Faia o se Auivi o le Lauga

PE A tofia e fai se lauga, o le toʻatele e alu se taimi tele e tusia ai, e amata lava i le faatomuaga ona alu ai lava lea seʻi oo i le faaiʻuga. E anoanoaʻi le mau ata faataʻitaʻi o le lauga atonu e tusia, a o leʻi māeʻa le sauniaina o le lauga. E ono alu ai le tele o itula i lenei faiga.

Pe o le auala ea lenā e saunia ai au lauga? Pe e te manaʻo e aʻoaʻoina se faiga faigofie? Afai e te aʻoaʻoina le auala e saunia ai se auivi, o le a lē toe manaʻomia ona e tusia i lalo mea uma. O le faiga lenei e te maua ai le taimi tele e faataʻitaʻi ai le taulimaina o le lauga. O le a lē gata ina faigofie au taulimaga ae o le a faaoso naunau foʻi e faalogo i ai, ma o le a sili atu ona faagaeeina ai lau aofia.

E moni, e iai se auivi autū ua saunia mai mo lauga i le lautele na e fai atu i le faapotopotoga. Peitaʻi, e lē faapena le tele o isi lauga. E ono tofia atu iā te oe na o se mataupu lava po o se matua. Pe e logo atu oe e te saunia se lauga mai ni manatu o se mataupu ua uma ona lomia. O nisi taimi atonu e na o ni nai taʻiala lava e avatu iā te oe. Mo ituaiga tofiga uma faapena, e manaʻomia ai ona e sauniaina lau lava auivi.

O le faataʻitaʻiga o loo i le itulau e 41 o le a e iloa ai le auala e ono faatulaga ai se auivi puupuu. Mātau o manatu autū taʻitasi e amata mai i le itu tauagavale ma o loo tusia i mataʻitusi lapopoʻa. I lalo o manatu autū taʻitasi o loo tusia ai manatu e lagolagoina ai. O manatu faaopoopo o le a faaaogā e talanoaina ai na manatu, o loo lisi ifo i lalo o manatu ma o loo faasasasasa mai i totonu mai i le itu tauagavale. Iloilo ma le faaeteete lenei auivi. Mātau o manatu autū e lua e fesootaʻi tuusaʻo atu lava i le matua. Ia mātauina foʻi, o manatu faaopoopo e lē faapea ua tau ina faaaogā ona o ni manatu e lelei i le faalogo. Na i lo lenā, e lagolagoina e nei manatu taʻitasi manatu autū na o loo tusia ai nei manatu i lalo ifo.

Pe a e saunia se auivi, atonu o le a lē tutusa tonu lava ma le auivi faataʻitaʻi lenei. Peitaʻi afai e te maua manatu autū o loo aofia ai i inei, o le a fesoasoani lenei iā te oe e faatulaga ai lau mataupu ma saunia se lauga lelei i se taimi talafeagai. E faapefea ona e fai o lenei mea?

Ia Iloilo, Filifilia, ma Faatulaga

E te manaʻomia se matua. O lau matua e lē faapea o le mataupu lautele lenā lea e mafai ona tā aofaʻi i se upu se tasi. Ae o le manatu autū lenā e te manaʻo e faailoa atu, ma e faailoa ai foʻi le tafa lea o loo e fuafua e agaʻi mai ai le talanoaina o lau mataupu. Pe afai ua tofia mai se matua, ia tilofaʻia ma le faaeteete upu autū taʻitasi. Afai e te faia se lauga i se matua ua tofia mai e faavae i mataupu ua uma ona lomia, suʻesuʻe le mataupu lenā ma manatunatu i le matua. Afai e na o le mataupu lava e tofia atu iā te oe, o lona uiga la e filifili e oe le matua. Peitaʻi, a o leʻi faia lenei tulaga, atonu e fesoasoani iā te oe le fai muamua o ni nai suʻesuʻega loloto. O le fetālaʻi pea o lou mafaufau, o le a e maua ai manatu aogā.

A o e uia nei laasaga, fesili ifo iā te oe e lē aunoa: ‘Aiseā e aogā ai lenei mataupu i laʻu aofia? O le a loʻu sini?’ E lē o le tau ina talanoaina se mataupu po o le fai o se lauga o loo iai le tele o mea mananaia i le faalogo, ae ia faataulauina ai se mea e aogā i lau aofia. A oo loa ina manino mai lou sini, tusi loa i lalo. Faaauau ona e manatunatu i ai a o fai au sauniuniga.

A uma ona faamautū lou sini ma ua e filifilia se matua e fesootaʻi lelei atu i ai (po o le tilofaʻia pe faapefea ona fetaui i ai lau matua ua tofia mai i lou sini ua iai), e mafai loa ona e faia ni suʻesuʻega loloto e sili ona taulaʻi patino atu i ai. Tulimataʻi mataupu o le a faapitoa ona aogā i lau aofia. Aua le gata mai i mataupu ua masani ai le toʻatele, ae saʻili mo manatu patino e aogā ma aʻoaʻoina moni ai. Ia fuafua tatau le tele e te faia ai suʻesuʻega loloto. O le tele o taimi e lē umi lava ae e mauaina faamatalaga ua tele atu na i lo faamatalaga e mafai ona e faaaogā, o lea la e manaʻomia ona e filifili lelei.

Faamaʻoti manatu autū e te manaʻo e talanoaina, ina ia mafai ai ona fafau aʻe lau matua ma ausia lou sini. O le a avea lenei ma au ata autū, o lau auivi autū. E fia ni manatu autū e tatau ona iai? Atonu ua lava se lua mo se talanoaga puupuu, ma o le tulaga masani ua lava le lima mo se lauga e oo lava i se lauga e itula le umi. O le itiiti o manatu autū, o le faigofie foʻi lea ona manatua e lau aofia.

Afai loa ua i lou mafaufau lau matua ma manatu autū, faatulaga loa manatu na maua i lau suʻesuʻega loloto. Fuafua po o ā manatu e fesootaʻi saʻo lava i au manatu autū. Filifili faamatalaga o le a fesoasoani i le faaleleia atili o lau taulimaga. Pe a e filifilia ni mau e lagolagoina ai manatu autū, ia faamau i lalo faamatalaga o le a fesoasoani iā te oe e faamatala ai na mau i se auala uigā. Faatulaga manatu taʻitasi i lalo ifo lava o le manatu autū lea o loo aofia ai. Afai e iai nisi faamatalaga e lē fetaui i so o se manatu autū ua e filifilia, ia faalēaogāina—e tusa lava pe o se manatu e te fiafia i ai—ia po o le tuu foʻi i se faila e faaaogā i se isi lauga. Faaaogā tau o faamatalaga e sili ona lelei ma sili ona aogā. Afai e te taumafai e faaaofia le tele o manatu, e oo ai ina vave lau tautala ma lē māeʻaeʻa lelei ai ona faamatala lau mataupu. E sili atu ona lelei le avatu tau o ni nai manatu autū e aogā moni i le aofia ma ia lelei ona fai. Aua le ovataimi.

O le taimi loa lenei pe afai e te leʻi faia i le amataga, faatulaga lau mataupu i le faasologa saʻo e tatau ona iai. O le mea lenā na fai e le tusitala Evagelia o Luka. Ina ua uma ona aoaoina mai le anoano o faamatalaga e fesootaʻi i lana mataupu, ona ‘faasolosolo’ loa lea ona ia tusia. (Luka 1:3) E te ono faatulaga lau mataupu e faasolosolo mai i le tulaga na tutupu ai mea, pe faasolosolo i ulutala, atonu e fua i mea tutupu ma aafiaga po o faafitauli ma vaifofō, e faalagolago lava i le mea e sili ona aogā ina ia taulau ai lou sini. E lē tatau ona faafuaseʻi ona feosoosofaʻi solo mai i le isi manatu i le isi manatu. E ao ona faigofie ona tataʻi lau ʻaufaalogologo mai i le isi manatu i le isi manatu, e aunoa ma ni manatu e faafaigatā ona faafesootaʻia. E ao i faamaoniga e talanoaina ona taʻitaʻia ai le aofia i ni faaiʻuga talafeagai. A o e faatulaga ou manatu, manatunatu pe o le a faapefea le faalogo mai i ai a lau aofia i lau taulimaga. Pe o le a faigofie ea ona latou mulimuli mai i ou manatu? Pe o le a uunaʻia ai i latou e gaoioi i mea ua latou faalogo mai i ai, e talafeagai ma le sini o loo i lou manatu?

O le laasaga e sosoo ai, ia saunia se faatomuaga e faagaee ai le fiafia i lau mataupu ma faailoa atu ai i lau aofia e faapea, o mea ia o le a e talanoaina e matuā aogā lava iā i latou. Atonu e fesoasoani pe a amata i le tusia o ni nai fuaiupu itiiti. O le mea mulimuli, fuafua se upu faaiʻu e faagaee ai, ma e ōgatasi ma lou sini.

Afai e vave ona e saunia lau auivi, o le a maua le taimi e faaleleia ai a o leʻi oo i le taimi e fai ai lau lauga. E te ono mātauina se manaʻoga ina ia lagolagoina nisi manatu i ni fuainumera faamaumauina, se faataʻitaʻiga, po o se tala i se mea na tupu. O le faaaogāina o se mea na tupu lata mai nei po o se manatu e fiafia i ai le toʻatele, e ono fesoasoani lenā i lau aofia e mātauina gofie ai le aogā o le mataupu. A o e toe autaluina lau lauga, e te ono mātauina ai ni avanoa e toe fetuunaʻi ai faamatalaga ina ia fetaui atu i lau aofia. E aogā tele le faiga lea o le tilofaʻia ma faaleleia, ina ia faatulaga ai ni manatu lelei i se lauga e aogā.

O nisi failauga atonu e manaʻomia le tele o faamaumauga na i lo o isi failauga. Peitaʻi afai e te faatulaga lau mataupu i lalo o ni nai manatu autū, tuu ese manatu e lē matuā lagolagoina ai manatu ua iai, ma ia faatulaga ou manatu i se faasologa saʻo e tatau ona iai, o le a oo ina lē manaʻomia ai ona e tusia i lalo mea uma. E matuā telē lava le taimi e mafai ona faasaoina i le faiga lenei! Ma o le a faaleleia ai le uigā o au lauga. O le a faaalia ai o loo e mauaina moni lava aogā mai i au aʻoaʻoga i le Aʻoga o le Faiva Faatiokarate.