Sauniunia o Lauga i le Lautele

I VAIASO taʻitasi, e faatulaga ai e le tele o faapotopotoga a Molimau a Ieova se lauga i le lautele i se mataupu faale-Tusi Paia. Afai o oe o se toeaina po o se auauna o le faiva, pe e te faamaonia atu ea o oe o se failauga lelei i le lautele, o se faiaʻoga? Afai o lou tulaga lenā, e ono valaaulia oe e fai se lauga i le lautele. Ua fesoasoani le Aʻoga o le Faiva Faatiokarate i le faitau sefulu afe o uso ina ia agavaa i lenei faaeaga o le auaunaga. Pe a tofia oe e fai se lauga i le lautele, o fea e tatau ona e amata ai?

Suʻesuʻe le Auivi

A o e leʻi faia so o se suʻesuʻega loloto lava, faitau le auivi ma manatunatu loloto i ai seʻia oo ina e maua lona uiga tonu. Faatulaga i lou mafaufau le matua, o le ʻauʻau lea o le lauga. O le ā le mea lea o le a e aʻoaʻoina ai lau aofia? O le ā lou sini?

Ia faamasani i ulutala autū. Ia tilofaʻia na manatu autū. E faapefea i nei manatu taʻitasi ona fesootaʻi ma le matua? I lalo ifo o manatu autū taʻitasi, o loo lisi atu ai manatu faaopoopo. O manatu e lagolago ai manatu faaopoopo o loo lisi atu i lalo ifo o manatu nei. Manatu i le auala e fesootaʻi ai vaega taʻitasi o le auivi i se manatu amata, lea e tataʻi atu ai i le isi manatu, ma e fesoasoani i le faataulauina o le sini o le lauga. E te malamalama loa i le matua, le sini o le lauga, ma le auala e faataulau ai e manatu autū lenā fuafuaga, o lona uiga la ua e sauni e faatulaga le mataupu.

I le amataga lava atonu e lelei pe a e manatu i lau lauga e tai pei o ni lauga pupuu se fā pe lima foʻi, e tofu lava ma le manatu autū. Auauaʻi ona sauniuni taʻitasi nei manatu autū.

O le auivi lea ua avatu iā te oe o se meafaigaluega mo au tapenaga. E leʻi fuafuaina e avea ma faamaumauga e faaaogā e te lauga atu ai. E tai pei lava o se faatagata e lē ʻānoa. E manaʻomia ona e tuuina i ai ni aano, tuu i ai se fatu ma feula atu i ai se mānava ola.

Le Faaaogāina o le Tusi Paia

Sa faavae aʻe e Iesu Keriso ma ona soo la latou aʻoaʻoga i le Tusi Paia. (Luka 4:16-21; 24:27; Galu. 17:2, 3) E mafai foʻi ona e faia le mea lava lenā. E ao ona avea le Tusi Paia ma faavae o lau lauga. Na i lo le na ona faamalamalama lava ma faatatauina faamatalaga o loo i le auivi ua aumai iā te oe, taumafai ia iloa pe o faapefea ona lagolagoina na faamatalaga e le Tusi Paia, ona faaaogā lea o le Tusi Paia e faavae ai lau aʻoaʻo atu.

A o e sauniunia lau lauga, ia iloilo fuaiupu taʻitasi o loo faasino mai i le auivi. Manatunatu i manatu o loo siʻomia ai. O nisi mau e ala ona aumai e tau lava ina ia malamalama ai i le talaaga o le mea na tupu. E lē manaʻomia ona faitau uma nei mau pe faaopoopo i ai a o fai lau lauga. Filifili mau e sili ona aogā i lau aofia. Afai o le a e taulaʻi atu i mau faasino o loo i le auivi ua lomia mai, atonu la e lē manaʻomia ona toe faaaogā nisi manatu faale-Tusi Paia.

E lē faalagolago le lelei o lau lauga i le aofaʻiga o mau e te faaaogā, ae i le tulaga o loo e aʻoaʻo atu ai. Pe a faatomua atu mau, faailoa atu le māfuaaga ua faaaogā ai. Ia lava se taimi e fai ai se faatatauga. Pe a uma ona e faitau se mau, tatala pea lau Tusi Paia a o e talanoaina le mau. E ono fai ai foʻi e lau aofia le mea lava lenā. E faapefea ona e faagaee le fiafia o lau aofia ma fesoasoani iā i latou ina ia maua atoatoa aogā mai i le Afioga a le Atua? (Nee. 8:8, 12) E mafai ona e faia e ala i se faamatalaga, se talafaatusa, ma se faatatauga.

Faamatala. A o sauniuni e faamatala se manatu autū, fesili ifo iā te oe: ‘O le ā lona uiga? Aiseā ua ou faaaogāina ai lea manatu i laʻu lauga? O le ā e ono fesili ai le aofia iā i latou lava e faatatau i le mau lenei?’ E ono manaʻomia ona e tilofaʻia manatu o loo siʻomia ai le mau, lona talaaga, le faatulagaga, le malolosi o upu, le faanaunauga o le tusitala faagaeeina. E manaʻomia i lenei mea ni suʻesuʻega loloto. E te maua le anoanoaʻi o faamatalaga aogā i lomiga ua saunia mai e “le auauna faamaoni ma le mafaufau.” (Mata. 24:45-47) Aua le taumafai e faamatala mea uma e faatatau i le fuaiupu, ae faamatala le māfuaaga na e manaʻo ai i lau aofia e faitau i le fesootaʻiga ma le manatu o loo talanoaina.

Talafaatusa. O le fuafuaga o talafaatusa e tataʻi ai lau aofia ina ia loloto le malamalamaga po o le fesoasoani foʻi iā i latou ia manatua se manatu po o se mataupu silisili na e talanoaina. O talafaatusa e fesoasoani i tagata ina ia malamalama i mea ua e taʻu atu iā i latou ma faafetaui i se mea ua latou iloa. O le mea lenā na fai e Iesu ina ua ia fai atu lana Lauga taʻutaʻua i luga o le Mauga. O “manu felelei,” o “lautalotalo o le vao,” se “faitotoa va apiapi,” se “fale i luga o le papa,” ma le tele o faaupuga faapena sa faamamafa ai, faamanino, ma faigatā ai ona faagaloina lana aʻoaʻo atu.—Mata., mata. 5–7.

Faatatauga. O le faamatalaina ma le faia o ni talafaatusa i se mau e maua ai le poto, peitaʻi o le faatatauina o le poto lenā e maua ai iʻuga. E moni, o le matafaioi a i latou o loo i lau aofia le gaoioi i le feʻau faale-Tusi Paia, peitaʻi e mafai ona e fesoasoani iā i latou ina ia iloa mea e manaʻomia ona fai. E te mautinoa loa ua malamalama lau aofia i le mau o loo talanoaina ma ua iloa le fesootaʻiga i le manatu na taʻua, ona faaalu lea o se taimi e faailoa atu ai aafiaga i talitonuga ma amioga. Faamatilatila aogā o le aveesea o manatu sesē po o amioga e lē talafeagai ma le upu moni o loo talanoaina.

A o e manatunatu i le auala e faatatauina ai mau, ia manatua o tagata o loo i lau aofia e ō mai i le tele o talaaga, ma le anoanoaʻi o tulaga eseese. Atonu o iai ni tagata fiafia e fou mai, o talavou, o ē matutua, ma i latou o loo tauivi ma le anoano o o latou lava faafitauli. Faatulaga lau lauga ia moni ma aogā i tulaga o le olaga. ʻAlofia le avatu o fautuaga e peiseaʻī e na o ni nai tagata lava o loo e manatu i ai.

O Faaiʻuga a le Failauga

O nisi o faaiʻuga e faatatau i lau lauga ua uma ona faia mo oe. Ua uma ona faailoa manino atu manatu autū, ma o loo manino ona faailoa mai le tele o le taimi e tatau ona e faaalu i le talanoaina o ulutala autū taʻitasi. O isi faaiʻuga o oe e faia. E te ono filifili e faaalu se taimi tele i nisi o manatu faaopoopo ae faaitiiti i nisi. Aua neʻi e manatu e ao ona tutusa le tele o le taimi e te talanoaina ai manatu faaopoopo uma. E ono faapogaia ai oe e faatopetope ona talanoaina le mataupu ma lofitūina ai lau aofia. E faapefea ona e fuafuaina le manatu e matuā talanoaina māeʻaeʻa ma le manatu e na ona taʻua puupuu lava, ia po o le lē taʻua foʻi? Fesili ifo iā te oe: ‘O fea manatu o le a fesoasoani iā te aʻu e faamatala atu ai le manatu tāua o le lauga? O fea manatu e mautinoa o le a sili ona aogā i laʻu aofia? Pe o le a avea ea le lē taʻua o se mau o faasino mai po o se manatu, ma māfuaaga o le a faavaivaia ai le faatulagaga o faamaoniga e pei ona taʻua?’

Ia ʻalofia le tuu i ai o ni manatu e lē o mautinoa po o ni ou lava manatu. E oo lava i le Alo o le Atua, o Iesu Keriso, sa ia ʻalofia le taʻua o ‘ona lava manatu.’ (Ioa. 14:10, NW) Ia amanaʻia o le māfuaaga e ō mai ai tagata i sauniga a Molimau a Ieova ina ia faalogologo i le talanoaina o le Tusi Paia. Afai ua mātaulia oe o se failauga lelei, e lē taumatea ona ua fai ma au masani le faauaʻi atu o manatu, e lē iā te oe, ae i le Afioga a le Atua. O le auala lea e talisapaia ai au lauga.—Fili. 1:10, 11.

O lea la ua uma nei ona e faatulagaina se auivi lea sa na o ni nai manatu na faatulaga ai, i se faamalamalamaga ʻānoa faale-Tusi Paia, ua manaʻomia nei la ona faataʻitaʻi lau lauga. O le a aogā pe a fai leotele. O le mea tāua ia faamautinoa ua e manatuaina uma manatu o le lauga. Ia mafai ona e tautala atu ma le matuā mautinoa, ia avatu i se auala ola, ma ia ʻānoa, ma avatu se taulimaga ola o le upu moni. A o leʻi faia lau lauga, fesili ifo iā te oe: ‘O le ā o loo oʻu faamoemoe e faataunuuina? Pe o matilatila atu manatu autū? Pe o oʻu faia moni lava le Tusi Paia ma faavae o laʻu lauga? Pe o faigofie ona tataʻi atu le isi manatu autū i le isi manatu autū? Pe o atiina aʻe e le lauga le lagona talisapaia mo Ieova ma mea ua ia saunia? Pe e fesootaʻi tuusaʻo upu faaiʻu i le matua, e faaalia ai i le aofia le mea e fai, ma faagaeeina ai i latou e fai?’ Afai o lau tali i nei fesili o le ioe, o lona uiga la ua mafai ona e ‘faafiafiaina tagata i le poto,’ mo le lelei o le faapotopotoga ma le viiga o Ieova!—Faata. 15:2.