MANNA GIWA AGURA DANDIINANNIHU HIITTOONNIITI?

4 | Maganu Kaaꞌlonni Manna Giwa agura Dandaatto

Qullaawu Maxaafi Rosiisannore:

“Ayyaanu laalo kayinni baxilleho, hagiirreho, keereho, cincate, shooshanqete, danchummate, ammanamate, joongilleho, meessanaa qeeꞌlate.”—Galatiyu Sokka 5:22, 23.

Hatto Yaa Mayyaate?

Maganu kaaꞌlonni manna giwa agura dandiineemmo. Maganunnihu qullaawu ayyaani uminkenni afiꞌra dandiineemmokkiti dancha akatta heedhannonke gede kaaꞌlannonke. Hakko daafira manna giwa agurate uminkenni sharramantenni, Maganu kaaꞌlo addaxxa hasiissannonke. Hatto assinummoro ninkeno soqqamaasinchu Phaawuloosi yiinota yaa dandiineemmo. Isi, “Tini jawa wolqa Maganunnite ikkinnina ninketa [diꞌꞌikkitino]” yiino. (2 Qorontoosi 4:7) Addanko, “Kaaꞌloꞌya daggannohu . . . Kaaliiqiwiinniiti” yaa dandiineemmo.—Faarso 121:2.

Ati Maa Assa Dandaatto?

“Yihowa hanqe boolaqiꞌreemmohu soorrame keere baxeemmoha ikkeemmo gede kaaꞌlinoe.”—WAALDO

Yihowa qullaawa ayyaana aannohe gede seekkite huucciꞌri. (Luqaasi 11:13) Isi baxanno gedee akatta heedhannohe gede kaaꞌlahera huucciꞌri. Qullaawu Maxaafi manna giwa aguratto gede kaaꞌlitannohe akatta daafira mayyaannoro xiinxalli; kuri giddo gama baxilleho, keereho cincatenna meessaneeto qeeꞌlate. Kuri akatta leellishatto faro hasiꞌri. Qoleno togoo akatta heedhannonsa gede assiꞌrate sharrantannoriwa aani. Togoo manni ‘Baxille afiꞌratenna dancha looso loosate kaꞌꞌatto’ gede kaaꞌlannohe.—Ibiraawoota 10:24.

Addu Xagge—WAALDO

Finqillenna Manna Giwate Hedo Qeeꞌlino

Waaldo anje heeꞌreenna lowo qarri iillinosi daafira lophihu gedensaanni manna giwannoha ikkino. Isi togo yiino: “Jingilli assitanno xagga hirtannori ledo duucha woyite doogote ganameemmo. Mitte yannara ninke ledo giwantino gaamo ane shaanno gede mitto mancho qaxadhitino; hakku manchi qase madiissinoeha ikkirono reyummokki gate fuloommo.”

Waaldo minaamasi Yihowa Farciꞌraasine ledo Qullaawa Maxaafa xiinxalla hanaffinota dibaxino. Isi togo yiino: “Yihowa Farciꞌraasine lowo geya giweemmo daafira busha xono xoneemmonsa. Insa kayi woꞌmanka woyite shaqqillunni hasaawissannoe.”

Gedensoonni Waaldono Qullaawa Maxaafa xiinxalla hanafino. Isi togo yiino: “Rosoommore loosu aana hosiisa shota diꞌꞌikkitinoe. Hanqo horo hooꞌla dandeemmokkiha lawinoe.” Ikkollana Qullaawu Maxaafinni rosinori heeshshosi biddi assiꞌranno gede kaaꞌlinosi.

Waaldo togo yiino: “Mitto barra Qullaawa Maxaafa xiinxallisannoehu Alehandiro yinanni rodii Galatiyu Sokka 5:22, 23 nabbaweemmo gede koyisie. Alehandiro kuri akatta heedhannoe gede assiꞌra dandeemmohu umiꞌyanni ikkikkinni, Maganunnihu qullaawu ayyaani kaaꞌlonni ikkinota xawisinoe. Kuni halaali hedoꞌya woꞌmunni woꞌma biddi assiꞌreemmo gede kaaꞌlinoe!”

Waaldo Maganu kaaꞌleennasi manna giwa agura dandiino. Isi togo yiino: “Fiixiꞌyanna albi jaallaꞌya heeshshoꞌya biddi assiꞌroommo gara laꞌe dhagge assidhino.” Isi lede, “Yihowa hanqe boolaqiꞌreemmohu soorrame keere baxeemmoha ikkeemmo gede kaaꞌlinoe” yiino.