Akory ty Azon’ny Anti-panahy Anampea ty Olo Nalà tsy ho Anisan’ny Fiangona?

1-2. a) Manao akory ty fahitàn’i Jehovah ty olo nanao fahotà bevata fe tsy mibebaky? b) Ino ty raha tamanin’i Jehovah hoe hataon’olo nanao fahotà bevata?

TSY ze kila raha ataon’olo iaby ro eken’i Jehovah. Halany ty fahotà. (Sal. 5:4-6) Natorony antsika amy Baiboly ao ty fitsipikiny mikasiky ty soa noho ty raty, le teany tsika laha manoriky an’ny raha rey. Fe ndre zay, le hainy hoe tsy lavorary tsika ka tsy hahavita hanoriky tanteraky an’ny raha reo. (Sal. 130:3, 4) Fe ie koa aloha tsy handefitsy amy ty olo manararaotsy ty hasoam-panahiny noho ‘tsy matahotsy azy, ka mana fandaisam-bata tsy misy henatsy.’ (Joda 4) Mivola mihintsy ty Baiboly hoe haripaky ty olo “tsy matahotsy a-Ndranahary” amy aly Aramagedona.​—2 Pet. 3:7; Apok. 16:16

² Fe ndre zay, le tsy misy olo tean’i Jehovah ho ripaky. Fa nihitantsika tamy lahatsoratsy taloha teo rey fa “teany hibebaky ty olo iaby.” (2 Pet. 3:9) Manahaky an’i Jehovah koa ty anti-panahy, ka lafa misy nanao fahotà bevata le miezaky manampy azy hibebaky noho hifandramby soa amy Jehovah ndraiky rozy. Fe misy avao ty tsy mibebaky ndre fa ampea aza. (Isaia 6:9) Ndre fa niezaky mafy nimpolimpoly nanampy azy aza ty anti-panahy, le mbo tsy mibebaky avao ie fa manohy an’ny raha raty ataony iny. Ka ino ty atao lafa miseho ty raha manahaky ani-zay?

“ALÀO TSY HO AMINAREO EO AZY MPANAO RATY INY”

3. a) Tokony hatao akory ty olo tsy mibebaky laha hentea ty Baiboly? b) Manino tsika ro mivola hoe olo iny mihintsy ro mifily ty tsy ho anisan’ny fiangona?

³ Laha tsy mety mibebaky ty olo raiky nanao raha raty, le tsy misy azon’ny anti-panahy atao, fa tsy maintsy manoriky ty raha resahin’ny 1 Korintianina 5:13 rozy. Zao ty toromariky voaresaky ao: “Alào tsy ho aminareo eo azy mpanao raty iny.” Ndre azy nanao raha raty iny koa mahay fa tsy maintsy zay ty hiafaràny laha tsy mibebaky ie. Midika zay fa ie mihintsy zany ro fa tsy ta ho anisan’ny fiangona kanao tsy mibebaky. Mijinja ty nafafiny avao zany ie laha ty marina. (Gal. 6:7) Manino tsika ro mivola ani-zay? Satria ndre fa nimpolimpoly nanampy azy aza ty anti-panahy, le mbo tsy mety miova avao ie. (2 Mpanj. 17:12-15) Asehony amy ty raha ataony fa tsy ta hanoriky ty fitsipikin’i Jehovah sasy ie.​—Deot. 30:19, 20.

4. Manino tsika ro mila manao fampandrenesa lafa misy olo nalà tsy ho anisan’ny fiangona?

⁴ Lafa tsy mibebaky ty olo raiky nanao fahotà bevata, le halà tsy ho anisan’ny fiangona. Hampandrenesy amy fiangona eo afarani-zay hoe tsy Vavolombelon’i Jehovah sasy iano.a Tsy hoe mba hahamenatsy an’olo nanao fahotà iny ro antony anaova an’ny fampandrenesa io, fa mba hahavy ty fiangona hanoriky ty torolalan’ny Baiboly. (1 Kor. 5:9-11) Misy antony koa kanao Jehovah nandidy ani-zay. Henteo moa raha nisoratin’ny apostoly Paoly toy: “Levira kelikely avao le fa mampitombo ty koba iaby.” (1 Kor. 5:6) Laha tsy alà amy fiangona eo zany ty mpanota tsy mibebaky, le mety hisy vokany amin’olo hafa miezaky manoriky ty fitsipikin’i Jehovah raha zay.​—Ohab. 13:20; 1 Kor. 15:33.

5. Akory ty tokony ho fahitantsika ty olo nalà tsy ho anisan’ny fiangona, le ino ty antony?

⁵ Akory amy zay ty tokony ho fahitantsika ty olo nalà tsy anisan’ny fiangona? Marina fa tsy mifandramby aminy sasy tsika, fe tsy tokony hieritseritsy tsika hoe le fa tsy misy raha tamany sasy ty aminy. Manahaky aondry trobo io ty tokony ho fahitantsika azy. Laha trobo ty aondry raiky, le mbo tamany himpoly. Tiarovo koa hoe fa nanokam-bata ho an’i Jehovah olo iny. Fe mampalahelo fa tsy nahavita nanao raha mampifaly an’i Jehovah ie ka mety tsy hahazo fiaina mandrakizay. (Ezek. 18:31) Fe ndre zay, le mbo mitamà tsika fa mbo himpoly avao ndraiky ie satria mamindra fo Jehovah. Ino ty hataon’ny anti-panahy mba hanampea ani-ze olo nalà tsy ho anisan’ny fiangona?

AKORY TY ANAMPEAN’NY ANTI-PANAHY ANI-ZE OLO NALÀ TSY HO ANISAN’NY FIANGONA?

6. Ino iaby ty raha tokony hataon’ny anti-panahy mba hanampea ty olo nalà tsy ho anisan’ny fiangona?

⁶ Lafa nalà tsy ho anisan’ny fiangona ty olo raiky, le liany tsy manao raha sasy va ty anti-panahy mba hanampea azy himpoly amy Jehovah? Tsy zay mihintsy! Lafa manambara amin’olo iny ty komitin’ny anti-panahy hoe halà tsy ho anisan’ny fiangona ie, le hazavanin-drozy aminy koa hoe ino iaby ty raha tokony hataony mba himpolia amy fiangona eo ndraiky. Fe tsy zay avao ty raha ataon-drozy. Horesahin’ny anti-panahy reo ie hoe hifampiresaky aminy ndraiky rozy afaky vola vitsivitsy, mba hanentea hoe fa niova va ie. Laha maneky hifampiresaky amin-drozy ie amy fotoa zay, le handrisiky azy hibebaky noho himpoly ty anti-panahy. Fe laha mbo tsy miova ie amy fotoa io, le mbo hiezaky hiresaky aminy ndraiky rozy afarani-zay mba hanampea azy hiova noho hibebaky.

7. Akory ty ampisehoan’ny anti-panahy hoe soa fanahy manahaky an’i Jehovah rozy amin’olo nalà tsy ho anisan’ny fiangona rey? (Jeremia 3:12)

⁷ Soa fanahy manahaky an’i Jehovah ty anti-panahy lafa mifandramby amin’olo nalà tsy ho anisan’ny fiangona. Tsy nengàn’i Jehovah hibebaky tse, ohatsy, Israelita rey zay ie vo nanampy an-drozy. Ie mihintsy ro nanao raha voalohany mba hanampea an-drozy, ndre mbo tsy nibebaky aza rozy. Nihitantsika tamy lahatsoratsy faharoe tamy gazety toy fa nivolanin’i Jehovah Hosea, mba hanenga ty hadisoan’ny valiny ndre mbo anatin’ny manao fahotà bevata aza ie. Hita baka amy ohatsy io fa tena miferinay ty vahoakiny Jehovah. (Hosea 3:1; Mal. 3:7) Manahaky an’i Jehovah koa ty anti-panahy, ka tean-drozy laha mimpoly ty olo raiky nanota. Ataon-drozy koa ze hahavy an’olo iny tsy hahatsapa hoe sarotsy ty manao an’ny raha zay.​—Vakio Jeremia 3:12.

8. Manino fanoharan’i Jesosy mikasiky anaky adala iny ro manampy antsika hahatakatsy hoe mamindra fo Jehovah? (Lioka 15:7)

⁸ Tiaronao va fanoharan’i Jesosy mikasiky an’ny anaky adala iny? Nianarantsika tamy lahatsoratsy faharoe amy gazety toy ato moa fanohara io. Tiaronao va hoe ino ty nataon’ny nahoda iny lafa nijilony baka lavitsy eny anany iny? ‘Nilailay ie nandrakoky azy sady nanoroky azy.’ (Lioka 15:20) Tsy nandiny an’ny anany io hisoloho aminy eo zany ie, fa ie mihintsy ro nitsena azy. Ino ty antony? Satria teany anany iny. Manahaky ani-zay mihintsy ty raha tsapan’i Jehovah amin’olo niala azy rey, le miezaky mafy hanahaky azy koa ty anti-panahy. Tean-drozy “himpoly” amy Jehovah ndraiky aondriny nitrobo iny. (Lioka 15:22-24, 32) Ndre ty an-danitsy any ndre ty an-tany etoa, le samby falifaly lafa misy olo mimpoly amy Jehovah!​—Vakio Lioka 15:7.

9. Ampirisihin’i Jehovah hanao ino ty olo nanota?

⁹ Nihitantsika tato hoe tsy tean’i Jehovah hijano amy fiangona eo ty olo raiky nanota fe tsy mibebaky. Fe ndre zay, le tsy hoe engany any olo iny, fa mbo ampeany himpoly aminy avao. Ino amy zay ty raha tsapany lafa mibebaky olo iny? Ho zao ty resahin’ny Hosea 14:4: “Hitaha an-drozy aho, le tsy hivaliky amiko rozy. Sitrapoko ty ho tea azy, satria tsy meloky aminy sasy aho.” Lafa mandiniky an’ny fihetseham-pon’i Jehovah io ty anti-panahy, le tokony handrisiky an-drozy raha zay hanenty ze fiovà kelikely ataon’olo iny, ka ahità hoe fa manomboky mibebaky ie. Manome toky ani-ze niala tamy Jehovah rey koa safà reo hoe tean’i Jehovah rozy sady teany himpoly aminy.

10-11. Ino ty hataon’ny anti-panahy mba hanampea ani-ze olo nalà tsy ho anisan’ny fiangona tanatin’ny tao maro?

¹⁰ Ka manao akory olo nalà tsy anisan’ny fiangona fa tanatin’ny tao maro rey? Misy amin’olo rey fa tsy manao ty raha nahavy azy nalà tsy ho anisan’ny fiangona. Ty sisany koa fa tsy mahatiaro ty antony nangalà azy tsy ho anisan’ny fiangona. Hila noho hitsidiky an’olo rey ty anti-panahy ndre fa ela ndre vo tsiela ty nangalà azy tsy ho anisan’ny fiangona. Lafa mitsidiky rozy, le tokony hiaraky mivavaky aminy sady handrisiky azy himpoly ndraiky. Azo antoky fa malemy ara-panahy ie satria fa ela ty tsy niarahany amy fiangona. Laha mivola ie hoe ta himpoly ndraiky, le hanao fandahara ty anti-panahy mba hisy olo hampianatsy azy Baiboly ndre mbo tsy voaramby aza ie. Ty anti-panahy avao ro handamy an’ny fandahara zay.

¹¹ Miezaky ho soa fanahy manahaky an’i Jehovah ty anti-panahy. Miezaky rozy mila an’olo niala tamy Jehovah rey sady miezaky rozy manampy an’olo rey. Ka laha hita hoe tena mibebaky ty olo raiky nanao fahotà bevata sady niala amy ty raha raty nataony, le tokony ho rambesy malaky ie.​—2 Kor. 2:6-8.

12. a) Ino ty raha mila itandreman’ny anti-panahy? b) Manino tsika ro tsy tokony hieritseritsy hoe tsy hahazo famindram-po amy Jehovah ty olo nanao fahotà bevata sisany? (Henteo koa ty fanamariha ambany pejy.)

¹² Fe amy raha sisany, le mila miamby soa ty anti-panahy alohan’ny handrambesa ty olo raiky ho anisan’ny fiangona. Laha nandrava ajà, ohatsy, olo iny na nivadi-pinoa, na nanao ze fomba hisaraha amy ty valiny, le mila ataon’ny anti-panahy azo antoky hoe nibebaky vatany ie alohan’ny handrambesa azy. (Mal. 2:14; 2 Tim. 3:6) Tsy maintsy miaro ty rahalahy noho anabavy ty anti-panahy. Tokony hazava soa fa ze olo nibebaky noho niala tamy ty raha raty nataony avao ro eken’i Jehovah himpoly. Ndre atao aza hoe miamby soa ty anti-panahy amy raha niresahy reo, le tsy tokony hieritseritsy rozy hoe tsy hamindra fo amin’olo manao ani-reo mihintsy Jehovah.b​—1 Pet. 2:10.

INO TY AZON’NY FIANGONA ATAO?

13. Ino ty tsy mampitovy ty fomba anandesantsika ty olo nahazo fananara noho ty olo nalà tsy ho anisan’ny fiangona?

¹³ Niresahintsika tamy lahatsoratsy taloha teo iny hoe kindraiky mety hisy olo ampandrenesy hoe namea fananara. Mbo mifandramby aminy tsika satria nibebaky ie sady fa tsy manao an’ny raha raty nataony iny sasy. (1 Tim. 5:20) Mbo anisan’ny fiangona avao ie, le mila fampahereza baka amy rahalahy noho anabaviny reo mba hahavita hanao raha soa avao. (Heb. 10:24, 25) Fe tsy zay ty ataontsika laha nalà tsy ho anisan’ny fiangona ty olo raiky. Tsy tokony “hifandramby” na “hiaraky mihina” amin’olo manahaky ani-zay mihintsy tsika.”​—1 Kor. 5:11.

14. Akory ty azon’ny Kristiana kiraidraiky ampiasà ty feon’ny fieritseretany nampiofanin’ny Baiboly lafa misy olo nalà tsy ho anisan’ny fiangona mivory? (Henteo koa sary io.)

¹⁴ Midika va raha zay hoe tsy tokony ho dareantsika sasy ze olo nalà tsy ho anisan’ny fiangona? Tsy zay mihintsy. Marina fa tsy minama aminy tsika. Fe afaky mampiasa ty feon’ny fieritseretany nampiofanin’ny Baiboly ty Kristiana kiraidraiky laha longony na ninamany marìny olo nalà tsy ho anisan’ny fiangona iny, ka anjarany ty manapa-kevitsy hoe hanasa azy hivory va ie sa tsy hanasa azy. Ka ino amy zay ty hataontsika laha mivory ie? Tsy niarahaba an-drozy tsika taloha. Fe henanizao, le anjaran’ny kiraidraiky ro hanapa-kevitsy mikasiky ani-zay. Mety hisy zao ta hiarahaba an’olo iny lafa am-pivoria any. Fe tsy tokony hiresaky maharitsy amin’olo iny na hiaraky hanao raha hafa aminy tsika.

15. Olo nanao fahotà manao akory resahin’ny 2 Jaona 9-11 io? (Henteo koa ty efajoro hoe “Fahotà Mitovy Avao va Niresahin’i Jaona noho Paoly Io?”)

¹⁵ Mety hieritseritsy henanizao ty olo sisany hoe: ‘Ka tsy mivola va ty Baiboly hoe manoha ty raha raty ataon’olo iny ty Kristiana raiky laha miarahaba azy?’ (Vakio 2 Jaona 9-11.) Laha hentea ty safà manodidy an’ny andinin-teny io, le ty olo mpivadi-pinoa na ty olo mitao ty hafa tsy hanoriky ty fitsipikin’ny Baiboly ro teany horesahy. (Apok. 2:20) Tsy hanao fandahara mba hitsidiha an’olo reo ty anti-panahy. Fe mbo mitamà avao tsika hoe hibebaky rozy. Fe zisiky hiaviani-zay, le tsy miarahaba an-drozy tsika na manasa an-drozy hivory.

MANAHAKY AN’I JEHOVAH TSIKA LAHA MIFERINAY NOHO MAMINDRA FO

16-17. a) Tean’i Jehovah hanao ino ty olo nanota? (Ezekiela 18:32) b) Akory ty ampisehoan’ny anti-panahy hoe miaraky miasa amy Jehovah rozy lafa manampy ty olo nanota?

¹⁶ Ino ty nianarantsika tamy gazety toy tato? Nihitantsika hoe tsy misy tean’i Jehovah ho ripaky ty olo! (Vakio Ezekiela 18:32.) Ndre ty olo nanao fahotà bevata, le mbo teany hifandramby soa aminy ndraiky. (2 Kor. 5:20) Tsy vo zao ie ro nanao ani-zay. Fa niezaky avao ie bakany bakany zay nampirisiky ty olo niala taminy mba hibebaky noho himpoly aminy. Tombotsoa ho ahi-ty anti-panahy koa ty miaraky miasa amy Jehovah mba hanampy ty olo nanota hibebaky.​—Rom. 2:4; 1 Kor. 3:9.

¹⁷ Mba eritsereto avao ty hafalean-drozy an-danitsy any lafa misy mpanota raiky mibebaky! Tena falifaly Jehovah Babantsika an-danitsy any iny lafa mimpoly amy fiangona eo ty aondriny nitrobo. Vomaiky hitombo ty fitiavantsika an’i Jehovah lafa mandiniky ty famindram-pony noho ty hasoam-panahiny tsika.​—Lioka 1:78.