Qoqqowu Gambooshshi Qaagiishsha
Pirogiraame Jammartanno Yanna: Waalcho fannannihu soodo 2:00 saatenniiti. Pirogiraame jammartannota qummi assanno muuziiqa fannannihu, sasenka barra soodo 3:20nniiti. Muuziiqu jammaranno wote, pirogiraame amanyootunni jammartanno gede baalunku bayicho bayichonke ofolla hasiissannonke. Arbenna Qidaame jeefote faarsonna huuccatto egensiinsannihu 10:55nniiti; Sambatu barra kayinni 9:50nni egensiinsanni.
Yihowa Faarsotenni Guwisiꞌra: Biꞌre Maganu daga Yihowa faarsotenninna muuziiqunni guwisidhanno; yannankerano faarsonna muuziiqu lowo geeshsha hasiissannoho magansiꞌranke kifileeti. (Far. 28:7) Mitte mittenta qoqqowu gambooshshi pirogiraame jammarrannihu muuziqunniiti. Kuni muuziiqi mulla fanate geeshshira calla fannanniha ikkikkinni Yihoware rosatenna iso magansiꞌrate kaaꞌlannonke gede hende qixxeessinanniho. Konni daafira pirogiraamete liqambartichi muuziiqa fannannita, hattono base basenkera ofollineemmo yanna iillitinotanna qixxeessinoonni muuziiqa hajo assine macciishshineemmo gede kulanno. Konne muuziiqa ofolline macciishshanke Agarooshshu Shaeti faarsaasinete gaamo miilla daafurte assitinore kaffi assine laꞌneemmota leellishshanno. Kuri labballunna meya roduuwinke xeertote gobbanni uminsa woce fushshite, maccate coommanno muuziiqa qixxeessate, dirunni lame hige Paaterseni Niwu Yoorke daanno. Gamba yiino manni baalu qixxeessinoonni muuziiqa seekke macciishshihu gedensaanni Yihowa faarsotenni shooshshe guwisiꞌra hasiissanno.
Makeena Uurrisiꞌnanni Base: Gambooshshu heeꞌranno base baalate makeena woxe kaffallikkinni uurrisiꞌnanni base qixxeessinanni; tenne basera balaxe dayihu uurrisiꞌranno. Makeena uurrisiꞌnanni base shiima ikkitino daafira dandaamannoha ikkiro umiꞌne makeena agurtine wolu roduuwi ledo insa makeeninni dagginiro woyyanno.
Bayicho Amada: Soodo waalcho fannanni wote, gambooshshe daanno roduuwiꞌne ledo qolchantinanni heedhinoonnihu gede, kiꞌne ofolla baxxinanni base rahe amaxxate doddinoonte ballo. Wole manna xaqqamannore assate kakkayisannonkehu meessi xiqime agurate akatinke addu Kiristaana ikkinoommota bade leellishanno; hattono laꞌꞌannonke manni Magano ayirrisanno gede assanno. (Yoh. 13:34, 35; 1 Qor. 13:4, 5; 1 Phe. 2:12) Ofollinanni base amada dandiitinannihu miniꞌne mannira, woy Qullaawa Maxaafa xiinxallissinanni mannira callaati. Kiꞌne ofollate amaxxitinoonnikki bayicho mitore wortinooonte ballo. Hatto assaꞌne wolootu fano bayicho layidhe ofoltanno gede kaaꞌlitanno. Mite gambooshshu basera, geerraho woy bisu xeꞌne noonsari ofoltannowa bande qixxeessinoonni. Tini base lowo manna haadhannokki daafira geerra woy bisu xeꞌne noo manna towaatannohu mittu woy lamu manni callu ledonsa ofollanno.
Likkanya Uddano: Qoqqowu gambooshshi yannara, gabbaꞌannotanna likkanya uddano uddiꞌra hasiissannonke ikkinnina alamete manni uddiꞌranno garinni uddiꞌra dihasiissannonke. (1 Xim. 2:9) Gambooshshu albaanninna gedensaanni gobbaange milli yineemmo wote nafa, banxummo gede ikkineemmore lawisannonke uduunne diuddiꞌneemmo. Hakko daafira gambooshshu baaje wodha horo disaalfachishshannonke; qoleno faro afiꞌneemmo wote mannaho farciꞌra diwaajjineemmo. Daannohu qoqqowu gambooshshi yannara leellinsheemmohu danchu amanyootinna ikkitonke, suwashshu wodani noonsa manni heeshsho gatisanno Qaaliwa daanno gede assitanno; hakkiinni saꞌeno, Yihowa hagiirsiissanno.—Sof. 3:17.
Elekitirooniksete Uduunne Horoonsiꞌneemmo Gara: Pirogiraamete yannara mobayileꞌne woy wole elekitirooniksete uduunne woloota rabbashannokki gede asse wodha hasiissanno. Kaameera, viidiyo qaddaꞌnanni uduunne, tableete woy wole togoo uduunne horoonsidhanni wote woloota goltinannikki gede qorophe ballo. Qoleno, pirogiraamete yannara hakkeeshshi geeshsha hasiissannokki sokka woy iimeele borreessitinannikki gede qorophitine danchu amanyooti nooꞌneta leellishshe.
Barri Sagale: Barri fooliishsho yannara gambooshshu basenni hadhinannikki gede sagale adhitine amme ballo. Boodu uduunnichira abbidhine ofoltinanni xarapheessi woroonni wodha dandiitinanni. Xarmuusete gedeere hiiqqamanno uduunne adhe daa difajjinanni.
Fushsho: Alamete doyicho looso kaaꞌlate uminke fajjonni woxe fushshine konni gambooshshira galatu noonketa leellisha dandiineemmo. Cheeketenni fushsho fushshitannori baalunku, “Yeyihowa Misikiroch” yite borreessa hasiissannonsa.
Xagga: Akime hajajjeenna adhitinanni heedhinoonni xagga nooro, togoo xagga gambooshshu basera heedhannokkihura adhitine daa habbinoonte. Sukkaarete xibbira marfe qasiꞌnoonni sirinjuwanna marfuwa manna madiissitannokki gede, gambooshshu baserano ikko hoteelete wolu ishini ledo mitteenni tuga dihasiissanno.
Adagu Iillannonkekki Gede Assa Dandiineemmore: Shalaqishe tugaꞌnera woy guficho ikkaꞌnera dandaannori maatiro balaxxine hedde. Caammunni, hakko iso ginde seedino caamma wodhatenni kainohunni diru dirunku haammatu mannira gudaatu iillanno. Daraja fulate, eelallitte dirratenna alillitte fulate injaanno caamma wodha lowo geeshsha danchate.
Macca Dunkino Mannira: Mitowa qoqqowu gambooshshi pirogiraame effi-emmete (FM) widoonni saꞌꞌanno gede assinanni. Tenne macciishshate, effi-emme saawanno uduunnichonna maccate wodhine macciishshinanni uduunnicho abbiꞌra habbinoonte.
Gambooshshu Basera Noo Muꞌro: Gambooshshu basera noo awawa woy haqqe kaasanna shuquna wolqanna mito wote isinni woxe nafa fushshitanno daafira oosoꞌne hiiqqitannokki, tayissannokki woy faccannokki gede rosiissensa.
Ballo Faana Gantine Kaaꞌlesi (S-43) Yinanni Forme: Gambooshshu yannara farcidhinoonni manni hasatto noonsaha ikkiro, Ballo Faana Gantine Kaaꞌlesi yinanni forme wonsha hasiissannoꞌne. Wonshitine kaꞌiniro Borrote Kifilera massitine aa woy qaera higgini gedensaanni songoꞌne borreessaanchira aa hasiissannoꞌne.
Sagalete Mine: Sagalete mine dancha akata leellishshine Yihowa suꞌmi ayirranno gede asse. Kiristaanaho gabbaꞌanno uddano uddidhe. Rosaminoha ikkiro soqqantannorira mitore saantete gedeere aa danchate.
Mangistete Addaraashe: Mangistete Addaraashe galate horoonsiꞌra hoogginiro woyyate. Horo qarrame galannohu heeꞌriro Mangistete Addaraashe ishintannokki gedenna caqaamurritannokki gede assa hasiissanno. Gonxoonni maꞌna garunni erre kayisa, duꞌnaminore bayichonko feya, uwino ishini heeꞌriro bayichonko kayisanna ishine tunganni qircaate giddo tuga hasiissanno.
Hoteele:
Hoteelete galtinannita agurranna wole kifile amaddinoonte; mitte kifilera fajjinanni manni aleenni galtinoonte.
Hoteelete kifile amaddine kaꞌine agurtinoonte. Agurtinanni gede assannoꞌnehu hedeweelchu coyi tuncu yiiꞌnero hoteelete halaafichira hakkawontenni kulle. (Mat. 5:37)
Rosaminoha ikkiro, hoteelete soqqamaanoranna kifileꞌne fiite biddi assitannorira mitore woxu gedeere uyiyyensa.
Hoteelete giddo sagale qishidhinanniha ikkiro faqqandanni kifilera calla qishidhe.
Hoteelete giddo loosanno manna qullaawu ayyaani gumi nooꞌneta leellishanno garinni coyishiishshensa. Insa lowo mannira soqqantanni daafurtanno daafira, shaqqillenke, cincankenna quwa saꞌneemmokkire ikkinoommota laꞌanno wote hagiidhitanno.
Annuwunna amuuwu qaaqquullinsa hoteelete giddo afimala gede ikkannokki gede towaata hasiissannonsa.
Gambooshshu Base Feya: Gambooshshu Base Fiitanno Gaamo yanna yannatenni fiitannoha ikkirono, ninke baalunku Yihowa mannisi xuru nookkiha ikkara lowonta hasiꞌrannota anfe tennera kaaꞌlama hasiissannonke. Konni daafira ayewoteno woraqatu woy wolu ishini gambooshshu basera uwiro hakkawotenni hoola hasiissannonke. Ishinu uwiro ishine tugate worroonni qircaatera tuga hasiissannonke; hatto assineemmoha ikkiro gambooshshu basenke pirogiraamete yannarano fooliishshote yannarano laꞌꞌate baxxissannota ikkitanno. Qoleno ofollinoommo bayichinni kaꞌne haꞌneemmo wote ofollinoommowa uwinori nooro laꞌne hoollummoro danchaho.
Meessi Fajjonni Soqqama: Togoo looso kaaꞌla hasidhannori baalunku, Uminsa Fajjonni Soqqantannori Kifilera kula hasiissannonsa. Tonaa lee diro ikkinonsakki ooso nafa anninsanna amansa ledo woy wolu naggi yiinohu ledo loossannoha ikkiro lowore kaaꞌla dandiitanno.