Soqqanshonke Isilanchimma Woyyeessiꞌra—Dancha Duduwo! Yitanno Biroshere Horoonsiꞌne Xullichoho Heeꞌne Xiinxallo Hanafisiisa
Hasiissannohu Mayiraati? Manna rosaano assate, Maganu Qaale rosiisa hasiissannonke. (Mat. 28:19, 20) Uyinoonninke uduunnicho horoonsiꞌneemmoha ikkiro baalunku halaale danchu garinni rosiisa dandiineemmo. Maganuwiinni Dayinoha Dancha Duduwo! yitanno biroshere qixxeessinoonnihu mannaho halaale rosiinseemmo gede roorenkanni ninke kaaꞌlateeti. Hakko daafira, tenne biroshere qaete anna umo hasaawinseemmo wote xullichoho heeꞌnenni Qullaawu Maxaafi xiinxallo hanafisiisate horoonsiꞌra dandiineemmo.
Konni Aganira Togo Assate Woꞌnaalle:
Qullaawa Maxaafa xiinxallisate hasatto heedhannoꞌne gede huuccatto assidhe. Qoleno, Qullaawu Maxaafi xiinxallo hanafisiissinanni gedenna halaale dancha gede rosiissinannire ikkate Yihowa kaaꞌlannoꞌne gede huuccidhe.—Fil. 2:13.
Maatete magansiꞌraꞌne woy gillete xiinxalloꞌne assidhinanni wote, mannu ledo hasaawa hanaffinanni gari surreꞌnera qaꞌma geeshsha rosiisidhe. Togo assitinanniha ikkiro soqqanshote yannara waajjitinikkinni manna hasaawisanna xullichoho heedhinenni Qullaawu Maxaafi xiinxallo hanafisiisa dandiitinanni.