Waajjitooti Yihowa Kaaꞌlaanchokkiitina!

1, 2. Wole gobba loosoho haꞌre higannohura lowo mannira qarra ikkannori maati? (Umi misile lai.)

EDIWAARDOa yinanni rodii togo yiino: “Wole gobbara haꞌre looseemmo waro, danchu loosi nooe; qoleno woxe dancha gede afiꞌreemmo. Yihowa Farciꞌraasine ledo Qullaawa Maxaafa xiinxalla jammarummota kayinni, hakkiinni roorino halaafinati nooeta yaano maateꞌya maalaamittetenni calla ikkikkinni ayyaanaamittetennino towaata hasiissannoeta huwatummo. Hakko daafira agure qae higummo.”—Efe. 6:4.

² Ediwaardo qae hige maatesi ledo heeꞌrasi Yihowa hagiirsiissannota afino. Ikkollana, sai birxichira qummi assinite Merliini gede, isino maatesi ledo noosi fiixooma haaroonsiꞌrate sharrama hasiissinosi. Qoleno minaamasinna qaaqquullesi maalaamittetenni towaaxxa shota diꞌꞌikkitinosi. Maatesira hasiisannore wonshate maa assa dandaanno? Songote giddo noo roduuwi ma garinni kaaꞌlitasira dandiitanno?

YIHOWANNA MAATEKKI LEDO NOOHE FIIXOOMA HAAROONSIꞌRI

3. Annu woy ama wole gobbara heeꞌransa qaaqquulle gawajjitannohu hiittoonniiti?

³ Ediwaardo togo yee noore coyiꞌrino: “Qaaqquulliꞌya ane biddishshanna baxille roore hasiꞌranno yannara lashshi asse aguroommonsata huwatummo. Ledonsa heeꞌre Qullaawu Maxaafi xagge dinabbawoommonsa, ledonsa huuccatto diassiꞌroommo, dihanqafoommonsa, qoleno digodoshshiishoommonsa.” (Marro 6:7) Bayira qaaqqosi Aana togo yitino: “Hakkawaro anninke ledonke heeꞌrannokki daafira baxannoekkihu gede asse hedeemma. Qae higi yannara, danasinna coyiꞌranno gara calla qaangoommo. Isi hanqafieta wosincho coye ikkie.”

4. Minaanni qaete hoogasi maatete umo ikke assannorira guficho ikkitannohu hiittoonniiti?

⁴ Annu qaete hoogasi maatete umo ikke assannorirano guficho ikkitanno. Ediwaardo minaama Rubii togo yitino: “Hatte yannara amano annano ikka hasiissinoe; qoleno maatete giddo wossana hasiissannoha roore coye wossaneemmati ane ikkumma. Ediwaardo qae higita, Kiristaanu silxaanete maahoyye yee galanno yaa mayyaatero rosa hasiissinoe. Xa nafa sae sae minaanniꞌya qaete noota haweemma daafira qaaga hasiissannoe.” (Efe. 5:22, 23) Ediwaardo qole togo yiino: “Qaaqquullu mitore assate amansa xaꞌmiꞌranni keeshshino. Anino amansano mitto coye wossanneemmohu afoo xaande ikkinota oosonke affanno gede assa hasiissinonketa huwantummo; anino umimmate silxaaneꞌya Kiristaanu horoonsiꞌranno garinni horoonsiꞌreemmo gara rosa hasiissinoe.”

5. Ediwaardo maatesi agure haꞌrasi abbitino gawajjo dhaawate maa assino? Tenne assasi mayi guma abbitino?

⁵ Ediwaardo maatesi ledo noosi fiixooma haaroonsiꞌranna ayyaanaamittensa jawaachisha dandaanno gede dandaannore baala assate murciꞌre kaino. Togo yiino: “Coyiꞌreemmo coyinninna assootiꞌyanni halaalu qaaqquulliꞌya surrera qaꞌmanno gede assate, hattono Yihowa baxeemmo yaa calla ikkikkinni iso baxeemmota leellishate murciꞌre kaummo.” (1 Yoh. 3:18) Ediwaardo ammanatenni assinore Yihowa maassiꞌrinoyya? Aana togo yitino: “Isi dancha anna ikkatenna ninkewa gamba yaate assannore laꞌꞌanke lowore woyyeessitino. Songote giddo ayyaanaamittetenni lophanni noota laꞌnummoti hagiidhinummo. Tini alame hatte yannara Yihowawiinni xeertissanni noonke. Anninkenna amanke woꞌma hedonsa halaalu widira qoltinota laꞌnummota kayinni, ninkeno insa gede ikkate kaꞌnummo. Anninke layinkita agure dihaꞌreemmoꞌne yiino; qoleno konne qaalesi agadhino. Wirro agure haꞌroommenkero kayinni, techo Yihowa dirijjite giddo heeꞌreemmaha dilawannoe.”

ATINO HUNOOTTORI NOOTA AMMANI

6. Balkaani gobbuwara mitu anninna ama olu yannara mayi roso afidhino?

⁶ Mite temokkiro leellishshanno garinni, Balkaani gobbuwara olu kai waro nooti Yihowa Farciꞌraasine ooso hudetenni hawaaxantinoha ikkirono hagiirraammaho. Hiitto ikkite? Annuwinsanna amuwinsa fulte loosoho haꞌra dandiitannokki daafira qaete heedhe oosonsa xiinxallissanno, ledonsa godoꞌlitanno, hattono ledonsa hasaabbanno. Tennenni maa ronseemmo? Ooso woxe woy uduunne uyinansantenni anninsanna amansa ledonsa heedhara hasidhanno. Ee, Maganu Qaali yaannonte gede, ooso anninsanna amansa towaanyonna qajeelsha afiꞌransa lowore kaaꞌlitannonsa.—Law. 22:6.

7, 8. (a) Mitu anni woy ama wole gobbanni qae higganno wote loossanno soꞌro hiitteeti? (b) Annu woy ama oosonsa ledo noonsa fiixooma galagalte seekkiꞌrate ma assa dandiitanno?

⁷ Mitu anni woy ama wole gobbara heedhe higganno wote oosonsa koffi yitannonna koloꞌmattanno daafira, “Kiꞌnera yee kageeshsha daafureemmotera hili geeshsha nafa digalattinanni?” yitanno. Ikkollana, ooso togo ikkitinohu anninsa woy amansa agurte hadhinonsa daafira xissiisidhe ikkara dandaanno. Annuwunna amuwu tenne dhaawate maa assa dandaanno?

⁸ Minikki manni simmeete huwatanna insara assaawattota leellisha dandaatto gede kaaꞌlahera Yihowa huucciꞌri. Hakkiinnino, insa ledo hasaawatto wote, atino hunoottori noota woy kalaqamino qarrira atino noottota ammani. Maaro xaꞌmiꞌra kaaꞌlitara dandiitanno. Galtekkinna oosokki kalaqamino qarra tirate ganyite sharramatto gara laꞌuro, maaro xaꞌmiꞌroottohu addanka ikkinota huwattanno. Hexxo mudha hoogittoronna cinca heedhuhero, minikki manni gale hosanni bashshonte gede baxannohenna ayirrisannohe gede assiꞌra dandaatto.

‘MINI MANNIRA HASIISANNORE SHIQISHA’

9. ‘Mininke mannira hasiisannore shiqishate’ yine jiro duuꞌnate dodama dihasiissannonke yineemmohu mayiraati?

⁹ Hawaariya Phaawuloosi, geerru Kiristaani maalaamittetenni hasiisannonsare afiꞌra hoogannoha ikkiro oosonsanna oosote ooso “anninsaranna akaakkansara hasiissanno bado qoltanno” gede amaalino. Phaawuloosi hakkiinni aanche kayinni baalunku Kiristaani heeshshote hasiisannoha xinta ikkino coye yaano sagale, uddanonna galannowa afiꞌriro hakkuyinni kassi yee heeꞌranno gede duure amaalino. Qawaaxxote heeshsho heeꞌrate uffi qocci yaa woy albillitte maalaamittetenni teense heeꞌrate yine woxe duuꞌnate dodama dihasiissannonke. (1 Xim. 5:4, 8; 6:6-8; 1 Ximootewosi 6:9, 10 nabbawi.b) Mittu Kiristaanchi ‘minisi mannira hasiisannore shiqishate’ yee mulenni saꞌannota tenne alame jiro duuꞌnate sharrama dihasiissannosi. (1 Yoh. 2:15-17) “Jironniti dogate wolqa” woy “heeshshote hasiisannorira yaada,” maatenke Maganu abbannote haaro alamera afidhannota ‘addu heeshsho seekkite cuꞌmidhannota’ hooltanno gede assa dihasiissannonke!—Marq. 4:19; Luq. 21:34-36; 1 Xim. 6:19.

10. Edu giddora ea hooga hayyote yineemmohu mayiraati?

¹⁰ Yihowa woxu mito geeshsha hasiisannonketa afino. Ikkollana, woxu Maganuwiinni afiꞌnanni hayyo geeshsha agarankeranna kaaꞌlankera didandaanno. (Mek. 7:12; Luq. 12:15) Duucha wote mannu loosoho wole gobba haꞌra abbitanno gawajjo dihuwatanno; qoleno, wole gobba haꞌrino daafira calla woxe afiꞌranno yaa diꞌꞌikkino. Isinni buutote qarri iillansara dandaanno. Wole gobba haꞌre daannohu lowo manni rooru edi giddora eꞌꞌe higanno. Maganoho soqqamate wolapho afiꞌranno bayicho, woxe liqiissinsa mannira soqqamannoha ikkanno. (Lawishsha 22:7 nabbawi.c) Kaimanka edu giddora ea hooga hayyote.

11. Baajeette fushshiꞌne hattee seekkine harunsa maate kaaꞌlitannohu hiittoonniiti?

¹¹ Ediwaardo maatesi ledo heeꞌre insara hasiisannore shiqishate, woxe garunni horoonsiꞌra hasiissannosita afino. Isinna galtesi maatensara addinta hasiisannore hedde baajeette fushshidhu. Insa tenne baajeette garinni hidhitannori bashsho rooru woxi noonsa wote hidhitannorinni ajannoti egennantinote. Ikkirono insa baalunku sumuu yite kaaꞌlantino; qoleno hakkeeshshi geeshsha hasiisannokkirira woxe difushshitanno.d Ediwaardo togo yiino: “Lawishshaho, qaaqquulleꞌya gillete rosi mininni fushshe dancha mangistete rosi minira eꞌanno gede assummo.” Isinna maatesi ayyaanaamittete millimmonsara guficho ikkannokki looso afiꞌranno gede huuccatto assidhino. Yihowa huuccattonsara dawaro qolinohu hiittoonniiti?

12, 13. Mittu anni maatesira hasiisannore shiqishate maa maa assino? Yihowa isi assinore maassiꞌrinohu hiittoonniiti?

¹² Ediwaardo togo yiino: “Umo lamu diri geeshsha angate anje lowonta qarrissunke. Codhoommo woxi goofanni haꞌri; qoleno afiꞌreemmo woxi wocete ikkannonkekki woti no; hakkiinni saeno loosu lowo geeshsha daafursannoho. Ikkirono baalanka gambooshshe haꞌranna soqqansho mitteenni fula dandiinoommo.” Ediwaardo maatesiwiinni haammata agana woy diro baxxanno gede assannosi looso amadate heda nafa hedannokki gede murciꞌre kaino. Isi togo yiino: “Mittu loosi hooganno wote woleho higa dandeemmo gede addi addi looso loosa rosummo.”

¹³ Ediwaardo liqiiꞌrino woxe kaffale gudate lowo yanna adhinosi daafira, roore qallo kaffala hasiissinosi. Ikkollana, isi Yihowa hasiꞌranno garinni duuchunku coyira minisi manni ledo heeꞌra hasiꞌrino daafira konne lowo duhi gede asse dihedino. Togo yiino: “Xa afiꞌreemmo woxi wole gobbara looseemmo waro afiꞌreemmohunni xibbunni 10 anga ajanno; ikkirono hudiꞌne diegenninoommo. ‘Yihowa anga harancho diꞌꞌikkitino.’ Suwisaano ikkate nafa wossaꞌninummo. Hakkuyi gedensaanni gobbate miinju qarri woyyaawanni haꞌrita, maalaamittete hasiisannonkere afiꞌra albinni roore shota ikkitunke.”—Isa. 59:1.

FIIXU XIXXIIWANNOTA DANDEE HEEꞌRA

14, 15. Maate ayyaanaamittete coyinni maalaamittete coye roorsitanno gede fiixu xixxiiwannota qeela dandiitannohu hiittoonniiti? Dancha lawishsha ikkansa mayi guma abbitara dandiitanno?

¹⁴ Duuchu qooxeessira mannu fiixinsaranna jaallansara woxenna uduunne aa hasiissannonsahu gede asse hedanno. Ediwaardo, “Hatto assa budenkeeti; qoleno mannaho mitore aa lowo geeshsha banxeemmo” yee xawisino. Ikkirono isi lede togo yiino: “Hatto assa dandiineemmokki woti no. Fiixiꞌyara danduummo geeshsha mitore eemmonsata, kayinni miniꞌya mannira hasiisannorenna ayyaanaamittensa lashshi asseemmokkita hayyotenni kuloommonsa.”

¹⁵ Wole gobbanni qae higanno mannanna maatensa agure loosoho wole gobba haꞌra giwanno manna, insa anga laꞌꞌanno fiixinsa hanqara, qacifatansara, woy koffi yaara dandaanno. Mitootu isinni, kaajjaddaho yitannonsa. (Law. 19:6, 7) Ediwaardo beetto Aana togo yitino: “Maalaamittete coyira yine ayyaanaamittete coye agura hoongummoro, mitu fiixinke Kiristaanu heeshshonke mageeshshi waaga afidhinoro ganaanni huwatara dandaanno. Kayinni insa hasattonni qeelammummoro tenne hiitto ikke huwatanno?”—1 Pheexiroosi 3:1, 2 ledo heewisiisi.

MAGANO ADDAXXINEEMMOTA LEELLISHA

16. (a) Mittu manchi ‘kaphu korkaata kule isonooto dogara’ dandaannohu hiittoonniiti? (Yaq. 1:22) (b) Yihowa maassiꞌrannonkehu hiittoo coye wossaꞌninummorooti?

¹⁶ Mitte rodoo minaannisenna oososewiinni baxxite dureette gobba hadhu gedensaanni martinowa cimeeyyete togo yitino: “Ani kawa dayeemma gede maatenke lowo coye agurtino. Isinni minaanniꞌya cimeessa ikke soqqamate qoossosi hoogino. Yihowa kore baalankare maassiꞌranno yee hexxeemma.” Yihowa iso addaxxine wossaꞌnineemmo coye baalanka ayewoteno maassiꞌranno; ikkina fajjosi ledo sumuu yaannokkire wossaꞌnine heeꞌneenna, hakko iso hasiisikki qullaawa ikkitinota soqqanshote qoossonke agurre heeꞌneenna hiitto asse maassiꞌrannonke?—Ibiraawuyaani 11:6 nabbawi;e 1 Yoh. 5:13-15.

17. Mitto coye wossaꞌninammora albaanni Yihowa biddishsha hasiꞌra hasiissannonkehu mayiraati? Tenne assa dandiineemmohu hiittoonniiti?

¹⁷ Mittore wossaꞌnattora woy sheemaate eattora albaanni Yihowa biddishsha afiꞌrate woꞌnaali. Qullaawa ayyaanasi, hayyonna biddishsha aannohe gede huucciꞌri. (2 Xim. 1:7) Ateneeto togo yite xaꞌmi: ‘Yihowara hajajameemmohu mageeshshi geeshshaati? Dartu iilliero nafa isira hajajameemmo? Togoo woteno hajajameemmoha ikkiro, miinju qarri heeꞌriro nafa hajajameemmo?’ (Luq. 14:33) Qullaawa Borro aana xintantino amaale uyitannohe gede cimeeyye xaꞌmiꞌri; qoleno uyitannohe amaale harunsite ammana noohetanna Yihowa kaaꞌleemmohe yee eino qaale addaxxattota leellishi. Cimeeyye togo assi yite atera diwossantannohe; ikkirono, hagiirraame heeshsho heeꞌratto gede assannohere doodhatto gede kaaꞌlitahera dandiitanno.—2 Qor. 1:24.

18. Maate towaatate halaafinati ayeho? Ikkirono wolootu kaaꞌlo hasiissanno gede assannori mayi kalaqamara dandaanno?

¹⁸ Yihowa qaete anni maatesi barru barrunku towaatara hasiꞌranno. Loosoho yite maatensa agurte wolewa hadhara xixxiibbannori heedhurono woy insa uminsara hattoo hedo heedhunsarono, galtensa woy oosonsa agurte hadhukki maatete hasiisannore wonshitannore galatanna insara huuccatto assa hasiissannonke. Hendoonnikkiri lawishshaho kalaqamu dano woy hedeweelchu dhibbi tuncu yaanno wote, roduuwinkera halaalaancho Kiristaanu baxille leellishanna mimmitu qarra duqqa hasiissannonke. (Gal. 6:2, 5; 1 Phe. 3:8) Ikkina hedeweelchu coyi iillannonsa wote woxunni irkisa woy qooxeessinsara looso afidhanno gede kaaꞌla dandiitinanni? Hatto assitiniro, mininsa manna agurte wolewa loosoho hadhara xixxiimbanninsati ajjara dandiitanno.—Law. 3:27, 28; 1 Yoh. 3:17.

YIHOWA KAAꞌLAANCHOKKI IKKINOTA QAAGI!

19, 20. Kiristaanu Yihowa kaaꞌlannonsata huluullama hasiissannonsakkihu mayiraati?

¹⁹ Qullaawa Borro togo yitannonke: “Heeshshoꞌne woxu baxilli nookkita ikkito; nooꞌne coyinni kassi yitine heedhe. Korkaatuno [Maganu] togo yiino: ‘Ani horonta diagureemmohe, hattono horonta ditugeemmohe.’ Konni daafira waajjinummokki, ‘Yihowa kaaꞌlaanchoꞌyaati; mittoreno diwaajjeemmo. Mannu ma assannoe?’ yineemmo.” (Ibi. 13:5, 6) Tenne loosunni leellisha dandiineemmohu hiittoonniiti?

²⁰ Mitte buxicho gobbara heeꞌrannohu seeda yanna cimeessa ikke soqqamino rodii togo yiino: “Mannu duucha wote Yihowa Farciꞌraasine hagiirraammaho yaanno. Qoleno anga ajjino roduuwi nafa duuchanka wote dancha gede uddidhannotanna wolu manniwiinni lowo geeshsha woyyitannota huwatino.” Kuni Yesuusi balaxxe Maganu Mangiste hasidhannori afidhanno yee albanni qaale einoreeti. (Mat. 6:28-30, 33) Ee iimi Anniꞌne Yihowa kiꞌne baxannoꞌne; hattono isi ayewoteno kiꞌnerano oosoꞌnerano woyyinorella assanno. “Woꞌmu wodaninsanni iso addaxxitannore jawaachishara, Yihowa ille uulla woꞌmate aana kawanna kaꞌa laꞌanno.” (2 Zee. 16:9) Isi maatete heeshshonna maalaamittete coyeno ikko wole coyibba lainohunni hajajo uyinonkehu uminke xiqimera yeeti. Hajajosi agadhanke, iso banxeemmotanna addaxxineemmota leellishshanno. “Magano baxate yaa hajajosi agadhate; hajajosino qarrissannota diꞌꞌikkitino.”—1 Yoh. 5:3.

21, 22. Yihowa addaxxattota leellishate murcidhe kaoottohu mayiraati?

²¹ Ediwaardo togo yiino: “Minaamaꞌyanna oosoꞌyawiinni baxxe heeꞌroommo yanna galagale qole afeemmokkita afoommo; kayinni hatteera gaabbanni calla diheeꞌreemmo. Alba ledoꞌya loossannori durooꞌmitinoha ikkirono, hagiirraamma diꞌꞌikkitino. Maatensa mereero buutote qarri no. Ninke maate kayinni lowo geeshsha hagiirraamete! Qoleno tenne gobbara noori wolu roduuwi buxane ikkiturono, heeshshonsa giddo ayyaanaamittete coye balaxisiissanno gari dhagge ikkannoe. Ninke baalunku Yesuusi coyiꞌrino qaali heeshshonke giddo woꞌmanna laꞌnanni heeꞌnoommo.”—Maatewoosi 6:33 nabbawi.f

²² Waajjitooti! Yihowara hajajamanna iso addaxxa doodhi. Magano, galtekkinna oosokki baxakki maatekkira dancha qaete anna ikkatto gede kaaꞌlitannohe. Hatto ikkiro, ‘Yihowa kaaꞌlaanchokki’ ikkinota heeshshokkinni laꞌꞌatto.