Xaa Yannara Yihowa Fajjo Assitanni Noori Ayeooti?

1. Xaa Yannara Yihowa Fajjo Assitanni Noori Ayeooti? yitanno biroshere albillitte maaho horoonsiꞌneemmo? Tenne biroshere xiinxallanke maaho kaaꞌlitannonke?

¹ Albillitte Songonnite Qullaawu Maxaafi Xiinxallora Xaa Yannara Yihowa Fajjo Assitanni Noori Ayeooti? yitanno biroshere xiinxallineemmo. “Wodanakki Agadhi!” yinannihu Awuraajju Gambooshshira fultinota tenne haaro biroshere qixxeessinoonnihu Qullaawa Maxaafa xiinxallinseemmo manni Yihowa dirijjite afanno gede kaaꞌlateeti. Tenne borro xiinxallanke, Yihowa dirijjite giddo heeꞌrankenni albinni roore hagiidhineemmo gede assitannonke; hakkiino saꞌe soqqanshonkera kaaꞌlitannonketa tenne biroshere horoonsiꞌneemmo gara afate kaaꞌlitannonke.—Far. 48:13.

2. Tenne biroshere songote xiinxallinannihu hiittoonniiti?

² Songote Xiinxallinanni Gara: Xiinxallo marraꞌꞌanno rodii mittu mittunku rosira yanna taalte iillitanno gede assate uyinoonnisi yanna beeha hasiissannosi. Marraꞌꞌanno rodii mittu mittunku rosi birxichira noo xaꞌmo nabbawe roso egensiisanno. Hakkiinnino nabbawara maddamboonni rodii bitimu gufo nabbawanno gede koyisanno. Aantete, marraꞌꞌanno rodii bitimu gufora qixxeessino xaꞌmo macciishshaano xaꞌmanno. Hakkiinnino, duꞌminse borreessinoonni coyi fooliishshuwanni jammarannoha mitto mittonka gafa nabbambe addi addinni hasaawa hasiissanno. Gafa nabbambi gedensaanni, marraꞌꞌanno rodii hakku gafi birxichoho noo xaꞌmora dawaro qolannohu hiittoonniitiro macciishshaano xaꞌmanno. Qoleno tini biroshere macciishshaano assaawe uyitannota batinye misilla amaddino. Yanna assitu deerrinni, umo umo ikkitino xiqisubba nabbawa hasiissanno. Marraꞌꞌanno rodii aane noo rosiwa saꞌꞌara albaanni, hundaanni noota killasu xaꞌmuwa xaꞌmanno. “Egenno Lexxi” yitanno saaxine nooha ikkiro nabbambanni gede assanno; hakkiinnino xiinxallinseemmo manni saaxinete giddo kulloonnire assiro mayi horo afiꞌrannoro macciishshaano xaꞌmanno. Yanna assitu deerrinni marraꞌꞌanno rodii xiinxallo jeefisanno wote rosu birxichuwa killasu xaꞌmo gede asse horoonsiꞌranno. Manna Qullaawa Maxaafa xiinxallinseemmo woteno konni garinni xiinxallinseemmo yaa ikkinokkita kayinni deꞌinoonte.

3. Tenne biroshere xiinxalline woꞌma xiqime afiꞌra dandiineemmohu hiittoonniiti?

³ Tenne qixxaawonni woꞌma xiqime afiꞌrate seekkine qixxaawe daa hasiissannonke. Qoleno dawaro qolate sharramme. Xiintallinanni yannara hasaambanni heeꞌnoonniri xiinxallinseemmo manna kaaꞌlannohu hiittoonniitiro hedde. Tenne haaro biroshere xiinxalline wolootuno ninkente gede Maganu fajjo assite hegeri heeshsho hexxo afidhanno gede kaaꞌlino.—1 Yoh. 2:17.