Manery ty Anakiny Hanaraky ty Finoany va ty Vavolombeloni-Jehovah?

Aha, satria ty olo kiraidraiky ro manapa-kevitsy hoe hanompo a Ndranahary sa tsy hanompo azy. (Romanina 14:12) Mampianatsy ty anakin-drozy ty torolalani-Baiboly ty Vavolombeloni-Jehovah, fe ajà rey avao ro tsy maintsy manapa-kevitsy lafa mihabe hoe ho Vavolombeloni-Jehovah sa tsy ho Vavolombeloni-Jehovah.—Romanina 12:2; Galatianina 6:5

Maniry hahasoa ty anakiny, manahaky baba noho reny iaby io avao ty Vavolombeloni-Jehovah. Mampianatsy ty raha eritreretin-drozy fa hahasoa ty anakiny rozy. Ohatsy hoe: ty fahaiza tena ilàny, ty torolala mikasiky fandaisam-bata noho ty raha tokony hinoany. Mino ty Vavolombeloni-Jehovah fa mahasoa amy fiaina ty fanoriha ty torolalani-Baiboly. Manampy ty anakin-drozy hahatsapa ty maha lavofily ani-raha zay rozy, ka mampianatsy Baiboly an-drozy noho manday an-drozy hamonjy fivoria Kristiana. (Deoteronomia 6:6, 7) Lafa be ajà rey, le rozy avao ro handramby fanapaha-kevitsy hoe hanoriky ty finoani-baba noho reniny sa tsy hanoriky.

• Manao batisa ajà kelikely va ty Vavolombeloni-Jehovah?

• Tsy mifandramby amy ty anakiny mifily tsy atao batisa va ty Vavolombeloni-Jehovah?

• Manino ty Vavolombeloni-Jehovah ro manday ty anakiny lafa mandeha mitory?

• Tsy manao fety na fankalazà hafa va ty Vavolombeloni-Jehovah?

• Ino ty raha tsapan’olo lasa Vavolombeloni-Jehovah rey?

Manao batisa ajà kelikely va ty Vavolombeloni-Jehovah?

Aha. Tsy mampirisiky fanaova batisa ajà kelikely ty Baiboly. Resahini-Baiboly ohatsy, fa naharè hafatsy noho ‘nandramby soa’ ani-hafatsy iny sady nibebaky Kristiana tamy taonjato voalohany rey zay vo natao batisa. (Asan’ny Apostoly 2:14, 22, 38, 41) Midika raha zay, fa mila mahazo soa noho mino ty raha ampianarini-Baiboly sady tapa-kevitsy hiay mifanaraky amy raha ianarany ty olo raiky, zay vo tokony hatao batisa. Kanefa tsy afaky manao ani-raha reo ty ajà.

Mety hanapa-kevitsy hatao batisa ty ajà lafa mihabe. Fe ndre zay, le tokony ho hainy soa ty dikani-fanokanam-bata ataony.

Tsy mifandramby amy ty anakiny mifily tsy atao batisa va ty Vavolombeloni-Jehovah?

Aha. Marina aloha fa malahelo ty baba noho reny Vavolombelo lafa tsy manaraky ty finoan-drozy ty anakiny. Fe mbo tea noho tsy mihatakataky amy ty anakin-drozy tsy ta ho lasa Vavolombelo rozy.

Manino ty Vavolombeloni-Jehovah ro manday ty anakiny lafa mandeha mitory?

Maro ty antony mahavy anay manday ty anakinay manao asa fitoria.a

• Resahini-Baiboly fa tokony hampianatsy ty anakiny amy lafiny ara-panahy noho hanampy an-drozy hanompo a Ndranahary ty baba noho reny. (Efesianina 6:4) Tampany bevata amy fampianara ty ajà mikasiky a Ndranahary ty fitoria satria anisani-fanompoa ty hoe manambara ty finoa ankavoria.—Romanina 10:9, 10; Hebreo 13:15.

• Mampirisiky manoka ty tanora ty Baiboly mba “hidera ty anarani-Tompo.” (Salamo 148: 12, 13, Fandikan-teny Katolika) Fomba raiky bevata hiderà a Ndranahary ty firesaha amin’olo mikasiky azy.b

• Mandramby soa ty ajà lafa miaraky mitory amy baba noho reniny. Ohatsy hoe: lasa mahay mifandramby amin’olo sankarazany rozy sady lasa mana toetsy soa manahaky ty hoe miferinay olo, soa fanahy, manaja olo noho tsy tea tena. Lasa hain-drozy koa ty mampiasa Baiboly mba hanaporofoa ty raha inoan-drozy.

Tsy manao fety na fankalazà hafa va ty Vavolombeloni-Jehovah?

Tsy manao fety ara-pivavaha na fankalazà hafa tsy mampifaly a Ndranahary ty Vavolombeloni-Jehovah.c (2 Korintianina 6:14-17; Efesianina 5:10) Tsy mankalaza aniversera na Krismasy ohatsy zahay satria tsy Kristiana ty olo niaviani-raha reo.

Fe ndre zay, le mahafaly anay ty miaraky amy fianakavianay noho manome raha ty anakinay. Tsy miamby daty voafaritsy zahay vo hifamory amy fianakavia noho hifanolotsy fanomeza, fa afaky manao fiaraha noho manao fanomeza avao zahay amy fotoa itiavanay azy.