Atiina Aʻe o Tomai i le Avea o se Faiaʻoga

O LE ā lou sini i le avea o se faiaʻoga? Pe afai e leʻi leva nei ona avea oe o se tagata talaʻi o le Malo, e lē taumatea o loo iā te oe le faanaunauga e faamasani pe faapefea ona fai se suʻesuʻega faale-Tusi Paia i se aiga, auā na avatu e Iesu i ona soo le tofiga ina ia fai ni soo. (Mata. 28:19, 20) Afai ua iai sou poto masani i lenei galuega, atonu la o lou sini o le matuā uigā i le pāʻia o loto o i latou o loo e saʻilia e fesoasoani i ai. Afai o oe o se matua, e mautinoa lava lou manaʻo ia avea oe o se faiaʻoga o lē e mafai ona faagaeeina lau fanau ina ia tuuina atu o latou ola i le Atua. (3 Ioa. 4) Afai o oe o se toeaina pe faapea foʻi o loo e aapa atu ia avea ma se toeaina, atonu e te manaʻo ia avea oe o se failauga i le lautele, o lē e mafai ona ia atiina aʻe i lana ʻaufaalogologo se talisapaia loloto mo Ieova ma ona ala. E faapefea ona e ausia nei sini?

Ia aʻoaʻoina se lesona mai i le Aʻoaʻo (Faiaʻoga) Sili, o Iesu Keriso. (Luka 6:40) Pe sa talanoa atu Iesu i se motu o tagata i se auvae mauga pe i ni nai tagata sa latou savavali i le auala, ae o mea sa ia fetalai atu ai ma le auala na ia fai atu ai sa iai ni āuga tumau. Sa faagaeeina e Iesu manatu ma loto o ē na faalogologo iā te ia, ma sa ia faia faatatauga aogā lea sa mafai ona latou malamalama i ai. Pe e mafai ona e faia le mea lenā?

Ia Faalagolago iā Ieova

O le tomai o Iesu e aʻoaʻo atu ai, sa faaleleia e lē gata i le la faiā totino sa iai ma lona Tamā faalelagi, ae o le faamanuia mai a le agaga o le Atua. Pe e te tatalo faatauanau ea iā Ieova ina ia mafai ona e faia ma le uigā se suʻesuʻega faale-Tusi Paia? Afai o oe o se matua, pe e te tatalo e lē aunoa mo le taʻitaʻiga tauatua i le aʻoaʻoina o lau fanau? Pe e te faia ni tatalo mai le loto a o sauni atu e taulimaina se lauga po o le faia foʻi o se sauniga? O tatalo ma le faalagolago iā Ieova faapena e fesoasoani iā te oe e avea ma faiaʻoga e uigā.

O le faalagolago iā Ieova e faaalia foʻi i le faalagolago atu i lana Afioga, le Tusi Paia. I le tatalo i le pō mulimuli o lona soifuaga o se tagata lelei atoatoa, na faapea atu ai Iesu i lona Tamā: “Ua ou tuu atu lau afioga ia te i latou.” (Ioa. 17:14) E ui lava i le anoanoaʻi o le poto masani sa iā Iesu, ae sa lē taitai ona fetalai i ni ona lava manatu. E fetalai lava i taimi uma i mea na aʻoaʻo ai e lona Tamā, ma ua ia faataatia se faaaʻoaʻoga mo i tatou e mulimuli ai. (Ioa. 12:49, 50) O afioga a le Atua, e pei ona faasaoina ai i le Tusi Paia, o loo iai le mana e aafia ai tagata—o a latou gaoioiga, o manatunatuga loloto, ma faalogona. (Epe. 4:12) A o tuputupu aʻe lou poto i le Afioga a le Atua ma faamasani e faaaogā lelei i lau faiva, o le a e atiina aʻe le ituaiga o tomai e aʻoaʻo atu ai, lea e tataʻiina atu ai tagata i le Atua.—2 Timo. 3:16, 17.

Ia Faamamalu ai Ieova

O le avea ma faiaʻoga e faaaʻoaʻo iā Keriso e lē faapea na pau lava le mea e manaʻomia ia mafai ona fai se lauga e lelei i le faalogo. E moni sa maofa tagata i “upu alofa” a Iesu. (Luka 4:22) Peitaʻi o le ā le sini o le lelei ona fetalai atu o Iesu? Sa fai ina ia faamamalu ai Ieova, ae lē o le faauaʻi mai ai o manatu iā te ia. (Ioa. 7:16-18) Ma sa ia faalaeiau atu i ona soo: “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.” (Mata. 5:16) O le fautuaga lenā e ao ona aafia ai le auala tatou te aʻoaʻo atu ai. E ao ona avea ma o tatou faanaunauga le ʻalofia o so o se mea e tataʻi ese ai mai i lenā sini. O lea la a o fuafua mea o le a tatou fai atu ai po o le auala foʻi tatou te fai atu ai, e lelei le fesili ifo iā i tatou lava: ‘Pe o le a faalolotoina e le mea lenei le talisapaia mo Ieova, pe o le a tosina mai ai manatu iā te aʻu?’

Mo se faaaʻoaʻoga, e mafai ona aogā i le aʻoaʻo atu le faaaogāina o talafaatusa po o faaaʻoaʻoga i ni mea moni na tutupu i soifuaga o nisi. Peitaʻi, pe a talanoaina se talafaatusa umī po o le faamatala foʻi o se mea na tupu i ona auʻiliʻiliga uma, e ono leiloa ai le manatu tāua o le faatomuaga. E faapena foʻi le faamatala atu o ni tala e na ona mālie ma taliē ai, ae tataʻi ese ai mai le fuafuaga o la tatou faiva. O le mea e tupu, o le a faauaʻi mai e le faiaʻoga manatu iā te ia na i lo le faataunuuina o le sini autū o aʻoaʻoga faatiokarate.

Ia “Fai se Faaeseesega”

Ina ia avea moni lava se tagata ma se soo, e ao ona malamalama lelei i mea ua aʻoaʻoina. E ao ona ia lagonaina le upu moni ma iloa le auala e eseese ai mai isi talitonuga. E mafai ona fai le mea lenei e ala i le faia o ni faaeseesega.

Sa faaauau e lē aunoa, ona timaʻi atu Ieova i ona tagata ina ia “fai se faaeseesega” i mea e mamā ma mea e lē mamā. (Levi. 10:9-11, NW) Na ia faapea mai o i latou o le a auauna i totonu o lona malumalu sili faaleagaga, o le a latou aʻoaʻoina tagata ina “ia masino mea paia ma mea e le paia.” (Eseki. 44:23) O loo tumu le tusi o Faataoto i faaeseesega i le va o le amiotonu ma le amioleaga, le va o le atamai ma le valea. E oo lava i mea e lē tuufaafeagai e mafai lava ona faaeseese le faatulagaina. Sa faia e le aposetolo o Paulo se faaeseesega i le va o le tagata amiotonu ma le tagata agalelei, e pei ona faamauina i le Roma 5:7. I le tusi o Eperu, na ia faaalia ai le silisili o le faiva faaositaulaga sili a Keriso na i lo le faiva faaositaulaga a Arona. O le mea moni, ua pei lava o le mea na tusia e se faiaʻoga i le senituri e 17 e suafa iā John Amos Comenius e faapea: “Ina ia aʻoaʻo atu, e leai lava ni mea se tele e manaʻomia, na ona faasino lava i ai o le eseesega o le isi mea mai i le isi mea i le eseese o o latou fuafuaga, o foliga, ma amataga. . . . O lona uiga la, o le tagata e lelei lana faaeseesega e lelei lana aʻoaʻo atu.”

Seʻi fai ma faaaʻoaʻoga, le aʻoaʻoina o se tasi e faatatau i le Malo o le Atua. Afai e lē malamalama le tagata po o le ā le Malo, e te ono faaalia pe faapefea ona ese le mea o fai mai ai le Tusi Paia, mai le manatu faapea o le Malo ua na o se tulaga i le loto o le tagata. Ia pe e te faaalia foʻi le auala e ese ai le Malo mai i malo faaletagata. Peitaʻi, o tagata ua latou iloa nei mea moni, e te ono talanoaina manatu e loloto atu. E te ono faaalia iā i latou le auala e ese ai le Malo Faa-Mesia mai le pulega tautupu a Ieova i le aoao o mea uma, e pei ona faamatalaina i le Salamo 103:19, po o le eseesega mai “le malo o lona lava Alo pele,” e pei ona taʻua i le Kolose 1:13, ia po o le eseesega mai i le “sauniga,” o loo taʻua i le Efeso 1:10 (LT). O le faaaogāina o faaeseesega e mafai ona faamanino ai lenei aʻoaʻoga tāua a le Tusi Paia, ina ia uaʻi atu i ai lau aofia.

Sa faaaogā e lē aunoa e Iesu lenei faiga mo le aʻoaʻo atu. Sa ia faaeseeseina le malamalamaga masani sa iai o le Tulafono Faa-Mose mai le fuafuaga moni o le Tulafono. (Mata. 5:21-48) Sa ia faaalia le eseesega i le tuutoina moni faale-Atua mai i gaoioiga faagutugutulua a le ʻau Faresaio. (Mata. 6:1-18) Sa ia faia le faaeseesega i le agaga o i latou o ē sa “aliitai” i isi, mai le agaga faataulagaina totino lea e ao ona faaalia e ona soo. (Mata. 20:25-28) I se tasi mea na tupu, o loo faamauina i le Mataio 21:28-32, sa valaaulia ai e Iesu lana ʻaufaalogologo e fai sa latou lava faaeseesega i le va o le faafiaamiotonu ma le salamō moni. O lenei mea ua tataʻi mai ai i tatou i le isi vala tāua o le lelei o le aʻoaʻo atu.

Faalaeiau le ʻAufaalogologo e Manatunatu

I le Mataio 21:28, tatou te faitau ai sa faatomua e Iesu lana faatusatusaga i le fesili atu: “Pe ni a fa outou?” O se faiaʻoga lelei e lē na ona faamatala atu o mea moni po o le avatu o tali. Na i lo lenā, e na te faalaeiauina lana ʻaufaalogologo e ati aʻe le tomai e mafaufau ai. (Faata. 3:21; Roma 12:1) O se tasi vala e fai ai le mea lenei, e ala i le fai atu o fesili. E pei ona maua i le Mataio 17:25 (LF), na fesili atu Iesu: “Simona e, pe ni a fa oe? E ao tiute po o lafoga mai ia te ai e tupu o le lalolagi? O a latou fanau ea, po o tagata ese?” O fesili faatupu manatu a Iesu sa fesoasoani iā Peteru e fai ai lana ia lava faaiʻuga saʻo e faatatau i le totogia o lafoga o le malumalu. E faapena foʻi ina ua tali atu i le tamāloa na fesili ane, “O ai foi le tagata ma te tuaoi?” Sa faailoa e Iesu le eseesega o gaoioiga a se ositaulaga ma se sā Levī mai gaoioiga a se Samaria. Ona ia lāgā lea o le fesili lenei: “Pe ni a fa te oe, o ai so latou nei o le toatolu ua fai ma tagata la te tuaoi ma le na maua e tagata fao mea?” (Luka 10:29-36) Ua faaalia atili i inei, na i lo le faia e Iesu o mafaufauga o lē na faalogologo iā te ia, ae na valaaulia o ia e Iesu e tali lana ia lava fesili.—Luka 7:41-43.

Ia Pāʻia le Loto

O faiaʻoga o ē latou te iloa le uiga o le Afioga a le Atua latou te amanaʻia o le tapuaʻiga moni e lē uiga faapea, e na o le taulotoina lava o ni mea moni patino ma lolo atu i ni tulafono patino. E ati aʻe i se faiā lelei ma Ieova ma se talisapaia mo ona ala. O le ituaiga tapuaʻiga faapena e aafia ai le loto. (Teu. 10:12, 13; Luka 10:25-27) I le Tusi Paia, o le faaupuga “loto” e masani ona faatatau atu i le tagata atoa, e aofia ai mea e pei o faanaunauga, alofa, faalogona, ma uunaʻiga.

Sa silafia e Iesu e ui e vaai tagata i le foliga mai fafo, ae silasila le Atua i mea o i le loto. (1 Samu. 16:7) O la tatou auaunaga i le Atua e ao ona uunaʻia e lo tatou alofa mo ia, ae lē o ni taumafaiga e faaofo ai tagata. (Mata. 6:5-8) I le isi itu, sa faia e Faresaio le tele o mea ona o le faalialia i le vaaiga a tagata. Sa latou matuā faamamafa lava le maumauaʻi i auʻiliʻiliga o le Tulafono ma ia lolo atu i a latou lava tulafono na fai. Peitaʻi sa lē taulau ona latou faaalia i o latou olaga uiga ia e mafai ona mātaulia ai i latou faatasi ma le Atua, lea latou te faapea mai o loo latou tapuaʻi i ai. (Mata. 9:13; Luka 11:42) Sa aʻoaʻo atu e Iesu e faapea, a o tāua le usitai i mea e faafinagaloina e le Atua, peitaʻi e fua le tāua o lenā usitai i mea o i le loto. (Mata. 15:7-9; Mare. 7:20-23; Ioa. 3:36) E telē se lelei o le a faataulauina e la tatou aʻoaʻo atu pe a tatou faataʻitaʻi i le faaaʻoaʻoga a Iesu. E tāua lo tatou fesoasoani i tagata e aʻoaʻoina mea o manaʻomia e le Atua mai iā i latou. Peitaʻi e tāua foʻi mo i latou ona iloa ma alolofa iā Ieova i lona tulaga e pei ona iai, ina ia atagia mai i a latou amio lo latou faatāuaina o se faiā faamaonia ma le Atua moni.

E moni, ina ia maua aogā mai na aʻoaʻoga, e manaʻomia e tagata ona vaai le mea o i o latou lava loto. Sa faalaeiauina e Iesu tagata ina ia tilofaʻia a latou māfuaaga ma iloilo o latou faalogona. Pe a faasaʻoina se vaaiga sesē, sa ia fesili atu i lana ʻaufaalogologo i le māfuaaga latou te manatunatu ai, tautatala ai, po o le faia o nisi o mea. Peitaʻi, ina ia aua le tuua ai faapena, sa faaopoopo atu e Iesu i ana fesili se faamatalaga, se talafaatusa, po o se gaoioiga, lea sa faalaeiauina ai i latou ina ia maua le vaaiga saʻo i mataupu. (Mare. 2:8; 4:40; 8:17; Luka 6:41, 46) E mafai foʻi ona tatou fesoasoani faapena i a tatou ʻaufaalogologo e ala i le fai i ai e fesili ifo iā i latou lava i fesili nei: ‘Aiseā e faaoso fiafia ai iā te aʻu lenei gaoioiga? Aiseā ua ou tali atu ai faapenei i lenei tulaga?’ Ona taʻu atu lea i ai o ni māfuaaga e ono uunaʻia ai i latou ina ia vaai i mea e pei ona tagaʻi i ai Ieova.

Ia Saunia Faatatauga

E iloa e se faiaʻoga lelei e faapea “o le poto (atamai) o le mea sili lea.” (Faata. 4:7) O le atamai o le tomai lea e faatatauina ai ma le manuia le poto i le foʻiaina o faafitauli, e ʻalofia ai lamatiaga, e ausia ai sini, e fesoasoani ai i isi. O le tiute tauave la o le faiaʻoga le fesoasoani i tagata suʻesuʻe e faamasani e fai le mea lenā ae lē o le fai e ia o filifiliga mo i latou. Pe a talanoaina mataupu silisili eseese o le Tusi Paia, fesoasoani i tagata suʻesuʻe ina ia fefulifulisaʻi manatu. E te ono taʻua se tulaga i le olaga e masani ai i aso faisoo ma fesili atu i le tagata suʻesuʻe pe faapefea i le mataupu silisili o le Tusi Paia sa lua talanoaina ona fesoasoani iā te ia pe a ia fesagaʻia lea tulaga.—Epe. 5:14.

I lana lauga i le Penetekoso i le 33 T.A., sa saunia ai e le aposetolo o Peteru se faaaʻoaʻoga o le faatatauga aogā lea sa aafia ai soifuaga o tagata. (Galu. 2:14-36) Ina ua uma ona ia talanoaina ni vaega se tolu o le Tusi Paia lea na faapea mai le aofia ua latou talitonu i ai, sa faia loa e Peteru se faatatauga o nei manatu e tusa ai o lo latou malamalamaga i mea sa latou molimauina uma lava. O le iʻuga, sa lagona e le aofia le manaʻomia ona latou gaoioi e tusa ai o mea na latou faalogo i ai. Pe o iai ni aafiaga faapena o lau aʻoaʻo atu i tagata? Na i lo le na ona toe taʻua o mea moni, pe e te fesoasoani ea i tagata ina ia malamalama i le māfuaaga ua ala ai ona faia mea i le auala ua fai ai? Pe e te faalaeiauina i latou ina ia iloilo pe faapefea i mea ua latou aʻoaʻoina ona aafia ai o latou soifua? Atonu latou te lē tuualaga mai, “Se a se mea matou te faia?” e pei ona sa tuualaga ai le motu o tagata i le Penetekoso, peitaʻi a lelei ona e faatatauina mau, o le a uunaʻia ai i latou e manatunatu i le faia o gaoioiga talafeagai.—Galu. 2:37.

Pe a faitauina faatasi ma lau fanau le Tusi Paia, ua iā te outou mātua se avanoa lelei e toleniina ai i latou ina ia fai ni faatatauga aogā o mataupu silisili o le Tusi Paia. (Efe. 6:4) Atonu mo se faataʻitaʻiga, e te filifilia ni nai fuaiupu o le faitauga Tusi Paia o loo faatulagaina mo le vaiaso, talanoa i le uiga o nei fuaiupu, ona fai atu lea o fesili e pei o nei: ‘E faapefea i lenei fuaiupu ona saunia mai ai taʻiala mo i tatou? E faapefea ona tatou ono faaaogāina nei fuaiupu i le faiva? O le ā o latou faailoa maia e faatatau iā Ieova ma lana auala e faia ai mea, ma e faapefea i lenā tulaga ona ati aʻe ai lo tatou talisapaia mo ia?’ Faalaeiau i lou aiga e fai ni o latou sao i nei manatu pe a talanoaina manatu tāua mai le Tusi Paia i le Aʻoga o le Faiva Faatiokarate. O fuaiupu ia o le a fai ai ni o latou sao e foliga mai o fuaiupu e lē o galo iā i latou.

Ia Faataatia se Faaaʻoaʻoga Lelei

E te aʻoaʻo atu e lē gata i mea e te fai atu ai ae faapena foʻi i mea e te faia. O au gaoioiga e saunia ai se faaaʻoaʻoga aogā i le auala e faatatauina ai mea o loo e fai atu ai. O le auala lenei e aʻoaʻoina ai mea e le fanau. Pe a latou faataʻitaʻi i o latou mātua, e latou te faailoa mai ai lo latou mananaʻo e fia pei o o latou mātua. Latou te fia iloa pe faapeʻī le faia o mea o loo fai e o latou mātua. O le mea lava la e tasi, pe a oo ina avea i latou o loo e aʻoaʻoina ma ē ‘faaaʻoaʻo mai ia te oe, e pei o oe ia Keriso,’ ona amata foʻi lea ona latou maua faamanuiaga i le savavali i ala o Ieova. (1 Kori. 11:1) O le a avea feutagaʻiga a le Atua ma i latou ma vaega o a latou meafai.

O se faamanatuga manino lenei o le tāua o le faataatia o se faaaʻoaʻoga talafeagai. O le ituaiga tagata e iai i tatou i le “amio e tatau ai i le amio lelei ma le amio Atua,” o le a telē lava sona aafiaga i le avatuina i ē tatou te suʻesuʻe, o se faataʻitaʻiga ola i le auala e faatatauina ai mataupu silisili o le Tusi Paia. (2 Pete. 3:11) Afai e te faalaeiauina se tagata suʻesuʻe e faitau e lē aunoa le Afioga a le Atua, ia e maumauaʻi foʻi oe e faitau. Afai e te manaʻo i lau fanau e ola i mataupu silisili o le Tusi Paia, ia faamautinoa latou te mātauina mai le talafeagai o au gaoioiga ma le finagalo o le Atua. Afai e te faatonuina le faapotopotoga ina ia maelega i le faiva, ia latou mātauina mai ua fai sou sao atoatoa i lenā galuega. Pe afai e te faataʻitaʻia mea o loo e aʻoaʻo atu, ua e iai la i se tulaga e sili ona lelei e uunaʻia ai isi.—Roma 2:21-23.

I le iai o le manatu ia faaleleia lau aʻoaʻo atu, fesili ifo iā te oe: ‘Pe a ou avatu faatonuga, pe o faia ea i se auala e suia ai uiga faaalia, o le tautala, po o gaoioiga a i latou e faalogo i ai? Ina ia faamanino le tulaga o mea, pe ou te faia ea se faaeseesega i le va o se manatu po o se gaoioiga mai i isi manatu ma gaoioiga? O le ā ou te faia e fesoasoani ai i aʻu tagata suʻesuʻe, laʻu fanau, po o laʻu aofia i sauniga, ina ia manatua mea o loo oʻu fai atu ai? Pe e manino ea ona ou faailoa atu i laʻu ʻaufaalogologo le auala e faatatauina ai mea ua latou aʻoaʻoina? Pe o latou mātaulia mai i laʻu faaaʻoaʻoga? Pe o latou talisapaia le auala e mafai ai i le latou tali mai i le mataupu na talanoaina ona aafia ai la latou faiā ma Ieova?’ (Faata. 9:10) Ia faaauau ona uaʻi atu i nei mea a o e taumafai e ati aʻe tomai i le avea ma se faiaʻoga. “Ia oe lava ia te oe, atoa ma lau e aʻoaʻo atu, ia e tumau pea i ai; auā a ē fai lena mea, e faaolaina ai oe e oe atoa ma e ua faalogologo ia te oe.”—1 Timo. 4:16.