Koronta Ara-politiky​—Ino ty Volanin’ny Baiboly?

Nanjary fa mahazatsy henanizao ty hasatà ataon’olo amy ty manam-pahefà.

Fa manino ro manjeky marè raha zay henanizao? Mbo ho tampitsy avao va raha io ndraiky andro any? Ino ty volanin’ny Baiboly?

Fa nambara mialoha hoe hisy ty fisaratsaraha ara-politiky

Fa nivola mialoha ty Baiboly hoe ho maro ty olo hana toetsy mampisy koronta noho tsy fifanaraha amy “andro farany,” zany hoe amy androntsika zao.

• andro farany, le hisy fotoa sarotsy tsy mora atrehy. Fa ty olo . . . tsy hahay hisaotsy, ho mora mivaliky, . . . tsy ho azo ifanaraha, . . . hasiaky marè, . . . ho mpamadiky, hahery loha, hirengirengy.”​—2 Timoty 3:1-4.

Fa nivola mialoha koa ty Baiboly hoe hisy koronta amy tany toy iaby, anatini-zay ty fizizoan’olo amy fanjakà noho ty koronta ara-politiky. (Lioka 21:9, fanamariha ambany pejy) Fe ndre zay, le tsy haharitsy zisiky farany raha rey.

Kely sisa le ho tampitsy ty koronta ara-politiky

Hazavanin’ny Baiboly fa hosoloa-Ndranahary amy ty Fanjakàny lafa atao fanjakàn’olombelo iaby.

• fanjakà tsy ho rava zisiky farany [azy Ndranaharin’ny lanitsy iny] . . . Hotorotoroeny noho haravany fanjakà [hafa] iaby reo, fa ie ho eo avao zisiky amy fotoa tsy voafaritsy.”​—Daniela 2:44.

Tsy hisy sasy ty koronta sady hiharo raiky ty olo iaby lafa manday ty Fanjakà-Ndranahary.

• hoe “Anakin’ny Mpanjakan’ny Fiadana” Jesosy Kristy, azy Mpanjakan’ny fanjakà io iny. ‘Tsy hisy farany ty fiadana’ lafa ie manday.​—Isaia 9:6, 7.

• Ndre henanizao, le fa mianatsy hiay anatin’ny filamina ty olo fehezin’ny Fanjakà-Ndranahary. Vokatsini-zay, le zao ty volanin’ny Baiboly: “Le hanefy ty sabatsin-drozy ho sarỳ rozy, le ty lefon-drozy ho meso fandrantsanam-boaloboky. Tsy hampiranga sabatsy hifamangoa ty firenena, sady tsy hianatsy aly sasy.”​—Isaia 2:3, 4.

Laha mila fanazavà fanampiny iha, le vakio ty lahatsoratsy hoe “Inona no Hataon’ny Fanjakan’Andriamanitra?.” Henteo koa ty video hoe Ino Fanjakà-Ndranahary Zao?