Poletiku Finqille—Qullaawu Maxaafi Mayyaanno?

Gashshaasinete finqilanna shitta xa roore rosantinota ikkitino.

Poletiku finqille togo batidhinohu mayiraati? Togoo finqille heedhannokki yanna dagga ikka? Qullaawu Maxaafi mayyaanno?

Poletikunni babbadama heedhannota balanxe himannoonni

Qullaawu Maxaafi tenne ninke heeꞌnoommo yanna “goofimarchu barra” yaanno; qoleno tenne yannara batinyu manni gibbonna finqille kakkayisanno akata leellishannota balanxe masaalloonni.

• “Goofimarchu barra qarrissanno yanna daggannota afi. Mannu . . . galata afiꞌrinokkiha, qullaawa heeshsho afiꞌrinokkiha, . . . araara giwannoha, . . . mararro afiꞌrinokkiha, . . . muddamaasincho, booꞌnatenni ufuufaminoha . . . ikkanno.”—2 Ximootewoosi 3:1-4.

Qoleno yannankera duuchu manni gashshooteho finqilansanna poletiku gaanci rosaminore ikkannota Qullaawu Maxaafi giddo himannoonni. (Luqaasi 21:9, lekkaalliidi qaagiishsha) Ikkollana, poletiku finqillenna babbadooshshu tenne gedee diheeꞌranno.

Poletiku finqille baꞌanno yanna

Qullaawu Maxaafi, Maganu uullate gashshoote baala hune umisi gashshoote abbannota kulanno.

• “Gordu Magani horonta diigamannokki . . . gashshoote uurrisanno. Kuni wole gashshoote baala coꞌo asse hunanno. Isi kayinni hegerera kaajje heeꞌranno.”—Daanieeli 2:44.

Maganu Gashshooti mannu mereero addu mittimma heedhanno gede assanno; qoleno alame woꞌmate aana keere abbanno.

• Konni Gashshooti Moote Yesuusi Kiristoosi ‘Keeru Roorrichaati’; isi uullate aana “hegere keeri” woꞌmanno gede assanno.—Isayaasi 9:6, 7.

• Konni Gashshooti qansooti, xa nafa mannu ledo keere heeꞌnanni gara rossanni no. Hakko daafira, Qullaawu Maxaafi togo yaanno: “Bisensa maarashaho, urdensa haantote soorritanno. Gashshootu gashshootu aana ola dikayisanno; hakkunni gedensaanni olaho qixxaawannohu diheeꞌranno.”—Isayaasi 2:3, 4.

Ledde afate, “Maganu Mangiste Maa Maa Assitanno?” yaanno birxicho nabbawi; hattono Maganu Mangiste Maati? yitanno viidiyo lai.