“Tena Lafovily Iha”!

1-2. Ino ty hanampy antsika hatòky hoe lafovily amy Jehovah tsika?

LAFOVILY amy Jehovah ty mpanompony iabiaby. Fe misy avao ty tsy nahatsapa ani-zay, satria mety tsy nasian’olo dikany ie tamy ty fiainany. Fa nahatsapa raha manahaky ani-zay koa va iha? Laha eka, ino ty hanampy anao hatòky hoe lafovily amy Jehovah iha?

² Resahy amy Baiboly ao ty fomba tean’i Jehovah handaisa ty olo. Hanampy anao hahita an’ny raha zay ty fandiniha ty tantara amy Baiboly ao. Hita ao hoe soa fanahy noho nanaja olo Jesosy. Mampiseho raha zay fa tena lafovily aminy noho amy Babany ty olo, ndre azy mieritseritsy ty vatany ho tsy misy dikany rey aza. (Jaona 5:19; Heb. 1:3) Hodinihintsika amy lahatsoratsy toy ato hoe: 1) akory ty nanampean’i Jesosy ty olo mba hahatsapa hoe lafovily amy Jehovah rozy, le 2) ino ty hanampy antsika hatòky hoe tena lafovily amy Ndranahary koa tsika.​—Hag. 2:7.

AKORY TY NANAMPEAN’I JESOSY TY OLO HAHATSAPA HOE LAFOVILY ROZY?

3. Akory ty fomba nandaisan’i Jesosy an’olo ta Galilia any rey?

³ Lafa nitory ta Galilia any Jesosy, le maro ty olo nijanjy azy noho nitahany. Nivoamarikin’i Jesosy hoe “nampijalỳ rozy sady tsy misy mpidary manahaky aondry tsy misy mpiaraky rey.”(Mat. 9:36) Tsy nanisy dikany an’olo reo ty mpitariky fivavaha. Nikaihin-drozy hoe “voaozo” mihintsy aza olo rey. (Jaona 7:47-49) Fe tsy nanahaky ani-zay Jesosy fa nanaja noho nisoa fanahy tamin-drozy, ka nanoka fotoa hampianara noho nitahà ty aretin-drozy. (Mat. 9:35) Ta hanampy olo maro araky ze azo atao ie, le nampiofaniny hitory koa apostoly rey sady namean’ny fahefà hitaha olo.​—Mat. 10:5-8.

4. Ino ty ianarantsika baka amy fomba nandaisan’i Jesosy an’olo nijanjy azy rey?

⁴ Nanaja noho nisoa fanahy tamin’olo nijanjy azy rey Jesosy, ka hita baka amy zay hoe tena lafovily aminy noho amy Babany ty olo ndre olo tsy de nasian’olo dikany aza. Laha mpanompon’i Jehovah iha fe misalasala laha tena lafovily aminy, le diniho ty fomba nandaisan’i Jesosy an’olo nijanjy azy rey. Hanampy anao ty fanaova ani-zay mba hahita hoe tena lafovily amy Jehovah iha.

5. Ino ty raha haintsika mikasiky an’ny ampela marary nihitan’i Jesosy ta Galilia any iny?

⁵ Tsy ty olo amy fitambarany avao ro nampean’i Jesosy noho nampianariny fa ty olo kiraidraiky koa. Tamy ie nitory ta Galilia any iny, ohatsy, le nahita ampela nampijalin’arety satria nandeha lio avao tanatiny 12 tao. (Marka 5:25) Lasa naloto ampela iny vokatsini-zay, ka lasa maloto koa ze olo mikasikasiky azy. Azo antoky zany fa tsy de nisy olo nifandramby tamin’ampela io. Ankoatsini-zay, tsy afaky nanompo an’i Jehovah niaraky tamin’olo maro na namonjy fankalazà tamy synagoga any koa ie. (Lev. 15:19, 25) Azo antoky fa nijaly ara-bata noho ara-pihetseham-po ampela io.​—Marka 5:26.

6. Ino ty nataon’ny ampela iny mba hahafaky an’ny aretiny iny?

⁶ Tean’ny ampela io hitaha azy Jesosy. Fe tsy niresahiny aminy mivanta raha zay. Ino ty antony? Mety nahamenatsy azy vasa aretiny iny na natahotsy horoasin’i Jesosy amason’olo maro eo ie satria naloto. Farany ty sikin’i Jesosy avao ro nikasihiny sady natoky ie hoe hahajanga azy raha zay. (Marka 5:27, 28) Tena nanam-pinoa ie ka niafaky aretiny iny. Lafa nanontany Jesosy hoe ia olo nikasiky azy iny, le nivolaniny tamy Jesosy iaby ty raha nataony. Ino amy zay ty nataon’i Jesosy taminy?

7. Akory ty fomba nandaisan’i Jesosy an’ny ampela nampijalin’arety iny? (Marka 5:34)

⁷ Soa fanahy noho nanaja ampela Jesosy. Hitany hoe “natahotsy noho nangitikitiky” ampela iny. (Marka 5:33) Tena nisoa fanahy taminy ie sady nampahery azy. Nikaihiny hoe “anako” mihintsy aza ampela iny. Hita baka amy zay fa tsy hoe nanaja azy avao Jesosy fa nampiseho fitiava noho hasoam-panahy taminy koa. (Vakio Marka 5:34.) Io “raiky avao ty andininy amy Baiboly ao ahità an’i Jesosy nikaiky ampela hoe ‘anako.’” Nampiasa an’ny safà misy hasoam-panahy zay ie satria hitany hoe natahotsy ampela iny. Mba vetsevetseo ty hafalea tsapan’ny ampela io! Nasehon’i Jesosy tamy raha nivolaniny iny koa hoe ta hampahery an’ny ampela iny ie, amy zay tsy hanome tsiny ty vatany ampela iny satria hoe nikasiky ty sikiny sady nilitsy anivon’olo eo. Tsy hoe ta hitaha an’ny aretin’ny ampela iny avao Jesosy fa ta hanampy azy koa mba hahay hoe tena lafovily amy Babany an-danitsy any iny ie.

8. Akory ty fomba nandaisan’olo an’ny ranabavy baka a Brezily any io?

⁸ Misy amy mpanompo-Ndranahary koa henanizao kivy sady mahatsapa hoe tsy misy dikany satria marary. Kilemaina baka an-tron-dreniny any, ohatsy, mpisava lala baka a Brezily any mana anara Mariaa zay, ka tsy nisy tomboky noho tana ankavia. Zao ty nivolaniny: “Nampijaly ahy avao ty mpiaraky mianatsy amiko. Namean-drozy anara kizaky iaby aho. Ndre ty fianakaviako aza kindraiky nanilikiliky ahy.”

9. Akory ty nahavy an’i Maria hahay hoe tena lafovily amy Jehovah ie?

⁹ Ino ty nanampy an’i Maria? Lafa lasa Vavolombelon’i Jehovah ie, le nampahery noho nanampy azy ty mpiara-manompo mba hahita ty fomba fahitan’i Jehovah azy. Hoy ty asany: “Maro ty ranadahy noho rahavavy nanampy ahy ka tsy ho tendriky anaty karneko ato iaby raha rey laha soraty! Misaotsy an’i Jehovah amy foko iabiaby aho satria namean’ny fianakavia ara-panahy soasoa.” Nanampy an’i Maria mpiara-manompo rey mba hahay hoe tena lafovily amy Ndranahary ie.

10. Ino ty raha nampijaly an’i Maria Magdalena? (Henteo koa sary io.)

¹⁰ Diniho koa ty fomba nanampean’i Jesosy an’i Maria Magdalena. Nisy demonia fito nipetraky taminy! (Lioka 8:2) Azo antoky hoe nanao fihetsiky hafahafa ie satria nisy demonia ka lasa nihatakatahan’olo. Tena nijaly ie. Tsy maintsy natahotsy koa ie sady nieritseritsy hoe tsy misy olo afaky ho tea azy na afaky hanampy azy. Fe niroasin’i Jesosy, demonia nampijaly azy rey, le nanjary mpianatsiny ie. Ino koa ty raha hafa nataon’i Jesosy mba hanampea an’i Maria Magdalena hahay hoe tena lafovily amy Ndranahary ie?

11. Akory ty nampisehoan’i Jesosy tamy Maria Magdalena hoe lafovily amy Ndranahary ie? (Henteo koa sary reo.)

¹¹ Nandesin’i Jesosy nitory niaraky amin-drozy Maria Magdalena.b Afaky naharè ty fampianaran’i Jesosy avao zany ie lafa nitory tamin’olo hafa Jesosy. Niseho taminy koa Jesosy lafa nivelomy sady ie ro anisan’ny mpianatsy niresahan’i Jesosy voalohany tamy fotoa io. Nirahin’i Jesosy mihintsy aza ie mba hanambara amy apostoly rey hoe fa velo Jesosy. Reo iaby ty fomba nanampean’i Jesosy an’i Maria Magdalena hahay hoe tena lafovily amy Jehovah ie!​—Jaona 20:11-18.

12. Ino ty nahavy an’i Lidia hahatsapa hoe tsy misy ilà azy ie?

¹² Maro koa ty mitovitovy amy Maria Magdalena henanizao ka mahatsapa ailikilikin’olo. Nivola Lidia, ranabavy baka an’Espainy any zay hoe nieritseritsy hanafaky azy reniny lafa nibevoka azy. Tiaron’i Lidia hoe ndre mbo nikelikely aza ie, le tsy nidary azy reniny sady nasiatsiaky taminy. Zao ty nivolaniny: “Vokatsin’ny raha niainako zay, le teako laha mba tean’olo noho inaman’olo avao aho. Fe natahotsy aho tsy no tsy maeva ampisehoa fitiava satria nivola tamiko mamako hoe olo tsy misy ilà azy aho.”

13. Ino ty nanampy an’i Lidia hahatsapa hoe lafovily amy Jehovah ie?

¹³ Niova raha rezay lafa nanomboky nianatsy Baiboly Lidia. Lasa tsapany hoe lafovily amy Jehovah ie lafa nivavaky, namaky Baiboly noho nahazo fampahereza baka amy rahalahy noho anabavy. Hoy ty asany: “Mivola amiko avao valiko matetiky hoe tena teany aho.” Ampahatiaroviny ahy avao toetsy soako rey. Manao manahaky ani-zay koa ty mpiara-manompo.” Mety misy olo manahaky an’i Lidia koa amy fiangonanareo eo, ka mila fanampea noho fampahereza baka aminao mba hahavy an-drozy hahatsapa hoe tena lafovily amy Jehovah rozy.

MANINO RO TOKONY HITOVY AMY FAHITAN’I JEHOVAH AZY TY FAHITANTSIKA TY VATANTSIKA?

14. Manino ty 1 Samoela 16:7 ro manampy antsika hahay ty fomba fahitan’i Jehovah ty olo? (Henteo koa ty efajoro hoe “Manino ro lafovily amy Jehovah ty Vahoakiny?”)

¹⁴ Tiarovo fa tsy mitovy amy fahitan’ny tontolo toy anao ty fahitan’i Jehovah anao. (Vakio 1 Samoela 16:7.) Tsy mianky amy pozinao, ty hanananao, na ty fianara nataonao ty fahitany anao. (Isa. 55:8, 9) Miezaha zany hanenty ty vatanao mitovy amy ty fahitan’i Jehovah azy, fa tsy manahaky ty fahitan’ny tontolo toy azy. Mety fa nivakinao amy Baiboly ao vasa ty tantara mampiseho hoe lafovily amy Jehovah ty olo. Miresaky tantaran’olo mieritseritsy ty vatany ho tsy misy ilà azy ty Baiboly, ohatsy hoe ty tantaran’i Elia, Naomy, noho Hana. Ka lafa mamaky an’ny tantara rey iha, le mariho ty fomba nitiavan’i Jehovah an-drozy. Azonao soraty koa ty raha niainanao mampiseho hoe tena tea anao Jehovah sady lafovily aminy iha. Afaky mamaky tantaran’olo nieritseritsy ty vatany ho tsy misy dikany rey koa iha amy boky noho gazetintsika rey ao.c

15. Manino Daniela ro “tena nilafovily” tamy Jehovah? (Daniela 9:23)

¹⁵ Tiarovo hoe lafovily amy Jehovah iha lafa tsy mivaliky. Nahatiaro ho reraky noho kivy marè Daniela mpaminany ndraiky zay. Fa ho zato tao ie tamy zay. (Dan. 9:20, 21) Akory ty nampaherezan’i Jehovah azy? Naniraky an’ny anjely Gabriela ie mba hampahatiarova an’i Daniela hoe “tena lafovily” ie sady ren’i Jehovah iaby ty vavaky nataony. (Vakio Daniela 9:23.) Manino Daniela ro lafovily amy Ndranahary? Satria mana toetsy soa maro ie, anisani-zay ty hoe tea fahamarina noho tsy mivaliky. (Ezek. 14:14) Nataon’i Jehovah amy Safàny ao tantara zay mba hampahereza antsika. (Rom. 15:4) Lafovily amy Jehovah koa iha satria tea fahamarina sady tsy mivaliky. Mijanjy ty vavaky ataonao ie, manahaky ty nataony tamy Daniela.​—Mik. 6:8; Heb. 6:10.

16. Ino ty hanampy anao hahita hoe sahala Baba tena tea anao Jehovah?

¹⁶ Ataovo sahala amy Baba tena tea anao Jehovah. Ta hanampy anao Jehovah fa tsy hoe hifantoky amy ze raha tsy mety ataonao. (Sal. 130:3; Mat. 7:11; Lioka 12:6, 7) Nanampy olo maro mieritseritsy ty vatany ho tsy misy dikany ty fametsevetsea ani-zay. Diniho, ohatsy, ty tantaran’i Michelle, ranabavy baka an’Espainy any. Nahatsapa ho tsy misy dikany noho tsy misy ilà azy ie, satria nanao safà maharary taminy avao valiny tanatin’ny tao maro. Zao ty nivolaniny: “Lafa malahelo aho, le vetsevetseko hoe ingy Jehovah mitrotro ahy sady manambintamby noho miaro ahy.” (Sal. 28:9) Zao avao koa ty nitiarovin’i Lauren, ranabavy baka an’Afriky antimo any zay: “Kanao Jehovah nitao ahy hamonjy azy, nanampy ahy tsy hivaliky aminy tanatin’ny tao maro noho nampiasa ahy mba hampianatsy Baiboly olo, le azoko antoky hoe tena lafovily aminy aho.”​—Jaona 6:44.

17. Ino ty hanampy anao ho resy lahatsy hoe mahazo hatò amy Jehovah iha? (Salamo 5:12) (Henteo koa sary io.)

¹⁷ Miezaha ho resy lahatsy hoe mahazo hatò amy Jehovah iha. (Vakio Salamo 5:12.) Nampitovizin’i Davida tamy “apinga bevata” ty hatò baka amy Jehovah, ka afaky miaro ty olo marina. Ka laha mahatsapa ho tsy misy dikany iha, le afaky manampy anao ty fahaizanao hoe mahazo hatò amy Jehovah iha sady ampeany. Akory ty ahaizanao hoe mahazo hatò amy Jehovah iha? Manome toky antsika amy raha zay ty Safàny. Mampiasa ty anti-panahy, ty mpiara-manompo na raha hafa koa Jehovah mba hampahatiarova antsika hoe lafovily aminy tsika. Ino ty tokony hataonao lafa mahazo fampahereza manahaky ani-zay?

18. Manino iha ro tokony hino hoe marina ty safà fampahereza ataon’olo aminao?

¹⁸ Rambeso soa ty safà fampahereza baka amin’olo tea anao na mahay anao. Tiarovo hoe mety hampiasa an-drozy Jehovah mba hanampea anao ho resy lahatsy hoe mahazo hatò aminy iha. Zao ty nivolanin’i Michelle, azy niresahintsika taloha teo iny: “Lasa nino tsikelikely aho hoe tena marina safà fampahereza ataon’olo amiko rey. Nisarotsy amiko ty hino raha soa resahin’olo mikasiky ahy, fe haiko henanizao hoe tean’i Jehovah hino an’ny raha zay aho.” Nanampy an’i Michelle ty fanampean’ny anti-panahy mba hahita hoe tea azy Jehovah. Mpisava lala ie henanizao sady miasa an-tsitrapo ho an’ny Betela baka an-tranony any.

19. Manino iha ro afaky matoky hoe lafovily amy Ndranahary?

¹⁹ Nampahatiarovin’i Jesosy antsika hoe tena mikarakara antsika Babantsika an-danitsy any iny. (Lioka 12:24) Afaky matoky zany tsika fa tena lafovily amy Jehovah. Loniky lahy mba tsy ho halinontsika mihintsy raha zay! Le enganè tsika hanao ze azontsika atao koa mba hanampea ty hafa hahita hoe lafovily amy Ndranahary rozy!