Soqqanshonke Isilanchimma Woyyeessiꞌra—Wole Afoo Coyiꞌranno Mannira Farciꞌra

Hasiissannohu Mayiraati? Yihowa “daga baalante” mannira ayyaanaamittete hasattonsa wonsha hasiꞌranno. (Hawaariyaatete Looso 10:34, 35) Konni daafira Yesuusi dancha duduwo “daga baalantera” “uulla woꞌmate” dudumbannita coyiꞌrino. (Mat. 24:14) Masaalaanchu Zekkaariyaasi ‘addi addi dagahu duuchunku afiinni’ fulino manni dancha duduwo adhannota kulino. (Zek. 8:23) Hawaariya Yohaannisi laino ajuujara, bayira qarra gate saꞌꞌanno manni “duuchante daganni, gaꞌrenni, manninni, hattono afiinni” gamba yiinoha ikkitinota kulloonni. (Aju. 7:9, 13, 14) Konni daafira, songonkehu soqqanshote qoqqowi giddo wole afoo coyiꞌranno manninni xaandummoro, insara farciꞌrate woꞌnaala hasiissannonke.