O Aiā Tatau mo Tagata Uma o le a Iai Moni i le Lalolagi Atoa!

UA FESILIGIA se tasi o loia o aiā tatau a tagata o lē ua iai le poto masani, “O le ā le aa autū o le faaleagaina o aiā tatau a tagata?” Na tali le loia: “O le matapeapea. O le matapeapea mo le pule faapolotiki ma le tamaoaiga.” Ma ona o le matapeapea e sau mai le mafaufau o le tagata, o le faaleagaina la o aiā tatau a tagata ua faaalia moni ai le tulaga o le mafaufau. O le isi mafuaaga o le lotonuu. O le filosofia o loo uunaia ai le faaleagaina o aiā tatau a tagata e faapea, e muamua lava loʻu atunuu. O aiā tatau a tagata la, faatoʻā faatinoina moni lava pe afai ‘e oo mai se malo o le lalolagi e mafai ona gaoioi i se tulaga e matuā faamalosiaina ai,’ o le faamatalaga lena a le polofesa o tulafono ma tamaoaiga mai Holani e suafa ia Jan Berkouwer.

I nisi faaupuga, ina ia avea aiā tatau a tagata o se mea moni lava i le lalolagi atoa, pe ā ma le lua mea e ao ona fai muamua: o se suiga o mafaufau ma se suiga o faiga malo. Pe e talafeagai ea ona faamoemoe e mafai ona tupu lenei mea?

O Mafuaaga e Lua mo Suiga

A o tulata atu le Sefulu Tausaga o Aʻoaʻoga mo Aiā Tatau a Tagata a Malo Aufaatasi i lona lima o tausaga talu ona iai, ua tele tausaga talu ona taulau manuia se polokalame tau aʻoaʻoga a se faalapotopotoga tumaoti faava-o-malo i le suia lea o manatu o le faitau miliona o tagata. O le iuga, ua feutagai nei tagata taitoatasi ma o latou uso a tagata i se auala faaaloalo ma le mamalu. O lenei polokalame, o loo faatinoina e Molimau a Ieova, o loo faagaoioia i le sili atu i le 230 atunuu. Aisea o loo taulau ai?

O se tasi o pogai, ona o lenei polokalame o le aʻoaʻoina o le Tusi Paia i le lalolagi atoa ua faalautele ai le malamalamaga o tagata e faatatau i le amataga o aiā tatau a tagata. Sa taʻua i le Faalauiloaina Faalauaitele o Aiā Tatau a Tagata e faapea ua i le tagata aiā tatau ona o ia o le tagata soifua e mafaufau.

Sa tatau ona maua mai e le tagata lona tomai e mafaufau ai ma lona loto fuatiaifo mai se puna e maualuga aʻe. (Tagai i le pusa “Le Puna o Aiā Tatau a Tagata,” i le itulau 13.) O le amanaiaina o lenei pogai tauatua e sili aʻe, o le a avatu ai ia te oe mafuaaga malolosi e faaaloalo ai i lou uso a tagata. O le a e feutagai ai ma isi i le faaaloalo e lē gata ona ua taʻu atu ia te oe e lou loto fuatiaifo e fai, ae e sili atu ona tāua, ona o lou faaaloalo ma lou alofa mo Lē na Foafoaina Mea o le a uunaia oe e feagai ai ma le faaaloalo ma lana foafoaga. O lenei vaaiga vala lua e faavae i afioga a Iesu: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” atoa ma le “E te alofa atu i lē lua te tuaoi, ia pei o oe lava ia te oe.” (Mataio 22:37-39) O le tagata e faaaloalo loloto i Lē na Foafoaina Mea o le a lē tāitai ona ia faaleagaina aiā tatau a lona uso a tagata, auā o se tofi na maua mai le Atua. O lē e faaleagaina aiā tatau a tagata ua faoa foi e ia le tofi.

Aʻoaʻoga e Mafai Ona Faia ai Suiga

O le ā le lelei o iai i le polokalame tau aʻoaʻoga o le Tusi Paia a Molimau a Ieova mo le faaitiitia o le faaleagaina o aiā tatau a tagata? O le auala lelei lava e tali ai le fesili lena o le tagai i iuga o le polokalame, e pei ona fetalai Iesu, “e taʻuamiotonuina le poto i ana galuega.”—Mataio 11:19.

Ua lauiloa se tusitusiga o loo lolomi i se pa i le Lotoā o Malo Aufaatasi i Niu Ioka e faitauina faapea: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te lē toe aʻoaʻo foi i taua.” O loo sii mai nei upu i le Isaia mataupu e 2, fuaiupu e 4, ma o loo faaaogā e Malo Aufaatasi e faasino atu ai i se auala iloga e aveesea ai le matuā faaleagaina o aiā tatau a tagata—o le faauma lea o faiga taua. Auā foi, o taua o le ‘fili lea o aiā tatau a tagata,’ e pei ona faaupu ai e se lomiga a Malo Aufaatasi.

I le polokalame tau aʻoaʻoga a Molimau a Ieova ua latou faaaogaina ai manatu o upu a Isaia o i le pa maa i se uiga e sili atu. Ua “tusia” upu a Isaia i loto o tagata. (Faatusatusa i le Eperu 8:10.) E faapefea? Ua aveesea e le polokalame pa puipui o ituaiga ma lanu ma nutililii pa o le lotonuu e ala i le aʻoaʻoina o le vaaiga a le Tusi Paia i ituaiga o tagata: E na o le tasi lava le ituaiga—o le ituaiga lea o tagata. (Galuega 17:26) O i latou ua auai i le polokalame ua ati ae le faanaunauga e “faaaʻoaʻo . . . i le Atua,” o lē o loo faapea mai le Tusi Paia: “E le faailogaina tagata e le Atua; ae peitai o le mataʻu ia te ia i nuu uma lava, ma fai le amiotonu, ua talia i latou e ia.”—Efeso 5:1; Galuega 10:34, 35.

Ona o iuga o lenei aʻoaʻoga e faavae i le Tusi Paia, e faitau miliona tagata i aso nei latou te lē o “toe aʻoaʻo foi i taua.” Ua iai nei se suiga i manatu ma loto. Ma e tumau le suiga. (Tagai i le pusa Aʻoaʻoga mo le Filemu,” i le itulau e 14.) I le taimi nei, o le fua faatatau e tusa e sili atu i le 1,000 tagata i le aso, e faaiuina le faasologa o suesuega e faia e Molimau a Ieova ma auai loa i le vaega o loo taulamua mo le filemu i le lalolagi.

O le ā le mauaa o lenei suiga o manatu ma le filifiliga e pei ona iai ina ia faaaloalogia aiā tatau a tagata e ala i le mumusu e auai i taua? E matuā loloto lava. Seʻi aumai se faaaoaoga: Na matuā tofotofoina lava le loloto o le faaaloalo o Molimau a Ieova i aiā tatau a tagata i le taimi o le Taua Lona Lua a le Lalolagi, ae maise lava i Nasi i Siamani. Na taʻua e le tusitala o talafaasolopito o Brian Dunn e faapea: “Sa lē loto faatasi Molimau a Ieova ma le Faa-Nasi. O le vaega autū o le osofaiga a Nasi ia i latou o lo latou solitu faapolotiki. O lona uiga o lenei mea e leai se tagata talitonu e na te faaaogā se auupega.” (The Churches’ Response to the Holocaust) I le tusi A History of Christianity, na faapea mai Paul Johnson: “E toatele sa faasalaina i le oti ona o le teena o le auai i vaegaau . . . , ia po o le iu aʻe i nofoaga o falepuipui i Duchau po o nofoaga e tuu ai tagata ua faaletonu mafaufau.” E ui i na mea, sa latou tutumau pea. Sa faamatalaina e se tagata e suesue i uiga o tagata e suafa ia Anna Pawełczyńska ia Molimau a Ieova e faapea “o se tamai motu o teteega lē motusia o loo i totonu o se atunuu na faamataʻuina.”

Seʻi tau ina manatu i le vave ma le telē o le a faaitiitia ai le faaleagaina o aiā tatau a tagata i le lalolagi atoa pe afai e uia e tagata uma lenei tulaga ma latou ‘lē toe aʻoaʻo foi i taua’!

Se Malo o le Lalolagi—‘Pe na o se Moomooga’?

O le suiga o manatu o se luitau, ae o le faatulagaina o se malo o le lalolagi ua na o se moomooga,’ o le faamatalaga lena a se tagata faigaluega o Malo Aufaatasi. Ma ona o le mea moni, e lē o mananao atunuu e lafoai atu o latou pule i Malo Aufaatasi, po o se isi lava faalapotopotoga, ua fai ma faamaoniga o lenei faaiuga. Ae ui lava i lea, o i latou e teena le manatu e uiga i se malo o le lalolagi, fai mai le polofesa o Berkouwer, “o loo ia i latou le tiute tauave e faasino atu ai i se isi mea mo le foiaina o faafitauli o le lalolagi. Peitai, e leai ni vaifofo ese e mafai ona maua.” Vaifofo ia faaletagata. Ae o loo iai le vaifofo e sili aʻe i le malosi o le tagata. O le ā lena vaifofo?

E pei lava ona faaalia mai e le Tusi Paia e faapea o Lē na Foafoaina Mea o ia o le puna o le malosi o loo faavae ai aiā tatau a le tagata, o loo taʻu mai ai foi ia i tatou e faapea o ia o le puna o se malo o le lalolagi lea o le a ia faamautuina nei mea. O lenei malo faalelagi e lē vaaia ae o se malo moni. O le mea moni, e faitau miliona tagata o loo tatalo ma le lē iloa mo lenei malo o le lalolagi pe a latou faapea atu e pei ona masani ai i le Tatalo a le Alii: “Ia oo mai lou malo, Ia faia lou finagalo, I le lalolagi e pei ona faia i le lagi.” (Mataio 6:10) O le Ao ua tofia e le Atua mo lena Malo o le Perenise o le Filemu, o Iesu Keriso.—Isaia 9:6.

O lenei malo o le lalolagi o le a taulau i le faia o ni faiga tumau i le lalolagi atoa o aiā tatau a tagata, e tele isi mea e aofia ai ma le aveesea o taua e faavavau. O loo valoia mai e le Tusi Paia e faapea: “Ua faaiua e ia [Lē na Foafoaina Mea] o taua e oo lava i tuluʻiga o le lalolagi; ua gagau e ia le aufana, ma vavae le tao; ua susunuina foi e ia kariota i le afi.”—Salamo 46:9.

Ua tali oo mai lenei mea i le lalolagi atoa? O le polokalame mo le suesueina o le Tusi Paia lea o loo faia e Molimau a Ieova o loo aofia ai ma le tali faamalie loto i lenei fesili. Matou te faalaeiauina oe ina ia e faamasani atu i lenei polokalame.a Afai e te manatu mamafa i aiā tatau a tagata, o le a faamalieina oe.

[Faaopoopoga i lalo]

[Pusa i le itulau 13]

Le Puna o Aiā Tatau a Tagata

Fai mai le Mataupu 1 o le Faalauiloaga Faalauaitele o Aiā Tatau a Tagata o “tagata soifua uma na soifua mai e saoloto ma e tutusa uma i le mamalu ma aiā tatau.” E faamatalaina aiā tatau a tagata o se aiā na soifua mai ma le tagata e tuufaasolo mai i mātua i fanau, e tai pei o se vaitafe o loo avatu ai vai mo i latou o loo ola i ona auvai. O fea na amata mai ai lenei vaitafe o aiā tatau a tagata?

E tusa ai o le Faalauiloaga Faalauaitele, ua i tagata soifua aiā tatau ona “ua tuuina ia i latou manatu ma loto fuatiaifo.” Ua faamatala i se lomiga a Malo Aufaatasi e faapea: “Ona o le tagata e mafai ona malamalama ma faavasega le saʻo ma le sese, e ese la ia mai isi meafaiola i le lalolagi ma o lea la e tatau i ai ni aiā tatau ma ni saolotoga e lē o maua e isi meafaiola.” (O upu faasisipa e ā matou ia.) O lea la, o le iai o manatu ma loto fuatiaifo o loo taʻua, o le faavae lea o le iai o aiā tatau a le tagata. Afai o le tulaga lena, o le puna la o manatu ma loto fuatiaifo o tagata o le puna foi lena o ona aiā tatau faaletagata.

O i latou o loo tuutoina atu mo le mauaina o aiā tatau a tagata o ē talitonu i le evolusione, o le faaupuga e faapea o aiā tatau a tagata e fesootai i manatu ma le loto fuatiaifo ua faapogaia ai se lē mautonu. Na tautino mai e se tusi e lagolagoina le faaevolusione o le Life Ascending e faapea: “Pe a tatou fesili pe faapefea i le faagasologa o le [evolusione] . . . ona atiina ae uiga e pei o le talisapaia o le matagofie ma le moni, o le alofa mutimutivale, o le saoloto, ae maise ai lava le silisili ma le maoaʻe o le loto o le tagata, tatou te lē mautali.” Ma ua matuā fetaui lea. Auā o le mea moni, o le manatu faapea o le tomai o le tagata e manatunatu ai ma le loto fuatiaifo na tuufaasolo mai i tupuaga e maulalo ifo i le tagata o meafaiola e lē mafai ona manatunatu ma e leai foi ni loto fuatiaifo, e tai pei o le faapea atu o le vaitafe e puna mai i se vaieli e lē o iai se suavai.

Talu ai e lei maua mai tomai o le tagata e manatunatu ai ma le loto fuatiaifo mai ni tupuaga e maulalo ifo i tagata, e ao la ona pogai mai nei tomai i se malosi e sili aʻe i tagata. E na o tagata o loo iai uiga e fesootai i aiā tatau a tagata—le tomai e mafaufau ai ma le loto fuatiaifo—auā i le ese mai meaola, o tagata na faia i le “faatusa” o le Atua, o le faamatalaga lena a le Tusi Paia. (Kenese 1:27) O lea la, e pei ona matauina e le tusi o le Human Rights—Essays on Justification and Applications e faapea, o le tali e fetaui i le fesili pe aisea ua iai ai i le tagata aiā tatau tau amio, ona “e matuā talafeagai ia i latou le faaaloalo po o le faamamaluina ia pe o . . . fanau a le Atua.”

[Pusa i le itulau 14]

Aʻoaʻoga mo le Filemu

I ni tausaga ua tuanai atu, a o faamalepeina e le taua Balkans, sa galue ai Branko o se leoleo faaauupegaina i se falemaʻi i le vaega o Bosnia e taʻu o Croatia.b O le taimi lea o loo suesue se fomaʻi iina ma Molimau a Ieova, ma i se tasi po na faamatala ai e le fomaʻi ia Branko mea ua ia aʻoaʻoina mai le suesuega. O mea na faalogo i ai Branko na uunaia ai o ia e lafoaia ana auupega. I se taimi mulimuli ane, ina ua ia alu atu i se isi atunuu i Europa, sa auai atu ai Branko i se sauniga a Molimau a Ieova, ma na la feiloai ai iina ma Slobodan.

E sau foi Slobodan mai Bosnia. Sa auai foi o ia i le taua lava e tasi lea sa iai Branko—ae i le isi itu taua. O Slobodan sa tau mo le Serbs faasaga tau i le Croats. I le taimi lea sa feiloai ai le toalua lea, ua uma ona avea Slobodan ma se Molimau a Ieova, ma sa ia ofo mai e suesue ma Branko, lē na avea muamua ma ona fili. A o faagasolo le suesuega, sa tuputupu aʻe le alofa o Branko ia Ieova, Lē na Foafoaina Mea. E lei umi ae manao loa e avea o ia ma se Molimau a Ieova.c

Ua avea foi Slobodan ia ma se Molimau i le fesoasoani a lē sa uluai avea muamua ma ona fili. E faapefea? O le mea na tupu, ina ua alu ese mai le taua i Bosnia, sa asiasi atu ai Mujo ia Slobodan, o Mujo e sau foi mai Bosnia peitai e matuā ese lava lana lotu sa iai mai le lotu a Slobodan. O le taimi lea ua avea Mujo ma Molimau a Ieova. E ui lava sa uluai avea muamua i laua ma fili, ae na talia e Slobodan le ofo mai a Mujo la te suesue faatasi ma ia le Tusi Paia, ma na mulimuli ane ia uia laasaga e avea ai ma se Molimau a Ieova.

O le ā na faapogaia ai nei tamaloloa e foia le feitagai na mauaa i le va o ituaiga ae suia mai le avea ma fili i le avea ma uo? E ala i a latou suesuega faale-Tusi Paia, na latou ati ae ai le alofa mo Ieova. Ina ua uma lena, sa latou loto malilie e “aʻoaʻoina . . . e le Atua ia fealofani.” (1 Tesalonia 4:9) Faapei lava ona matauina e le polofesa o Wojciech Modzelewski e faatatau i le tulaga lautele o Molimau a Ieova, “o le mafuaaga autū mo lo latou tulaga toafimalie ona o loo latou mulimuli nei i mataupu silisili o loo faailoa mai i le Tusi Paia.”

[Faaopoopoga i lalo]

[Ata i le itulau 11]

Se suiga i manatu ma faiga malo—pe o le a tupu moni ea?

[Ē Ana le Ata]

U.S. National Archives photo

[Ata i le itulau 12]

O aʻoaʻoga e faavae i le Tusi Paia o loo faapogaia moni ai se suiga mautinoa o le mafaufau