Dancha Duduwo Mannaho Tuqisate Tiraaktuwa Horoonsidhe
1. Maganu manni tiraaktuwa horoonsiꞌranni keeshshinohu hiittoonniiti?
1 Yihowa daga dancha duduwo mannaho tuqisate tiraaktuwa horoonsiꞌra jammartunku lowo dirra saꞌino. Roduu Raasilinna miillasi 1880nni Qullaawu Maxaafi Rosaano Tiraaktuwa qixxeessite, Agarooshshu Shae nabbabbannori mannaho tuqissanno gede assa jammartu. Tiraaktuwa lowo kaaꞌlo afidhino daafira, 1884nni Maganu Mangiste looso halashshate horoonsiꞌneemmohu daddaloho uurrinokki maamari kalaqami wote, Roduu Raasili Zayonisi Wochi Tawori Tirakti Sosayitii yinanni suꞌmi giddo “tiraakte” yaanno qaali eanno gede assino; xaa yannara konne maamara, Wochi Tawori Bayibili Endi Tirakti Sosayitii Ovi Pensiliveeniya yinanni. Qullaawu Maxaafi Rosaano 1918 geeshsha, 300 miliyoone aleenni ikkitanno tiraaktuwa mannaho iillishshino. Xaano ikkiro tiraaktuwa sabbakate loosira lowonta kaaꞌlitanno.
2. Tiraaktuwa lowo kaaꞌlo afidhino yineemmohu mayiraati?
2 Tiraaktuwa Lowo Kaaꞌlo Afidhino Yineemmohu Mayiraati? Tiraaktuwa biifado misilla afidhinotenna laꞌꞌate baxissannote. Amaddinoti harancho sokka nabbambeenna aguri assitannokkitenna lowore rosiissannote. Metseete woyi maxaafa lae waajjanno mannira tiraaktuwa lowonta baxissanno. Tiraaktuwa mannaho ela qallaale ikkitino daafira haaro halashshaanonna qaaqquullu nafa ela dandiitanno. Qoleno shiimaadda ikkitino daafira anga adhe haꞌrate diqarrissanno.
3. Tiraaktuwanke uyitanno kaaꞌlo xawissannota umikki temokkiro woyi borronkera fultinota kuli.
3 Batinyu mannira mite yee halaalu iillinonsahu tiraaktete widoonniiti. Lawishshaho Heyitii gobbara mitte mancho mitte tiraaktenke doogote ubbe noota affu. Hakkiinnino haadhe nabbabbu gedensaanni hagiidhite, “Halaalewe afiꞌrumma!” yitu. Ganaanni higge Mangistete Addaraashe hadhe Qullaawa Maxaafa xiinxallitu gedensaanni, cuuantino; kuni baalu ikkinohu tiraaktenkera noohu Maganu Qaali wolqa afiꞌrinoha ikkino daafiraati.
4. Aganu giddo ellanni borro tiraaktuwa ikkituro, waanna mixonke maati?
4 Minunni Mine: Tiraaktuwa halaale farciꞌrate lowo geeshsha kaaꞌlitanno daafira, Bocaasu aganinni jammarre tiraaktuwa elleemmo agana maddambanni. Waanna mixonke mannaho tiraaktuwa uyine agura ikkitukkinni, tiraaktuwa horoonsiꞌne hasaawa jammarsiisate. Mite yine hasaawinseemmo manchi woyi wirro marre hasaawinseemmo manchi hasatto noosiha ikkiro, Qullaawu Maxaafi Roso yinanni maxaafinni woyi wole xiinxallinseemmo borronni Qullaawa Maxaafa xiinxallinseemmo gara leellisha dandiineemmo. Minunni mine haꞌne soqqammeemmo wote tiraaktuwa ela dandiineemmohu hiittoonniiti? Baalanti tiraaktuwa addi addita ikkitino daafira ellammora hasiꞌnoommo tiraakte amaddino assaawe afa hasiissannonke.
5. Minunni mine soqqammeemmo wote tiraaktuwa ela dandiineemmohu hiittoonniiti?
5 Manna coyishiinsheemmo wote yineemmore, killilenke garinni woyi elleemmo tiraakte garinni biddi assiꞌra hasiissannonke. Minu annira tiraakte uyine hasaawa jammara dandiineemmo. Tiraaktete aanaanni nooti biifado misile adhanno gede assitara dandiitanno. Woyi minu annira haammata tiraaktuwa leellinshe, doodhita adhanno gede assa dandiineemmo. Tiraaktete birxichi xaꞌmo ikkiro tenne xaꞌmora dawaro ikkanno yee hedinore coyiꞌranno gede xaꞌma dandiineemmo. Woyi afate quqquxamanno gede assitannotanna hasaawa jammarate kaaꞌlitanno xaꞌmo ninke uminke qixxeessine xaꞌma dandiineemmo. Hakkiinnino minu annira tiraaktete aaninni gama gafa nabbawa dandiineemmo; nabbambeemmo wote xaꞌmo noowa iillinummoro taxxi yine minu anni hedosi coyiꞌranno gede xaꞌma dandiineemmo. Qara xiqisubba Qullaawu Maxaafi aaninni nabbambeemmo. Boode gafa hasaambummo gedensaanni, wirro marre hasaawisate barranna saate qaxadhine haꞌra hasiissannonke. Songoꞌne killilera mannu mine hooganno wote borro wore haꞌrate rosi nooha ikkiro, mini manna hoogginanni wote tiraakte doogaanchu laꞌꞌannokki gede assitine wora dandiitinanni.
6. Doogote farciꞌneemmo wote tiraakte horoonsiꞌra dandiineemmohu hiittoonniiti?
6 Doogote Farciꞌra: Doogote farcidhinanni wote tiraakte horoonsidhinanni? Doogote xaandeemmohu mitu manni muddamanno daafira hasaawaho diuurranno. Togoo manni hasatto mageeshshitero afa qarra ikkitara dandiitanno. Kuni manni nabbawannotanna teꞌee anfummokki metseete uyinammonte tiraakte uyinummoro woyyate. Tiraaktete aanaanni noo misile laꞌꞌate baxissannota, hattono borro shiima ikkase afate quqquxxanno daafira mannu yanna heedhannonsa wote nabbawanno gede assitara dandiitanno. Muddamannokkiha ikkiro kayinni tiraaktete aaninni boode gafa ledonsa hasaawa dandiineemmo.
7. Tunceenyunni farciꞌnanni wote tiraaktuwa horoonsiꞌnanni gara xawissanno temokkirubba kuli.
7 Tunceenyunni Farciꞌra: Tiraaktuwa horoonsiꞌne tunceenyunni farciꞌra diqarrissanno. Mittu rodii ayewoteno mininni fulanno wote boode tiraakte kiisete wodhe fulanno. Mannunni xaadanno wote, lawishshaho suuqete daddaꞌlanno manchinni xaadiro, nabbawattore ooheni yee mitte tiraakte aanno. Mittu minaanninna minaama gobba daaꞌꞌatate Niwu Yoorke haꞌri yannara, addi addi gobbanni dayino manninni xaadannota huwatino daafira Daga Baalate Hasiisannoha Dancha Duduwo yinanni buukileetenna batinyu afiinni qixxaabbino tiraaktuwa adhe haꞌri. Hakkiinnino doogote mitore hiranno manni, woyi paarkete giddo woyi hoteelete ledonsa ofollino manchi wolu afiinni coyiꞌranna macciishshitanno wote umisi afiinni qixxaabbino tiraakte uyitannosi.
8. Tiraaktuwa wixu gedeeti yineemmohu mayiraati?
8 “Wixakki Wixiꞌri”: Tiraaktuwa wixu gedeeti yaa dandiinanni. Mittu gawartichi wixino gumi giddo hiikku muꞌrannoronna lophannoro afinokkki daafira sammi yee wixanno. Mekibibi 11:6 togo yitanno: “Soodo wixakki wixiꞌri, hawarro geeshshano angakki fooliishshidhoonke; korkaatuno kuni woyi kuꞌu, woyi lamunku seyo, hiikku laalannoro diafootto.” Konni daafira, soqqanshote lowonta kaaꞌlannonkeha konne uduunnicho horoonsiꞌne ‘ganyine egenno winxo.’—Law. 15:7.
[Qoola 3 nooha misilete xawishsha]
Tiraaktuwa halaale farciꞌrate lowo geeshsha kaaꞌlitanno daafira, Bocaasu aganinni jammarre yannate kiiro tiraaktuwa elleemmo agana maddambanni