Salamo

37 Aua e te tigā* ona o ē e fai mea leaga

Pe matauʻa i ē e faia mea sesē.+

 2 E vave magumagu i latou e pei o le mutia+

Ma mamae e pei o le vao muʻa lauolaola.

 3 Ia e faatuatua iā Ieova ma faia mea lelei;+

Ia e nofo i le lalolagi* ma gaoioi ma le faamaoni.+

 4 Ia e matuā fiafia foʻi iā Ieova,

Ona foaʻi mai lea e ia o mea e manaʻo i ai lou loto.

 5 Ia e tuuina atu iā Ieova lou ala;+

Ia faalagolago atu iā te ia, ona gaoioi lea o ia mo oe.+

 6 E faaalia lava e ia lau amiotonu e pei o le malamalama,

Ma lau faamasinogatonu e pei o le tutonu o le lā.

 7 Ia filemu pea i luma o Ieova+

Ma ia matuā faatalitali atu* iā te ia.

Aua neʻi e tigā ona o le tagata

O loo taulau i le faataunuuina o ana faufauga.+

 8 Inā tuu ia le ita ma lafoaʻi le lotoa;+

Aua neʻi e tigā ma liliu atu i le faia o se mea leaga.*

 9 Auā e faaumatia o ē e fai mea leaga,+

A o ē e faamoemoe iā Ieova e fai mo i latou le lalolagi.+

10 Ua toeitiiti lava ona lē toe iai lea o le tagata amioleaga;+

E te vaai atu i le mea sa iai o ia,

Ae ua leai lava.+

11 A o ē e agamalu, e fai mo i latou le lalolagi,+

E matuā faafiafiaina foʻi i latou ona o le tele o le filemu.+

12 Ua taupulepule le tagata amioleaga faasaga i lē e amiotonu;+

Ua atigū atu foʻi ona nifo iā te ia.

13 Ae e soisoi Ieova iā te ia,

Auā ua silafia e Ia e oo mai le aso e faaumatia ai o ia.+

14 Ua seʻi aʻe e tagata amioleaga a latou pelu ma loloʻu* a latou ʻaufana,

Ina ia osofaʻia ai ē ua tigā ma ē ua matitiva,

Ma fasiotia ai i latou e saʻo o latou ala.

15 Ae e ati a latou pelu i o latou lava fatu;+

E gauia a latou ʻaufana.

16 E sili atu si mea itiiti a lē e amiotonu

Nai lo o mea e tele a le toʻatele o ē e amioleaga.+

17 Auā e gauia lima o tagata amioleaga,

Ae e lagolagoina e Ieova o ē e amiotonu.

18 Ua silafia e Ieova mea e oo i ē ua lē ponā,*

Ma e faavavau lava lo latou tofi.+

19 E lē māsiasi i latou i le taimi o puapuaga;

E tele foʻi a latou meaʻai i taimi o le oge.

20 Ae e fano tagata amioleaga;+

E mavae atu fili o Ieova e pei o laufanua matagofie;

E mavae atu i latou e pei o le asu.

21 E aitalafu e le tagata amioleaga mea, ae e lē toe totogiina atu,

A o le tagata amiotonu e limafoaʻi ma agalelei.+

22 O i latou e faamanuiaina e Ia, e fai mo i latou le lalolagi,

A o ē e fetuuina e Ia, e faaumatia i latou.+

23 E ta‘ita‘ia* e Ieova laasaga o se tagata,+

Pe a fiafia o Ia i lona ala.+

24 Afai e paʻū o ia, e lē lafotūina i lalo,+

Auā e taofia e Ieova lona lima.+

25 Sa ou talavou a o lenei ua ou toeaina,

Ae ou te leʻi iloa lava se tagata amiotonu ua tuulafoaʻiina,+

Po o ana fanau o ʻaisi mo ni meaʻai.*+

26 E nonō atu ana mea i taimi uma ma le lotomalie,+

Ma o le a maua e lana fanau le faamanuiaga.

27 Ia liliuese mai i mea leaga ae fai mea lelei,+

Ona e nofo ai lea i le lalolagi e faavavau.

28 Auā e fiafia Ieova i le faamasinogatonu,

E na te lē tuulafoa‘ia foʻi o ē e faamaoni iā te ia.+

E leoleoina i latou i taimi uma lava;+

A o fanau a ē e amioleaga, e aveesea lava i latou.+

29 E fai lava le lalolagi mo ē e amiotonu,+

E nonofo ai pea i latou e oo i le faavavau.+

30 O le gutu o le tagata amiotonu e tautala i le atamai,*

O lona laulaufaiva foʻi e tautala i mea e tonu.+

31 Ua iai i lona loto le tulafono a lona Atua;+

E lē tautevateva foʻi lana savali.+

32 O loo mata‘ituina e le tagata amioleaga le tagata amiotonu

Ma o loo saʻili e fasioti o ia.

33 Ae e lē tuuina atu e Ieova o ia i le lima o lenā tagata,+

Pe taʻusalaina o ia pe a faamasinoina.+

34 Ia faamoemoe iā Ieova ma mulimuli i lona ala,

Ona ia faaeaina lea o oe ina ia fai ma ou tofi le lalolagi.

35 Ua ou vaai atu i le tagata amioleaga ua faasauā,

Ua lauolaola e pei o se laau lauusiusi i lona lava laueleele.+

36 Ae ua faafuase‘i ona mou atu o ia, ma ua leai lava;+

Na ou saʻili pea iā te ia, ae ua lē maua o ia.+

37 Ia vaavaai i lē ua lē ponā,*

Ma ia tulimataʻi pea lē ua amio saʻo,+

Auā o le a filemu le lumanaʻi o lenā tagata.+

38 Ae e faaumatia o ē uma e solitulafono;

E leai foʻi se lumanaʻi o tagata amioleaga.+

39 O le faaolataga o ē e amiotonu, e mai iā Ieova lea;+

O ia o lo latou malosi i taimi o mafatiaga.+

E na te lavea‘iina i latou mai i tagata amioleaga ma faaolaina i latou,

Auā ua latou sulufaʻi atu iā te ia.+