Maganu Qaale Horoonsidhe Heeshsho Noohona!
“Maganu qaali heeshsho noohonna wolqa afiꞌrinoho.”—IBI. 4:12.
1, 2. Yihowa Musera mayi looso uyinosi? Isi mayyee jawaachishinosi?
HANNI Maganu mannira yite alamete aana baalanka roortanno silxaane noosi gashshaancho coyishiishattora kaoottohu gede assite hedi. Hakkawote mayi macciishshamannohe? Lowo geeshsha yaadattora, ateneeto ajishshe laꞌꞌattora hattono waajjattora dandaatto. Marte yaattore qixxaawattohu hiittoonniiti? Coyiꞌratto qaali duuchanka dandaanno Magani soyinoheta leellishannoha wolqa noo qaale ikkanno gede maa assa dandaatto?
2 Musera togoo coyi tuncu yiinosi woti no. Yihowa, “uullate aana noo manni baalunkunni roore shooshaqa” ikkinoha konne mancho mannasi Gibitsete borojjimmanni fushshanno gede Feriooniwa soyasira kainota kulisi. (Zeh. 12:3) Feriooni qole bushahonna naaxxaleessa manchooti. (Wol. 5:1, 2) Ikkirono, Yihowa Feriooni haammata miliyoone ikkanno borojjesi gobbasinni fulara fajjara Muse mare hajajara hasiꞌrino! Muse Yihowara togo yaasi dhagge assiꞌnannita diꞌꞌikkitino: “Feriooniwa mareemmohunna Isiraeele Gibitsetenni fushsheemmohu ani ayeti?” Muse isonooto ikkado ikkinokkihunna dandoo noosikkihu gede asse hedino. Ikkirono, Yihowa iso callichosi agurannosikkita kule jawaachishinosi. Togo yiinosi: “Ani ledokki ikkeemmo.”—Wol. 3:9-12.
3, 4. (a) Muse waajjino coyi maati? (b) Musete gedee hedo macciishshantannohe gede assannori maa ikkara dandaanno?
3 Muse waajjinori maati? Isi, Feriooni Maganu Yihowa soyino sokkaanchi yaannore dimacciishshanno woy dinaadannoe yee waajjino. Qoleno, mannisino Gibitsetenni fushshannonsa gede Yihowa iso shoominota ammana giwanno yee waajjino. Hakko daafira Muse Yihowara togo yiino: “Insa ammana gibbaeranna ‘Yihowa dicoyishiishinohe’ yite qaaleꞌya adha gibbara dandiitanno.”—Wol. 3:15-18; 4:1.
4 Hakkawote Yihowa Musera qolino dawaronna hakkiinni aante ikkitino coyibba kaajja roso rosiissannonke. Ninke Muse gede lowo silxaane noosi manchi albira shiqa hasiissannonkekkiha ikkara dandaanno. Ikkirono, hakkeeshshi geeshsha baxxino ayirrinyi noonsakki mannano ikkiro Maganunna Mangistesi daafira kula waajjishshannohe? Hanni Muse xaggenni maa ronseemmoro laꞌno.
“ANGAKKI NOOHU MAATI?”
5. Yihowa Muse anga maa worino? Tini waajjasi qeeꞌlanno gede kaaꞌlitannosihu hiittoonniiti? (Umi misile lai.)
5 Muse coyiꞌreemmore naadannohu diheeꞌranno yee waajjinota kuli yannara, tuncu yaannosi coyira qixxaawanno gede Maganu kaaꞌlinosi. Wolaphote maxaafi togo yaanno: “Yihowa [Muse], ‘Angakki noohu maati?’ yee xaꞌmisi. Isino, ‘Siqqote’ yee qoli. [Yihowa,] ‘Uulla tugi’ yiisi. Isino uulla tugi, hakkiinni hamashsho ikkitu; Museno mulinni xooqi. Yihowa Muse, ‘Angakki diriirsite farro amadi’ yiisi. Isino angasi diriirse amadi, hakkiinni angasi aana siqqo ikkitu. Maganu hakkiinni togo yii: ‘Kuni ikkinohu Yihowa coyishiishinoheta . . . insa ammantanno gedeeti.’” (Wol. 4:2-5) Ee, Yihowa Muse coyiꞌranno sokka Isiwiinni dagginota leellishshanno taje angasi worino. Heeshsho nookki siqqo Maganu wolqanni heeshsho noota ikkitino! Tini maalale Muse coyiꞌranno qaali wolqa nooha ikkanno gedenna Muse Yihowawiinni afiꞌrino silxaane noosiha ikkinota leellishshanno! Hakko daafira Yihowa isira togo yiinosi: “Maalale loosatto gede tenne siqqo anga adhite haꞌri.” (Wol. 4:17) Muse Maganu uyinosi silxaane noosita leellishshanno taje angasi noo daafira, waajjasi qeeꞌle halaalaancho Magano riqiwe mannisinna Feriooni albira shiqa dandaanno.—Wol. 4:29-31; 7:8-13.
6. (a) Sabbankeemmo yannara anganke heeꞌra hasiissannori maati? Mayira? (b) ‘Maganu qaali heeshsho noohanna’ ‘wolqa afiꞌrinoha’ ikkino gara xawisi.
6 Qullaawu Maxaafi sokka mannaho kulate fulleemmo wote, “Angakki noohu maati?” yitanno xaꞌmo ninkerano maltinote. Duucha wote horoonsiꞌneemmohu Qullaawa Maxaafaati. Mitu manni Qullaawa Maxaafa wole maxaaffanni baxxinori nookkihu gede asse hedannoha ikkirono, Yihowa ninkera soyino sokka amadino Qaaleeti. (2 Phe. 1:21) Qullaawu Maxaafi Maganu Mangistesi gashshooti yannara asseemmo yiinore kulannonke. Hawaariya Phaawuloosi togo yee borreessinohu iseraati: “Maganu qaali heeshsho noohonna wolqa afiꞌrinoho.” (Ibi. 4:12) Yihowa alaami noowa gatinoha ikkikkinni albaage haꞌranni no; korkaatuno Yihowa alaamasi wonshate loosanni no. (Isa. 46:10; 55:11) Mittu manchi Yihowa Qaali daafira tenne huwatiro, Qullaawu Maxaafi giddonni nabbawannori heeshshosi danchu garinni soorrara dandaanno.
7. ‘Halaalu qaale garunni horoonsiꞌra’ dandiineemmohu hiittoonniiti?
7 Ee, Yihowa sabbankeemmo sokka halaalenna isiwiinni dagginota ikkitinota buuxisate kaaꞌlannonkeha borreessamino Qaalesi anganke worino. Phaawuloosi Ibiraawe Kiristaanira sokka borreessi gedensaanni, Ximootewosi qajeelsanni ‘halaalu qaale garunni horoonsiꞌrate dandaamisire baala assanno’ gede amaalinosi. (2 Xim. 2:15) Ninke tenne amaale harunsate maa assa dandiineemmo? Macciishshannonke manni wodana kakkayissannota Qullaawu Maxaafi giddonni balanxe qixxaamboommo xiqisubba nabbawa hasiissannonke. Lamu kuminna tonaa sasunni fultino tiraaktuwa tennera hende qixxeessinoonnite.
DANCHA GEDE DOORANTINO XIQISUBBA NABBABBE!
8. Mittu soqqanshote aliidi laꞌꞌaanchi tiraaktuwanke daafira mayino?
8 Haaro tiraaktuwa baalanti qixxaabbinohu mittu garinniiti. Konni daafira mitte horoonsiꞌneemmo gara anfummoro, baalanta hakko garinni horoonsiꞌra dandiineemmo. Tini tiraaktuwa horoonsiꞌrate injiitannote? Yunayitidi Isteetete Hawayi gobbara heeꞌrannohu mittu soqqanshote aliidi laꞌꞌaanchi togo yee borreessino: “Tini haaro tiraaktuwa minunni mine haꞌne ikko gudumaaleho soqqammeemmo soqqanshora togo kaaꞌlitannonketa umo dihuwantoommo.” Kuni rodii tiraaktuwa qixxaabbino gari mannu dawaro mitiiꞌmikki qolanno gede kakkayisannotanna tini qolte danchu hasaawi kaꞌꞌanno gede assitannota huwatino. Isi tiraaktuwate albiidi qoolira xaꞌmonna doorre qollanni dawaro heeꞌrase tennera lowonta kaaꞌlitanno yiino. Konnira qaete anni soꞌrammokka yee yaadikki noo dawaro giddonni doora dandaanno.
9, 10. (a) Tiraaktuwanke Qullaawa Maxaafa horoonsiꞌneemmo gede kaaꞌlitannonkehu hiittoonniiti? (b) Ati horoonsidhe dancha guma afiꞌrootto tiraaktuwa hiikkuriiti? Mayira?
9 Mitte mittenti tiraakte dancha gede doorantino xiqise nabbawate kaaꞌlitannonke. Lawishshaho, Qarrunna Shetto Heedhannokki Yanna Dagga Ikka? yitanno tiraakte laꞌno. Qaete anni tenne xaꞌmo qolate, “ee dagganno,” “didagganno” woy “daggarano hooggarano dandiitanno” yitannori giddo baxitano dooriro, aane noo qoola fante “Qullaawu Maxaafi yaannore lai” calla yaate. Hakkiinni Ajuuja 21:3, 4 nabbawi.
10 Hatteente gede, Qullaawu Maxaafi Mayi Maxaafaati Yaatto? yitanno tiraakte horoonsiꞌneemmo woteno qaete anni baxi dawaro doore qolara dandaanno. Wolere agurte aane noo qoola fante, “Qullaawu Maxaafi, ‘Qullaawa Borro baalanti Maganu ayyaani marraino manni borreessinote’ yaanno” yii. Hakkiinnino, “Tini xiqise yitannori kayinni konne calla diꞌꞌikkino” yaa dandaatto. Aanchite Qullaawa Maxaafakki fante 2 Ximootewosi 3:16, 17 gudisse nabbawi.
11, 12. (a) Soqqanshote yannara hagiirsiisannonkeri maati? (b) Tiraaktuwanke manna galagalle marre hasaawisate qixxaambeemmo gede kaaꞌlitannonkehu hiittoonniiti?
11 Qaete anni hasaawinseenna leellishanno akati, tiraaktete aaninni lende hasaambeemmo gede woy haranchunni agurreemmo gede assara dandaanno. Ikkihano ikkiro kayinni, tiraakte ela calla ikkikkinni Maganu Qaali yaannore nabbawa dandaanke hagiirsiissannonke. Umo xaaditto wote nabbawootto xiqise mitte woy lame calla ikkituro nafa, galagalte marte ledde hasaawisa dandaatto.
12 Tiraaktuwanke badhiidi qoolira “Hanni Konne Coye Hedi” yaannohu hunda galagalle marre hasaawinseemmo wotira qixxaabbino xaꞌmonna xiqisubba amaddino. Albillitte Heeshsho Hiittoota Ikkitannoha Lawannohe? yitanno tiraakte galagalle marre hasaawate qixxaabbinota, “Maganu tenne alame soorre woyyaabbino alame abbannohu hiittoonniiti?” yitanno xaꞌmo afidhino. Qoleno, Maatewoosi 6:9, 10 nna Daanieeli 2:44 qummi assinoonni. Reyino Manni Addinta Kaꞌꞌanno? yitanno tiraakte aana galagalle marre hasaawinseemmo wotira, “Geedhineemmohunna reyineemmohu mayiraati?” yitanno xaꞌmo qixxaabbino. Hakkonni Kalaqo 3:17-19 nna Roomu Sokka 5:12 no.
13. Qullaawu Maxaafi xiinxallo jammarsiisate tiraaktuwa horoonsiꞌra dandiineemmo gara xawisi.
13 Qullaawu Maxaafi xiinxallo jammarsiisate tiraaktuwanke buusa assitine horoonsidhe. Qaete anni tiraaktuwanke aana noo koodde iskaane assiro (woy nabbawisiisiro), Webisayitenke aana Qullaawa Maxaafa xiinxallanno gede koyisannosiri faꞌnamanno. Hakkiinni saeno, tiraaktuwanke Maganuwiinni Dayinoha Dancha Duduwo! yitanno biroshere egensiissanno, hattono birosherete giddonni mitto roso badde kultanno. Lawishshaho, Alame Gashshe Noohu Isi Ayeti? yitanno tiraakte hattee biroshere giddonni 5ki roso nabbambanni gede koyissanno. Maate Hagiirraame Assiꞌrate Kaaꞌlannohu Qaru Coyi Maati? yitanno tiraakte kayinni 9ki roso qummi assitanno. Tiraaktuwanke hende qixxeessinoonni garinni horoonsiꞌrakki, manna umono ikko galagalte marte hasaawisatto wote Qullaawa Maxaafa dancha gede horoonsiꞌrate kaaꞌlitannohe. Hakko garinni lowo manna xiinxallo jammarsiisa dandaatto. Soqqanshonke yannara Maganu Qaale garunni horoonsiꞌrate wolere maa assa dandiineemmo?
MANNAHO HULUULLE NOORE KAYISSINE HASAAWISSE
14, 15. Soqqanshonke yannara Phaawuloosi lawishsha harunsa dandiineemmohu hiittoonniiti?
14 Phaawuloosi soqqanshosi yannara “dandaami deerrinni lowo manni” hedo huwatate woꞌnaalanno. (1 Qor. 9:19-23) Phaawuloosi ‘Yihudootanna higgete hunda noore gatisate, hattono higge noonsakkirenna laafoota gatisate’ halcho noosita coyiꞌrino. Ee, isi “dandaami deerrinni mito manna gatisate yee, duuchunku gari manna” kaaꞌla hasiꞌrino. (Looso 20:21) Qooxeessinkera noohu “duuchunku gari mannira” halaale kulate qixxaambeemmo wote Phaawuloosi lawishsha harunsa dandiineemmohu hiittoonniiti?—1 Xim. 2:3, 4.
15 Lawishsha ikkannohu hasaawu bitimi aganu kiiro Maganu Mangiste Soqqanshonkera fulanno. Hakkoye horoonsiꞌrate woꞌnaali. Ikkollana qooxeessiꞌnera noo mannira dhiwannori wolere ikkiro, hakkoye kayisse hasaawisate hasaawu bitima qixxeessiꞌri. Tennera kaaꞌlannohe gede, heeꞌratto qooxeessire, hakko heeꞌranno mannirenna insara roore dhiwannonsa coye hedi. Hakkiinni, insara huluullitanno coyibba ledo sumuu yitanno xiqise hedi. Mittu woradu aliidi laꞌꞌaanchi isinna minaamasi Qullaawa Maxaafa horoonsidhanno gara kulanni togo yiino: “Haranchore coyiꞌneemmonna hedonke ranke xawinseemmo wote, roore qaete annuwa xiqise nabbambeemmota digibbanno. Qullaawa Maxaafanke fanne anga amande keere haaꞌnummo gedensaanni, xiqise nabbambeemmo.” Hanni killileꞌnera woꞌnaalattora dandaattoha qanchu soqqanshora horoonsiꞌneenna dancha guma abbinoha hasaawu umo, xaꞌmuwanna xiqisubba laꞌno.
Soqqanshokki yannara Qullaawa Maxaafanna tiraaktuwa seekkite horoonsidhanni nootto? (Gufo 8-13 lai)
16. Isayyaasi 14:7 soqqanshote horoonsiꞌra dandiineemmohu hiittoonniiti?
16 Dagoomu giddo duucha wote gaance kaꞌanno qooxeessira heeꞌrattoha ikkiro, hasaawisatto mancho togo yaattora dandaatto: “‘Uulla gudisidhe fooliishsho afidhino, keereno afidhino. Mannu hagiidhe ilili yaanni no’ yine dudumbanni barri daannoha lawannohe? Qullaawu Maxaafi Isayyaasi 14:7 aana hatto yaanno. Isinni Qullaawu Maxaafi Maganu albillitte abbannote salaame woꞌmitino yanna daafira lowore kulanno.” Hakkiinnino, tenne kultanno xiqisubba giddo mitte nabbawisi.
17. Hasaawu yannara Maatewoosi 5:3 horoonsiꞌra dandiineemmo gara xawisi.
17 Qooxeessiꞌnera lowo mannira looso afiꞌra qarra ikkitanno? Hatto ikkiro, hasaawa jammarate togo yaa dandaatto: “Mittu manchi minisi mannira hasiisannore wonshate mageeshshi woxe afiꞌra hasiissannosiha lawannohe?” Qolanno dawaro macciishshite kaꞌe togo yii: “Lowo manni hakkiinni roorino woxe afiꞌranno, kayinni mininsa manni xaano kassi diyiino. Hakko daafira, mannaho roore hasiisannori maa lawannohe?” Hakkiinni, Maatewoosi 5:3 nabbabbe kaꞌe Qullaawu Maxaafi xiinxallo jammaranno gede koyisi.
18. Manna sheshifachishate Faarso 37:11 horoonsiꞌra dandiineemmohu hiittoonniiti?
18 Qooxeessiꞌnera muli yannara kalaqamu dano iilliteenna mannu gawajjamino? Hatto ikkiro, togo yite hasaawa jammara dandaatto: “Dayoommohu sheshifachishanno qaale kulammoheraati. (Faarso 37:11 nabbawi.a) Tenne xiqise aana Maganu ninkera halchanno coyi maatiro huwatitto? ‘Keere,’ hattono ‘tashshi yaannonsa’ yaanno qaale wodanchi. Maganu ninke dancha heeshsho heeꞌnammora hasiꞌrannota afa didanchate? Ikkina hattoo heeshsho heeꞌra dandiinannihu hiittoonniiti?” Hakkiinni Dancha Duduwo yitanno biroshere giddonni tennera sumuu yaanno roso egensiisi.
19. Ammaꞌno ayirrisanno manni ledo hasaambeemmo wote Ajuuja 14:6, 7 horoonsiꞌra dandiineemmo gara xawisi.
19 Olliiꞌnera heeꞌranno manni ammaꞌno ayirrisanno gedeeho? Hatto ikkiro, togo yite hasaawa jammara dandaatto: “Sokkaanchu daye coyishiishoommehero yaannore macciishshatto? (Ajuuja 14:6, 7 nabbawi.b) Kuni sokkaanchi ‘Magano waajje’ yiino daafira, isi yiino Magani hiikkoyetiro afa hasiissannonkeha dilawannohe? Sokkaanchu ‘iimanna uulla kalaqinoha’ yaasi isi yiino Magani ayetiro afate kaaꞌlitannonke. Ati hakku Magani ayeti yaatto?” Hakkiinnino Faarso 124:8 nabbawisi; xiqise togo yitanno: “Iimanna uulla Kalaqaancho ikkinohu Yihowa suꞌmi kaaꞌlonkeeti.” Hakkiinni, Yihowa ayimma ledde xawisattosita kulisi.
20. (a) Mannaho Maganu suꞌmire rosiisate Lawishsha 30:4 horoonsiꞌra dandiineemmohu hiittoonniiti? (b) Ati tennera horoonsidhe dancha guma afiꞌrootto xiqise no?
20 Aja manna hasaawisate togo yaa dandaatto: “Lowo geeshsha hasiissanno xaꞌmo xaꞌmitannota mitte xiqise nabbaweemmohe. (Lawishsha 30:4 nabbawi.c) Kalaqaanchonke agurranna koye yinire asse afanno manchi nookkiti egennantinote.d Ikkina suꞌmasi afa dandiineemmo gari nooha lawannohe? Suꞌmasi Qullaawu Maxaafi giddonni kulammohera dandeemmo.”
MAGANU QAALI AFIꞌRINO WOLQA SOQQANSHOꞌNERA HOROONSIDHE
21, 22. (a) Dancha gede doorantino xiqise mannu heeshsho soorritara dandiitannohu hiittoonniiti? (b) Soqqanshokki yannara maa assate murcidhe kaootto?
21 Dancha gede doorantino xiqise mitto mancho mageeshshi geeshsha soorritara dandiitannoro afa didandiineemmo. Lawishshaho, Awustiraaliyaho lamu Yihowa Farciꞌraasinchi mitte aja beetto minira martu. Insa giddo mittu, “Maganu suꞌmi ayetiro afootta?” yee xaꞌmise; hakkiinni mitte xiqise calla yaano Faarso 83:18 nabbawise. Tini beetto togo yitino: “Lowo geeshsha mase sammi yee gatumma! Insa hadhu gedensaanni, kuni suꞌmi wole Qullaawu Maxaafi tiro giddono nooro buuxammara maxaaffate minira makeenunni 56 kiilomeetire haꞌrumma; hakkiinni mittu qaallate tiro amadino maxaafi giddo konne suꞌma laumma. Maganu suꞌmi Yihowa ikkinota ammanumma gedensaanni, kawoote afoommakkiri wolurino no yee hedumma.” Lowo yannano saꞌukki isenna ganaanni hige minaannase ikkino beetti Qullaawa Maxaafa xiinxalla jammari; insa gedenaanni hige cuuamino.
22 Maganu Qaali mannu heeshsho soorre biddi assate wolqa afiꞌrinoho. Mittu manchi Qullaawa Maxaafa nabbawannoha ikkiro, Yihowa coyiꞌrino qaalira kaajjado ammana heedhannosi. (1 Teselonqe 2:13 nabbawi.e) Mannaho wodana kakkayisate hende uminkenni coyiꞌneemmo qaali baalunkunni, Qullaawu Maxaafi sokka roore wolqa afidhino. Dandaaminke yanna baalantera Maganu Qaale horoonsiꞌra hasiissannonkehu iseraati. Addaho, Qaalisi heeshsho nooho!
a Faarso 37:11: “Jooguullu kayinni uulla ragidhanno; keeru woꞌmanno daafira lowo geeshsha tashshi yaannonsa.”
b Ajuuja 14:6, 7: “Hakkiinni wolu sokkaanchi iimi mereero buuwanna laummo; isira uullate aana heedhannorira duuchante dagara, gaꞌrera, afiiranna mannira duduwannohu hegerihu danchu duduwi noosi. Isi qoonqosi gotti asse togo yii: ‘Magano waajje, ayirrinyeno uuyyesi; korkaatuno isi firde faradanno saate iillitino; hakko daafira, iimanna uulla hattono baaranna wayi buꞌa kalaqinoha magansidhe.’”
c Lawishsha 30:4: “Iimira fulinohunna hakkiinni dirrinohu ayeti? Lamente angasi hoowira bubbe gamba asse amadinohu ayeti? Uddanosira waa kuuse amada dandiinohu ayeti? Uullate qasiro baalanta likke worinohu ayeti? Afoottoha ikkiro, isi suꞌminna beettisi suꞌmi ayeti?”
d Maaja 15, 1987 Agarooshshu Shaera (Ingilizete Afoo) qoola 31 aana fultinota “Nabbawaanote Xaꞌmo” lai.
e 1 Teselonqe 2:13: “Magano xaa xaa galanteemmohu iseraati; korkaatuno ninkewiinni macciishshitinoonniha Maganu qaale adhiti yannara mannu qaali gede ikkikkinni kiꞌne giddo loosanni noohu Maganu qaali gede assitine adhitinoonni; Maganu qaale ikkasi garankolla.”