Sauniunia o Tofiga o Tagata Aʻoga mo le Aʻoga

SO O se tofiga lava e maua mai i le aʻoga o loo iai le avanoa e agaʻigaʻi ai i luma. Ia e matuā uaʻi atu ma le lotonaunau, ona faasolosolo lava lea ina e mātauina lou alualu faapena foʻi le vaai mai a isi. (1 Timo. 4:15) O le a fesoasoani le aʻoga iā te oe e ati aʻe atoatoa ou tomai.

Po o e lagona ea le tete i le manatu faapea o le a e tautala atu i le faapotopotoga? O le tulaga masani lava lenā, e tusa lava po ua fai si leva o e auai i le aʻoga. Peitaʻi, e iai ni mea e mafai ona fesoasoani atu e faaitiitia ai le tulaga o lou popole. Ia fai ma masani le faitau leotele e lē aunoa i le aiga. A o auai i sauniga a le faapotopotoga, ia fai e lē aunoa ni au tali, ma afai o oe o se tagata talaʻi, ia auai e lē aunoa i le auaunaga i le fanua. O le faiga lenei e te maua ai le poto masani e tautala ai i luma o isi. E faaopoopo atu i lenā, ia sauniuni lelei ou tofiga a o leʻi taitai le taimi e fai ai, ma faataʻitaʻi ona fai atu ma le leotele. Ia manatua o lea o le a e tautala atu i luma o se aofia e faaleuō. Ia tatalo iā Ieova a o lumanaʻi ona fai o so o sau lauga. E na te foaʻi maia ma le fiafia le agaga paia i ana auauna o ē talosaga atu iā te ia.—Luka 11:13; Fili. 4:6, 7.

Aua le soona faamamafaina naʻuā mea e lē mafai ona e faia. E umi se taimi e faaalu ina ia maua ai le poto masani i le avea o se failauga ma le avea ma faiaʻoga tomai. (Mika 6:8) Afai faatoʻā e auai i le aʻoga, aua le faatalitalia o le a e faia loa se lauga e matuā lelei lava. Na i lo lenā, ia galue faasolosolo i se manatu se tasi mo le faatonutonuina o le tautala. Ia suʻesuʻe le vaega o le tusi lenei o loo talanoaina ai lenā manatu. Afai e mafai, fai mea e ao ona fai o loo fautuaina mai i inā. O le faia faapea o le a e maua ai le poto masani i mea e fesootaʻi i le manatu o loo fautuaina, a o e leʻi taulimaina lou tofiga i le faapotopotoga. O le a iʻu ai i le agaʻigaʻi i luma.

Le Auala e Saunia ai se Tofiga o le Faitau

O sauniuniga mo le faitau atu i le lautele e tele mea e aofia ai na i lo le na ona mafai ona taʻu o upu o loo i le mataupu ua tofia mai. Taumafai malosi ia maua le malamalamaga manino o le uiga o le mataupu. O le taimi lava e maua ai lou tofiga, ia faitau loa i ai faatasi ai ma le sini lenā i lou manatu. Taumafai ia e malamalama i le manatu o i fuaiupu taʻitasi, atoa ai ma le manatu o loo iai i palakalafa taʻitasi, ina ia mafai ai ona e faamatala atu ma le saʻo manatu ma i faalogona talafeagai. Afai e mafai, ia siaki se lomifefiloi mo le faaleoga saʻo o upu e lē masani ai. Ia faamasani lelei i le mataupu. E ono manaʻomia ona fesoasoani mātua i a latou fanau iti ina ia faia lenei mea.

Po ua tofia ea oe e faitau se vaega o le Tusi Paia po o ni palakalafa foʻi o se mataupu i Le Olomatamata? Afai o iai se kaseti puʻe leo o le mataupu lenā o maua i lau gagana, o le a matuā aogā lava le faalogologo atu i le faitauina o loo iai i inā ma mātau mea iloga e pei o faaleoga, le faiga o faaupuga, faamamafaga, ma fesuiaʻiga o le leo. Ona taumafai loa lea e faatatauina nei uiga i lau lava faitau.

Pe a amata ona e galue i lou tofiga, ia faamautinoa ua e suʻesuʻeina ma le faaeteete le lesona o loo talanoaina ai le uiga o le tautala lea ua tofia mai iā te oe. Afai e mafai, ia autalu le uiga lenei pe afai ua uma ona e faataʻitaʻia mo ni taimi se tele le faitauina leotele o le mataupu ua tofia mai iā te oe. Taumafai malosi e faatatauina lenā fautuaga tusia i le mafai e oo i ai.

O lenei toleniga o le a matuā aogā lava iā te oe i lau faiva. A o e auai i le auaunaga i le fanua, e te maua le tele o avanoa e faitau atu ai i isi. Ona o le Afioga a le Atua o loo iai le mana e suia ai olaga o tagata, e tāua tele la le lelei ona e faitauina. (Epe. 4:12) Aua e te faatalitalia faapea o le a mafai ona e faatinoina vala uma lava o le faitau lelei pe a uma se tofiga se tasi pe lua. Na tusi atu le aposetolo o Paulo i se toeaina Kerisiano ua tele tausaga o le poto masani e faapea: “Ia e faasaga i le faitau.”—1 Timo. 4:13, LT.

Faatulaga le Mataupu ma se Faatulagaga

Pe a e mauaina se tofiga i le aʻoga lea e aofia ai le galue i se faatulagaga, o le a faapefea ona e faia?

E tolu mea tāua e manaʻomia ona iloiloina: (1) le mataupu ua tofia mai iā te oe, (2) o lau faatulagaga ma le tagata lea o le a e talanoa i ai, ma lona (3) o le manatu e fautuaina ai lea ua tofia mai e te galue i ai.

E manaʻomia ona faamaopoopo mai manatu o loo i lau mataupu ua tofia mai. Peitaʻi a o leʻi loloto tele au sauniuniga, ia matuā manatunatu mamafa i lau faatulagaga faapena ai ma le tagata lea o le a e talanoa atu i ai, auā o mea nei e iai se aafiaga i le ituaiga o mataupu o le a e talanoaina, atoa ma le auala o le a e taulimaina ai. O le ā le faatulagaga o le a e faaaogāina? Pe o le a e faataʻitaʻia le auala e taulimaina ai le tala lelei i se tasi e te iloa? Pe o le a e faaalia mai le mea e ono tupu pe afai o le taimi muamua lea ua feiloaʻi atu ai i se tasi? Pe e matua le tagata iā te oe pe e laʻitiiti? O ā uiga na te ono faaalia e faatatau i le mataupu o loo e fuafua e talanoaina? O le ā le tele atonu ua ia silafia e uiga i le mataupu? O le ā le sini o e faamoemoe ia ausia pe a uma se lua talanoaga? O tali i fesili nei o le a maua ai taʻiala tāua e ao ona galue i ai.

O fea e te maua ai manatu i le mataupu ua tofia mai? O loo i le itulau e 33 e oo i le 38 o le tusi lenei se talanoaga i “Le Auala e Fai ai Saʻiliʻiliga Loloto.” Faitau i ai, ona faaaogā lea o meafaigaluega mo suʻesuʻega loloto o loo mafai ona e maua. I le tele lava o tulaga, e vave lava ona e maua le tele o manatu na i lo manatu e mafai ona e faaaogāina. Ia lava ni faamatalaga e te faitauina, ina ia e iloa ai mea e ono mafai ona e faaaogāina. Peitaʻi, a o e faia le mea lenā, ia manatua le faatulagaga lea o le a e faaaogāina mo lau taulimaga, faapena foʻi ma le tagata lea o le a e talanoa atu i ai. Faailoga manatu e tatau ona faaaogā.

A o e leʻi faatulagaina lau taulimaga ma filifilia maʻoti manatu o le a e faaaogāina, faaalu se taimi e faitau ai le talanoaina o le manatu o le faatonutonuina o le tautala lea ua tofia mai iā te oe. O se tasi o māfuaaga o lou tofiga o le faatatauina o le fautuaga lenā.

O le taulimaina o lau mataupu i le taimi faatagaina, o le a fetaui lelei ai le avatuina o au upu faaiʻu, auā o le a iai le faailoilo pe a uma le taimi faatagaina. Ae i la tatou faiva i le fanua, e lē āfaina tele le taimi. O lea la, a o e sauniuni, ia amanaʻia le taimi o loo aofia ai, peitaʻi ave le faamamafa i aogā o le aʻoaʻo atu.

O Nai Fautuaga e Faatatau i Faatulagaga. Iloilo fautuaga o loo i le itulau e 82, ona filifili lea o se fautuaga o le a aogā i lau faiva ma o le a mafai ai ona e faaaogāina ma le talafeagai le mataupu ua tofia mai. Afai ua fai si leva ona e auai i le aʻoga, ia manatu i le mea lenei o se avanoa e te aapa atu ma ati aʻe ai ni tomai faaopoopo mo lau faiva.

Afai e tofia atu e le ovasia o le Aʻoga o le Faiva Faatiokarate le faatulagaga, talia le luʻi. O le tele o faatulagaga e aofia ai le molimau atu. Afai e te leʻi molimau atu lava i tulaga o loo faamatala mai, saʻili ni manatu e ala i le talanoa atu i tagata talaʻi ua uma ona latou faia. Afai e mafai, taumafai e talanoaina lau mataupu ua tofia mai i se faatulagaga e tai pei o le faatulagaga lea o le a e faaaogā i le aʻoga. O le a fesoasoani lenei iā te oe ina ia ausia ai se vala tāua o lau toleniga.

Pe Afai o le Taulimaga e Avatu o se Lauga

Afai o oe o se alii, e ono tofia oe e fai se lauga puupuu i le faapotopotoga. A o saunia nei lauga, o manatu faavae e manaʻomia ona talanoaina e tai pei lava o manatu ia ua uma ona lisi atu o ni faataʻitaʻiga mo tofiga o tagata aʻoga. O eseesega autū lava, o le aofia ma le auala e avatu ai.

O le tulaga masani lava e manaʻomia, o le sauniunia lea o lau mataupu ina ia maua ai ni aogā e tagata uma o loo i le aofia. O le toʻatele lava o loo auai ua uma ona iloa upu moni faavae o le Tusi Paia. Atonu po ua latou masani lelei i le mataupu lea ua tofia mai e te lauga ai. Manatunatu la i mea ua uma ona latou iloa e uiga i lau mataupu. Taumafai malosi i se isi auala e aogā ai iā i latou e ala i lau taulimaga. Fesili ifo iā te oe: ‘E mafai faapefea ona ou faaaogā laʻu mataupu ina ia faaloloto ai loʻu talisapaia ma le talisapaia e laʻu aofia o Ieova lava ia? O le ā o loo iai i le mataupu e fesoasoani ai iā i tatou ina ia iloa le finagalo o le Atua? E mafai faapefea ona fesoasoani lenei mataupu iā i tatou i le faia o ni filifiliga lelei i se lalolagi ua pulea e tuʻinanauga faaletino?’ (Efe. 2:3) E manaʻomia suʻesuʻega loloto ina ia maua ai tali e faamalieina ai i nei fesili. Pe a faaaogā le Tusi Paia, taumafai malosi e fai nisi mea e sili atu na i lo le na ona faitau o mau. Ia fefulisaʻi i mau na e te faaaogā, ma faailoa mai le auala e fesoasoani ai nei mau ina ia faavae aʻe ai ni faaiʻuga. (Galu. 17:2, 3) Aua le tele naʻuā manatu e talanoaina. Ia taulima lau mataupu i se auala o le a faigofie ai ona manatua.

E ao foʻi ona aofia ai i sauniuniga le uaʻi atu i le auala e fai atu ai lau lauga. Aua e te manatu māmā i le mea lenei. Faataʻitaʻi leotele le avatuina o lau lauga. O taumafaiga e te faaaluina i le suʻesuʻeina ma le faatatauina o fautuaga i vala eseese o le tautala o le a matuā saosaolaumea lava i lou agaʻigaʻi i luma. Po o oe o se failauga fou pe o se tasi ua iai le poto masani, ia sauniuni lelei pea ina ia mafai ai ona e tautala atu ma le mautinoa atoa ma faalogona, e talafeagai ma lau mataupu. A o e faataunuuina tofiga taʻitasi i le aʻoga, ia teu i manatu le fuafuaga o le faaaogāina o la tatou meaalofa mai le Atua o le tautala ina ia faamamalu ai Ieova.—Sala. 150:6.