Buwanno Cita

MUSE gereewisira hayisso hasiꞌranni Korebi ilaali geeshsha haꞌri. Hakkiichchono buwanno cita lai, ikkollana citu digiiramino!

Muse, ‘Kuni hiikkinoreeti’ yee hedi. ‘Shiqqi yee seekke laeemmo’ yii. Shiqqi yii wote, citu giddonni fultino huuro togo yitusi: ‘Kowiira shiqqi yitooti. Kaxxootto uulla qullaawa ikkitinohura caammakki fushshi.’ Musera sokkaanchu widoonni coyiꞌranni noohu Maganoho. Konni daafira Muse albasi gugguꞌli.

Maganu togo yiisi: ‘Gibitsete heeꞌranno manniꞌya qarra laoommo. Borojjimmatenni fushshammonsaraati, Konni daafira ate hakka soyeennahe Gibitsete gobbanni mannaꞌya massagge fushshato.’ Yihowa mannasi Kanaꞌꞌaanni yinannita dancha gobba massansaraati.

Muse kayinni, ‘Massage fushsheemmohu ani ayeeti? Ani gariha diꞌꞌikkoommo. Haꞌre fulle yuummoro nafa, Isiraaeelete gosa, “Ayi soyinohe?” yitannoe. Hakkawote mayyeemmo?’ yii.

Maganu qole, ‘Togo yaattonsa’ yiisi. ‘“Abirahaami Magani, Yisaaqi Magani, Yaaqoobi Magani YIHOWA soyinoe” yiinsa.’ Ledeno Yihowa, ‘Hegererano suꞌmiꞌya konneeti’ yiisi.

Museno, ‘Ati soottoeta kuleennansa ammana gibburonaa?’ yii.

Maganu Muse, ‘Angakkira noohu maati?’ yiisi.

Museno, ‘Siqqote’ yii.

Maganuno, ‘Uullara tugi’ yiisi. Muse siqqosi uullara tugita, siqqo hamashsho ikkitu. Yihowa xaano Musera wole maalale leellishisi. Togo yiisi: ‘Angakki kikkiꞌlakki giddora eessi.’ Muse angasi kikkiꞌlatenni fushshita kaadete gedee waajjo ikkitino! Anga xiigaho yinannihu bushu xibbi amadinohu gede ikkitu. Aanteteno Yihowa Musera wole sayikki maalale assanno gede wolqa uyisi. Gedensaannino, ‘Tenne baala maalale assatto wote, Isiraeelete gosa ani soommoheta ammantanno’ yiisi.

Hakkunni gedensaanni Muse minira haꞌre Yootoori, ‘Gibitse haꞌre fiixiꞌya noo gara layireemmona fajjie’ yii. Yootoorino Muse keerunni yeenna, Muse Gibitse haꞌri.