O le Tusi Muamua i le Faapotopotoga i Korinito

10 O lenei le ʻauuso e, ou te manaʻo ina ia outou iloa, sa iai o tatou augātamā uma i lalo ifo o le ao,+ ma na latou ui uma atu i le sami,+ 2 na papatisoina foʻi i latou uma iā Mose e ala i le ao ma le sami, 3 ma na latou aai uma i le meaʻai faaleagaga e tasi,+ 4 ma feinu uma i le meainu faaleagaga e tasi.+ Auā sa masani ona latou feinu mai i le papa faaleagaga, lea na mulimuli atu iā i latou, ma o lenā papa o le Keriso lea.+ 5 Peitaʻi, e leʻi fiafia le finagalo o le Atua i le toʻatele o i latou, auā na feoti i latou i le toafa.*+

6 Na fai na mea ma faaaʻoaʻoga iā i tatou, ina ia aua neʻi o tatou tuʻinanau i mea leaga, e pei ona latou tuʻinanau i ai.+ 7 Aua foʻi neʻi avea outou ma ē e ifo i tupua e pei ona faia e nisi o i latou; e pei ona tusia: “Sa nonofo i lalo le nuu e aai ma inu. Ona latou tutū lea i luga ma fiafia.”+ 8 Aua foʻi neʻi faaauau ona tatou faia amioga lē mamā taufeusuaʻiga,* e pei ona faia e nisi o i latou o amioga lē mamā taufeusuaʻiga,* ma fano ai le toʻa 23,000 o i latou i le aso e tasi.+ 9 Aua foʻi tatou te faia se mea e tofotofo ai iā Ieova,*+ e pei ona tofotofoina o ia e nisi o i latou, ma fano ai i gata.+ 10 Aua foʻi le muimui e pei ona muimui o nisi o i latou,+ ma fano ai i lē e faaoosala.+ 11 Na oo nei mea iā i latou e fai ma faaaʻoaʻoga, ma na tusia ina ia lapataʻia ai i tatou+ o ē o loo ola i le iʻuga o faiga o mea a le lalolagi.

12 O lea la, o lē ua manatu o loo tū o ia, ia faaeteete neʻi paʻū.+ 13 O faaosoosoga e oo iā te outou, e oo foʻi i tagata uma.+ Ae e faamaoni le Atua, ma e na te lē tuua outou i se faaosoosoga e sili atu nai lo o le mea tou te lavātia,+ ae pe a oo mai le faaosoosoga, e saunia e ia se auala e sao ai outou, ina ia outou tumau ai.+

14 O lea la, aʻu uō pele e, ia sosola ese mai i le ifo i tupua.+ 15 Ua ou tautala atu i tagata ua iai le faautaga loloto; ia faamasino outou i le mea ua ou fai atu ai. 16 O le ipu o le faafetai lea ua tatou faafetai atu ai,* pe e lē o le auai faatasi ea lea i le toto o Keriso?+ O le areto lea ua tatou vaevaeina, pe e lē o le auai faatasi ea lea i le tino o Keriso?+ 17 E tasi le areto, e ui lava e toʻatele i tatou ae e tasi lo tatou tino,+ auā e tatou te aai uma i lenā areto e tasi.

18 Ia outou manatu foʻi iā Isaraelu faaletino: Pe e lē o auai faatasi ea o ē e aai i manu ua fasia mo taulaga, i le tapuaʻiga i le fata faitaulaga?+ 19 O le ā la saʻu upu e fai atu? Pe e aogā ea mea ua faataulaga mo se tupua, ma pe e aogā ea le tupua? 20 E leai; ae ou te fai atu iā te outou, o mea ua faataulaga e nuu ese, ua latou faataulaga i temoni, ae e lē o le Atua;+ ma ou te lē manaʻo ina ia outou tofusia faatasi ma temoni.+ 21 E lē mafai ona outou inu i le ipu a Ieova* ma le ipu a temoni; e lē mafai foʻi ona outou aai i “le laoai a Ieova”*+ ma le laoai a temoni. 22 Po ua ‘tatou faatupu ea le fuā o Ieova’?*+ Pe e sili atu ea ona malolosi i tatou nai lo o ia?

23 E taga mea uma, ae e lē o mea uma e aogā. E taga mea uma, ae e lē o mea uma e atiaʻe ai.+ 24 Aua neʻi saʻilia e se tasi lona lava lelei, ae ia faaauau ona saʻili le lelei o isi.+

25 Ia outou aai i so o se mea ua faatauina atu i maketi e faatau ai aano o manu, ae aua le fesili ona o outou lotofuatiaifo; 26 auā “o Ieova* e ana le lalolagi ma mea uma o loo iai.”+ 27 Afai e valaaulia outou e se tasi e lē talitonu, ma ua outou mananaʻo e tou te ō i ai, ia aai i so o se mea ua laulauina i o outou luma, ae aua le fesili ona o o outou lotofuatiaifo. 28 Ae afai e faapea atu se tasi iā te outou: “O lenei meaʻai ua ofoina atu o se taulaga,” aua le aai ai ona o lē na ia taʻu atu iā te oe, ma ona o le lotofuatiaifo foʻi.+ 29 E lē o fai atu laʻu tala i lou lava lotofuatiaifo, a o le lotofuatiaifo o le isi tagata. Auā aiseā e faamasinoina ai fua loʻu saʻolotoga e le lotofuatiaifo o le isi tagata?+ 30 Afai ua ou ʻai ma le faafetai, aiseā e taʻuleagaina ai fua aʻu i mea ua ou faafetai ai?+

31 O le mea lea, pe tou te aai, pe inu, pe faia se isi lava mea, ia faia mea uma lava ina ia faamamaluina ai le Atua.+ 32 Aua neʻi avea outou ma mea e tausuai ai tagata Iutaia, ma tagata Eleni, atoa foʻi ma le faapotopotoga a le Atua,+ 33 e pei foʻi ona ou taumafai e faafiafia tagata uma i mea uma lava, ou te lē o saʻili i soʻu lava lelei+ ae e mo le lelei o le toʻatele, ina ia faaolaina ai i latou.+