“Kaajjitine Uurre, Shashshafantinoonte”

1-2. Kiristaanu jawu mini gede ikkinohu ma garinniiti? (1 Qorontoosi 15:58)

JAAPPAANETE Tookiyo katamira 1978nni 60 fooqe afiꞌrinoha jawa mine minnoonni. Konni katamira duucha woyite baatto huxidhanno daafira, mannu kuni mini hiitto ikke uurranno yee hedino. Kuni mini kaajje uurranno gede assinori maati? Konne mine mintu maandisooti minu kaajjado ikkanno gedenna baatto huxidhanno woyite milli yiirono diigamannokki gede assite mintino. Kiristaanuno konni mini gedeeti. Ma garinni?

² Mittu Kiristaanchi kaajje uurrannohanna hasiisanno woyite kayinni hedinore agurannoha ikka hasiissannosi. Kuni Kiristaanchi Yihowa seeriranna biddishshisira hajajamate mitte giddohanna shashshafamannokkiha ikka hasiissannosi. (1 Qorontoosi 15:58, (NW) nabbawi.b) Isi ‘owaatahonna’ muratinoho. Kayinni hasiisannohanna dandiinannire ikkiro hedinore agura hasiissannosi. (Yai. 3:17) Togoo Kiristaanchi ani yoommoti calla ikkito diyaanno; kayinni assa hasiissannore lashshi asse diaguranno. Konni birxichira shashshafammeemmokkire ikka dandiineemmo gara ronseemmo. Qoleno Sheexaanu ammananke shoshshoggishate woꞌnaalannota onte doogonna isi xagarro gargadha dandiineemmohu hiittoonniitiro ronseemmo.

KAAJJINE UURRA DANDIINEEMMOHU HIITTOONNIITI?

3. Soqqamaasinete Looso 15:28, 29te Yihowa fushshinoha hiikkonne seera kulloonni?

³ Seera fushshannohu Yihowa woꞌmanka woyite mannisira xawe leellanno biddishsha aanno. (Isa. 33:22) Lawishshaho umi xibbi diro heeꞌrinohu aliidi bisi Kiristaanu ammaname assa hasiissannonsaha sase coye qummi assino; insano: (1) kaphu maganna gimbe Yihowa calla magansiꞌrate, (2) mundee qullaawa asse laꞌꞌatenna (3) Qullaawu Maxaafiha amanyootu seera seekke harunsate. (Soqqamaasinete Looso 15:28, 29 nabbawi.) Xaa yannara Kiristaanu konne sasenka coye ammaname assa dandaannohu hiittoonniiti?

4. Yihowa calla magansiꞌneemmota leellisha dandiineemmohu hiittoonniiti? (Yohaannisi Ajuuja 4:11)

⁴ Kaphu maganna gimbe Yihowa calla magansiꞌneemmo. Yihowa Israeele iso calla magansidhanno gede hajajinonsa. (Mar. 5:6-10) Yesuusino Daawuloosi fonqolisi yannara Yihowa calla magansiꞌra hasiissannonketa kulino. (Mat. 4:8-10) Hakko daafira kaphu maganna dimagansiꞌneemmo. Qoleno ammaꞌnote massagaanonna poletiku gashshaano, woy muuziiqunninna ispoortetenni tenne alamera maccare ikkitinore magannate gede assine dilaꞌneemmo. ‘Baalankare kalaqinoha’ Yihowa calla magansiꞌneemmo hattono isira ammanammeemmo.—Yohaannisi Ajuuja 4:11 nabbawi.

5. Yihowa heeshshonna mundee qullaawa assine laꞌneemmo gede fushshino seerira hajajammeemmohu mayiraati?

⁵ Yihowa heeshshonna mundee qullaawa assine laꞌnammora fushshino seerira hajajammeemmo. Mayira? Korkaatuno Yihowa mundee isi uyinonketa muxxe elto yaano heeshsho riqibbannota kulino. (Lew. 17:14) Yihowa umo mannu ooso saadate maala ittanno gede fajji woyite mundee ittannokki gede hajajino. (Kal. 9:4) Isi Israeelete mannira Muse seera uyi woyiteno tenne hajajo wirro kulino. (Lew. 17:10) Qoleno isi umi xibbi diro heeꞌrinohu aliidi bisi widoonni baalunku Kiristaani ‘mundeetewiinni xeertiꞌranno’ gede hajajino. (Soq. 15:28, 29) Xagisiꞌneemmo woyite konni biddishshira hajajammeemmo.c

6. Yihowahu amanyootu seeri garinni heeꞌrate maa assa hasiissannonke?

⁶ Yihowaha amanyootu seera seekkine harunsineemmo. (Ibi. 13:4) Soqqamaasinchu Phaawuloosi xawe leellanno lawishsha horoonsiꞌre tenne gobba yorto “shiiyye” yiino; hatto yaa gara ikkitinokkita maalu yorto giwate murciꞌra hasiissannonke yaate. Amanyoote bainore assineemmo gede xixxiiwannonkeha aye coyeno laꞌꞌa woy assa qoropha hasiissannonke. (Qol. 3:5; Iyo. 31:1) Qoleno gara ikkinokkire assate fonqolammeemmo woyite woy Maganu ledo noonke jaalooma hunara dandaannori tuncu yaannonke woyite togoo coye bayichonkonni giwa hasiissannonke.

7. Ma assate murciꞌra hasiissannonke? Mayira?

⁷ Yihowa ‘woꞌmu wodaninkenni hajajammammosira’ hasiꞌranno. (Rom. 6:17) Isi asse yaannonkeri woꞌmanka woyite kaaꞌlannonkereeti; hattono seerisi disoorramannoho. (Isa. 48:17, 18; 1 Qor. 6:9, 10) Yihowa hagiirsiisate dandiinummore baala assineemmo; hattono faarsaanchu yiinota yineemmo; isi “Reyammo geeshsha wogakki agadhate murciꞌroommo” yiino. (Far. 119:112) Ikkirono Sheexaanu ammananke shoshshoggishate woꞌnaalanno. Isi tenne assate hiittenne hayyo horoonsiꞌranno?

SHEEXAANU AMMANANKE SHOSHSHOGGISHATE WOꞌNAALANNO GARA

8. Sheexaanu darammeemmo gede asse ammananke shoshshoggishate woꞌnaalannohu hiittoonniiti?

⁸ Darte. Daawuloosi ammananke shoshshoggishate ganne gawajjinanninke gedenna coyinni xissiinsanninke gede assanno. Isi hasatto ninke ‘egemme’ Yihowa ledo noonke jaalooma hunate. (1 Phe. 5:8) Umi xibbi diro heeꞌrino Kiristaani Yihowara ammaname heeꞌrate murciꞌrino daafira waajjishiinshoonninsa, gannoonninsa hattono mito shinoonni. (Soq. 5:27, 28, 40; 7:54-60) Sheexaanu xaa yannarano darammeemmo gede assa diagurino. Ruusiyahonna wole gobbuwara noore ammanate roduuwanke beebba assiꞌnanni heeꞌnoonni; hattono gibbannonkeri roduuwanke wolu garinni gawajjitannonsa.

9. Goꞌle daanno fonqolo qoropha hasiissannota leellishanno lawishsha kuli.

⁹ Goꞌle daanno fonqolo. Sheexaanu xaaddote siannotano agurranna goꞌle ‘xagaranno.’ (Efe. 6:11) Hanni Boobi yinanni rodii woꞌnaalsha laꞌno; isi darre xaginsasira hospitaale haꞌrino. Boobi ikkirino ikkiro horo mundee adhannokkita akimootaho kulino. Xagisannosi akimichi tennera sumuu yiino. Ikkirono, darre gombasira albaanni noo hashsha maatesi isiwiinni hadhuhu gedensaanni mittu akimichi isiwa daye, mundee aa hoongasira dandiinannita kayinni ikkinare anfoonnikki daafira mundee qixxeessa hasiissannota kulisi. Akimichu hatto yiinohu maatesi ledosi nookki daafira Boobi hedinore aguranno yee hede ikkara dandaanno. Kayinni Boobi ikkirino ikkiro mundee adhannokkita kule ammanasinni kaajje uurrino.

10. Mannu hedo woshshaadote yineemmohu mayiraati? (1 Qorontoosi 3:19, 20)

¹⁰ Mannu hedo. Yihowara hajajamannokki manni hedanno garinni hendeemmoha ikkiro, Yihowanna seerasi lashshi assinammora dandiineemmo. (1 Qorontoosi 3:19, 20 nabbawi.) Duucha woyite, “tenne gobba egenno” maalu hasatto wonshinanni gede kakkayissanno. Phergamooninna Tiyaxiroosi heeꞌrannohu boodu Kiristaani hakko katamira heeꞌranno manni gede kaphu maganna magansiꞌranna foora hanafino. Insa foorre lashshi assite saꞌino daafira Yesuusi lamenta songo kaajjishe amaalino. (Aju. 2:14, 20) Xaa yannarano mannu gara ikkinokkire assineemmo gede xixxiiwannonke. Maatenke miillanna egenninoommo manni quwa saꞌnoommohu gede asse coyiꞌraranna Yihowa seera diingeemmo gede assate woꞌnaalara dandaanno. Lawishshaho insa amanyootunni xuru nookkire ikkine heeꞌra waaga afidhinokkihu gedenna Qullaawu Maxaafihu amanyootu seeri yannankera kaaꞌlannori nookkihu gede assite coyidhara dandiitanno.

11. Ammanamme heeꞌrate maa qoropha hasiissannonke?

¹¹ Mito woyite Yihowa aanno biddishshi xawe leellannokkiha lawankera dandaanno. ‘Borreessine worroonnihunni saꞌne haꞌrate’ fonqolammeemmoha nafa ikkara dandaanno. (1 Qor. 4:6) Yesuusi waro heedhinori ammaꞌnote massagaano togoo soꞌro loossino. Insa Seeru aana uminsa seera ledde mannaho lowo duha duhisiissino. (Mat. 23:4) Yihowa Qaalisinna dirijjitesi widoonni xawe leellanno biddishsha aannonke. Isi fushshino biddishshi aana wolere lendeemmo gede assannonkeri dino. (Law. 3:5-7) Hakko daafira Qullaawu Maxaafi giddo borreessine worroonnihunni disaꞌneemmo; woy ammanate roduuwinkete uminsa hajora seera difushshineemmo.

12. Sheexaanu ‘haafa awaawursha’ horoonsiꞌre manna soꞌrisiisannohu hiittoonniiti?

¹² Awaawursha. Sheexaanu manna soꞌrisiisatenna babbadate ‘awaawurshanna tenne alameha haafa coye’ horoonsiꞌranno. (Qol. 2:8) Lawishshaho, umi xibbi diro mannu hedo, Qullaawa Borro aana xintaminokkiha Ayihudete rosonna Kiristaanu Muse Seera agadha hasiissannonsa yaanno roso horoonsiꞌrino. Togoo rosi mannu addu hayyo Buicho ikkinoha Yihowa illachishannokki gede assannoha ikkino daafira soꞌrisiisannoho. Xaa yannarano Sheexaanu xaadooshshu buusinna dagoomittete webisayite widoonni, poletiku massagaano haafa hexxonna kaphu duduwo tareessitanno gede assanno. Koroonu yannara togoohu duuchu coyi ikkanna laꞌnoommo.d Soꞌrisiisaano coyidhannore macciishshanno manna yaaddo amaddinonsa; dirijjitenke uyitanno biddishsha macciishshitinori Yihowa Farciꞌraasine kayinni tenne yaaddonni gattino.—Mat. 24:45.

13. Hedonke billaallitannokki gede qoropha hasiissannonkehu mayiraati?

¹³ Hedonke billaallitanno gede assannore. “Woyyanno coye” woy roore hasiisanno coye dea dihasiissannonke. (Fil. 1:9, 10) Hedonke billaallituro roore hasiisannore agurre yannankenna wolqanke mulla guxxinammora dandiineemmo. Heeshshonke giddo, ita, aga, boohaaranna maalaamittete looso loosa balaxisiinseemmoha ikkiro, kuni rosamino coyi nafa hedonke billaallisara dandaanno. (Luq. 21:34, 35) Tenneno agurranna barru baala dagoomittetenna poletiku daafira kullannita ise iseneewa sumuu yitannokki odoo nabbambeemmo woy macciishshineemmo. Kuri coyibba hedonke billaallissara wodha dihasiissannonke. Qoropha hoongummoro hedonkenninna wodaninkenni mittu ragira halammammora dandiineemmo. Sheexaanu aleenni kulli hayyo baala horoonsiꞌrannohu ammananke shoshshoggishateetinna gara ikkinokkire assineemmo gede assateeti. Hanni isi xagarro gargadhanna kaajjine uurra dandiineemmohu hiittoonniitiro laꞌno.

KAAJJINE UURRA DANDIINEEMMOHU HIITTOONNIITI?

14. Yihowa wido ikkine heeꞌneemmo gede kaaꞌlannonkehu mittu coyi maati?

¹⁴ Heeshshokki Yihowara sayisse oottohunna cuuamoottohu mayiraatiro hedi. Kuri coyibba assoottohu Yihowa wido ikka hasiꞌrootto daafiraati. Hanni halaale afiꞌroottota ammanatto gede kaaꞌlinoheri maatiro galagalte hedi. Yihowa daafira halaale ikkitino egenno afiꞌrootto hattono iimi Annakki ayirrisanna baxa hanafootto. Ammanakki lexxituta maaro eootto. Busha rosicho agurootto hattono Yihowa fajjo ledo sumuu yaanno garinni heeꞌra hanafootto. Maganu cubbokki gatona yiinota afittoti fooliishsho afiꞌrootto. (Far. 32:1, 2) Songote gambooshshe haꞌranna rosoottoha dhagge ikkanno coye wolootaho kula hanafootto. Heeshshokki Yihowara sayisse oottohanna cuuamootto Kiristaancho ikkootto daafira xa heeshshonniwa massitanno doogora hadhanni nootto; hattono tenne doogonni fulattokki gede murciꞌrootto.—Mat. 7:13, 14.

15. Maganu Qaale xiinxallanna hiinca kaaꞌlitanno yineemmohu mayiraati?

¹⁵ Maganu Qaale xiinxalli hattono hiinci. Mitte haqqicho rumuddase baattote giddora lixxe eꞌuro kaajjite uurritannonte gede, ammanankeno Maganu Qaali aana dancha gede rumuxxitinota ikkituro ammanamme heeꞌra dandiineemmo. Haqqicho lophitanno woyite rumuddaseno lixxanninna halaꞌlitanni hadhanno. Ninkeno Maganu Qaale xiinxallineemmonna hiincineemmo woyite ammananke kaajjitanni hadhanno; hattono Maganu doogo baalunkurinni woyyitinota ikkitinota albinni roore ammanneemmo. (Qol. 2:6, 7) Yihowa biddishshi, amaalenna agarooshshi hunda heedhino soqqamaanosi kaaꞌlino gara hiinci. Lawishshaho sokkaasinchu, Hiziqeeli ajuujatenni lainoha qullaawu miniha mitto mittonka coye bikki woyite Hiziqeeli seekke laino. Tini ajuuja Hiziqeeli jawaachishshinosi; tenne xaggenni ninkeno Yihowa xalala magansiꞌra daafira fushshino biddishshira ammanamme heeꞌneemmo gede kaaꞌlanno roso ronseemmo.e (Hiz. 40:1-4; 43:10-12) Maganu Qaali giddo nooha hawa gede huwantannikki coye xiinxallatenna hiincate yanna gaaꞌmineemmoha ikkiro ninkeno horo afiꞌneemmo.

16. Shafamannokki wodani heeꞌrannosi gede assiꞌrasi Boobi kaaꞌlitinosihu hiittoonniiti? (Faarso 112:7)

¹⁶ Wodaniꞌne shafamannokki gede assidhe. Moote Daawiti Yihowara noosi baxilli horo baꞌꞌara dandaannokkita coyiꞌrino; isi “Magano! Wodaniꞌya dishafamannoho” yee faarsino. (Far. 57:7) Ninkeno Yihowa woꞌmunni woꞌma addaxxine wodaninke shafamannokki gede assiꞌra dandiineemmo. (Faarso 112:7 nabbawi.) Hanni togo assiꞌra aleenni kulliha Boobi kaaꞌlitinosi gara laꞌno. Isi ikkinannita dianfoonnina mundee qixxeessa hasiissanno yine kullisita, mittoreno huluullamikkinni mundee uyinannisi gede assannori kalaqamiro hospitaaletenni bayichonkonni fule haꞌrannota kulino. Gedensoonni Boobi “Mittoreno dihuluullamoommo; hattono diyaadoommo” yiino.

17. Boobi woꞌnaalshinni maa ronseemmo? (Misileno lai.)

¹⁷ Boobira wodanisi shafaminokkihu hospitaale eara seeda yannara albaanni ammaname heeꞌrate murciꞌrino daafiraati. Umihunni, isi Yihowa hagiirsiisa hasiꞌrino. Layinkihunni, Qullaawu Maxaafinna Qullaawu Maxaafi aana xintantino borruwanke heeshshotenna mundee qullaawa asse laꞌꞌate daafira mayitannoro seekke xiinxallino. Sayikkihunni, Yihowa biddishsha harunsa hegere atoote abbitannota ammanino. Ninkeno iillannonke fonqoli ikkihano ikkiro shafamannokki wodani heeꞌrannonke gede assiꞌra dandiineemmo.

18. Yihowa addaxxate daafira Baaraaqi lawishshinni maa ronseemmo? (Aaniidi qoolira noo misile lai.)

¹⁸ Yihowa addaxxi. Hanni Baaraaqi Yihowa biddishsha addaxxino daafira coyi qiniinosi gara laꞌno. Israeelete mannira wonqonna amaxxo nafa noonsakkiha ikkirono, Yihowa Baaraaqi Kanaꞌꞌaani olanto roorricha Sisaaranna lowoha olu uduunne afidhino olantosi ledo olamanno gede hajajinosi. (Eje. 5:8) Masaalaancho Diboora Baaraaqi ilaalunni xawo dirre Sisaaranna 900 faradi gaare afidhino olantosi ledo olamanno gede kultinosi. Xawoho lowo geeshsha doddanno faradi gaarera noo olanto ledo olama lowo geeshsha qarrissannota ikkiturono Baaraaqi kayinni hajajamino. Olanto Taaboori ilaalinni dirrituta Yihowa iiminni biite xeena dirrisino. Sisaarata olu faradi gaare lixu amadino; hattono Yihowa Baaraaqira qeelle uyinosi. (Eje. 4:1-7, 10, 13-16) Hatteente gede, Yihowa isonna dirijjitesi uyitannonke biddishsha addaxxineemmoha ikkiro ninkerano qeelle aannonke.—Mar. 31:6.

KAAJJITINE UURRATE MURCIDHE

19. Kaajjite uurra hasiꞌrattohu mayiraati?

¹⁹ Kaajjine uurrate woꞌmanka woyite sharrama hasiissannonke. (1 Xim. 6:11, 12; 2 Phe. 3:17) Dartu, goꞌlino fonqoli, mannu hedo, awaawurshunna hedonke billaallisannori ammananke shoshshoggishara wodhinoonke. (Efe. 4:14) Hatteentenni Yihowa calla magansiꞌrate ammanamme heeꞌno, kaajjine uurrino, hattono seerisira hajajamate shashshafammeemmokkire ikkino. Kayinni quwa saꞌneemmokkireno ikka hasiissannonke. Aananno birxichira Yihowanna Yesuusi quwa saꞌannokkire ikkite guuta lawishsha ikkitinonke gara ronseemmo.