“Dagate Mereero Danchu Amanyooti Heeꞌroꞌne”

1. Daannohu awuraajjunna daga dagiyyote gambooshshi yannara, dancha amanyoote leellisha hasiissannonkehu mayiraati?

¹ Diru dirunku heeꞌrannohu awuraajju gambooshshinke yannara, duuchu manni ninke ille wore laꞌꞌanno; hakko daafira, amanyootinke magansiꞌneemmo Maganira ayirrinye abbannoha ikka hasiissannosi. (Zel. 20:26) Ikkitonke, hattono uddiꞌrankenna seesinke gari addinta Kiristoosi harunsaano ikkinoommota leellishannoha ikkanno gede assiꞌra hasiissannonke. Daannohu awuraajjunna daga dagiyyote gambooshshi yannara, ‘dagate mereero amanyootinke dancha ikkanno’ gede assiꞌranna iimi Anninke ayirranno gede assa dandiineemmohu hiittoonniiti?—1 Phe. 2:12.

2. Awuraajju gambooshshi yannara Kiristaanu akatta leellisha dandiineemmohu hiittoonniiti?

² Kiristaanu Akati Heeꞌroꞌne: Mereeronke noo baxillinna “gobbaanni noo manna” amandeemmo gari, base baalate woꞌminohu alamete ayyaaniwiinni lowonta baxxinoho. (Qol. 3:10; 4:5; 2 Xim. 3:1-5) Hoteeletenna sagalete mini soqqamaasine, qarru heeꞌranno wote nafa awu afiinni coyishiisha hasiissannonke; hattono cincaaleeyye ikka hasiissannonke. Qoleno rosaminoha ikkiro, togoo basera soqqantannonkerira mitore woxu gedeere aa danchate.

3. Annuwunna amuwu maa assa hawa dihasiissannonsa? Mayira?

³ Annuwunna amuwu gambooshshu basera, sagalete minnara, hattono hoteelete oosonsa seekkite illaallisa hasiissannonsa. (Law. 29:15) Mitte hoteelete halaafitte mitto minaannanna minaama togo yitino: “Kiꞌne manna lowo geeshsha banxeemmo. Maateꞌnenna qaaqquulliꞌne amanyoote afidhinoreeti, qoleno shooshaqootaho. Soqqamaasine baalanti kiꞌne daafira hasaabbanni no; saammintete kiiro kawa dagginoommero tashshi yaannonke.”

4. Awuraajju gambooshshi heeꞌranno katamira heeꞌnoommo wote, uddiꞌrankenna seesinke gari hiittooha ikka hasiissannosi?

⁴ Likkanya Uddano: Awuraajju gambooshshi yannara, gabbaꞌannotanna likkanya uddano uddiꞌra hasiissannonke ikkinnina alamete manni uddiꞌranno garinni uddiꞌra dihasiissannonke. (1 Xim. 2:9) Hoteelete galleemmowa amaxxate haꞌneemmo wote woy hakkiinni fulleemmo wote, hattono gambooshshu albaanninna gedensaanni gobbaange milli yineemmo wote nafa, banxummo gede ikkineemmore lawisannonke uduunne diuddiꞌneemmo. Hakko daafira gambooshshu baaje wodha horo disaalfachishshannonke; qoleno faro afiꞌneemmo wote mannaho farciꞌra diwaajjineemmo. Daannohu awuraajjunna daga dagiyyote gambooshshi yannara leellinsheemmohu danchu amanyootinna ikkitonke, suwashshu wodani noonsa manni heeshsho gatisanno qaaliwa daanno gede assitanno; hakkiinni saꞌeno, Yihowa hagiirsiissanno.—Sof. 3:17.

2014nnihu Awuraajju Gambooshshi Qaagiishsha

◼Pirogiraame Jammartanno Yanna: Waalcho fannannihu soodo 2:00 saatenniiti. Pirogiraame jammartannota qummi assanno muuziiqa fannannihu, sasenka barra soodo 3:20nniiti. Muuziiqu jammaranno wote, pirogiraame amanyootunni jammartanno gede baalunku bayicho bayichonke ofolla hasiissannonke. Arbenna Qidaame jeefote faarsonna huuccatto egensiinsannihu 10:55nniiti; Sambatu barra kayinni 9:50nni egensiinsanni.

◼ Daga Dagiyyote Gambooshshe: Mite gobbara daga dagiyyote gambooshshi heeꞌranno. Kuni gambooshshi heeꞌranno gobbati sinu biiro songuwanna wole gobbanni daano wosina koyissinohu ofollate ikkitanno base, makeena uurrisiꞌnanni basenna gallanni hoteele mageeshshitero hedde ikkinota deꞌinoonte. Halashshaano daga dagiyyote gambooshshira koyinsikkinni daggannoha ikkiro mannu batiꞌrara dandaanno. Kiꞌne songo gaamantinoha awuraajju gambooshshe agurtine wole awuraajju gambooshshe hadhinanni gede assannoꞌneri tuncu yiiꞌnero, hakko bayicho daga dagiyyote gambooshshe haꞌra dihasiissannoꞌne.

◼ Bayicho Amada: Soodo waalcho fannanni wote, gambooshshe daanno roduuwiꞌne ledo qolchantinanni heedhinoonnihu gede, kiꞌne ofolla baxxinanni base rahe amaxxate doddinoonte ballo. Wole manna xaqqamannore assate kakkayisannonkehu meessi xiqime agurate akatinke addu Kiristaana ikkinoommota bade leellishanno; hattono laꞌꞌannonke manni Magano ayirrisanno gede assanno. (Yoh. 13:34, 35; 1 Qor. 13:4, 5; 1 Phe. 2:12) Ofollinanni base amada dandiitinannihu miniꞌne mannira, woy Qullaawa Maxaafa xiinxallissinanni mannira callaati. Mite gambooshshu basera, geerraho woy bisu xeꞌne noonsari ofoltannowa bande qixxeessinoonni. Tini base lowo manna haadhannokki daafira geerra woy bisu xeꞌne noo manna towaatannohu mittu woy lamu manni callu ledonsa ofollanno.

◼ Barri Sagale: Barri fooliishsho yannara gambooshshu basenni hadhinannikki gede sagale adhitine amme ballo. Boodu uduunnichira abbidhine ofoltinanni xarapheessi woroonni wodha dandiitinanni. Xarmuusete gedeere hiiqqamanno uduunne adhe daa difaqqandanni.

◼ Fushsho: Alamete doyicho looso kaaꞌlate uminke fajjonni woxe fushshine konni gambooshshira galatu noonketa leellisha dandiineemmo. Cheeketenni fushsho fushshitannori baalunku, “Yeyihowa Misikiroch” yite borreessa hasiissannonsa. Qoleno fushsho fushshate, debiti kaarde woy kiredit kaarde horoonsiꞌra dandiitinanni.

◼ Xagga: Akime hajajjeenna adhitinanni heedhinoonni xagga nooro, togoo xagga gambooshshu basera heedhannokkihura adhitine daa habbinoonte. Sukkaarete xibbira marfe qasiꞌnoonni sirinjuwanna marfuwa manna madiissitannokki gede, gambooshshu baserano ikko hoteelete wolu ishini ledo mitteenni tuga dihasiissanno.

◼ Adagu Iillannonkekki Gede Assa Dandiineemmore: Shalaqishe tugaꞌnera woy guficho ikkaꞌnera dandaannori maatiro balaxxine hedde. Caammunni, hakko iso ginde seedino caamma wodhatenni kainohunni diru dirunku haammatu mannira gudaatu iillanno. Daraja fulate, eelallitte dirratenna alillitte fulate injaanno caamma wodha lowo geeshsha danchate.

◼ Macca Dunkino Mannira: Mito awuraajju gambooshshe effi-emmete (FM) widoonni saꞌꞌanno gede assinanni. Tenne macciishshate, effi-emme saawanno uduunnichonna maccate wodhine macciishshinanni uduunnicho abbiꞌra habbinoonte.

◼ Gambooshshu Basera Noo Muro: Gambooshshu basera noo awawa woy haqqe kayisanna shuquna wolqanna mito wote isinni woxe nafa fushshitanno daafira oosoꞌne hiiqqitannokki, tayissannokki woy faccannokki gede rosiissensa.

◼ Ballo Faana Gantine Kaaꞌlesi (S-43) Yinanni Forme: Gambooshshu yannara madawanya ikkinokki garinni farcidhinoonni manni hasatto noonsaha ikkiro, Ballo Faana Gantine Kaaꞌlesi yinanni forme wonsha hasiissannoꞌne. Wonshitine kaꞌiniro Borrote Kifilera massitine aa woy qaera higgini gedensaanni songoꞌne borreessaanchira aa hasiissannoꞌne.

◼ Sagalete Mine: Sagalete mine dancha akata leellishshine Yihowa suꞌmi ayirranno gede asse. Kiristaanaho gabbaꞌanno uddano uddidhe. Rosaminoha ikkiro soqqantannorira mitore saantete gedeere aa danchate.

◼ Mangistete Addaraashe: Mangistete Addaraashe galate horoonsiꞌra hoogginiro woyyate. Horo qarrame galannohu heeꞌriro Mangistete Addaraashe ishintannokki gedenna caqaamurritannokki gede agara hasiissanno. Gonxoonni maꞌna garunni erre kayisa, duꞌnaminore bayichonko feya, uwino ishini heeꞌriro bayichonko kayisanna ishine tunganni qircaate giddo tuga hasiissanno.

◼ Hoteele:

Dandiitinanniha ikkiro hoteelete galle. Galtinannita agurranna wole kifile amaddinoonte; mitte kifilera faqqandanni manni aleenni galtinoonte.
Hoteelete kifile amaddine kaꞌine agurtinoonte. Agurtinanni gede assannoꞌnehu hedeweelchu coyi tuncu yiiꞌnero hoteelete halaafichira hakkawontenni kulle. (Mat. 5:37)
Rosaminoha ikkiro, hoteelete soqqamaanoranna kifileꞌne fiite biddi assitannorira mitore woxu gedeere uyiyyensa.
Hoteelete giddo sagale qishidhinanniha ikkiro faqqandanni kifilera calla qishidhe.
Hoteelete giddo loosanno manna qullaawu ayyaani guma laaltinoonnita leellishanno garinni coyishiishshensa. Insa lowo mannira soqqantanni daafurtanno daafira, shaqqillenke, cincankenna quwa saꞌneemmokkire ikkinoommota laꞌanno wote hagiidhitanno.
Annuwunna amuwu qaaqquullinsa hoteelete giddo afimala gede ikkannokki gede towaata hasiissannonsa.

◼ Gambooshshu Base Feya: Gambooshshu Base Fiitanno Gaamo yanna yannatenni fiitannoha ikkirono, ninke baalunku Yihowa mannisi xuru nookkiha ikkara lowonta hasiꞌrannota anfe tennera kaaꞌlama hasiissannonke. Konni daafira ayewoteno woraqatu woy wolu ishini gambooshshu basera uwiro hakkawotenni hoola hasiissannonke. Ishinu uwiro ishine tugate worroonni qircaatera tuga hasiissannonke; hatto assineemmoha ikkiro gambooshshu basenke pirogiraamete yannarano fooliishshote yannarano laꞌꞌate baxxissannota ikkitanno. Qoleno ofollinoommo bayichinni kaꞌne haꞌneemmo wote ofollinoommowa uwinori nooro laꞌne kayinse hoollummoro danchaho.

◼Meessi Fajjonni Soqqama: Togoo looso kaaꞌla hasidhannori baalunku, Uminsa Fajjonni Soqqantannori Kifilera kula hasiissannonsa. Tonaa lee diro ikkinonsakki ooso nafa anninsanna amansa ledo woy wolu naggi yiinohu ledo loossannoha ikkiro lowore kaaꞌla dandiitanno.