Mitandrema Avao mba Tsy ho Resin’ny Fakam-panahy

1-2. a) Ino ty nampitandremin’i Jesosy an’ny mpianatsiny rey? b) Nanino mpianatsy rey ro nanenga an’i Jesosy? (Henteo koa sary reo.)

“MAZOTO avao mbakany ty sain’olombelo, fa ty nofotsiny ro malemy.”a (Mat. 26:41b) Hita baka amy raha nivolanin’i Jesosy reo fa hainy hoe tsy lavorary tsika ka hanao fahadisoa. Fe ta hampitandrina antsika koa ie hoe tsy tokony hatòky tena marè tsika. Lera vitsivitsy talohan’ny nivolanan’i Jesosy an’ny raha reo, le nivola mpianatsiny rey fa tsy hiala azy mihintsy rozy. Hita hoe natoky tena marè rozy. (Mat. 26:35) Antony soa aloha ro nahavy an-drozy hivola ani-zay. Fe tsy hain-drozy hoe mety tsy hahavita hanao raha soa rozy lafa miatriky raha sarotsy. Farany nampitandrina an-drozy Jesosy hoe: “Miambena noho mivavaha avao mba tsy ho resin’ny fakam-panahy.”​—Mat. 26:41a.

² Mampalahelo fa tsy nahavita niamby mpianatsy rey. Akory ty nataon-drozy lafa nisambory Jesosy? Niaraky aminy avao va rozy sa natahotsy le nilay? Tsy nitandrina rozy ka lasa niala an’i Jesosy, kanefa fa nivola rozy hoe tsy hiala azy mihintsy.​—Mat. 26:56.

3. a) Manino tsika ro tsy tokony hatòky tena marè laha tsy ta hivaliky amy Jehovah? b) Ino ty hodinihintsika amy lahatsoratsy toy ato?

³ Mila mitandrina tsika mba tsy hatòky tena marè. Marina aloha fa tapa-kevitsy tsika hoe tsy hanao raha hampalahelo an’i Jehovah. Fe tsy lavorary tsika sady mora resin’ny fakam-panahy. (Rom. 5:12; 7:21-23) Laha tsy mitandrina tsika, le mety tsy hampanino antsika ty hanao raha fa haintsika hoe raty. Ka laha tsy ta hivaliky amy Jehovah noho Anakilahiny iny avao tsika, le mila manaraky an’ny torohevitsin’i Jesosy iny ka mitandrina avao mba tsy ho resin’ny fakam-panahy. Hanampy antsika hanao ani-zay fianara toy. Hodinihintsika voalohany hoe amy raha manao akory tsika ro tsy maintsy mitandrina. Bakeo horesahintsika hoe akory ty atao mba hanohera fakam-panahy. Farany, hodinihintsika hoe ino ty hanampy antsika hiamby avao.

AMY RAHA MANAO AKORY TSIKA RO TSY MAINTSY MITANDRINA?

4-5. Manino tsika ro mila mitandrina avao ndre amy fahotà maliniky aza?

⁴ Tsy de bevata ty fahotà sisany laha ampitovizy amy fahotà hafa. Fe mety hanimba ty fifandrambesantsika amy Jehovah raha rey. Tsy zay avao fa mety hitariky antsika hanao fahotà bevata koa raha rey.

⁵ Miatriky fakam-panahy tsika iaby. Fe samby mana ty raha mampalemy azy tsika kiraidraiky. Ao ty mialy mafy mba tsy hanao fahotà bevata, na hanao karaza fandaisam-bata maloto, na halàm-panahy hanahaky ty toe-tsaini-zao tontolo zao. Mety mialy ay, ohatsy, ty olo raiky mba tsy hijangajanga. Misy koa mbo mialy mafy mba tsy hanao fanao maloto, ohatsy hoe mikasikasiky ty maha lahilahy na ty maha ampela azy, na manenty sary tiva. Ty sisany mbo mialy mafy mba tsy hatahotsy olo, tsy ho mora meloky, na tsy hirengirengy. Haintsika amy zay ty antony nahavy an’i Jakoba nivola hoe “tsapà ty kiraidraiky lafa voatarikin’ny faniriany noho maneky ho resin’ny raha zay.”​—Jak. 1:14.

6. Ino ty raha tsy maintsy ekentsika?

⁶ Hainao va hoe amy raha manao akory iha ro mora resin’ny fakam-panahy? Hahita loza tsika laha mieritseritsy fa tsy mana fahalemea na mieritseritsy fa matanjaky ara-panahy ka tsy hanao raha raty mihintsy. (1 Jaona 1:8) Tiarovo fa nivola Paoly hoe mety ho resin’ny fakam-panahy ndre ty olo “matotsy” aza laha tsy mitandrina. (Gal. 6:1) Tsy maintsy mieky zany tsika hoe mana fahalemea, le ataontsika hay hoe amy raha manao akory tsika ro tsy mahatanjaky ay.​—2 Kor. 13:5.

7. Amy raha manao akory tsika ro tokony hitandrina soa? Manomeza ohatsy.

⁷ Ino ty tokony hataontsika laha vo haintsika hoe amy raha sisany tsika tsy mahatohitsy fa mora resin’ny fakam-panahy? Miezaha mafy mba ho vitanao ty hanohitsy an’ny raha rey! Eritsereto, ohatsy, tamy andron’ny Baiboly. Nisy lakorobe ty tanà, le amy vavahadiny eo matetiky ro mora iliran’ny fahavalo. Tsy maintsy nasia mpiamby maro zany eo mba hiaro an’ny tanà iny. Mila manao manahaky ani-zay koa tsika. Lafa haintsika hoe misy raha mampalemy antsika, le amin’iny mihintsy tsika ro tena mila mitandrina.​—1 Kor. 9:27.

AKORY TY HANOHERANTSIKA FAKAM-PANAHY?

8-9. Ino ty tokony ho nataon’ny pamaraky voaresaky amy Ohabolana toko faha-​7 ao iny, amy zay ie tsy ho nivoatariky hanao fahotà bevata? (Ohabolana 7:8, 9, 13, 14, 21)

⁸ Akory ty hiarovantsika ty vatantsika mba tsy hanota? Diniho ty raha azontsika ianara baka amy pamaraky resahin’ny Ohabolana toko faha-​7 ao. Nijangajanga tamy ampela raty fandaisam-bata raiky zay ie. Mivola ty andininy faha-22 fa “tampoky teo” le nanaraky azy pamaraky io. Atao raha tampoky zay ty raha nahazo azy. Fe hita amy andininy aloha eo fa nisy raha vitsivitsy nataony talohani-zay, ka nitariky azy tsikelikely hanota.

⁹ Ino tse ty nataon’ny pamaraky io ka nitariky azy hanao fahotà bevata? Voalohany, “nandalo tamy sisin-dala marìny an’ny tranon’ny ampela [raty fandaisam-bata] iny ie” tamy andro harivariva. Bakeo ie, nandeha tamy lala mana amy tranon’ny ampela iny any. (Vakio Ohabolana 7:8, 9.) Nihitany amy zay ampela iny, fe tsy niala teo ie. Vomaiky aza nengany hanoroky azy ampela iny. Nijanjy koa ie lafa nivola taminy ampela iny hoe baka nanao soro iharoa, satria teany hino pamaraky io hoe tsy olo raty ie. (Vakio Ohabolana 7:13, 14, 21.) Lasa nanota pamaraky iny. Tsy ho niafara amy zay anefa ie laha tsy nanao an’ny raha iaby reo.

10. Akory ty mety hahavy ty olo raiky hanao fahadisoa manahaky an’ny pamaraky iny koa?

¹⁰ Mety hahazo ty mpanompon’i Jehovah koa raha nitantaranin’i Solomona io. Mety nanao fahotà bevata ty olo raiky, le bakeo mivola ie hoe “tampoky” azy raha iny na tsy nampoiziny, farany ie nanota. Fe laha somary mandiniky ty antony nahavy azy nanota ie, le ho hitany hoe fa nisy raha vitsivitsy nataony taloha tany ka nitariky azy tsikelikely hanao fahotà bevata. Mety hoe niaraky tamy naman-draty ie, na nanao fialam-boly raty, na nanentinenty raha amy tranonkala fifandrambesa, na nandeha tamy pilasy tsy tokony handehanan’ny Kristiana. Vasa koa mety fa tsy nivavaky sasy ie, tsy namaky Baiboly, nivory, na nitory. Manahaky tamy pamaraky niresahin’ny Ohabolana iny, le tsy hoe lasa nanao fahotà bevata “tampoky” ie, fa tsy maintsy nisy raha nitariky azy tsikelikely hanao ani-zay.

11. Ino ty tokony hotandremantsika amy zay tsika tsy hanota?

¹¹ Ino ty fianara ho antsika? Tsy ty fahotà avao ro mila tandremantsika fa ty raha iaby mety hitariky antsika hanota koa. Niresaky ani-zay mihintsy Solomona lafa ie baka niresaky mikasiky pamaraky noho ampela raty fandaisam-bata iny. Ho zao ty torohevitsy nameany lafa ie niresaky mikasiky ampela iny: “Ka mandehandeha amy lalany eny.” (Ohab. 7:25) Nivola mihintsy aza ie hoe: “Ialao lavitsy ty ampela manahaky ani-zay, sady ka mihariny ty filira mana amy tranony any.” (Ohab. 5:3, 8) Ka ino ty tokony hataontsika mba hahavy antsika tsy hanota? Mila manalavitsy ze raha mety hitariky antsika hanota tsika.b Marina fa misy raha sisany azon’ny Kristiana atao, fe tsy hataontsika raha iny laha haintsika hoe mety hitariky antsika hanao raha raty.​—Mat. 5:29, 30.

12. Tapa-kevitsy hanao ino Joba, le manino raha zay ro nanampy azy tsy ho resin’ny fakam-panahy? (Joba 31:1)

¹² Mila mandramby fanapahan-kevitsy hentitsy tsika laha ta hanalavitsy ty raha mety hitariky antsika hanota. Zay mihintsy ty nataon’i Joba. “Nanao fifanekea tamy masony [ie]” mba tsy hanentinenty ampela hafa mihintsy, ka haniry hanao firaisa aminy. (Vakio Joba 31:1.) Fa tapa-kevitsy hanao ani-zay Joba ka nanampy azy tsy handranto mihintsy raha zay. Afaky manao manahaky ani-zay koa tsika ka manalavitsy ze raha mety hahavy antsika ho tratsin’ny fakam-panahy.

13. Manino tsika ro tsy maintsy mitandrina amy ty raha eritseretintsika? (Henteo koa sary reo.)

¹³ Tsy maintsy mitandrina amy ze raha eritseretintsika koa tsika. (Eks. 20:17) Mieritseritsy ty olo sisany hoe tsy mampanino ty manonofinofy manao raha raty, laha mbo tsy manatanteraky an’ny raha iny iha. Tsy marina anefa zay. Laha mieritseritsy raha raty avao ty olo raiky, le vomaiky ie mampitombo ty fanirian-dratiny. Vomaiky aza lasa sarotsy aminy ty hanohitsy an’ny raha iny. Mety mbo hieritseritsy raha raty avao aloha tsika kindraiky. Fe akory ty atao lafa miseho raha zay? Mila alantsika malaky raha iny, le miezaky tsika mieritseritsy raha soa avao. Tsy hanao fahotà bevata tsika laha manao ani-zay satria tsy nengantsika hamahatsy amintsika ao ty eritseri-draty.​—Fil. 4:8; Kol. 3:2; Jak. 1:13-15.

14. Ino koa ty hanampy antsika tsy ho resin’ny fakam-panahy?

¹⁴ Ino koa ty raha mila ataontsika laha tsy ta ho resin’ny fakam-panahy? Mila resy lahatsy tsika hoe tozoro mahasoa antsika ty mankatò ty lalànan’i Jehovah. Mety ho sarotsy amintsika kindraiky ty hampifanaraky ty raha eritseretintsika noho ty faniriantsika amy ty itiava-Ndranahary azy. Fe laha miezaky mafy manao ani-zay tsika, le hilamy soa ty saintsika.

15. Manino tsika ro hahavita hanohitsy fakam-panahy laha miezaky ho tea raha soa avao?

¹⁵ Mila miezaky tsika mba haniry raha soa avao. Laha mianatsy ‘halay ty raty noho ho tea ty soa’ tsika, le vomaiky ho tapa-kevitsy hanao raha soa sady hanalavitsy ze raha mety hitariky antsika hanota. (Amosa 5:15) Vomaiky hahavita hanohitsy fakam-panahy koa tsika laha maniry raha soa avao, ndre tampoky antsika aza ty nisehoan’ny raha zay.

16. Manino ro manampy antsika hitandrina avao ty fanaova raha ara-panahy? (Henteo koa sary reo.)

¹⁶ Akory ty hahavy antsika haniry raha soa avao? Hahavita ani-zay tsika laha miezaky manao ze raha hampitombo ty fitiavantsika an’i Jehovah. Tsy ho mora resin’ny fakam-panahy tsika laha mivory na manompo. Vomaiky aza tsika tapa-kevitsy hanao raha mampifalifaly an’i Jehovah. (Mat. 28:19, 20; Heb. 10:24, 25) Laha mamaky, mianatsy, noho mametsivetsy ty Safà-Ndranahary koa tsika, le vomaiky ho tea ty soa noho halay ty raty. (Jos. 1:8; Sal. 1:2, 3; 119:97, 101) Tiarovo fa nivola tamy mpianatsiny rey Jesosy hoe: “Mivavaha avao mba tsy ho resin’ny fakam-panahy.” (Mat. 26:41) Laha manoka fotoa hivavaha amy Babantsika an-danitsy any iny tsika, le hanampy antsika ie. Hameany hery tsika ka vomaiky ho tapa-kevitsy hampifaly azy.​—Jak. 4:8.

MITANDREMA AVAO

17. Ino ty fahalemea tsy nety resin’i Petera?

¹⁷ Azo inoa fa misy fahalemea sisany vitantsika ty nandresy azy. Fe mety misy fahalemea mbo tsy resintsika avao ndre fa niezaky tsika tanatin’ny tao maro. Diniho ty raha niseho tamy apostoly Petera. Natahotsy olo ie, le nandà an’i Jesosy intelo. (Mat. 26:69-75) Atao raha fa niresin’i Petera tahotsiny zay satria fa nahasaky nitory tanatrehan’ny Fitsarà Anabo Jiosy teo ie. (Asa. 5:27-29) Fe tao vitsivitsy tafara atoy, le tsy niaraky nihina tamy Kristiana hafa firenena rey ie satria natahotsy ty ho fahitan’ny Kristiana jiosy rey azy. (Gal. 2:11, 12) Nimpoly ndraiky tahotsin’i Petera iny. Mety mbo tsy niresiny tanteraky vasa raha io.

18. Ino ty mety hiseho ndre mieritseritsy aza tsika hoe fa niresintsika ty fahalemea sisany?

¹⁸ Mety hahazo antsika koa ty raha manahaky ani-zay. Mieritseritsy tsika hoe fa niresintsika fahalemeantsika iny, fe mety mbo himpoly ndraiky. Mbo mila mialy aminy ndraiky zany tsika. Nieky manahaky ani-zao rahalahy raiky zay: “Nahavita tsy nanenty sary tiva aho tanatin’ny folo tao. Nieritseritsy aho hoe fa afaky any iny. Fe aia koa. Sahala amy biby masiaky mivony anaty ala ala ao fahalemeako iny, ka mandiny fotoa hanafiha.” Soa avao fa tsy nikivy ie. Nieky ie hoe tsy maintsy nanao raha ie sanandro mba hialia amy fahalemeany iny, sady tsy maintsy manao ani-zay avao ie laha mbo amy tontolo raty toy eto. Tena nanampy azy koa valiny noho ty anti-panahy amy fiangona eo, ka vomaiky ie tapa-kevitsy tsy hanenty sary tiva.

19. Ino ty azontsika atao laha misy fahalemea mbo tsy mety resintsika?

¹⁹ Ino ty azontsika atao mba hahavy antsika tsy ho voatariky hanao raha raty laha mimpoly ndraiky fahalemeantsika iny? Tsy maintsy manoriky an’ny raha nivolanin’i Jesosy toy tsika: “Miambena avao.” Midika zay fa mila mitandrina avao tsika mba tsy ho resin’ny fakam-panahy. Ndre amy fotoa eritseretinao hoe tsy haharesy anao iny aza, le mbo mila mitandrina avao iha mba hanalavitsy ze raha mety hitariky anao ho tratsin’ny fakam-panahy. (1 Kor. 10:12) Anovo avao ze raha hitanao hoe fa nanampy anao handresy ty fahalemeanao. Mivola ty Ohabolana 28:14 hoe: “Sambatsy ze olo miamby avao.”​—2 Pet. 3:14.

HAHAZO FITAHIA TSIKA LAHA MITANDRINA AVAO

20-21. a) Ino ty fitahia ho azontsika laha miezaky manohitsy fakam-panahy avao tsika? b) Ino ty hataon’i Jehovah ho antsika laha miezaky mafy tsika? (2 Korintianina 4:7)

²⁰ Afaky matoky tsika fa tena handramby soa laha mitandrina avao mba tsy ho resin’ny fakam-panahy. Mety “ho falifaly tsiela” avao tsika laha manota, fe tsy hanahaky ani-zay tsika laha miay mifanaraky amy ty fitsipikin’i Jehovah. Lasa ho falifaly biby tsika. (Heb. 11:25; Sal. 19:8) Fa manino? Satria fa zay mihintsy ty namoronany antsika. (Gen. 1:27) Laha manaraky ty fitsipikiny tsika, le halio ty feon’ny fieritseretantsika. Tsy zay avao fa ho afaky hiay mandrakizay koa tsika ndraiky andro any.​—1 Tim. 6:12; 2 Tim. 1:3; Joda 20, 21.

²¹ Marina aloha hoe “malemy ty nofotsy.” Fe tsy midika zay hoe tsy afaky manao ino tsika mba hialia amy ty fahalemeantsika. Parè hanome ze hery ilàntsika Jehovah. (Vakio 2 Korintianina 4:7.) Fe tsy hery amy zao avao ro amean’i Jehovah antsika fa hery “mandilatsy ty ahin’olombelo.” Fe ndre zay, le tsy maintsy manao ze azontsika atao tse tsika mba hanohera fakam-panahy. Laha manao ani-zay tsika, le afaky matoky fa hamaly ty vavaky ataontsika Jehovah lafa tsika mangataky aminy mba hanome hery antsika. (1 Kor. 10:13) Hahavita hanohitsy fakam-panahy avao tsika satria manampy antsika Jehovah.