Le Pogai ua Sui ai e Nisi Tagata a Latou Lotu

O le toatele o tagata ua manatu, o lotu ua na o se taʻu po o se igoa. Atonu e faailoa ai le mea o loo fai ma agaʻi i ai se tagata i le Aso Sa, le mea e fai ai lana faaipoipoga, ma le mea e fai ai le sauniga o lona maliu. Peitai e lē taʻu mai ai le ituaiga o tagata e iai o ia pe taʻu mai ai po o ā mea o loo ia iloa ma talitonu i ai. Mo se faaaoaoga, i se tasi suesuega, na faaalia ai o le 50 pasene o ē faapea mai o Kerisiano sa latou lē iloa po o ai na faia le Lauga i luga o le Mauga. Ae o lea, e oo lava i le taʻitaʻi logologoā o Initia, o Mohandas Gandhi o se tagata Hinitū, sa ia iloa le tali i lena fesili!

PO O se mea la e ofo ai le seesee mālie ese o tagata mai lotu ae o le toatele o i latou e matuā itiiti lava so latou malamalamaga e uiga i lo latou faatuatuaga? E leai, e lē o se mea e maofa ai. Peitai, e lē faapea ua lē mafai ona alofia. O i latou ua taliaina fesoasoani ina ia aʻoaʻoina ai le Tusi Paia ua masani ona faateʻia ina ua latou iloa le tele o mea e mafai ona aogā mo i latou. Ua faapea mai le Tusi Paia lava ia: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.”—Isaia 48:17.

O le ā e tatau ona fai e i latou o loo lē faamalieina lo latou galala faaleagaga? E lē tatau ona latou faamaamulu mai le auauna atu i le Atua! Nai lo lea, e tatau ona latou saili atu i le Tusi Paia ma vaai po o ā mea ua faaavanoa mai e le Atua lava ia mo i latou.

Tali i Fesili Lavelave

I le fitu o tausaga o Peni, na ia vaavaai atu ai i le oti o lona tinā.a A o faagasolo la lona olaga o se tamaitiiti, sa ia tau mānatu pea, ‘O fea o iai loʻu tinā? Aisea ua ou ola ai e aunoa ma loʻu tinā?’ Ina ua talavou, sa avea Peni o se tagata e maelega i le lotu. Ona o le manatu mamafa i puapuaga o tagata, sa ia faamoemoe ai e avea ma se tagata e galue fesoasoani i se atunuu tauatiaʻe. Ae sa faatalatala pea i lona mafaufau fesili ia sa leai ni tali faamalieloto na te maua mai ai i lana lotu.

Ona talanoa atu lea o Peni i sana uo i le aʻoga, o se tasi o Molimau a Ieova. Na faaali atu e lenei talavou ia Peni mai le Tusi Paia e faapea o lona tinā ua moe i le oti ma na te lē o toe iloa se mea. Na aʻoaʻoina e Peni le tele o mau o le Tusi Paia o loo faamatala mai ai lenei manatu, e pei o le Failauga 9:5: “A o e ua oti, latou te le iloa se mea.” O lea sa leai se mafuaaga mo Peni e popole ai pe faamata o puapuagatia lona tinā i se pulekatolio—po o se isi nofoaga e sili atu ona matautia. E ui o loo aʻoaʻoina i le tele o lotu le talitonuga i le lē mafai ona oti o le solu, ae na iloa e Peni mai le Tusi Paia e faapea o le solu o le tagata lava ia. Pe a oti le tagata, ua oti ai foi ma le solu. “O le tagata [“solu,” NW] e agasala e oti ia.”—Esekielu 18:4.

Na aʻoaʻoina foi e Peni le faamoemoe matagofie mo ē ua maliliu. Na faitau lava o ia i le tusi o le Tusi Paia o Galuega: “O le a toe tutū mai e ua amiotonu atoa ma e ua amioletonu.” (Galuega 24:15) Maeu lona faagaeetia ina ua ia iloa o lenei toetu o le a faia lava iinei i le lalolagi, le nofoaga o le a toe faafoisia ai e le Atua le parataiso!—Salamo 37:29; Faaaliga 21:3, 4.

E lei umi ae faamalieina loa manaoga faaleagaga o Peni e le poto moni mai le Tusi Paia. Sa lei faamaamulu Peni mai lotu. Nai lo lea, sa ia alu ese mai le lotu lea na lē mafai ona faamalieina lona galala, ae liliu atu i le tapuaiga ua faavae mausalī aʻe i le Tusi Paia. Ua ia faapea mai: “E tusa ma le 14 tausaga ua mavae talu ona ou faia lena laasaga, ae ou te lē o salamō lava ona o le faia faapea. O lenei ua ou iloa e lē faapogaia e Lē na Foafoaina Mea puapuaga. O Satani o le atua ia o lenei faiga o mea, ma o ia e tatau ona tuuaʻia mo tulaga o loo siomia ai i tatou. Peitai ua lē pine ona faasaʻoina lea e le Atua mea leaga uma ua faia e le lalolagi a Satani. O le a toe ola mai foi loʻu tinā i le toetu. Maeu se olioli o le a iai lena mea!”

Ua faapea lava foi ona ausia e Peni lona sini o le galue i se isi atunuu e fesoasoani atu i isi. Ua galue o ia i se atunuu ese e fesoasoani i isi ia latou aʻoaʻoina mea e uiga i le Malo o le Atua, le vaifofo moni i o latou puapuaga. I le pei o Peni, e faitau miliona tagata ua latou iloa ua lē o toe mamao ona faaiuina lea e le Atua puapuaga o tagata. Ua faagaeetia i latou e iloa o loo iai se lotu e faamalieina ai o latou manaoga faaleagaga.—Mataio 5:3.

O le ā le Fuafuaga o le Olaga?

A o faasolosolo pea ina faateleina le tulaga faaitiitia o le naunau i mea faaleagaga o atunuu i Sisifo, e toatele ua fesili, ‘O le ā le fuafuaga o le olaga?’ E maua le tali i le Tusi Paia, e pei ona maua ai e Mikaele. I le taulotoaiga o tausaga e amata mai le 1970, na manao ai Mikaele e auai atu i se vaega o tagata faatupu faalavelave. Sa na o le tasi lava lona sini i le olaga—ia faatupuina faalavelave i tagata sa ia manatu o loo māfua ai faiga lē tonu i faiga faapisinisi. Fai mai a ia: “E lē tāitai ona ou alu ese mai loʻu fale e aunoa ma laʻu fana. O laʻu fuafuaga ia fasiotia uma se toatele o ni tagata maualuluga i vaega faapolotiki ma vaega o pisinisi pe a mafai. Na ou malie lava e uma ai loʻu ola mo lea fuafuaga.”

O Mikaele o se tagata e alu i le lotu, peitai e leai se tasi o lana lotu na mafai ona faamatalaina ia te ia le fuafuaga moni o le olaga. O lea ina ua afea lona aiga e Molimau a Ieova ma faaali atu ia te ia tali faale-Tusi Paia i ana fesili, sa matuā faalogologo lelei Mikaele. Na amata ona ia auai atu i sauniga mo le tapuaiga i le Maota o le Malo a Molimau a Ieova i le latou vaipanoa.

Sa fia iloa lava e uo a Mikaele po o le ā le mea fou lea ua ia naunau i ai i le Tusi Paia. Na tauanau atu Mikaele ia i latou: “Ō mai i le sauniga i le Aso Sa nei. E mafai ona tou faalogologo mo sina taimi. Afai tou te lē fiafia i mea o le a tou faalogologo i ai, ona tou toe ō lea.” Ma o le mea tonu lena na tupu. Ina ua mavae se lauga faale-Tusi Paia mo le 45 minute, o le toatele lava o ana uo sa toe ō ese ma le maota. Ae toatasi—o Susana—na nofo pea. Sa faafiafiaina lenei tamaitai talavou i mea na ia faalogologo i ai. Mulimuli ane ona faaipoipo lea o Mikaele ma Susana, ma papatiso ai e avea o ni Molimau a Ieova. Fai mai Mikaele: “Ua ou iloa nei le mafuaaga o lo tatou iai iinei i le lalolagi. Na foafoaina i tatou e Ieova. O la tatou fuafuaga moni i le olaga ia iloa o ia ma faia lona finagalo. O le mea lena e aumaia ai le faamalieina moni!”

E faitau miliona isi o loo iai le talitonuga lava lea o loo ia Mikaele. Ua latou teulotoina upu a le Tusi Paia: “Seʻi tatou faalogo ia i le iuga o ia mea uma, Ia e mataʻu i le Atua, ma e anaana i ana poloaiga; auā o mea ia e tatau i tagata uma.”—Failauga 12:13.

Manumalo Mai Faafitauli o le Olaga

Ua tatou tofo uma lava i le faataunuuga o le valoaga lea e maua i le 2 Timoteo 3:1: “O ona aso e gata ai e oo mai ai aso faigata.” E leai se tasi e mafai ona sola ese mai faafitauli o nei “aso faigata.” Peitai ua fesoasoani mai le Tusi Paia ia i tatou ina ia manumalo mai ai.

Seʻi manatu ia Sitivi ma Olive, o se ulugalii faaipoipo. Ina ua amata ona la suesueina le Tusi Paia ma Molimau a Ieova, sa iai ni faafitauli i le la faaipoipoga, e pei lava o le toatele o ulugalii. Fai mai Sitivi: “Na amata ona taitasi le tagata ma fai le mea e loto atu ia i ai. Sa eseese mea ma te sini ma naunau i ai.” O le ā na mafai ai ona la nonofo faatasi pea? Ua toe faapea mai Sitivi: “Na faaali mai e Molimau a Ieova ia i maʻua le auala e mafai ona ma faatatauina ai mataupu silisili o le Tusi Paia i o ma olaga. O le taimi muamua lea ua ma iloa ai po o le ā e uiga i ai le lē manatu faapito ma le tausi faapelepele. O le faatatauina o mataupu silisili o le Tusi Paia ua matuā faamausalīina ai i maʻua. Lenei la ua ma olioli ai i se faaipoipoga e fiafia, ma mautū.”

Se Faiā Vavalalata ma le Atua

E tusa ai ma se faitauga na faia lata mai nei e sailia ai manatu o le lautele (Gallup poll), na iloa ai e 96 pasene o tagata Amerika e talitonu i le Atua, ma o le toatele o nei tagata o loo tatalo atu ia te ia. Peitai, o se isi faitauga na ese mai na faaalia ai o le aofaiga o tagata o loo ō atu i falesā ma sunako ua faaitiitia nei i se aofaiga pito sili ona maulalo i totonu o le na o le ʻafa senituri. O se isi 58 pasene o tagata Amerika ua faapea mai latou te ō i lotu pe faatasi i le masina pe itiiti ifo foi. E manino lava, ua lē o tataʻiina atu e lotu i latou ina ia faalatalata ai i le Atua. Ma ua lē na o le Iunaite Setete o iai lenei faafitauli.

Na ola aʻe Lina i Bavaria. O ia o se teine sa auai i le lotu Katoliko ma na tatalo e lē aunoa. I le taimi e tasi, sa popole o ia i le mea e tupu i le lumanai. E leai ma sona iloa e faatatau i le fuafuaga a le Atua mo le tagata. I le na o le 14 o ona tausaga, na feiloai ai Lina ma Molimau a Ieova, ma ua ia taʻu mai: “Sa logo mālie mea na latou fai mai ai, o lea na ou talia ai ni tusi se lua e faia ai ni suesuega faale-Tusi Paia ma na vave ona ou faitauina ia tusi.” I le lua tausaga mulimuli ane, na amata ai e Lina ona suesueina le Tusi Paia ma Molimau a Ieova. Fai mai a ia: “O mea uma lava na ou aʻoaʻoina mai le Tusi Paia e uiga i le Atua sa talafeagai. Na faamavae Lina mai lana lotu, ma papatiso ai e avea o se Molimau a Ieova i le 18 o ona tausaga.

O le ā na uunaia ai Lina e suia lana lotu? Ua ia faamatala mai: “Sa fesoasoani mai laʻu lotu ina ia ou iloa e iai se Atua, ma sa ou talitonu i ai. Peitai o se Atua e leai ni ona lagona e māfana ma e matuā mamao ese lava. O loʻu suesueina o le Tusi Paia e lē gata ua faamausalīina ai loʻu talitonuga i le Atua, ae na fesoasoani foi ia te au ia ou iloa ai ma alofa atu ia te ia. O lenei ua iai se ma faiā totino ma le Atua, o se mea e sili atu ona tāua nai lo so o se isi lava mea.”

E Aogā le Lotu Moni!

Po o avatu ea e lau lotu ia te oe se taitaiga faaleagaga ma faasino oe i le ala e mafai e le Tusi Paia ona fesoasoani ia te oe e manumalo ai mai faafitauli o le olaga? Po o aʻoaʻoina ai le faamoemoe o le Tusi Paia mo le lumanai? Po o avatu ea ia te oe se faiā vavalalata ma le totino ma Lē na Foafoaina Mea, e faavae aʻe i le poto saʻo o le Tusi Paia? Pe afai e leai, aua le faamaamulu. Nai lo le lafoaia o lotu, ia e saili atu mo le tapuaiga o loo faavae mausalī i le Tusi Paia. Ona pei ai lea o oe o i latou na sa vavalo faatatau i ai le tusi o le Tusi Paia o Isaia e faapea: “O loo faapea ona fetalai mai ai o le Alii o Ieova, Faauta mai, e aai aʻu auauna . . . e feinu aʻu auauna . . . e olioli aʻu auauna . . . e alalaga aʻu auauna ona o le loto fiafia.”—Isaia 65:13, 14.

[Faaopoopoga i lalo]

[Ata i le itulau 4, 5]

Ua fesoasoani le Tusi Paia ia i tatou ia iloa le Atua ma alolofa atu ia te ia