Haaro Tiraaktuwanke Qixxaabbino Gari Kaajjaho!
1. Haaru garinni qixxeessinoonniti soqqanshote kaaꞌlitannonke borro hiikkuriiti?
1 “Maganu Qaali Halaaleho!” yaannohu 2013nnihu awuraajju gambooshshira, onte haaro tiraakte fultino. Qoleno, “Reyino Manni Addinta Kaꞌꞌanno?” yaannohu Mangistete Duduwi Kiiro 38, tiraaktuwate widira gaamamino. Kuri leenti tiraaktuwa qixxaabbino gari haarohonna kaajjaho. Tenne tiraaktuwa konni garinni qixxeessinoonnihu mayiraati? Minunni mine haꞌne soqqammeemmo wote, kuri tiraaktuwa dancha gede horoonsiꞌra dandiineemmohu ma garinniiti?
2. Tiraaktuwanke haaru garinni qixxeessinoonnihu maa hendeeti?
2 Haaru Garinni Qixxeessinoonni Korkaata: Danchu hasaawu bitimi roore wote aane nooha shoole dirima afiꞌranno: (1) Hasaawa jammarate kaaꞌlitanno xaꞌmo xaꞌmineemmo. (2) Xiqise nabbambe assaawe xawinseemmo. (3) Qaete annira nabbawanno borro uyineemmo. (4) Wole wote marre dawaro qolleemmo xaꞌmo xaꞌmine, qaxaro amandeemmo. Haaro tiraaktuwanke qixxeessinoonni gari, konne shoolenkare assate injaannonke gede kaaꞌlannonke.
3. Haaro tiraaktuwanke soqqanshote horoonsiꞌra dandiineemmohu ma garinniiti?
3 Horoonsiꞌra Dandiineemmo Gara: (1) Keere haadhini gedensaanni, tiraaktete aaniidi qoolira noota doorsha afidhino xaꞌmo leellishshine, qaete anni hedosi kulannoꞌne gede xaꞌme. (2) Tiraakte fantine, “Qullaawu Maxaafi Togo Yaanno” yaanno birxichiwa saꞌe. Dandaamiha ikkiro, hakko noo xiqise Qullaawa Maxaafa fantine nabbabbe. Qaete anni muddamannokkiha ikkiro, hakkuyira woroonni nooha, Qullaawu Maxaafi yaannore ammanasi uyitannosi kaaꞌlo kulanno gafa hasaabbe. (3) Tiraakte uyitinesi kaꞌine, gatino gafa wole wote nabbawanno gede jawaachishshesi. (4) Jeefote, badhiidi qoolira “Hanni Konne Coye Hedi” yaannohu hunda noo xaꞌmo leellishshine, Qullaawu Maxaafi hatte xaꞌmora qolanno dawaro hasaawate qaxaro amadde.
4. Manna galagalle marre hasaawinseemmo wote, haaro tiraaktuwanke horoonsiꞌra dandiineemmohu hiittoonniiti?
4 Galagale mare hasaawisano hakkeeshsha diqarrissanno. Gashshidhinoonni xaꞌmora dawaro qolate, tiraaktete badhiidi qoolira noo xiqise horoonsidhe. Hakkiinnino, tiraaktete aana noota Dancha Duduwo yitanno biroshere foto laꞌꞌanno gede asse; hakkiinni, biroshere umose fantine nabbawara bande kulloonniha birosherete gafa leellishshinisihu gedensaanni, biroshere uyiyyesi. Maahoyye yee adhiro, aantanno qaxaroꞌne barra hakkoye gafa hasaabbinannita kullesi. Xa Qullaawu Maxaafi xiinxallo jammarsiissinoonni yaate! Woy biroshere ela agurtine, wole tiraakte uyitinesi hatti yitannore hasaawate qaxaro amadde.
5. Tiraaktuwa soqqanshote kaaꞌlitannonkehu hiittoonniiti?
5 Tiraaktuwa soqqanshote horoonsiꞌra jammarrummonku 130 diro saꞌꞌanno. Geeshshinsanna qixxaabbino gari babbaxxinoha ikkirono, soqqanshote kaajja uduunnicho ikkite keeshshitino. Qullaawu Maxaafinni afiꞌnanni egenno gobba baala tuqisate, haaru garinni qixxaabbino tiraaktuwanke seekkine horoonsiꞌra agurroonke.—Law. 15:7a.