Sargekki Yihowara Ayirrinye Abbitanno Gede Assiꞌra Dandaatto Gara

1-2. Yihowa sarge ma garinni laꞌꞌanno?

ADHAMATE qixxaabbe nootto? Hatto ikkiro hawalle hagiidhootto! Sargete barrira qixxaabbanna loosu batiꞌrinoheha ikkara dandaanno. Yihowa sargekkia barranna hakkuy gedensaanni galtekki ledo hagiirraamo ikkite heeꞌrattora hasiꞌranno.—Law. 5:18; Frf. 3:11.

² Sargekki Yihowa ayirranno gede assitannota ikka hasiissannose. Hatto yineemmohu mayraati? Qoleno Yihowa ayirranno gede assa dandaattohu hiittoonniiti? Konne birxicho qixxeessinoonnihu adhamate qixxaabbanni noorira ikkirono, konni birxichira kulloonnihu xintu seeri sarge haꞌneemmorinna adhantannore kaaꞌlineemmori baalunku Yihowa ayirranno gede assa dandiineemmo gede kaaꞌlannonke.

YIHOWA AYIRRANNO GEDE ASSA HASIISSANNOHEHU MAYRAATI?

3. Sargensara qixxaawanno Kiristaani maa heda hasiissannonsa? Mayra?

³ Sargensara qixxaawanno Kiristaani Yihowa Qaalisi giddo kulinohu xintu seeri ledo sumuu yaannore doodha hasiissannonsa. Mayra yiniro, adhama xintinohu Yihowati. Umi minaanninna minaama yaano Addaaminna Heewani adhantanno gede assinohu isooti. (Kal. 1:28; 2:24) Hakko daafira sargete qixxaabbannori roorenkanni Yihowa hedo illachisha hasiissannonsa.

4. Adhantannori sargensa barra Yihowa ayirrissanno gede assannonsari maati?

⁴ Sargekki barra Yihowa hedo illachishatto gede assannohehu ikkadu korkaati no: Yihowa iimi Annakkiitinna muli jaalakkiiti. (Ibi. 12:9) Jaaloomikki kaajje heeꞌrara hasiꞌrattoti dihuluullissannote. Sargekki barra woy wole barra jaalakki xissiisannohu aye coyno ikkara horo dihasiꞌratto. (Fa. 25:14) Yihowa assinoheha mitto mittonka coyenna isi albillitte assannohe coye hedittoro, sargekki isi ayirranno gede assitannota ikka hasiissannose yiniro sumuu diyaatto?—Fa. 116:12.

YIHOWA AYIRRANNO GEDE ASSA DANDAATTOHU HIITTOONNIITI?

5. Sargensara qixxaabbannore Qullaawu Maxaafi kaaꞌlannonsahu hiittoonniiti?

⁵ Qullaawu Maxaafi Kiristaanu sarge hiittoota ikka hasiissannosero mitto mittonka coye dikulanno. Adhantannori angansa assitu deerrinni, budinsanna doodhitanno coy garinni sargensara qixxaawa dandiitanno. Qoleno addu Kiristaani Qeesaari fushshino seera ayirrisanno. (Mat. 22:21) Ikkirono Qullaawu Maxaafihu xintu seeri garinni qixxeessinoonni sarge Yihowa ayirranno gede assitanno hattono iso hagiirsiissanno. Ikkina heda hasiissannohehu xintu seeri hiikkonneeti?

6. Adhantannori adhamansa higge affinota ikkitanno gede assiꞌra hasiissannonsahu mayraati?

⁶ Higge hajajjannore wonshi. (Rom. 13:1, 2) Roore gobbara adhantannori balaxxe wonsha hasiissannonsahu higge fushshitino seeri no. Adhantannori insa heedhanno gobbara gashshootu fushshino seeri hiikkonneetiro afa hasiissannonsa. Tenne assinanni gara afa hoogittoro kaaꞌlitannohe gede songote cimeeyye kaaꞌlo xaꞌmirate hobbi ruxxi yitooti.b

7. Sarge hagiirsiissannota ikkitanno gede maa assa hasiissanno?

⁷ Sarge hagiirsiissannota ikkitanno gede assiꞌri. (1 Qo. 10:31, 32) Sargekki alamete ayyaani ikkikkinni Maganu ayyaani akatta leeltannota ikkitanno gede assiꞌrate sharrami. (Gal. 5:19-26) Qullaawa Borro umimmate daafira kultannohu xintu seeri garinni idaychoho sarge hagiirsiissannotanna amanyootu noota ikkitanno gede assate qeechi noosi. Sarge togoota ikkitanno gede kaaꞌlannori maati? Baxillunni, iibaddo giddonninna ayirrinyu noo garinni shiqinshanniti Qullaawu Maxaafi aana xintantinoti adhantannorira shiqqanno lallawo, macciishshanno manni Maganu qixxeessinota adhamate qixxaawo albinni roore naadanno gede assitanno. Qoleno tini lallawo sarge dayno manni baalu adhama mulluri gede assine laꞌnannita ikkitinokkita albinni roore huwatanno gede kaaꞌlitanno. Hakko daafira rooru Kiristaani dandaamannoha ikkiro, sargensara lallawo Gambooshshu Addaraashera shiqinshanni gede doodhanno. Lallawo gambooshshu addaraashera shiqinshahera hasiꞌrittoro balaxxe cimeeyyete biso borreessite xaꞌma hasiissannohe.

8. Sargekki Yihowa hagiirsiissannota ikkitanno gede assa dandaattohu hiittoonniiti? (Rooma 13:13)

⁸ Rooma 13:13 nabbawi. Sargisiꞌrate doodhoottoha ikkiro, sargekki alamete ayyaani noota ikkitannokki gede assa dandaattohu hiittoonniiti? “Jila jille ikkinannikkita ikka” yine tirroonniti Girikete afii yaatto, ago quwa sae aganna hashshu taalooti geeshsha muuziiqa fanne sirbano leellishshanno. Sargekkira agu heeꞌranno gede assattoha ikkiro quwa sae aganno manchi heeꞌrannokki gede assate balaxe qixxaawa hasiissannohe.c Muuziiqa fannanniha ikkiro, sarge dayno manni mimmitu ledo hasaawannota hoolannokki gede huuro bikkunni fana hasiissanno. Aye manchino gufiꞌrannokki gede fannanni muuziiqanna muuziiqu afiꞌrino sokka qorophite doori.

9. Adhantannori sargensawa wolootu insa daafira coydhanno hedo woy wolu boohaarshi daafira maa heda hasiissannonsa?

⁹ Sargekkira wolootu kiꞌne daafira mite hedo coydhanno? Fotta woy viidiyubba leellinshanni? Woy wolu gari boohaarshi heeꞌranno? Kuri coyibba duucha woyte sargete barri hambannikkiha ikkanno gede assitanno. Ikkirono, hakko assinanni coy dhaawannohoronna teꞌee buuxi. (Fil. 4:8) Ateneeto togo yite xaꞌmi: ‘Hakko assinanni coy woloota ayirrinsannita leellishanno? Adhama ayirrinsannita leellishanno?’ Wolu baalunkunni roore ateneeto togo yite xaꞌmi: ‘Hakko assinanniri Yihowa ayirranno gede assanno?’ Mite haariimo qarra afidhinokkita ikkitara dandiitanno; ikkirono busha yorto kakkaysannoha gara ikkinokkiha aye coyeno coyiꞌra qorophi. (Efe. 5:3) Kiꞌne daafira mite hedo coyiꞌrannohu miniꞌne manninna jaallaꞌne kiꞌne hasatto affinoronna ayirrissannoro buuxidhe.

10. Adhantannori sargensa bikkunnita assiꞌrate balaxe qixxaawa hasiissannonsahu mayraati? (1 Yohaannisi 2:15-17)

¹⁰ Sargeꞌne bikkunnita assidhe. (1 Yohaannisi 2:15-17 nabbawi.) Yihowa soqqamaanosi mannu insa illachishanno gede assantenni isi ayirranno gede assate sharrantanna laꞌꞌanno woyte lowo geeshsha hagiidhanno. Hakko daafira bikku heeshsho heeꞌranno Kiristaani woxe afimalsanna ‘afiꞌrinore leellishiꞌra’ qorophanno. Sargekki bikkunnita assiꞌra kaaꞌlitannohehu hiittoonniiti? Hanni Noorweyete heeꞌrannohu Mayki yinanni rodii woꞌnaalsha laꞌno. Isi togo yiino: “Asalu giddora dieꞌnoommo hattono suwisaano ikkine soqqama diagurroommo. Sargenke bikkunnita ikkiturono baxissannotenna hambannikkite.” Hindete heedhannoti Taabita yinanni rodoo togo yitino. “Lowo yaaddonni gantoommo. Sargenke bikkunnita assiꞌnoommo daafira lowo yaaddonni gantoommo hattono maatenke ledo afoo arrawo dibaꞌnoommo.”

11. Idaychonna idaychu bikkunni uddiranna seesa dandaannohu hiittoonniiti? (Misillano lai.)

¹¹ Sargekkira hiittoo uduunne uddiꞌrattoro doodhootto? Lowo geeshsha biifa hasiꞌrattoti dihuluullissannote. Hundi yannara nafa idaychonna idaychu uddiꞌrannonna seesanno gara seekke hedanno. (Isa. 61:10) Hige sargekkira uddiꞌratto uduunni wole yannara uddiꞌratto uduunninni mito geya baxxannoha ikkara dandaanno; ikkirono bikkunni seesa hasiissannohe. (1 Xi. 2:9) Sargekkira qaru coy uduunne woy wole maalaamittete coye ikkara wodhitooti.—1 Ph. 3:3, 4.

12. Adhantannori qooxeessinsara rosaminoha Qullaawa Borro ledo sumuu yaannokkiha sargete bude giwa hasiissannonsahu mayraati?

¹² Qullaawa Borro ledo sumuu yaannokki bude giwi. (Aju. 18:4) Sheexaanu alamera noohu sargete budi kaphu maganna, agaanintete loosinna haafu ammana ledo xaadooshshe afiꞌrinoho. Yihowa togoohu battaawino coywiinni xeertiꞌneemmo gede xawise qorophisiisinonke. (2 Qo. 6:14-17) Qooxeessikkira noohu mitu budi woy rosichi Yihowa hagiirsiisannohoronna teꞌee huluullamittoro, dancha doorsha doodhatto gede kaaꞌlitannohe mashalaqqenna Qullaawu Maxaafiha xintu seera afiꞌrate borruwanke seekkite xiinxalli.

13. Adhantannori uynanninsa afansha lainohunni Yihowate gedee hedo heedhannonsa gede assiꞌra dandiitannohu hiittoonniiti?

¹³ Ati heeꞌratto qooxeessira adhantinorira afansha aa rosantinote? Mittu manchi afansha aannohu angasi assitu deerrinniiti. Hige Kiristaanu aannore ikkanno gede jawaachinshoonninsa; tini qolte hagiirraamma ikkanno gede assitannonsa. (Law. 11:25; Soq. 20:35) Ikkirono, sarge daanno manni aate giddeeti noonke yee hedanno gede assa dihasiꞌneemmo; qoleno garire aa hoogguro insaneeto bushiishshanno gede assa dihasiꞌneemmo. Mannu aannonke afanshi ikkihano ikkiro, wodaninsanni baxe uyinke geeshsha galanteemmore ikkine Yihowa lawishsha haꞌrunsineemmo.—2 Qo. 9:7.

QARRA IKKANNORE QOROPHANNA QEELE SAꞌꞌA

14. Adhantannorira mitootaho qarra ikkannohu hiittoo coy tuncu yaannonsa?

¹⁴ Sargekki Yihowa hagiirsiissannota assiꞌrate qixxaawatto woyte, qarra ikkannori tuncu yaahera dandaanno. Lawishshaho, sargekki bikkunnita assiꞌra qarra ikkitahera dandiitanno. Selemooni Giddichora heeꞌrannohu Chaarli yinanni rodii togo yiino: “Sargenkera aye koyinse aye agurreemmore doora qarra ikkitinonke. Lowo jaalla noonke; budinkera qole baalunku manni koyinsansara hasiꞌranno!” Aleenni kulliti Taabitano togo yitino: “Heeꞌreemma qooxeessiꞌra sargete lowo manna koysa rosantinote. Xibbu manni geeshsha calla koysate hendoommota anninkeranna amankera kullummota ammane adhate yanna hasiissinonsa.” Hindete heedhannoti Saara yinanni rodoo togo yitino: “Mitu manni maccaha ikka lowori gede asse laꞌꞌanno. Wosiillaꞌya ooso hoola yinoonni sarge assidhino; hakko daafira anino hakkiinni saꞌino sarge assiꞌra hasiissannoehu gede asse hedoomma.” Togoohanna wole fonqolo ikkannohe coye qeela dandaatto gede kaaꞌlannoheri maati?

15. Sargete qixxaabbannori huuccatto assiꞌra hasiissannonsahu mayraati?

¹⁵ Sargete qixxaawatto woyte woꞌmanka woyte huuccatto assiꞌri. Iillanni nooheha aye coyeno woy giddokkita fushshite Yihowara hasaaphi. (Fil. 4:6,7) Dancha doorsha doodhatto gede, yaadatto woyte wodanaaꞌmatto gedenna hasiissannohe yannara worba ikkatto gede kaaꞌlahera Yihowa huucciꞌra dandaatto. (1 Ph. 5:7) Yihowa ate daafira yee qaafo adhanna laitto kiiro, albinni roore iso addaxxatto. Aleenni kulliti Taabita togo yitino: “Baxillaanchiꞌyanna ani mimmitinke ledonna maatenke ledo sumuu yaa qarra ikkitannonke yine yaandoommo. Hakko daafira sargenke daafira hasaambeemmo yannara huuccattotenni hananfeemmo. Yihowa kaaꞌlannanke laꞌnoommo hattono mimmitinkenna maatenke ledo sumuu yinoommo.”

16-17. Sargete qixxaambanni woyte dancha gede hasaawa kaaꞌlitannohu hiittoonniiti?

¹⁶ Xawissine hattono hayyotenni hasaabbe. (Law. 15:22) Lamunku mitteenni sargeꞌne daafira duucha doorsha doodha hasiissannoꞌne. Lawishshaho, sargeꞌne barra, fushshitinanni woxe, Ayeoo koyissinannironna wole batinye coye hasaawa hasiissannoꞌne. Mitto coye assitinara albaanni nooꞌne doorsha mitteenni hasaabbe; hattono Qullaawu Maxaafiha xintu seeranna gikki yiino Kiristaanchi aannoꞌne amaale loosu aana hosiissinanni gara hasaabbe. Hasattoꞌne daafira maateꞌne ledo hasaabbinanni woyte shaqqadda, quwa saꞌinannikkirenna hasiisanno woyte heddinoonnire agurtinannire ikke. Miniꞌne manni lawishshaho, anniꞌnenna amaꞌne asse yitannoꞌneri quwa saꞌꞌannokkire ikkiro insa yitinore assate woꞌnaalle. Hatti yanna insarano baxxitinote. Insa yitinoꞌnere assitinannikkiha ikkiro, hatto assa hasidhinoonnikkihu mayraatiro hayyotenni kullensa. (Qol. 4:6) Qara hasattoꞌne Yihowa hagiirsiissanno sarge assiꞌra ikkitinota maateꞌnera xawissine kullensa.

¹⁷ Roorenkanni anniꞌnenna amaꞌne Yihowa Farciꞌraasine ikkitinokkiha ikkiro, doorshaꞌne insara kula qarra ikkitaꞌnera dandiitanno; ikkirono qinaannoꞌne. Hindete heeꞌrannohu Santoshi yinanni rodii togo yiino: “Maatenke addi addiha Hindete bude haꞌrunsinammora hasidhino. Aninna baxillaanchoꞌya doodhinoommore insara xawinse kullanni lowo yanna gundoommo. Yihowa dadillisannoha diꞌꞌikkino yine hendeemmoha insa yitinoha mito coye assate sumuu yinoommo. Lawishshaho, insa heedhara hasidhannota mite sagale qixxeessinanni gede assinoommo; hattono insa budira rosaminokkire ikkino daafira faarso woy sirbu heeꞌrannokki gede assinoommo.”

18. Sargeꞌne qinaabbinota ikkitanno gede kaaꞌlannoꞌneri maati? (1 Qorontoosi 14:40) (Misileno lai.)

¹⁸ Seekkitine qixxaabbe. Qinaabbinoonnire ikkitiniro, sargeꞌne barra yaachishannoꞌneri ajanno. (1 Qorontoosi 14:40 nabbawi.) Tayiwaanete heeꞌrannohu Waani yinanni rodii togo yiino: “Sargenkera boodu barri gate heeꞌreenna sargenkera kaaꞌlamate insaneeto shiqishshinori ledo gambooshshe assiꞌnoommo. Maa assate hendoommoro hasaamboommo hattono sargenke qinaabbinota ikkitanno gede mito coye balanxe rosiisiꞌnoommo.” Baalanka coye yannasira assate dandiitinire assanꞌe dayno wosina ayirrissinannita leellishshanno.

19. Sargeꞌne amanyootu noota ikkitanno gede assiꞌrate kaaꞌlannoꞌneri maati?

¹⁹ Balaxe qixxaawaꞌne kalaqamannoha lowo qarra gatissara dandiitanno. (Law. 22:3) Lawishshaho, qooxeessiꞌnera mannu sargete koyinsikkinni daa rosantinota ikkituro, togoori kalaqamannokki gede maa assa dandiitinanniro balaxxine hedde. Yihowa Farciꞌraasine ikkinokki fiixiꞌnera assinanniha mito coye kullensa hattono mitu sargete budi daafira nooꞌne lao xawissensa. JW.ORG aana nooha “Yihowa Farciꞌraasine Sargewa Maa Maa Assinanni?” (Amaaru Afoo) yaanno birxicho kultinansara dandiitinanni. Sargeꞌne qinaabbinota ikkitanno gede mittu gikki yiino rodii ‘jilu murricha’ ikkanno gede asse. (Yoh. 2:8) Isira sargeꞌne daafira xawissine kultinannisiha ikkiro, sargeꞌne amanyootu nootanna heddinoonnite gedeeta ikkitanno gede kaaꞌlaꞌnera dandaanno.

20. Adhantannori sargensa daafira maa qaaga hasiissannonsa?

²⁰ Sargeꞌnera qixxaawate assitinanni coye baala heddinanni woyte, lowo geya yaaddinanniha ikkara dandaanno. Ikkirono sarge assidhinannihu mitto barra calla ikkinota qaagge. Kuni Yihowa soqqamaano ikkitine mitteenni hagiirru noo heeshsho heeꞌra hanaffinanniho umi barraati. Sargeꞌne bikkunnitanna amanyootu noota assiꞌrate dandiitinire baala asse. Yihowa addaxxe. Yihowa biddissa haꞌrunsitinanniha ikkiro, albillitte sargeꞌne daafira heddinanni woyte hagiidhitinanninna gaabbitinannikkita qinaabbino sarge assiꞌra dandiitinanni.—Fa. 37:3, 4.