Woꞌnaalsha Afidhino Halashshaanowiinni Rosa

Songote giddo woꞌnaalshu noonsa halashshaano afiꞌra jirote. Insa giddo mitu Yihowara ammanante lowo diro soqqantinoreeti. Mitu kayinni soqqansho hanaffinohu muli yanna giddo ikkirono soqqanshote dancha dandoo noonsareeti. Kuri halashshaano tenne goofimarchu yaanna giddo Yesuusi Kiristaanu songo massaganni noo garanna sabbakatenna manna rosaano assate loosi halaꞌlanno gede assanni noohu hiittoonniitiro affinoreeti. (Maatewoosi 28:19, 20) Insa tenne soqqanshonsanni, qarrunna fonqolu iillannonsa wote dandiite saꞌꞌate kaaꞌlitannota Maganuwiinni afiꞌnannita “bayira wolqa” afidhino. (2 Qor. 4:7) Kuri lowo woꞌnaalsha afidhino halashshaanowiinni lowori ronseemmori no. Insa xaꞌmininsaro rossino coye mannaho kula baxxanno. (Far. 71:18) Konni daafira insawiinni rosate faro hasiꞌra hasiissannonke. Tenne assa dandiineemmohu hiittoonniiti?

Soqqanshote Yannara. Soqqanshonsanni dancha guma afiꞌrate haaruuddunna gari woꞌnaalshi noonsakkiri qajeelsha afiꞌra hasiissannonsa. Woꞌnaalshu noonsa halashshaano soqqantanno wote manna hasaawissanno gara laꞌne lowore rosa dandiinanni. (Ammajje 15, 2015 Agarooshshu Shaera, (Amaaru Afoo) “Soqqanshote Diinaggaawaꞌne Agurtinoonte” yaanno birxichira “Gari Woꞌnaalshu Noonsakkire Kaaꞌlensa” yaannohu cinaanchu birxichi hunda sayikki gufora noo assaawe lai.) Woꞌnaalshu noonsa halashshaano ledo soqqamaꞌne kaaꞌlitinoꞌnehu hiittoonniiti?

Soqqanshote fullahino halashshaanchi ledoꞌne soqqamanno gede koyissinanni? Isira dhuku anje noosiha woy xiwaminoha ikkiro, Qullaawu Maxaafi rosaanchoꞌne mito wote isiwa massitine xiinxallisa dandiitinanni. Xiinxallote gedensaanni soqqanshote kaaꞌlannoꞌnere amaalannoꞌne gede xaꞌme.

Insawa Aanne: Woꞌnaalshu noonsa halashshaano ledo egennamate insawa aanne. Insa giddonni mitto maatete magansiꞌraꞌne yannara daanno gede koyissine woꞌnaalshasi kulannoꞌne gede xaꞌme. Kiꞌnewa daate dhuka hoogannoha ikkiro kayinni, maatete magansiꞌraꞌne hadhine isiwa assiꞌra dandiitinakka? Isi halaale macciishshinohu hiittoonniitiro xaꞌme. Afiꞌrino atooti maati? Qooxeessaho lexxitanna lainoti tiokiraasete lopho maati? Yihowara soqqamasi hagiirsiissinosihu hiittoonniiti?

Wodanchitinannirenna insa assitannonke yitine heddinanni coyira quwa saꞌinannikkire ikke. Lowo diro ammanante soqqantanni keeshshitino halashshaano ninkente gede babbaxxitino elto afidhinoreeti. (Rom. 12:6-8) Mitu roduuwi dirinsa lexxanni harino daafira ninke ledo sayissanno yanna ajjara dandiitanno. Ikkirono, Yihowara ammanante soqqante afidhino woꞌnaalshinni lowore rosa dandiineemmo.