Muse Xooqinohu Mayiraati?

MUSE Gibitsete gobbanni xooqanna lai. Kuneeti iso shorranni noo manna laitto? Insa Muse shitara hasidhinohu mayiraatiro afootto? Mayiraatiro hanni laꞌno.

Muse Gibitsete nugusi Feeriooni qaera lophphino. Qoleno hayyichchanna bayira mancho ikki. Muse sirchisi Gibitsete manna ikkinokkitanna ayiddisi Isiraeelete manni borojje ikkansa afino.

Muse 40 diro ikkisita mitto barra, ayiddisi noo gara laꞌꞌara hasiꞌri. Insa noo gari lowo geeshsha mararsannoho. Muse, mittu Gibitsete manchi mitto Isiraeelete borojjichcho gananna lai. Muse kawa kaꞌa lae lainohu nookkita afiti, Gibitsete mancho gani; manchuno reyi. Hakkiinnino Muse reeshsha shaafu giddo maaxi.

Layinki barra Muse ayiddesi laꞌꞌara layinkimeeshsho fuli. Dagasi borojjimmatenni fultanno gede kaaꞌlara hasiꞌrino. Ikkollana lamu Isiraeelete manni giwantanna lae, soꞌro loosinoha, ‘Rodookki mayira gantanni nootto?’ yii.

Manchuno, ‘Ate ninkera aliidihanna daanynya ayi assihe? Gibitsete mancho shiitto gede aneno shaa yorootto?’ yii.

Muse tenne macciishshiti waajji. Gibitsete mancho shiinota mannu afinota afi. Feerioonino tenne macciishshe, Muse shaara manna soyi. Muse Gibitsetenni xooqinohu iseraati.

Muse Gibitsetenni fulihu gedensaanni, xeertowa Miidiyaami yinanni gobba haꞌri. Hakkiichchono Yootoori yinanni manchi maate ledo xaadi, seennisi giddo Sippaara yinannita adhi. Qoleno Muse Yootoori gereewo allaalannoha ikki. Miidiyaami gobbara 40 diro heeꞌri. Xa isira 80 diro ikkinosi. Mitto barra Muse Yootoori gereewo allaale heeꞌreenna heeshshosi woꞌma soorritino maalale kalaqantu. Aananno qoola fanteenna, tini maalale maatiro hanni laꞌno.