XIINXALLO 6

Qummeeshshu Hedo Xawisa

Yohaannisi 10:33-36

ASSA HASIISSANNOHERE: Qummeeshsha nabbabbe calla wole hedowa saꞌooti. Macciishshaano nabbawootto qummeeshshinna xawissanni nootto hedo mereero noo xaadooshshe huwattanno gede assi.

KONNE ASSA DANDAATTO GARA:

Qara qaalla badi. Qummeeshsha nabbawitto gedensaanni, xawissanni noottote qara hedo ledo xaadooshshe afidhino qaalla luphi assi. Togo assate, kuri qaalla marro higge nabbawa, woy macciishshaano hattee qaalla badde affanno gede kaaꞌlitanno xaꞌmo xaꞌma dandaatto.

Qummeeshshu hedo xawisate wole qaalla horoonsiꞌrattoha ikkiro, macciishshaanote Qullaawu Maxaafinni nabbawitto qaallanna xawissanni nootto hedo mereero noo xaadooshshi leellinsakki gatannokki gede qorophi.
Hedo luphi assite xawisi. Mitto qummeeshsha nabbawatto korkaata balaxxe kulittoro, qummeeshshunniti qara qaalla hakko korkaati ledo mayi xaadooshshe afidhinoro xawisi.

Qummeeshsha xawisatto woyite Qullaawa Maxaafakki dibbooti. Tini, macciishshaano coyiꞌratto qaalla nabbawootto qummeeshshi ledo xaadooshshe afidhinota huwattanno gede kaaꞌlitanno.
Qummeeshshu hedo mitte mittenta xawisate woꞌnaaltooti. Lallawonnite qara hedo ledo xaadooshshe afiꞌrinokkire tittirte kula qorophi. Macciishshaano hatte hajo daafira konni albaanni maa affinoro hedde, qara hedo huwattanno gede kaaꞌlate mageeshshire coyiꞌra hasiissannohero wodanchi.