Maganu Ayirranno Gede Assanno Amanyoote

1. Yihowa Farciꞌraasine awuraajju gambooshshi yannara mullanka baxxite leeltannohu mayiraati?

¹ Awuraajju gambooshshe haꞌneemmo wote mannu mullanka bade afannonke. Awuraajju gambooshshi heeꞌrannonkete batinye katammara raadoonenna gaazeexxa lawinori gambooshshu noonketa dagoomaho duduwo iillishanno. Hoteeletenna sagalete mine gambooshshe dayino wosini woꞌmanno, qoleno katamaho noo manni baaje wodhinoha batinye manna laꞌꞌanno. Gambooshshu heeꞌrannonke katamira danchu amanyootinkenni Yihowa suꞌmi ayirranno gede assate kaaꞌlannonke qaagiishsha aanchine xawinsoonni.—1 Phe. 2:12.

2. Awuraajju gambooshshi heeꞌrannonke katamira likkanya uddano uddiꞌranke Maganu ayirranno gede assitannohu hiittoonniiti?

² Likkanya Uddano: Gambooshshe haꞌneemmo wote likkanya uddano uddiꞌra hasiissannonketi egennantinote. Ikkollana, wole yannarano lawishshaho hoteelete, sagalete mine, suuqete hira hidhineemmo wote woy wolere assineemmo wote uddiꞌneemmo gari mannu lae naadannonke woy mishannonke gede assara dandaanno. Togoo wote woꞌma uduunne uddiꞌneemmo yaano ikka hoogiro likkanyanna amanyootu noo uddano uddiꞌra hasiissannonke; qoleno boosaalli uduunne uddiꞌne haꞌrama dihasiissannonke. Laꞌꞌannonke manni ninkenna Yihowa magansiꞌrannokki manni mereero badooshshu noota afanno gede assa hasiissannonke. (Rom. 12:2) Hakkiinni saeno, gambooshshu baaje wodha hasiissannonke; togo assanke, gambooshshenke egensiissanno, farciꞌrate faro fantannonke, hattono wolu roduuwi badde affannonke gede assitanno.

3. Cincaalleeyyenna manna ayirrinseemmore ikkinoommota leellinsheemmohu hiittoonniiti?

³ Cincanna Manna Ayirrisa: Umonsa baxannonna galata baino manni woꞌminote tenne alamera, mannu hoteelete woy sagalete mine, woy wole basera cincaaleeyyenna manna ayirrinseemmore ikkinoommota laꞌꞌanno wote lowo geeshsha hagiidhanno! (2 Xim. 3:1-5) Bayicho amandeemmo wote woy haaro borro adhate salfineemmo wote, uminke xiqime ikkikkinni wolu manni xiqime balaxisiisa hasiissannonke. (1 Qor. 10:23, 24) Halaaleho hasatto noosihu mittu manchi umo awuraajju gambooshshenke haꞌri warita kayise togo yiino: “Hakko barra shiqqinoti mitte nigiggire nafa qulli diyitannoe; ikkirono [Yihowa] Farciꞌraasine amanyooti kayinni horonta surreꞌyanni dibainoe.”

4. Dandiineemmoha ikkiro awuraajju gambooshshi yannara uminke fajjonni soqqamate maahoyye yaa hasiissannonkehu mayiraati?

⁴ Meessi Fajjonni Soqqama: Meessi fajjonni soqqama addu Kiristaanira nooreeti. (Far. 110:3) Awuraajju gambooshshi yannara umiꞌne fajjonni soqqama dandiitinakka? Mittu awuraajju gambooshshira, gambooshshu barri daara albaanni mito 600 ikkitannori meyanna labbaa roduuwi uminsa fajjonni base fiite qixxeessitino. Tini dhagge ikkitinonsa manni togo yiino: “Togoore konni albaanni horo anfe diegenninoommo! Kageeshshi manni woxe adhikki mulla loosannoti ammanate kabbaadete.” Daannohu 2013⁠nnihu awuraajju gambooshshi macciishshine rosate calla ikkikkinni Maganu ayirranno gede assate faro fanannonke daafira quqquxamme agadhine heeꞌnoommo.

[Qoola 3-6 noo saaxine]

2013⁠nnihu Awuraajju Gambooshshi Qaagiishsha

◼ Pirogiraame Jammartanno Yanna: Waalcho fannannihu soodo 2:00 saatenniiti. Pirogiraame jammartannota qummi assanno muuziiqa fannannihu sasenka barra soodo 3:20⁠nniiti. Muuziiqu jammaranno wote, pirogiraame amanyootunni jammartanno gede baalunku bayicho bayichonke ofolla hasiissannonke. Arbenna Qidaame jeefote faarsonna huuccatto egensiinsannihu 10:50⁠nniiti; Sambatu barra kayinni 9:35⁠nni egensiinsanni.

◼ Bayicho Amada: Ofollinanni base amada dandiitinannihu miniꞌne mannira, woy Qullaawa Maxaafa xiinxallissinanni mannira calla ikkinota huwatte.—1 Qor. 13:5.

◼ Barri Sagale: Barri fooliishsho yannara gambooshshu basenni hadhinannikki gede sagale adhitine amme ballo. Boodu uduunnichira abbidhine ofoltinanni xarapheessi woroonni wodha dandiitinanni. Xarmusete gedeere hiiqqamanno uduunne adhe daa difaqqandanni.

◼ Fushsho: Alamete doyicho looso kaaꞌlate uminke fajjonni woxe fushshine konni gambooshshira galatu noonketa leellisha dandiineemmo. Cheeketenni fushsho fushshitannori baalunku “Yeyihowa Misikiroch” yite borreessa hasiissannonsa.

◼ Xagicho: Akime hajajjeenna adhitinanni heedhinoonni xagga nooro togoo xagga gambooshshu basera heedhannokkihura adhitine daa habbinoonte.

◼ Caamma: Caammunni, hakko iso ginde seedu caamminni kainohunni diru dirunku haammatu mannira gudaatu iillanno. Daraja fulate, eelallitte dirratenna alillitte fulate injaanno caamma wodha lowo geeshsha danchate.

◼ Macca Dunkino Mannira: Mito awuraajju gambooshshe effi-emmete (FM) widoonni saꞌꞌanno gede assinanni. Tenne macciishshate, effi-emme saawanno uduunnichonna maccate wodhine macciishshinanni uduunnicho adhitine daa hasiissannoꞌne.

◼ Ballo Faana Gantine Kaaꞌlesi (S-43) Yinanni Forme: Gambooshshu yannara madawanya ikkinokki garinni farcidhinoonni manni hasatto noonsaha ikkiro, Ballo Faana Gantine Kaaꞌlesi yinanni forme wonsha hasiissannoꞌne. Wonshitine kaꞌiniro Borrote Kifilera massitine aa woy qaera higgini gedensaanni songoꞌne borreessaanchira aa hasiissannoꞌne.

◼ Sagalete Mine: Sagalete mine dancha akata leellishshine Yihowa suꞌmi ayirranno gede asse. Kiristaanaho gabbaꞌanno uddano uddidhe. Rosaminoha ikkiro soqqantannorira mitore saantete gedeere aa danchate.

◼ Mangistete Addaraashe: Mangistete Addaraashe galate horoonsiꞌra hoogginiro woyyate. Horo qarrame galannohu heeꞌriro Mangistete Addaraashe ishintannokki gedenna caqaamurritannokki gede agara hasiissanno. Gonxoonni maꞌna garunni erre kayisa, duꞌnaminore bayichonko feya, uwino ishini heeꞌriro bayichonko kayisanna ishine tunganni qircaate giddo tuga hasiissanno.

◼ Hoteele:

(1) Dandiitinanniha ikkiro hoteelete galle. Galtinannita agurranna wole kifile amaddinoonte; mitte kifilera faqqandanni manni aleenni galtinoonte.

(2) Hoteelete kifile amaddine kaꞌine agurtinoonte. Agurtinanni gede assannoꞌnehu hedeweelchu coyi tuncu yiiꞌnero hoteelete halaafichira hakkawontenni kulle.—Mat. 5:37.

(3) Rosaminoha ikkiro, hoteelete soqqamaanoranna kifileꞌne fiite biddi assitannorira mitore woxu gedeere uyiyyensa.

(4) Hoteelete giddo sagale wodhitinanniha ikkiro faqqandanni kifilera calla wodhe.

(5) Hoteelete giddo loosanno manna qullaawu ayyaani guma laaltinoonnita leellishanno garinni coyishiishshensa. Insa lowo mannira soqqantanni daafurtanno daafira, shaqqillenke, cincankenna quwa saꞌneemmokkire ikkinoommota laꞌanno wote hagiidhitanno.

(6) Annuwunna amuwu qaaqquullinsa hoteelete giddo afimala gede ikkannokki gede towaata hasiissannonsa.

◼ Gambooshshu Base Feya: Gambooshshu Base Fiitanno Gaamo yanna yannatenni fiitannoha ikkirono, ninke baalunku Yihowa mannisi xuru nookkiha ikkara lowonta hasiꞌrannota anfe tennera kaaꞌlama hasiissannonke. Konni daafira ayewoteno woraqatu woy wolu ishini gambooshshu basera uwiro hakkawotenni hoola hasiissannonke. Ishinu uwiro ishine tugate worroonni qircaatera tuga hasiissannonke; hatto assineemmoha ikkiro gambooshshu basenke pirogiraamete yannarano fooliishshote yannarano laꞌꞌate baxxissannota ikkitanno. Qoleno ofollinoommo bayichinni kaꞌne haꞌneemmo wote ofollinoommowa uwinori nooro laꞌne kayinse hoollummoro danchaho.

◼ Meessi Fajjonni Soqqama: Togoo looso kaaꞌla hasidhannori baalunku, Uminsa Fajjonni Soqqantannori Kifilera kula hasiissannonsa. Tonaa lee diro ikkinonsakki ooso nafa anninsanna amansa ledo woy wolu naggi yiinohu ledo loossannoha ikkiro lowore kaaꞌla dandiitanno.