Sauniunia o Lauga mo le Faapotopotoga

UA SAUNIA le polokalame o le Aʻoga o le Faiva Faatiokarate ina ia maua ai aogā e le faapotopotoga atoa. E maua foʻi faamatalaga aogā i isi sauniga a le faapotopotoga faapena foʻi i fonotaga ma tauaofiaga. Afai ua tofia mai iā te oe se vaega i se tasi o nei polokalame, ua e maua la se tiute tauave mamafa. Sa uunaʻia e le aposetolo o Paulo le ovasia Kerisiano o Timoteo ina ia matuā uaʻi atu i lana aʻoaʻo atu. (1 Timo. 4:16, NW) O i latou o loo auai i faatasiga faa-Kerisiano ua latou faatulagaina o latou taimi tāua—ma o nisi e tele ni taumafaiga sa fai—ina ia maua ai faatonuga i mea e manaʻomia i la latou faiā ma le Atua. O le avatuina la o na faatonuga o se matuā faaeaga lava! E mafai faapefea ona e faaleleia le taulimaina o lenā faaeaga?

Manatu Tāua mai le Faitauina o le Tusi Paia

O le vaega lenei o le aʻoga e faavae mai i le faitauga Tusi Paia ua faatulagaina mo le vaiaso. E ao ona ave le faamamafa i le auala e aafia ai i tatou i aso nei i le mataupu. E pei ona lipotia mai i le Neemia 8:8, sa faitau atu e Esera ma ana aumea le Afioga a le Atua i le lautele, sa faamatala, sa “folafola atu le uiga,” ma faamalamalama. E te maua le avanoa i lau taulimaina o manatu tāua o le Tusi Paia e faia ai foʻi lenā mea.

E faapefea ona e saunia lea ituaiga o tofiga? Afai e mafai, ia faitau le vaega o le Tusi Paia lea ua tofia mai a o toe vaiaso po o le sili atu foʻi a o leʻi oo i le taimi e fai ai. Ona manatunatu lea i lau faapotopotoga ma ona manaʻoga. Tatalo e faatatau i le tofiga. O ā ni fautuaga, o ā ni faaaʻoaʻoga, o ā ni mataupu silisili o i lenei vaega o le Afioga a le Atua e fetaui i na manaʻoga?

E tāua tele suʻesuʻega loloto. O maua i lau gagana le Watchtower Library i le CD-ROM po o le Watch Tower Publications Index? Afai o maua, faaaogā lelei meafaigaluega na. O le suʻesuʻe loloto i manatu ua uma ona lomia mai e faatatau i fuaiupu ua e filifilia e uaʻi atu i ai, e te ono maua ai ni faamatalaga e faamalamalamaina ai le talaaga, o ni faamatalaga e faatatau i le faataunuuga o valoaga, o le iloiloina o mea o fai mai ai nisi o mau e faatatau iā Ieova, ia po o le talanoaina o ni mataupu silisili. Aua le tele naʻuā manatu e talanoaina. Taulaʻi atu i ni nai fuaiupu ua filifilia. E sili atu le laʻitiiti o fuaiupu e talanoaina ae lelei ona fai.

E ono manaʻomia foʻi i lou tofiga ona valaaulia le aofia e aumai ni manatu i le auala ua aogā ai iā i latou le faitau Tusi Paia o le vaiaso. O le ā sa latou mauaina o le a aogā iā i latou i a latou suʻesuʻega totino ma suʻesuʻega a le aiga, ia po o la latou faiva po o le auala e soifua ai? O ā uiga o Ieova sa faailoa mai i ana feutagaʻiga ma tagata ma atunuu? O ā mea na aʻoaʻoina e le aofia e faamalosia ai lo latou faatuatua ma ati aʻe ai le talisapaia mo Ieova? Aua le faaaluina uma le taimi i auʻiliʻiliga ma manatu lavelave. Faamamafa le uiga ma aogā e mafai ona faatino mai manatu na filifilia.

Lauga e Aʻoaʻo Ai

O le lauga lenei e faavae mai i mataupu ua uma ona lomia, e pei o se mataupu i Le Olomatamata po o le Ala Mai! ia po o se vaega foʻi o se tusi. O le tele lava o taimi e telē atu le mataupu na i lo le taimi faatulagaina. O le a faapefea ona e taulimaina le tofiga? I le avea ai o se faiaʻoga, ae lē o se tasi e tau ina talanoaina le mataupu. E ao i se ovasia ona “mafaia ona aʻoaʻo atu.”—1 Timo. 3:2.

Amata au sauniuniga i le suʻesuʻeina o le mataupu ua tofia mai. Suʻe uma mau ma faitau. Manatunatu loloto i ai. Taumafai malosi e muaʻi fai lelei le mea lenā a o leʻi taitai oo i le aso o lau lauga. Ia manatua o loo faalaeiauina uso ina ia muaʻi faitau i mataupu ua uma ona lomia lea o loo faavae ai le lauga. O lou tofiga e lē o le tau ina autalu po o le toe taʻua o manatu peitaʻi ia faailoa mai le auala e faatatauina ai. Faaaogā vaega talafeagai o le mataupu i se uiga o le a matuā aogā ai lava i le faapotopotoga.

E faapei lava ona tofu o le tamaitiiti ia ma ona uiga, e tofu foʻi faapotopotoga taʻitasi ma o latou uiga e matilatila ese mai ai. O se matua e lelei lana aʻoaʻo atu e lē na o le tau ina faamalau atu mataupu silisili tau amio i lana tama. E la te fetalanoaaʻi ma le tamaitiiti. E na te amanaʻia uiga totino o le tamaitiiti atoa ma faafitauli o loo tauivi ma le tamaitiiti. I se auala faapena, e taumafai malosi faiaʻoga i le faapotopotoga ina ia malamalama ma taulimaina manaʻoga o se vaega o tagata o loo latou talanoa atu i ai. Peitaʻi o se faiaʻoga e uta mamao na te ʻalofia le faaaogā o ni faaaʻoaʻoga e faamāina ai se tasi i le aofia. E na te taʻua aogā ua olioli ai nei nisi ona o lo latou savavali i ala o Ieova, ma na te faamatilatila fautuaga mai i le Tusi Paia lea e mafai ona fesoasoani i le faapotopotoga ina ia taulimaina ma le manuia faafitauli o loo latou fesagaʻia.

A lelei le aʻoaʻo atu e pāʻia loto o i latou i le aofia. E manaʻomia ai i lenei mea le lē tau ina taʻua o mea moni ae ia ati aʻe le talisapaia mo mea o loo faaata mai e nei mea moni. E manaʻomia ai le manatu mamafa moni mo i latou o loo aʻoaʻoina. E ao i leoleo mamoe faaleagaga ona iloa le lafu. Pe afai latou te teuina ma le alofa i manatu faafitauli o loo feagai ma tagata eseese, o le a mafai ai ona latou talanoa faalaeiau atu, faaalia le malamalama, faapalepale ma le tigā alofa.

E pei lava ona silafia e faiaʻoga tomai, e ao i se lauga ona matuā manino ma malamalama lona sini. E ao ona taulimaina le mataupu i se uiga o le a matuā matilatila mai ai ma manatua manatu autū. E ao i le aofia ona ave i fale manatu e mafai ona faaaogā lea o le a aafia ai o latou soifuaga.

Sauniga o le Auaunaga

Pe a aumai iā te oe se lauga e faavae i se mataupu i La Tatou Faiva o le Malo, atonu e fai si ese o le luʻi ua tulaʻi mai. I inei o le a e mātauina e masani lava e manaʻomia ona e faaoo uma atu i le aofia mea ua saunia mai, ae lē o le filifilia o mea e sili ona talafeagai. Fesoasoani i le aofia ina ia fefulisaʻi i mau o loo faavae ai so o se fautuaga lava e aumai. (Tito 1:9) E faatapulaa le taimi, i le tele lava o tulaga e lē faatagaina nisi manatu faaopoopo.

I le isi itu, e ono valaaulia oe e taulima se mataupu e lē o maua i La Tatou Faiva o le Malo. Atonu o ni manatu mai i se mataupu i Le Olomatamata, ia pe o le tofiga foʻi e na o ni nai faamatalaga pupuu lava. E tuu atu lava iā te oe le faiaʻoga ina ia e iloilo manaʻoga o le faapotopotoga e fesootaʻi atu i le mataupu ua tofia mai. E ono manaʻomia ona e faaaogā se faataʻitaʻiga e puupuu ma tuusaʻo, ia po o le faamatala o se mea na tupu e fetaui i ai. Ia manatua o lou tofiga e lē na o le tau lava o le talanoa i le mataupu, ae ia taulima i se auala e fesoasoani ai i le faapotopotoga e faataunuu le galuega o fai mai ai le Afioga a le Atua ma ia fiafia e fai.—Galu. 20:20, 21.

A o e saunia lou tofiga, manatunatu i tulaga o tagata o loo faia aʻe ai le faapotopotoga. Faamālō i ai i mea ua latou faia. E faapefea i lo latou faatatauina o fautuaga o loo maua i le mataupu ua tofia mai, ona faateleina ai lo latou uigā ma lo latou olioli i le faiva?

Pe e manaʻomia i lou tofiga se faataʻitaʻiga po o se faatalanoaga? Afai e manaʻomia, e ao ona matuā fuafua lelei a o lava le taimi. E faigofie lava ona fai atu i se isi na te faatulagaina ane lenā mea, peitaʻi e masani lava e lē maua ai ni iʻuga e sili ona lelei. Pe afai e mafai, ia faataʻitaʻi le faataʻitaʻiga po o le faatalanoaga a o leʻi oo i le aso o le sauniga. Ia faamautinoa ua taulimaina lenei vala o lau vaega i se tulaga e aloaʻia atoatoa ai le faatonuga o aofia ai.

Fonotaga ma Tauaofiaga

O uso o loo sologa lelei i le atiina aʻe o uiga lelei faaleagaga ma o ē ua tomai i le avea ma failauga ma faiaʻoga i le lautele, e ono talosagaina e faia sana vaega i le polokalame o se fonotaga po o se tauaofiaga. E faapitoa moni lava nei avanoa mo le aʻoaʻoina faatiokarate. E ono tofia i le uso se manusikulipi, se auivi, ni faatonuga mo se tala faale-Tusi Paia ma sona faatatauga faaonapōnei, ia pe na o se palakalafa foʻi o ni faatonuga. Pe a e maua se faaeaga e auauna ai i se polokalame faapena, ia suʻesuʻe ma le faaeteete le mataupu e aumai iā te oe. Galue i ai seʻia oo ina e talisapaia lona aogā.

O i latou e tofia mai i ai se lauga manusikulipi e ao ona faitau le mataupu i le upu i le upu. Latou te lē toe faaupuina pe toe faatulagaina le mataupu. Latou te suʻesuʻeina le mataupu ina ia manino lelei i manatu autū ma le auala e ati aʻe ai. Latou te aʻoina le faitauina leotele seʻi oo ina mafai ona latou taulimaina le lauga faatasi ai ma faamamafaga saʻo, aasa, māfana, faalogona, uigā ma le faatalitonu, faapena foʻi ma le leo atoa ai ma le malosi e talafeagai ma se aofia e toʻatele.

E ao i uso e tofia atu i ai se lauga auivi ona fafau aʻe a latou mataupu i se tulaga e matuā latalata atu lava i le auivi. Na i lo le faitau mai i le auivi i le taimi e fai ai le lauga po o le saunia foʻi e pei o se manusikulipi, e ao i le failauga ona taulima atu le mataupu i se taulimaga e lē faavaea i le upu i le upu, na i lo le faitau saʻo mai le auivi, e sau mai le loto. E tāua le tausisi i le taimi faatulagaina o loo i le auivi ina ia mafai ai ona faamatala manino manatu autū taʻitasi. E ao i le failauga ona faaaogā lelei manatu ma mau o loo i lalo o manatu autū. E lē tatau ona ia faaopoopo i ai ni ona lava manatu e fiafia i ai e ese mai manatu o loo i le auivi. E ao i faatonuga uma ona faavae mai i le Afioga a le Atua. O le tiute tauave o toeaina Kerisiano ina ia “talaʻi atu le upu.” (2 Timo. 4:1, 2) O lea la e ao i le failauga ona uaʻi faapitoa atu i mau o loo i le auivi—ia fefulisaʻi manatu i mau nei ma fai ni faatatauga.

Aua le Fai Mea Tuu

Po o e auauna i se faapotopotoga e tele avanoa e lauga ai? E faapefea ona e faataunuuina i se tulaga talafeagai nei tofiga uma? ʻAlofia le saunia o au vaega i le taimi mulimuli.

O lauga e aogā moni lava i le faapotopotoga e manaʻomia le lava o le taimi e muaʻi mafaufau ai i ai. O lea la, fai ma masani le vave ona faitau o le mataupu i le taimi lava e maua ai ou tofiga taʻitasi. O le faia faapea o le a mafai ai ona e manatunatu i ai a o fai isi au gaoioiga. A o faagasolo aso po o vaiaso a o lumanaʻi ona fai lau lauga, e te ono lagonaina ni manatu e fesoasoani iā te oe ina ia e iloa ai le auala e sili ona lelei mo le faatatauina o le mataupu. E ono tulaʻi mai tulaga e faaalia ai le talafeagai lelei o le mataupu. O le faitauina ma manatunatu i lou tofiga i le taimi lava e te mauaina ai e alu ai le taimi, peitaʻi o taimi alu aogā na. Pe a oo i le taimi e te nofo ai i lalo e faatulaga le auivi, o le a e maua aogā o lou muaʻi mafaufau mamao i ai a o lava le taimi. O le taulimaina o tofiga i le auala lenei o le a matuā faaitiitia ai le popole ma o le a fesoasoani iā te oe ina ia taulima le mataupu i se uiga e aogā ma pāʻia ai loto o ē o loo i le faapotopotoga.

Ona o lea e te talisapaia le meaalofa ua tuuina mai iā te oe e fesootaʻi i le polokalame a Ieova mo le aʻoaʻoina o ona tagata, o le a e faamamaluina ai o ia ma avea ma faamanuiaga iā i latou o ē e alolofa iā te ia.—Isa. 54:13; Roma 12:6-8.