Akory ty Fomba Andamina ty Fiangona?

Ndranaharini-filamina Jehovah. (1 Korintianina 14:33) Ka afaky matoky tsika hoe voalamy ty vahoakiny. Akory ty fomba andamina ty fiangona kristiana? Ino ty azontsika atao mba hilamy soa avao raha io?

1. Ia ty lohani-fiangona?

“Kristy ro lohani-fiangona.” (Efesianina 5:23) Baka an-danitsy any ie ro mitariky ty asani-vahoakini-Jehovah amy tany toy iaby. Nanendry “ty mpanompo azo atokisa noho mahihitsy” Jesosy. (Vakio Matio 24:45-47.) Anti-panahy matotsy vitsivitsy ro anatini-mpanompo io ao. Kaihy hoe Filan-kevi-pitantana koa mpanompo io. Manome tari-dala ho ani-fiangona amy tany toy iaby ty Filan-kevi-pitantana, manahaky ty nataoni-apostoly noho ty anti-panahy ta Jerosalema ao tamy taonjato voalohany. (Asan’ny Apostoly 15:2) Fe tsy midika zay hoe lahilahy vitsivitsy reo ro mpitariky ty fandaminantsika. Mamaky Baiboly rozy mba hahità ty raha teani-Jehovah hataon-drozy. Manaraky ty tari-dalani-Jesosy koa rozy.

2. Ino ty andraikitsini-anti-panahy?

Lahilahy Kristiana matotsy ty anti-panahy. Mampianatsy ty Soratsy Masy rozy, le manampy noho mampahery ty mpanomponi-Jehovah. Tsy karamà rozy amy fanaova ani-raha rezay. Lafa manao ty andraikitsin-drozy rozy le “tsy forosè, fa an-tsitrapo, sady tsy amy ty fitiava tombony azo baka amy tsy marina, fa amim-paharisiha.” (1 Petera 5:1, 2) Ty mpanampy amy fanompoa ro manampy ty anti-panahy. Mety hahafeno fepetra ho anti-panahy koa rozy afarafara any.

Misy anti-panahy tendreni-Filan-kevi-pitantana mba ho mpiandraikitsini-faritsy. Mitsidiky fiangona rozy mba hanome toromariky noho hampahery ty rahalahy noho anabavy. Manendry anti-panahy na mpanampy amy fanompoa koa rozy. Tsy maintsy mahafeno fepetra resahini-Baiboly ty rahalahy zay vo voatendry.​—1 Timoty 3:1-10, 12; Titosy 1:5-9.

3. Ino ty andraikitsini-Vavolombeloni-Jehovah kiraidraiky?

Mana andraikitsy “hidera ty anarani-Jehovah” ty olo iaby amy fiangona eo. (Vakio Salamo 148:12, 13.) Zay ro mahavy an-drozy mandramby anjara amy fivoria noho manao ze farany vitan-drozy mba hitoria ty vaovao soa.

DINIHO LALIKY

4. Mpitariky soa fanahy Jesosy

Soasoa raha nampanaovini-Jesosy antsika toy. Vakio Matio 11:28-30, bakeo iaraho midiniky fanontanea toy:

• Mpitariky manao akory Jesosy, le ino ty teany ho tsapantsika?

VIDEO: Nanampy ty Anti-panahy Lafa Nisy Horohoron-tany ta Népal Any (4:56)

Volanini-Baiboly mazava ty fomba tokony hanaovani-anti-panahy ty andraikitsiny.

Vakio Isaia 32:2 noho 1 Petera 5:1-3, bakeo iaraho midiniky fanontanea retoa:

• Ino ty tsapanao lafa hainao hoe miezaky mafy ty anti-panahy mba hanahaky ty modelini-Jesosy?

• Ino ty raha ataoni-anti-panahy mba hanahafa ani-Jesosy?

5. Manome modely ty anti-panahy

VIDEO: Mitariky ty Anti-panahy Sady Modely! (7:39)

Nivolanini-Jesosy ty toetsy tokony hananani-ze mpiandraikitsy amy fiangona eo. Vakio Matio 23:8-12, bakeo iaraho midiniky fanontanea toy:

• Tokony hanao akory ty toetsini-anti-panahy laha hentea ty Baiboly? Akory ty fahitanao azy, manaraky ty raha volanini-Baiboly va ty mpanday fivavaha?

1. A. Miezaky mafy ty anti-panahy mba hatanjaky ara-panahy avao ie noho ty fianakaviany

2. B. Mikarakara ty olo iaby amy fiangona ao ty anti-panahy

3. D. Mazoto mitory ty anti-panahy

4. E. Mpampianatsy ty anti-panahy. Manampy amy fanadiova noho asa hafa koa rozy

6. Afaky miaraky miasa amy anti-panahy tsika

Miresaky antony bevata tokony hiarahantsika miasa amy anti-panahy reo ty Baiboly. Vakio Hebreo 13:17, bakeo iaraho midiniky fanontanea retoa:

• Manino ty Baiboly ro mampirisiky antsika mba hanoriky noho haneky ani-azy mitariky reo? Marina va zay laha ty fahitanao azy?

Vakio Lioka 16:10, bakeo iaraho midiniky fanontanea toy:

• Manino tsika ro tokony hanoriky safàni-anti-panahy reo avao, ndre amy raha eritseretintsika hoe kelikely aza?

FAMINTINA

Jesosy ro lohani-fiangona, le maneky ty fahefàny anti-panahy reo. Falifaly koa tsika miaraky miasa amy anti-panahy reo, satria soa fanahy rozy sady modely ho antsika.

Famerena

• Ia ro lohani-fiangona?

• Akory ty anampeani-anti-panahy reo ty fiangona?

• Ino ty andraikitsini-mpanomponi-Jehovah kiraidraiky?

DINIHO KOA RETOA

Ino ty ahità hoe tena mila fomba hahasoa ty Kristiana ty Filan-kevi-pitantana noho ty anti-panahy hafa?

Niezaky Hiharo Raiky Avao Ndre Nisy ty Fandrarà (4:22)

Ino ty asani-mpiandraikitsini-faritsy?

Raha Iainani-Mpiandraikitsini-Faritsy amy Pilasy Mitoka Any (4:51)

Ino ty andraikitsini-ampela amy fiangona eo?

“Misy Vehivavy Mitory Teny ve ao Amin’ny Vavolombelon’i Jehovah?” (Ny Tilikambo Fiambenana 1 Septambra 2012)

Ino ty ezaky mafy ataoni-anti-panahy reo mba hampahereza ty finoa raiky aminy?

“‘Mpiara-miasa mba Hahazoantsika Fifaliana’ ny Anti-panahy” (Ny Tilikambo Fiambenana 15 Janoary 2013)