Nareo Anti-panahy, Asehò hoe Teanareo noho Ferinesanareo ty Olo Nanota

1. Ino ty raha mety hiseho lafa misy olo raiky nanao fahotà bevata?

NIHITANTSIKA tamy lahatsoratsy taloha teo iny hoe ino ty toromariky namean’i Paoly ty fiangonan’i Korinto, lafa nisy lahilahy raiky nanao fahotà bevata. Tsy nety nibebaky lahilahy io ka tsy maintsy nalà tsy ho anisan’ny fiangona. Fe araky ty hitantsika amy andinin-teny iorenan’ny lahatsoratsy toy, le afaky mitariky ty olo mba hibebaky Ndranahary. (Rom. 2:4) Ka akory ty ampiasany ty anti-panahy mba hanampea an’olo rey?

2-3. Ino ty tokony hataontsika laha misy olo raiky haintsika hoe nanao fahotà bevata, le ino ty antony?

² Voalohany tse aloha, le tsy afaky manampy ty anti-panahy laha tsy hain-drozy hoe nanao fahotà bevata ty olo raiky. Ka ino zany ty tokony hataonao laha misy mpiara-manompo raiky hainao hoe nanao fahotà bevata, ka mety hiafara amy fangalà azy tsy ho anisan’ny fiangona mihintsy? Ampirisiho ie hila fanampea amy anti-panahy.​—Isaia 1:18; Asa. 20:28; 1 Pet. 5:2.

³ Manao akory laha tsy mety miresaky amy anti-panahy ie? Laha zay ie, le tsika mihintsy ro mila miresaky amy anti-panahy mba hahazoany fanampea malaky. Laha manao ani-zay tsika, le asehontsika hoe teantsika vatany rahalahy na anabavintsika iny ka tsy fointsika mihintsy. Laha mbo tohizany avao raha raty ataony iny, le ho simba ty fifandrambesany amy Jehovah. Tsy vitani-zay fa laha hitan’olo ambaliky any koa ty raha ataony, le mety ho simba ty lazan’ny fiangona. Ka laha tsika zany miezaky mamonjy anti-panahy ndre tsy mora amintsika raha zay, le asehontsika hoe teantsika Jehovah noho azy nanao fahotà bevata iny.​—Sal. 27:14.

INO TY ATAON’NY ANTI-PANAHY MBA HANAMPEA TY OLO NANAO FAHOTÀ BEVATA?

4. Ino ty raha kendren’ny anti-panahy lafa miresaky amin’olo nanao fahotà bevata?

⁴ Lafa misy olo raiky nanao fahotà bevata anivon’ny fiangona eo, le mivory ty anti-panahy ka mifily anti-panahy telo mba hanampy an’olo iny.a Tsy maintsy miambany lahilahy reo. Marina hoe hiezaky hanampy an’olo iny hibebaky rozy, fe tsy afaky miforosè azy hiova rozy. (Deot. 30:19) Hain’ny anti-panahy reo koa hoe tsy ty olo iaby ro hibebaky manahaky an’i Davida Mpanjaka. (2 Sam. 12:13) Misy olo sisany tsy mety manoriky ty fananaran’i Jehovah mihintsy. (Gen. 4:6-8) Fe laha mbo azo atao avao, le ty hanampy an’olo iny hibebaky ro raha kendren’ny anti-panahy reo. Ino ty raha tokony hotiarovin’ny anti-panahy lafa hiresaky amin’olo nanao fahotà bevata rozy?

5. Ino ty raha tokony hotiarovin’ny anti-panahy lafa rozy mifampiresaky amin’olo nanao fahotà bevata? (2 Timoty 2:24-26) (Henteo koa sary io.)

⁵ Hain’ny anti-panahy fa ndre nanao fahotà bevata aza ty olo raiky, le mbo lafovily amy Jehovah avao ie. (Lioka 15:4, 6) Ka lafa mifampiresaky amin’olo iny amy zay rozy, le tsy masiaky na manao raha mampalahelo azy. Tsy mieritseritsy koa ty anti-panahy hoe hametraky fanontanea mba hahaiza ty raha niseho avao ty antony iresahan-drozy aminy. Tsy zay fa hiezaky rozy mba hampiseho an’ny toetsy amy 2 Timoty 2:24-26 ao rey. (Vakio.) Miezaky ho soa fanahy avao ty anti-panahy satria ta hanampy an’olo nanota iny hanova ty eritseritsiny.

6. Akory ty hanomanan’ny anti-panahy ty fony alohan’ny hifampiresaha amin’olo nanota iny? (Romanina 2:4)

⁶ Manoma ty fony ty anti-panahy alohan’ny hifampiresaha amin’olo nanota iny. Miezaky manahaky an’i Jehovah rozy lafa manampy ty olo nanota. Tiarovin-drozy safàn’i Paoly toy: “Tea-Ndranahary hibebaky iha kanao soa fanahy aminao ie.” (Vakio Romanina 2:4.) Zany hoe manao raha Ndranahary mba hanampea ty olo nanota hibebaky. Tokony hotiarovin’ny anti-panahy hoe mpiarakandro rozy ka mila manoriky ty tari-dalan’i Kristy sady manahaky azy lafa mikarakara ty fiangona. (Isaia 11:3, 4; Mat. 18:18-20) Hivavaky amy Jehovah ty komitin’ny anti-panahy alohan’ny hifampiresaha amin’olo iny, amy zay rozy ho afaky hanampy azy hibebaky. Hanao fikaroha amy Soratsy Masy ao noho amy boky noho gazetintsika rey koa rozy, mba hahavy an-drozy hitovy fomba fihevitsy amy Jehovah. Bakeo hivavaky amy Jehovah rozy mba hanampy an-drozy hahay soa ty tena raha misy. Hodinihin-drozy hoe ino marina ty raha niseho ka mety nisy vokany tamy eritseritsiny, toe-tsainy noho ty fandaisam-batany ka nahavy azy nanota.​—Ohab. 20:5.

7-8. Akory ty azon’ny anti-panahy ampisehoa hoe manam-pahareta manahaky an’i Jehovah rozy lafa mifampiresaky amin’olo nanao fahotà bevata?

⁷ Miezaky manam-pahareta manahaky an’i Jehovah ty anti-panahy. Tiarovin-drozy ty raha nataon’i Jehovah taloha tany mba hanampea ty olo nanao fahotà bevata hibebaky. Nanam-pahareta tamy Kaina, ohatsy, Jehovah. Nivola tamy Kaina ie hoe ino ty raha hiseho laha tsy miova ie. Nivolaniny koa ie hoe hotahiny laha manoriky ty Safàny. (Gen. 4:6, 7) Nanam-pahareta tamy Davida koa ie. Naniraky an’i Natana mpaminany ie mba hananatsy azy. Nampiasa fanohara raiky zay Natana mba hanampea an’i Davida hibebaky. (2 Sam. 12:1-7) Mbo mitovy amy zay avao koa ty nataon’i Jehovah tamy Israelita rey lafa rozy tsy nanoriky ty safàny. ‘Nirahiny ho amin-drozy any avao’ ty mpaminaniny sady “matetitetiky” mihintsy ty nanaovany ani-zay. (Jer. 7:24, 25) Tsy nipetraky amy zao avao ie le nandiny an’ny vahoakiny rey hibebaky zay vo nanampy an-drozy. Tsy zay ty nataony fa ie mihintsy ro nanao raha mba hanampea an-drozy hibebaky ndre mbo nanota aza rozy.

⁸ Manahaky ty modelin’i Jehovah ty anti-panahy lafa miezaky manampy ani-ze olo nanao fahotà bevata. Miezaky hanam-pahareta amin’olo iny rozy, araky ty resahin’ny 2 Timoty 4:2. Mila kalma avao zany ty anti-panahy sady mila “manam-pahareta” laha ta hahavita hanampy an’olo iny hanao raha soa. Fe manao akory laha meloky ty anti-panahy lafa manoro hevitsy an’olo iny? Mety tsy hijanjy ie na mety tsy hibebaky.

9-10. Akory ty azon’ny anti-panahy anampea ty olo nanota mba hahay hoe ino tamy ty raha nataony ro nitariky azy hanota?

⁹ Miezaky ty anti-panahy mba hahay hoe ino ty raha niseho ka nitariky an’olo iny hanota. Ino, ohatsy, ty nahavy azy lasa tsy de nifandramby soa amy Jehovah? Fa tsy nanao fianara am-bata sasy va ie? Sa fa tsy de nandeha nanompo? Fa tsy nivavaky matetiky tamy Jehovah va ie? Sa lasa fahazara avao ty vavaky ataony? Fa tsy nanohitsy ty fanirian-draty sasy va ie? Sa ie lasa tsy nahay nifily fialam-boly na tsy nahay nifily nama? Ino ty mety ho vokatsin’ny raha reo tamy ty eritseritsiny noho tamy ty faniriany? Tsapany va hoe nisy vokany tamy Jehovah Babany ty fanapahan-kevitsy nataony tato ho ato na ty raha nataony?

¹⁰ Afaky mametraky fanontanea manampy an’olo iny handiniky ty antony nahavy azy lasa tsy de nifandramby soa amy Jehovah, noho nitariky azy hanota ty anti-panahy. Fe tokony ho soa fanahy rozy lafa manao ani-zay sady tsy hanontanintany tsipiriany tsy ilà na mikasiky ty fiainan’olo iny manoka. (Ohab. 20:5) Ankoatsini-zay, mety hampiasa fanohara rozy mba hanampea an’olo iny hahatsapa noho hahita hoe tena raty ty raha nataony, manahaky ty nataon’i Natana tamy Davida. Mety vo mifampiresaky amin’olo iny voalohany ty komitin’ny anti-panahy, le fa haneny mafy amy ty raha nataony ie. Mety hibebaky ie.

11. Akory ty fomba nanandesan’i Jesosy ty mpanota?

¹¹ Miezaky ty anti-panahy mba hanahaky an’i Jesosy. Nametraky an’ny fanontanea mampieritseritsy toy tamy Saoly baka a Tarsosy any Jesosy, satria tena ta hanampy azy: “Saoly, Saoly, fa manino iha ro manenjiky ahy?” Hita baka amin’io fa teany ho tsapan’i Saoly hoe raty vatany ty raha nataony. (Asa. 9:3-6) Ho zao koa ty nivolanin’i Jesosy tamy “ampela manahaky an’i Jezebela iny”: “Nameako fotoa hibebaha ie.”​—Apok. 2:20, 21.

12-13. Ino ty mety hataon’ny anti-panahy mba hanomeza an’olo nanota iny fotoa hibebaha? (Henteo koa sary io.)

¹² Manahaky an’i Jesosy ty anti-panahy, ka tsy avy le mieritseritsy hoe tsy hibebaky olo nanao raha raty iny. Misy olo sisany mety hibebaky amy fotoa voalohany ifampiresahan’ny komitin’ny anti-panahy aminy iny. Fa ty sisany mety hila fotoa lavalava. Mety hanao fandahara amy zay ty anti-panahy mba hifampiresaha amin’olo iny, tsy hoe indraiky avao, fa mety hihoatsy ani-zay. Lafa vita fifampiresaha voalohany nataon’ny anti-panahy tamin’olo nanota iny, le mety handiniky soa ty raha nivolany taminy ie afarani-zay. Mety hiambany ie, ka hangataky amy Jehovah mba hanenga ty fahotàny. (Sal. 32:5; 38:18) Lafa mimpoly miresaky aminy ndraiky ty anti-panahy afarani-zay, le mety fa ho hafa ty toe-tsainy, fa tsy hanahaky ty toe-tsainy tamy voalohany iny.

¹³ Tokony hahay hiferinay noho ho soa fanahy ty anti-panahy laha tean-drozy ty hanampy an’olo nanota iny hibebaky. Mivavaky amy Jehovah rozy mba hitahy ty ezaky ataon-drozy sady mitamà hoe hahatsapa tena rahalahy na anabavin-drozy nanota iny, ka hibebaky.​—2 Tim. 2:25, 26.

14. Ia ro tena manampy ty olo nanota hibebaky, le manino tsika ro mivola ani-zay?

¹⁴ Falifaly biby tsika lafa mibebaky ty olo nanota! (Lioka 15:7, 10) Fe ia ro tena manampy an’olo iny hibebaky? Ty anti-panahy va? Tiarovo ty raha nivolanin’i Paoly mikasiky ty olo nanota. Hoy ty asany: “Vasa Ndranahary hanenga an-drozy hibebaky.” (2 Tim. 2:25) Jehovah zany fa tsy olombelo ro nanampy an’olo iny hanova ty eritseriny noho ty toe-tsainy. Nivola Paoly fa misy raha soa ho azon’olo raiky lafa ie mibebaky. Mety lasa hahay soa ty fahamarina ie, hiasa soa ty sainy, ka ho afaky amy fandrikin’i Satana ie.​—2 Tim. 2:26.

15. Ino ty ataon’ny anti-panahy mba hanampea avao ty olo raiky nibebaky?

¹⁵ Lafa mibebaky ty olo raiky nanota, le mbo hitsidiky azy avao ty anti-panahy mba hanampea azy hanatanjaky ty finoany noho mba hanampea azy hanao raha soa avao. (Heb. 12:12, 13) Mazava ho azy fa tsy horesadresahin’ny anti-panahy amin’olo hafa ty raha nataon’olo iny. Fa ino avao ty mila resahy amy fiangona?

“ANARO AMASON’OLO MARO EO IE”

16. Laha hentea ty 1 Timoty 5:20, ia “olo maro” resahin’i Paoly ao io?

¹⁶ Vakio 1 Timoty 5:20. Nivola tamy Timoty anti-panahy namany, Paoly mba hananatsy ty mpanota “amasolon’olo maro eo.” Ino ty teany hovolany? Ta hivola va ie hoe tokony hanary anatrehan’olo iaby amy fiangona eo ty olo nanota? Tsy voatery. Ty olo vitsivitsy mety fa nahay an’ny fahotà iny ro teany horesahy eto. Mety nahita maso an’ny raha iny rozy na olo iny mihintsy ro nivola an’ny raha nataony iny tamin-drozy. Rozy avao zany ro hovolanin’ny anti-panahy hoe fa nalamy raha iny sady fa nanary azy nanota iny.

17. Laha misy olo nanao fahotà bevata ka hain’olo maro amy fiangona eo raha zay na mety ho hain-drozy, ino ty fampandrenesa hatao, le ino ty antony?

¹⁷ Kindraiky, le mety hain’olo maro amy fiangona eo hoe nanao fahotà bevata ty olo raiky na mety ho hain-drozy raha iny. Laha zay ie, le tafilitsy amy hoe “olo maro” zany ty olo iaby amy fiangona eo. Hanao fampandrenesa amy fiangona eo amy zay zany ty anti-panahy hoe namea fananara rahalahy na anabavy iny. Ino ty antony? Nivola Paoly hoe “mba hampitandrema ty hafa” tsy hanao fahotà bevata.

18. Ino ty hataon’ny anti-panahy laha mpitory vita batisa tsy ampy tao ro manao fahotà bevata? (Henteo koa sary io.)

¹⁸ Manao akory laha mpitory vita batisa tsy ampy tao ro nanao fahotà bevata? Hanendry anti-panahy roe ty anti-panahy iaby mba hiresaky aminy, le hanatriky eo koa ty ray aman-dreniny laha Vavolombelo rozyb. Hanontanean’ny anti-panahy reo ty ray aman-dreniny hoe ino iaby ty fa nataon-drozy mba hanampea an’ny anakin-drozy io hiova noho hibebaky. Laha soa ty toe-tsain’ny mpitory tsy ampy tao iny sady fa mikarakara an’ny raha iny ty ray aman-dreniny, le mety hanapa-kevitsy anti-panahy roe rey fa tsy hilà ty hampitsangana komity, mba hiresaky amy ajà iny noho ty ray aman-dreniny na ty olo miteza azy. Sady hain’ny anti-panahy fa andraikitsy nankinin’i Jehovah tamy ray aman-dreny ty hananatsy ty anakin-drozy amim-pitiava. (Deot. 6:6, 7; Ohab. 6:20; 22:6; Efes. 6:2-4) Hiresaky kindraindraiky amy ray aman-drenin’ny ajà iny ty anti-panahy afarani-zay mba hahità laha mahazo fanampea ara-panahy ilàny ajà iny. Fe manao akory laha mbo manohy manao raha raty avao ie? Laha zay ie, le hisy komitin’ny anti-panahy hatsanga mba hifampiresaky aminy, le hanatriky eo koa ty ray aman-dreniny, laha Vavolombelo rozy.

“TENA BE FITIAVA JEHOVAH SADY MAMINDRA FO”

19. Akory ty azon’ny anti-panahy anahafa an’i Jehovah lafa rozy manampy olo raiky nanao fahotà bevata?

¹⁹ Namean’i Jehovah andraikitsy ty anti-panahy mba hanao ze hampalio avao ty fiangona. (1 Kor. 5:7) Fe hanao ze azon-drozy atao avao koa rozy mba hanampea ani-ze olo nanota hibebaky. Lafa manampy an’olo iny amy zay rozy, le mitamà avao hoe mbo hiova ie. Fa manino? Satria ta hanahaky an’i Jehovah rozy. Ie moa “tena be fitiava sady mamindra fo.” (Jak. 5:11) Nanahaky an’i Jehovah apostoly Jaona ka nampiseho fitiava tamy rahalahy noho anabaviny rey. Hoy ty asany: “Manoratsy aminareo mikasiky an’ny raha zay aho, anako teako, mba tsy hanotànareo. Fe laha misy sendra manota, le mana mpanampy amy Baba any tsika, tsy ia zay fa Jesosy Kristy, azy marina iny.”​—1 Jaona 2:1.

20. Ino ty hodinihintsika amy lahatsoratsy manaraky ao?

²⁰ Mampalahelo fa misy avao ty Kristiana tsy mibebaky. Laha zay ie, le tsy maintsy alà tsy ho anisan’ny fiangona ie. Ka ino ty hataon’ny anti-panahy laha zay ty raha miseho? Handiniky ani-zay tsika amy lahatsoratsy farany amy lahatsoratsy mifampitohy toy.