Maganu Qaali Soorraminoni?

Mitu manni, ‘Maganu Qaali soorraminohalla ikki?’ yee huluullamanno. Masaalaanchu Isayaasi, Maganu qaali “hegerera kaajje heeꞌranno” yee borreessino. (Isayaasi 40:8) Maganu sokka soorrantukki yannanke geeshsha iillitinota huluullammeemmokkihu mayiraati?

Maganoho, Qaalisi baikkinninna daafamikki heeꞌranno gede assate wolqa noosi. Biꞌree waro Qullaawa borro angatenni galchitannori, mitturino ledamannokki gede, soorramannokki gedenna xeannokki gede qorophite mitte mittenta fidale kiirtanni galchitanno. Ikkirono mannu guuta ikkinokki daafira, mitootu galchitu woyite hakkeya sokka soorrannokkire shiinqaaddare sodhino.

YANNANKERA NOOTI QULLAAWA BORRO HUNDITA MAGANU SOKKA IKKITINOTA BUUXA DANDIINEEMMOHU HIITTOONNIITI?

Yannankera, biꞌre angatenni galchinoonniti lowo kume ikkitannoti Qullaawa Borro no. Angatenni galchinoonniti mitte borro woletewiinni shiimare baxxitannoha ikkiro, wole borro ledo heewisiinse soꞌraminore bande afa dandiinanni.—Ledde afate, jw.org/sid aana “Qullaawu Maxaafi Soorraminoni?” yaanno birxicho lai.

Lawishshaho, hanni 1947nni Reyote Baari mule noo godi giddo anfoonnita Reyote Baari Xaaxo yinannita biꞌree borro laꞌno. Qullaawa Borro gafa amaddinoti tini biꞌree borro, lame kume diro saꞌanno yanna albaanni qixxeessinoonnite. Egennaammu angatenni galchinoonnita tenne hundi borro yannankera noote Qullaawa Borro ledo heewisiisse laꞌino. Hakkiinni maa buuxxinoyya?

Fullahaano, xaa yannara noohu Maganu Qaali hunda borreessinoonnihu ledo mitto ikkinota buuxxino.a Angatenni galchinoonnita hundi borro haja assine xiinxallinanni woyite, anganke nooti Qullaawa Borro hundita Maganu sokka ikkitinota buuxa dandiinanni. Maganu Qullaawu Qaalisi giddo noo sokka, soorrantukkinni yannanke geeshsha iillitanno gede assinota tennenni huwata dandiineemmo.

Hakko daafira, Maganu Qaali soorraminokkita woꞌmunni woꞌma hawaqiꞌne nabbawa dandiineemmo. Hanni tenne masaalaanote widoonni Maganu daafira maa ronseemmoro laꞌno.