Tahafo ty Fomba Anandesan’i Jehovah ty Olo Nanao Fahotà Bevata

1. Tean’i Jehovah hanao akory ty olo iaby?

LAFA namoro antsika olombelo Jehovah, le nameany fahafaha mifily tsika. Mampiasa an’ny fanomeza io tsika matetiky lafa mandramby fanapahan-kevitsy. Afaky manapa-kevitsy ty olo raiky hoe hanokam-bata ho an’i Jehovah ie ka ho anisan’ny fianakaviany. Io ty fanapahan-kevitsy farany bevata azony atao. Tean’i Jehovah laha manao ani-zay ty olo iaby. Ino ty antony? Satria teany ty olo, le teany ho soa. Teany hifandramby soa aminy rozy sady teany hiay zisiky farany.​—Deot. 30:19, 20; Gal. 6:7, 8.

2. Tean’i Jehovah hanao akory ty mpanota tsy mibebaky? (1 Jaona 2:1)

² Fe ndre zay, le tsy miforosè olo hanompo azy Jehovah. Engany ty olo kiraidraiky hanapa-kevitsy mikasiky ty raha hataony. Ka manao akory laha misy Kristiana raiky vita batisa tsy manoriky ty lalàna-Ndranahary, ka manao fahotà bevata? Laha tsy mibebaky ie, le halà tsy ho anisan’ny fiangona. (1 Kor. 5:13) Fe ndre nalà tsy ho anisan’ny fiangona ie, le mbo tean’i Jehovah hibebaky noho hifandramby soa aminy ndraiky. Laha ty marina aza zay ty antony bevata nanomezany an’ny vilim-panavota iny, mba hahazoani-ze olo mibebaky fanengà hadisoa. (Vakio 1 Jaona 2:1.) Tena be fitiava Jehovah Ndranahary, le mampirisiky ty olo nanao fahotà bevata ie mba hibebaky.​—Zak. 1:3; Rom. 2:4; Jak. 4:8.

3. Ino ty hodinihintsika ato?

³ Tean’i Jehovah hanahaky azy tsika ka nambarany antsika ty fahitany ty fahotà noho ty fahitany ty olo manao fahotà bevata. Ka amy lahatsoratsy toy ato tsika le handiniky hoe akory ty ahafahantsika manahaky azy. Hodinihintsika hoe ino ty toromariky namean’i Paoly ho an’ny fiangonan’i Korinto, lafa nisy rahalahy raiky nanao fahotà bevata tamin-drozy teo. Bakeo hodinihintsika koa hoe ino ty raha nampanaovin’i Paoly an-drozy lafa nibebaky olo iny. Le amy farany ho henteantsika hoe manao akory ty fahitan’i Jehovah ty olo manao fahotà bevata.

AKORY TY NATAO LAFA NISY OLO NANAO FAHOTÀ BEVATA TAMY TAONJATO VOALOHANY?

4. Ino ty raha niseho tamy fiangonan’i Korinto tao? (1 Korintianina 5:1, 2)

⁴ Vakio 1 Korintianina 5:1, 2. Tamy lia misionera fahatelo nataon’i Paoly iny, le naharè vaovao raty baka amy fiangonan’i Korinto any ie. Vo niforo amin’io fiangona io tamy zay. Nireny fa nisy rahalahy raiky tamy fiangona io tao nanao firaisa tamy kely reniny. Tena nahamenatsy raha zay sady ndre olo ‘tsy manompo a-Ndranahary aza tsy nanao raha raty’ ho zay. Tsy vitan’ny hoe tsy nampanino an’ny fiangona io anefa raha zay, fa tsy nanao raha mihintsy rozy. Mety nieritseritsy ty olo sisany tamy fiangona eo hoe mamindra fo anè Jehovah sady hainy fa tsy lavorary tsika olombelo. Kanefa Jehovah tsy hoe mankasitraky ty fanaovan-draty. Mety lasa nalaza raty mihintsy fiangona iny vokatsin’ny raha raty nataon’ny lahilahy io. Mety fa nisy vokany tamy Kristiana niarakaraky taminy koa ty raha raty nataony. Ka ino amy zay ty raha nampanaovin’i Paoly an’ny fiangona io?

5. Ino ty raha nampanaovin’i Paoly an’ny fiangona iny, le ino ty teany hovolany? (1 Korintianina 5:13) (Henteo koa sary io.)

⁵ Vakio 1 Korintianina 5:13. Nitarihin’ny fanahy masy Paoly, le nanoratsy taratasy ho an’ny fiangona iny. Nihazavaniny tao hoe tokony halà tsy ho anisan’ny fiangona lahilahy tsy nibebaky iny. Ino zany ty tokony hataon’olo anivon’ny fiangona eo? Nivola tamin-drozy Paoly ‘mba tsy hifandramby aminy sasy.’ Mbo nivola koa ie hoe ndre ty ‘hiaraky mihina’ aminy aza tsy tokony hataon-drozy mihintsy. (1 Kor. 5:11) Fa manino? Satria lafa miaraky mihina amin’olo raiky iha, le lasa mana fotoa hiaraha aminy noho hifampiresaha aminy. Ka ino ty soa ho azon’ny fiangona laha tsy mifandramby amy lahilahy io rozy? Ho voaro rozy ka tsy ho voatariky hanao raha raty. (1 Kor. 5:5-7) Ankoatsini-zay, mety ho tsapan’ny lahilahy io hoe tena nampalahelo an’i Jehovah ty raha nataony. Mety ho menatsy amy zay ie ka lasa ho voatosiky hibebaky.

6. Ino ty raha nataon’ny fiangona iny lafa nivoarambin-drozy taratasin’i Paoly iny, le ino koa ty nataon’ny lahilahy nanota iny?

⁶ Lafa baka nandefa an’ny taratasiny ho an’ny Kristiana ta Korinto any rey Paoly, le niasa loha ie hoe nanao akory zay ty nandrambesan-drozy an’ny torohevitsy iny. Nifaly biby ie lafa niavy Titosy satria nanday vaovao soa. Nitantaranin’i Titosy taminy hoe nirambesin’ny fiangona iny soa taratasiny iny ka nalan-drozy tsy ho anisan’ny fiangona lahilahy iny. (2 Kor. 7:6, 7) Norihin-drozy soa toromariky nameany rey. Tsy vitani-zay, fa vola vitsivitsy tafaran’ny nandefasan’i Paoly an’ny taratasiny iny le nibebaky noho niala tamy raha raty fataony iny lahilahy io! Nanova ty fandaisam-batany noho ty fahazarany ie ka lasa nanoriky ty fitsipikin’i Jehovah. (2 Kor. 7:8-11) Ino amy zay koa henanizao ty hampanaovin’i Paoly an’ny fiangona iny?

AKORY TY NATAON’NY FIANGONA LAFA NIBEBAKY LAHILAHY INY?

7. Ino ty vokany lafa nalà tsy ho anisan’ny fiangona lahilahy nanao raha raty iny? (2 Korintianina 2:5-8)

⁷ Vakio 2 Korintianina 2:5-8. Nivola Paoly hoe: “Ampy ho an’olo iny fananara mafy nataon’ny ankamaroanareo zay.” Ta hivola zany ie hoe lafa nalà tsy ho anisan’ny fiangona lahilahy iny, le nahatsapa hoe tena mila mibebaky ie. Lafa nibebaky amy zay ie, le tokony halà fananara namea azy iny.​—Heb. 12:11.

8. Ino amy zay koa ty raha nampanaovin’i Paoly an’ny fiangona iny?

⁸ Lafa nibebaky lahilahy iny, le nivolanin’i Paoly ty anti-panahy mba handramby azy amy fiangona eo ndraiky. Nampirisiky ty fiangona koa ie hoe tokony ‘ho parè hanenga ty hadisoany rozy le ho soa fanahy lafa manao ani-zay, ka hampionona azy’, sady ‘hanome toky azy hoe tean-drozy ie.’ Henteo fa tsy nivola avao ie hoe rambesonareo avao ie fa misy raha koa teany hampanaovy an-drozy. Teany hasehon-drozy hoe tena nanenga ty hadisoany rozy sady tena tea azy. Hahatsapa rahalahy iny amy zay hoe falifaly rozy satria tafampoly amy fiangona eo ndraiky ie.

9. Manino ro nisarotsy tamin’olo sisany ty hanenga ty hadisoan’ny rahalahy nibebaky iny?

⁹ Nanao akory amy zay ty olo tamy fiangona teo lafa nivoaramby ndraiky rahalahy iny? Mety nisy va ty tsy nifaly? Tsy miresaky ani-zay aloha fitantarà io, fe azo inoa hoe mety niseho zay. Misy zao ty mety mbo neloky satria nanakoronta fiangona ie. Ty hafa koa mety nikivy satria namparatsy ty fony ty raha nataon’ny lahilahy io. Eo koa azy niezaky mafy hanoriky ty fitsipikin’i Jehovah rey, mety nieritseritsy rozy hoe tsy rariny laha rambesy amy fiangona eo ndraiky ie satria nanao raha tena raty. (Ampitovizo amy Lioka 15:28-30.) Fe manino ty fiangona ro tokony hampiseho fitiava an’ny lahilahy nibebaky iny?

10-11. Ino ty raha mety hiseho laha tsy mety manenga ty hadisoan’ny lahilahy iny ty anti-panahy?

¹⁰ Eritsereto avao hoe mety ho nanao akory ty fihetseham-pon’ny lahilahy iny laha ohatsy mbo tsy nengan’ny anti-panahy reo himpoly amy fiangona eo avao ie ndre fa nibebaky aza. Na mety ho nanao akory ty fihetseham-pony laha ohatsy fa nengà himpoly amy fiangona eo ie, fe tsy nampiseho fitiava azy rahalahy noho anabavy reo. Mety halahelo marè ie sady hieritseritsy hoe tsy ho afaky hanompo an’i Jehovah sasy. Mety hieritseritsy iaby aza ie hoe tsy hanenga ty hadisoany mihintsy Jehovah ka tsy misy dikany avao ty ezaky ataony mba hiovà.

¹¹ Ino koa ty raha hafa mety hiseho laha tsy mety manenga ty hadisoan’ny lahilahy iny ty fiangona? Lasa ho simba ty fifandrambesan-drozy amy Jehovah. Ino ty antony? Satria lasa tsy manahaky an’i Jehovah, azy nanenga ty hadisoan’ny lahilahy nibebaky iny rozy. Lasa hanahaky an’i Satana rozy, satria ie ro tsy miferinay olo sady tsy mamindra fo. Mety hampiasan’ny Devoly hanakivy an’ny lahilahy iny rozy ka hisaka azy tsy hanompo an’i Jehovah.​—2 Kor. 2:10, 11; Efes. 4:27.

12. Akory ty azon’ny fiangonan’i Korinto anahafa an’i Jehovah?

¹² Akory zany ty azon’ny fiangonan’i Korinto atao mba hanahafa an’i Jehovah fa tsy Satana? Mila manenga ty hadisoani-azy nibebaky iny rozy, manahaky ty ataon’i Jehovah. Mba henteo avao ty raha nisoratin’ny mpanoratsy Baiboly sisany mikasiky Azy. Davida zao nivola hoe “soa toetsy noho parè hanenga hadisoa” Jehovah. (Sal. 86:5) Nivola koa Mika hoe: ‘Ia ty Ndranahary manahaky anao, ka manenga fahadisoa noho manenga ani-ze nanao raha tsy mety?’ (Mika 7:18) Le Isaia nivola hoe: “Ao ty raty fanahy hiala amy ty raty fataony, le ty mpanao raty tsy hieritseritsy raha raty sasy. Ao ie himpoly amy Jehovah, azy hamindra fo aminy iny.”​—Isaia 55:7.

13. Manino ty anti-panahy ro tsy voatery nandiny ela sasy vo nandramby an’ny lahilahy iny ho anisan’ny fiangona? (Henteo ty efajoro hoe “Nombia Lahilahy ta Korinto tany iny ro Nirambesy ho Anisan’ny Fiangona Ndraiky?”)

¹³ Ho fanahafa an’i Jehovah, le mila manenga ty fahadisoan’ny lahilahy nibebaky iny ty fiangonan’i Korinto sady hasehon-drozy hoe tean-drozy ie. Nivola Paoly hoe laha manenga ty hadisoan’ny lahilahy iny rozy, le asehon-drozy amy zay hoe “manoriky safà amy raha iaby” rozy. (2 Kor. 2:9) Vola vitsivitsy tafaran’ny nangalà an’ny lahilahy iny tsy ho anisan’ny fiangona avao, le nibebaky ie. Tsy nila nandiny ela sasy zany ty anti-panahy tamy zay, fa azon-drozy rambesy ho anisan’ny fiangona ie.

AKORY TY AMPISEHOANTSIKA HOE MANAO TY RARINY NOHO MAMINDRA FO MANAHAKY AN’I JEHOVAH TSIKA?

14-15. Ino ty azontsika ianara baka amy fomba nandamina an’ny raha niseho ta Korinto tany iny? (2 Petera 3:9) (Henteo koa sary io.)

¹⁴ Nisoraty tamy Baiboly ao ty fomba nandamina an’ny raha niseho ta Korinto tany iny mba “hampianara antsika.” (Rom. 15:4) Hitantsika baka amy tantara iny hoe tsy engan’i Jehovah ho anisan’ny fiangona avao ty olo raiky nanao fahotà bevata fe tsy mibebaky. Mety misy moa mieritseritsy hoe mpanenga hadisoa Jehovah ka tsy mampanino azy ndre engà anivon’ny fiangona eo avao ty olo manao fahotà bevata fe tsy mibebaky. Fe diso zay satria tsy ho zay ty fomba ampisehoan’i Jehovah famindram-po. Marina fa mamindra fo Jehovah, fe tsy ze kila raha ataon’olo iaby ro ekeny. Tsy miova mihintsy ty fitsipikiny mikasiky ty soa noho ty raty. (Joda 4) Sahala tsy mamindra fo koa aza Jehovah laha engany ho anivon’ny fiangona eo avao olo nanao fahotà bevata iny, satria mety hanimba ty olo hafa amy fiangona eo raha zay.​—Ohab. 13:20; 1 Kor. 15:33.

¹⁵ Fe ndre zay, le tsy misy olo tean’i Jehovah ho ripaky zao. Teany havota ty olo iaby laha mbo azo atao. Mamindra fo amy ze olo manova ty eritseriny, ty raha ataony, noho ta hanompo azy ndraiky ie. (Ezek. 33:11; Vakio 2 Petera 3:9.) Ka lafa nibebaky lahilahy ta Korinto tany iny sady nanova ty raha fataony, le nanome toromariky Jehovah hoe tokony hengà ty hadisoany sady hengà himpoly amy fiangona eo ndraiky ie.

16. Ino ty raha tsapanao lafa mandiniky an’ny fomba nandamina an’ny raha niseho ta Korinto tany iny?

¹⁶ Nianarantsika tamy raha niseho ta Korinto tany iny fa be fitiava Jehovah, manao ty marina, sady manao raha mahity. (Sal. 33:5) Tsy lasa vomaiky ta hidera an’i Jehovah va iha lafa mandiniky an’ny toetsiny reo? Soa avao aloha fa mpamindra fo ie satria tsika iaby io samby mpanota ka mila fanengà hadisoa baka aminy. Mana antony hisaora an’i Jehovah tsika kiraidraiky satria nanome ty vilim-panavota ie mba hahazoantsika fanengà hadisoa. Tena mampahery ty mahay hoe tea ty vahoakiny vatany Jehovah sady ty hahasoa an-drozy avao ro irìny!

17. Ino ty hodinihintsika amy lahatsoratsy manaraky ao?

¹⁷ Ka akory amy zay koa ty anahafan’ny anti-panahy an’i Jehovah henanizao lafa misy olo manao fahotà bevata? Ino ty azon-drozy atao mba hampisehoa hoe be fitiava manahaky an’i Jehovah rozy sady ta hanampy ani-ze olo nanao fahotà bevata mba hibebaky? Ino koa ty raha tokony hataon’ny fiangona laha manapa-kevitsy ty anti-panahy hoe misy olo raiky halà tsy ho anisan’ny fiangona na misy olo raiky horambesy ndraiky? Hodinihintsika amy lahatsoratsy manaraky ao fanontanea reo.