Qullaawu Maxaafi Xaꞌmonna Dawaro
Mannu ooso heeshsho albillitte hiittoota ikkitanno?
Yesuusi reyo mimmito baxanno manni noo dagoomi heeꞌranno gede assitannohu hiittoonniiti?
Mannu ooso sayinsetenni lophitanni hadhanni nooti dikaandannite. Ikkollana mimmito lubbora baxanno manni noo dagooma uminsanni kalaqa dandiitanno? Didandiitanno. Yannankera alamete aana umo roorsiꞌranna hafuurre batidhino. Ikkollana, Maganu mannu oosora woyyitino alame abbara qaale eino.—2 Pheexiroosi 3:13 nabbawi.
Maganu Qaali albillitte alame woꞌmate aana mimmito baxanno manna amadinohu mittu dagoomi heeꞌrannota kulanno. Hatte yannara mannu waajjikkinni teese heeꞌranno; gawajjannonsarino diheeꞌranno.—Mikkiyaasi 4:3, 4 nabbawi.
Meessira roorsiꞌra gattannohu hiittoonniiti?
Maganu umo manna kalaqi wote mannu umisira roorsiꞌrate dooꞌꞌo diafiꞌrino. Ikkollana umi manchi Maganoho hajajama giwino daafira guuntesi huꞌnino. Ninke meessira roorsiꞌrate dooꞌꞌo ragiꞌnoommohu isiwiinniiti. Ikkollana, Maganu Yesuusi widoonni mannu ooso galagalte guuta ikkitanno gede assanno.—Roomu Sokka 7:21, 24, 25 nabbawi.
Yesuusi, Maganu fajjo ledo sumuu yaanno garinni kakkalo ikke, umi manchi finqille abbitinori baꞌꞌanno gede faro fanino. (Roomu Sokka 5:19) Konni garinni Yesuusi, mannu ooso bunshete widira xixxiibbannote meessira roorsiꞌrate dooꞌꞌonni keere fultannoti dhaggete hexxo heedhannonsa gede assino.—Faarso 37:9-11 nabbawi.