno; hattono baalunkura aliidiha ikkirono hedinore aguranno. Hanni isi Muse rodoora Miiriyaamira assinore laꞌno. Isenna Aarooni Yihowa shoominohu Musera gungumino. Hakko daafira Miiriyaami Yihowa ayirrissannokkita leellishshino. Konnira Yihowa Miiriyaamira hanqino daafira, ise dhiigu dhibbinni ganino. Kayinni Aarooni ise daafira huuccanno gede Musera kulitanna Muse Yihowa huuccita Yihowa ma assiyya? Yihowa booꞌnanno manni gede ikkikkinni hedinore agurate maahoyye yiino. Yihowa umosi heeshshi assannoha ikkino daafira Miiriyaami hurse hedinore agurino.—Kir. 12:1-15.

⁷ Yihowa Moote Hiziqiyaasira assinorino umosi heeshshi assannoha ikkinota leellishanno. Yihowa masaalaanchisi widoonni moote reyannota kulinosi. Hiziqiyaasi Yihowa hursannosi gede wiꞌle huucciꞌrino. Yihowano maarosinni moote Hiziqiyaasira 15 diro ledinosi. (2 Mo. 20:1, 5, 6) Addaho, Yihowa umosi heeshshi assannoha ikkasi mararannohanna hedinore agurannoha ikkanno gede assitinosi.

8. Yesuusi quwa saꞌꞌannokkiha ikkinota leellishanno lawishshi hiikkonneeti? (Maarqoosi 3:1-6)

⁸ Yesuusi Annisi lawishsha haꞌrunsino. Yesuusi uullate aana noo yannara manna kaaꞌla hasiissusi woyte insa kaaꞌlate badhera dihigino. Lawishshaho isi tiyyiꞌne gimbisirono sambatu barra dhiwantinore hursino. (Maarqoosi 3:1-6 nabbawi.) Yesuusi Kiristaanu songora umo ikke noote xaa yannarano quwa saꞌꞌannokkiha ikkasi leellishanni no. Lawishshaho, isi songote giddo noohu mittu manchi jawa cubbo loosanno woyte cincannosi hattono assootesi biddi assiꞌranno gede yanna aannosi.—Aju. 2:2-5.

9. Quwa saꞌneemmokkire ikkinoommota leellishsha dandiineemmohu hiittoonniiti? (Misillano lai.)

⁹ Yihowa lawishsha haꞌrunsa dandiineemmohu hiittoonniiti? Hendeemmorinna assineemmorinni Yihowa gede quwa saꞌneemmokkire ikkate umonke heeshshi assine sharrama hasiissannonke. (Yaq. 3:17) Lawishshaho, quwa saꞌannokki anninna ama oosonsa assa dandiitannokkire asse diytanno. Kalaqama 33:12-14 nooti Yaaqoobi xagge tenne dancha gede assite leellishshanno. Umonsa heeshshi assitannorinna quwa saꞌannokki anninna ama mitto qaaqqonsa wolu ledo heewisiisano qorophitanno. Songote cimeeyyeno quwa saꞌannokkire ikka hasiissannonsa. Tenne assa dandiitannoti mitte doogo Qullaawu Maxaafihu xintu seeri diigama hoogi geeshsha roore cimeeyye sumuu yitino hedora maahoyye yite heddinore agurate. (1 Xi. 3:2, 3) Qoleno ninke baalunku ninkete ledo sumuu yaa hoogguro nafa wolootu hedo huwatate woꞌnaalleemmo. (Rom. 14:1) Addanko, songote giddo noori baalunku ‘quwa saꞌannokkire ikkitinoti manna baalaho leeltanno’ gede assate sharrama hasiissannonsa.—Fil. 4:5.

YIHOWA CINCAHO

10. Yihowa cincannoha ikkasi leellishinohu hiitte doogganniiti?

¹⁰ Naaxxanno manni mito coye cince agarannokkita huwatoottoha ikkara dandaanno. Naaxxa insa cincitannokkire ikkitanno gede assitannonsa. Cincate taalle noosikkihu Yihowa insawiinni lowo geeshsha baxxinoho! Lawishshaho, Nohi yannara Yihowa bushuulle hunara albaanni 120 diro agarannota kulino. (Kal. 6:3) Tini, Nohi oososi lossiꞌratenna maatesi kaaꞌlitannasi markaawe loosanno yanna afiꞌranno gede assitinosi. Gedensoonni Yihowa sokkaasinchi Abirihaami Soddoomunna Gomooru bao daafira xaꞌmanna cince macciishshino. Naaxxanno mancho ikkoommero, ‘Kuri xaꞌmuwa xaꞌmattoehu ati ayeti!’ yaara dandaanno. Kayinni kuni sokkaasinchi Yihowa gede Abirihaami cince macciishshino.—Kal. 18:20-33.

11. Layinki Pheexiroosi 3:9 kultanno garinni Yihowa xaa yannara cince noohu mayraati?

¹¹ Yihowa umosi heeshshi asse xaa yannarano cincannoha ikkasi leellishanni no. Isi goofimarchu daannoti hirqino yanna iillita geeshsha cince agare no. Isi cincinohu mayraati? “Baalunku maaro eara ikkinnina ayino baꞌꞌara hasiꞌrannokki daafiraati.” (2 Pheexiroosi 3:9 nabbawi.) Yihowa cinca mulla daafurootini? Deeꞌni! Lowo miliyoone ikkannohu dancha wodanu dooꞌꞌo noonsa manni isiwa shiqino. Qoleno wolu lowo miliyoone ikkanno manni isiwa shiqanno yine hexxineemmo. Kayinni Yihowa cinca gawalo noote. Yihowa manna baxanno; ikkirono mannu hasiꞌri gede ikkanna wore dilaꞌꞌanno. Isi bushuullu hegerera heedhara difajjanno.—Imb. 2:3.

12. Yesuusi cincatenni Annisi lawishsha haꞌrunsinohu hiittoonniiti?

¹² Yesuusi Annisi lawishsha haꞌrunsino. Lowo kume ikkanno diro Yesuusi cincatenni Annisi lawishsha haꞌrunsino. Isi Sheexaanu Yihowanna ammanamino manni suꞌma hunanna laino. (Kal. 3:4, 5; Iyo. 1:11; Aju. 12:10) Qoleno Yesuusi mannaho konneeti yine kula dandiinannikki qarri iillanna laino. Hanni isi “Daawuloosi looso [diigate]” mageeshshi geeshsha quqquxaminoro hedi! (1 Yo. 3:8) Yesuusi Daawuloosi looso woꞌmunni woꞌma diigate Yihowa hirqino yanna iillita geeshsha cince agaranno gede kaaꞌlinosiri maati? Tennera kaaꞌlinosihu mittu coy umosi heeshshi assannoha ikkasiiti; isi goofimarchu daanno yanna murannohu Yihowa ikkinota afino.—Soq. 1:7.

13. Yesuusi rosaanosi cincinohu hiittoonniiti? Mayra?

¹³ Yesuusi uullate aana noo yannara soqqamaasinesino cincino. Lawishshaho Soqqamaasinesi, ‘Ninke giddo roorannohu ayeti?’ yitanni higge higge heewisantu yannara hexxo mudhe insa diagurino. Hatteentenni isi insa cince kaaꞌlinonsa. (Luq. 9:46; 22:24-27) Isi insa soorrante biddi yitannota addaxxino. Ati duucha higge togoo soꞌro loosse egennootto? Hatto ikkiro, umosi heeshshi assannohunna cincanno Moote noohe daafira digalaxxatto?

14. Albinni roore cincineemmore ikka dandiineemmohu hiittoonniiti?

¹⁴ Yihowa lawishsha haꞌrunsa dandiineemmohu hiittoonniiti? “Kiristoosi hedo” heedhannonke gede assiꞌnummoro hendeemmorinninna assineemmorinni Yihowa lawishsha haꞌrunsa dandiineemmo. (1 Qo. 2:16) Kiristoosi hedo albinni roore huwata dandiineemmohu hiittoonniiti? Tenne assa dandiineemmo doogga giddo mitte Qullaawu Maxaafi giddonni Yesuusi heeshsho daafira kultanno xagge ganyine nabbawate. Hakkiinni nabbamboommo xagge Yesuusi hedo leellishshannohu hiittoonniitiro hiincate yanna gaaꞌma hasiissannonke. Qoleno Yesuusi gede umonke heeshshi assineemmorenna cincineemmore ikkineemmo gede kaaꞌlankera Yihowa huucciꞌra hasiissannonke. Kiristoosi hedo heedhannonke gede assiꞌnummoro, ninkeneetono ikko ammanate roduuwanke cincate albinni roore Yihowa lawishsha haꞌrunsa dandiineemmo.—Mat. 18:26-30, 35.

YIHOWA UMONSA HEESHSHI ASSITANNORE AYIRRISANNO

15. Yihowa Faarso 138:6 kulloonnire assinohu hiittoonniiti?

¹⁵ Faarso 138:6 nabbawi. Kalqe alamera Aliidi Magani afinonsare ikka jooguulleho lowo ayirrinyeeti! Hanni lowo diro Yihowa ayirrisinonsahu woffi yiinohu mitu manni lawishsha laꞌno. Konni manni giddo mitu hakkeya qaanganniha nafa diꞌꞌikkino; kayinni insa xagge Yihowa Qullaawu Maxaafi giddo borreessinanni gede assino. Yihowa ammanate annuwa yannara heedhinote qaaqquulle awuuttannote Deboora yinanni mancho suꞌma Muse Qullaawu Maxaafi giddo borreessanno gede assino. Ise Yisihaaqinna Yaaqoobi maate giddo ammanante 125 diro soqqantino! Tini ammanantino mancho hakkeya lowo manni afinokkita ikkiturono Yihowa tini mancho mageeshshi geeshsha baxantinota ikkitinoro anfanni gede assate Qullaawu Maxaafi giddo borreessiisino. (Kal. 24:59; 35:8) Lowo diri gedensaanni Yihowa geꞌreewo allaalanno beetto Daawiti Israeelete moote ikkanno gede assino. (2 Sa. 22:1, 36) Yesuusi ilamihunni shiima yanna gedensaanni saada allaaꞌlite noori albillitte Buuramino Moote ikkannohu Beeteliheemete ilaminota umo affanno gede asse ayirrisinonsa. (Luq. 2:8-11) Maariyaaminna Yooseefi Yesuusa qullaawu minira abbitu yannara, geedhitinori Simiooninna Haanna Beettosi Yesuusa badde affanno gede asse Yihowa ayirrisinonsa. (Luq. 2:25-30, 36-38) Addanko Yihowa ‘woꞌmunkura aliidiha ikke heeꞌrenni jooguulle towaatanno!’

16. Yesuusi woloota amadino gari Annisi lawishsha haꞌrunsinota leellishannohu hiittoonniiti?

¹⁶ Yesuusi Annisi lawishsha haꞌrunsino. Annisi gede Yesuusi umonsa heeshshi assanno manna ayirrisino. Isi ‘roso rossinokkiriranna mulla manna ikkitinorira’ Maganu Gashshooti halaale rosiisinonsa. (Soq. 4:13; Mat. 11:25) Qoleno Yesuusi dhiwantinore hursino hattono dhibbansa hursa calla ikkikkinni ayirrisannonsata leellishannore assino. (Luq. 5:13) Yesuusi reyara albaanni noo hashsha soqqamaasinesi lekka hayishshe borojjichu loosanno looso loosino. (Yoh. 13:5) Qoleno isi iimira haꞌrara albaanni baalanti umonsa heeshshi assitanno haꞌrunsaanosi xaano ikko albillitte ayeno loosara dandaannokki looso yaano mannu hegere heeshsho afiꞌranno gede kaaꞌlate looso loossanno gede asse ayirrisinonsa.—Mat. 28:19, 20.

17. Woloota ayirrisa dandiineemmohu hiittoonniiti? (Misileno lai.)

¹⁷ Yihowa lawishsha haꞌrunsa dandiineemmohu hiittoonniiti? Budinsa, daninsa woy rosu deerrinsa ikkihano ikkiro macciishshannonke mannira baalaho dancha duduwo kulle manna ayirrinseemmo. Noonke dandoo woy qoosso ikkitutano ikkituro, ammanate roduuwinke ninkenni roortannohu gede assine hende insa ayirrinseemmo. (Fil. 2:3) Umonke heeshshi assine tennenna wole doogganni ‘mimmito ayirrisate umire’ ikkinanna laꞌꞌanno woyte Yihowa hagiidhanno.—Rom. 12:10; Sof. 3:12.

18. Umo heeshshi assate Yihowa lawishsha haꞌrunsa hasiꞌrattohu mayraati?

¹⁸ Umonke heeshshi assate baxillaanchu iimi Anninke lawishsha haꞌrunsate sharrammeemmo woyte, albinni roore huxuxxi yinikki shinqannire, quwa saꞌneemmokkirenna cincineemmore ikkineemmo. Qoleno Yihowa gede woloota ayirrinseemmore ikkineemmo. Umosi heeshshi assanno Maganinkewa albinni roore shiqate assineemmori, ninke mittu mittunku isi albaanni albinni roore muxxe ikkineemmo gede assonke!—Isa. 43:4.