Pe e Ia te Oe ‘le Loto Usiusitai’?

INA ua avea Solomona ma tupu o Isaraelu anamua, sa ia lagona le lē lava o lona agavaa. Ona ia ole atu ai lea i le Atua mo le poto ma le atamai. (2 Nofoaiga a Tupu 1:10) Na tatalo foi Solomona: “Ia e foai mai ai i lau auauna le loto matala [“usiusitai,” NW] ina ia faamasino e ia i lou nuu.” (1 Tupu 3:9) Pe afai sa maua e Solomona “le loto usiusitai,” e mautinoa lona mulimuli atu i tulafono ma mataupu silisili a le Atua ma ia maua ai faamanuiaga a Ieova.

O le loto usiusitai e lē o se avega mamafa ae o le puna o le olioli. Na tusi le aposetolo o Ioane e faapea: “O lenei lava le alofa i le Atua, ia tatou tausi i ana poloaiga; e le mamafa foi ana poloaiga.” (1 Ioane 5:3) O le mea moni, e tatau lava ona tatou usiusitai atu i le Atua. Auā, o Ieova o Lē Sili na Foafoaina i tatou. O ia e ona le lalolagi ma mea uma o iai, e oo lava i siliva ma auro uma. E lē mafai la ona tatou avatua moni i le Atua so o se mea faaletino, e ui lava o loo ia faatagaina i tatou e faaaogā a tatou tupe e faailoa atu ai lo tatou alolofa mo ia. (1 Nofoaiga a Tupu 29:14) Ua faatalitalia mai i tatou e Ieova ina ia alolofa atu ia te ia ma savavali ma le loto maulalo faatasi ma ia, i le faia o lona finagalo.—Mika 6:8.

Ina ua fesiligia Iesu Keriso po o lē fea le poloaiga e silisili i le Tulafono, na ia fetalai: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili.” (Mataio 22:36-38) O se tasi o auala e faailoa atu ai lena alofa o le usitai atu lea i le Atua. E tatau ona avea ma a tatou tatalo taitoatasi ia foai mai e Ieova le loto usiusitai ia i tatou.

Sa ia i Latou le Loto Usiusitai

Ua i le Tusi Paia le tele o faaaoaoga o i latou na iai le loto usiusitai. Mo se faataitaiga, na fetalai Ieova ia Noa ia fau se vaa tele lava e faasaoina ai ola. O se galuega telē tele lea galuega na faaaluina ai le 40 i le 50 tausaga. E tusa lava pe ana faapea na iai meafaigaluega malolosi ma isi mea ia o loo faaaogaina i ona po nei, ae o se galuega fitā tele le fausiaina o lea fausaga telē e mafai ona opeopea i le vai. E lē gata i lena, na tatau ona lapataia e Noa tagata o ē na mautinoa na ula atu ma tauemu ia te ia. Ae na ia usiusitai i mea uma lava. Ua fai mai le Tusi Paia: “Sa faapea lava ona fai e ia.” (Kenese 6:9, 22; 2 Peteru 2:5) Na faaalia e Noa lona alofa ia Ieova e ala i le usiusitai ma le faamaoni i le tele o tausaga. E maeu sea faaaoaoga lelei mo i tatou uma lava!

Seʻi manatu foi i le augātamā o Aperaamo. Na fetalai atu le Atua ia te ia ina ia alu atu mai le nuu tamaoaiga o Uro o Kaletaia i se nuu sa ia lei iloaina. Na usiusitai Aperaamo e aunoa ma se fesili. (Eperu 11:8) I le taimi atoa na totoe o lona soifuaga, na mau ai o ia ma lona aiga i faleie. Ina ua mavae le tele o tausaga o aumau o se tagata ese i le nuu, na faamanuia ai o ia ma lana avā usiusitai o Sara e Ieova, i le mauaina o se la tama tama e igoa ia Isaako. E maeu le tele o le alofa na iai o Aperaamo ua 100 tausaga i lenei atalii ua maua i lona soifuaga matua! I ni tausaga mulimuli ane, na fetalai atu ai Ieova ia Aperaamo ina ia faataulagaina Isaako e fai ma taulaga mu. (Kenese 22:1, 2) O le mafaufau atu i le faatinoina o lea mea e mautinoa na tiga ai Aperaamo. Ae ui i lea, na faaauau ona ia usitai ona sa alofa o ia ia Ieova ma iai lona faatuatua faapea o le fanau folafolaina o le a ala mai ia Isaako, e oo lava i le taimi e ono faatuina mai ai o ia e le Atua mai le oti. (Eperu 11:17-19) Peitai, ina ua sauni atu Aperaamo e faaoo le oti i lona atalii, ae taofia loa o ia e Ieova ma fetalai atu: “Ua ou iloa nei ua e mataʻu i le Atua, ina ua e le taofia lou atalii, o lou atalii e toatasi, a ua e tuu mai ia te au.” (Kenese 22:12) Ona o lona usiusitai, na avea ai Aperaamo mataʻu i le Atua, ma “uo a le Atua.”—Iakopo 2:23.

O lo tatou faaaoao sili lava o le usiusitai o Iesu Keriso. I le taimi a o lei avea ma tagata, na fiafia o ia e auauna ma le usiusitai atu i lona Tamā i le lagi. (Faataoto 8:22-31) A o avea ma tagata, na usitai atu ai Iesu ia Ieova i mea uma lava, e fiafia pea o ia e faia lona finagalo. (Salamo 40:8; Eperu 10:9) O lea, na mafai ai e Iesu ona fetalai mai ma le faamaoni lava: “Ou te le fai fua foi se mea, a e peitai, faapei ona aʻoaʻo mai e loʻu Tamā ia te au, o mea ia ou te tautala atu ai. O ia foi ua auina mai aʻu o loo ia te au ia; e le tuua aʻu e toatasi e le Tamā, auā ou te faia pea lava o mea e lelei ia te ia.” (Ioane 8:28, 29) I le faaiuga, ina ia faaeaina le pule silisiliese a Ieova ma togiola tagata usiusitai, na lotomalie ai Iesu e foaiina lona soifua, i le tuuina atu i se maliu sili ona faalumaina ma tiga. O le mea moni, “a o iloa o ia i ona foliga e faapei o se tagata, ua faamaulalo o ia e ia lava, ua na anaana ua oo ina maliu, o le maliu lava lea i le satauro.” (Filipi 2:8) Maeu se faaaoaoga sili o le faaalia o le loto usiusitai!

Usiusitai Faaʻafaʻafa e Lē Lava

E lē o i latou uma o faapea mai e usiusitai i le Atua ua usiusitai moni lava ia te ia. Manatu foi i le tupu o Saulo o Isaraelu anamua. Na faatonuina o ia e le Atua ina ia tafi uma ese sa Amalekā amioleaga. (1 Samuelu 15:1-3) E ui ina sa faaumatia e Saulo i latou o se nuu, ae na ia faatotoeina lo latou tupu ma faasaoina nisi o a latou mamoe ma povi. Na fesili Samuelu: “O le a le mea ua e le faafofoga ai i le siufofoga o Ieova?” I le tali, na faapea atu Saulo: “Auā! ua ou faalogo lava i le siufofoga o Ieova . . . A ua au mai e le nuu [o Isaraelu] mea a le itu taua, o mamoe ma povi, (o mea sili lava ia . . .,) e fai aʻi taulaga ia Ieova.” I le faamamafa atu o le manaoga mo le usiusitai atoatoa, na tali atu ai Samuelu: “E tusa ea ona fiafia o Ieova i taulaga mu ma taulaga, i lona fiafia i le faalogo i le siufofoga o Ieova? Faauta, o le faalogo e sili lea i le taulaga, ma le usiusitai e sili lea i le gaʻo o mamoe poa. Auā o le fouvale, e tusa ia ma le agasala o le faataulāitu; o le finau vale, e tusa ia ma le leaga o le tapuai i tupua. Ua e lafoai le afioga a Ieova, o lea ua lafoai ai o ia ia te oe ia le fai ma tupu.” (1 Samuelu 15:17-23) Pagā le telē o le tulaga o Saulo na leiloa ai ona o le lē iai ia te ia o le loto usiusitai!

E oo lava i le tupu poto o Solomona, o lē na tatalo atu mo le loto usiusitai, na lei faaauau foi ona usitai atu ia Ieova. I le feteenai ma le finagalo tauatua, na ia faaipoipo atu ai i fafine ese o ē na faapogaia o ia e agasala faasaga i le Atua. (Neemia 13:23, 26) Na aveesea ai mai ia Solomona le finagalo fiafia mai i ai o le Atua ona sa lei faaauau ona ia te ia le loto usiusitai. Maeu se lapataiga ua aumaia e lea mea mo i tatou!

E lē o le uiga o lea mea e faatalitalia mai e Ieova se lelei atoatoa mai ana auauna faaletagata. E na te ‘manatua o le efuefu lava i tatou.’ (Salamo 103:14) E mautinoa lava e iai taimi tatou te faia uma ai lava mea sese, ae e silasila mai le Atua po o ia i tatou moni lava se loto naunautai ina ia faafiafiaina o ia. (2 Nofoaiga a Tupu 16:9) Afai tatou te sese ona o le lē lelei atoatoa faaletagata ae toe salamō, e mafai ona tatou ole atu mo le faamagaloga e faavae i le taulaga togiola a Keriso, ma mautinoa o Ieova “na te matuā faamagaloina.” (Isaia 55:7; 1 Ioane 2:1, 2) O le fesoasoani a toeaina Kerisiano agaalofa e ono manaomia foi ina ia mafai ai ona tatou toe malolosi faaleagaga ma maua le faatuatua malosi ma le loto usiusitai.—Tito 2:2; Iakopo 5:13-15.

O Faapeī le Atoatoa o Lou Usiusitai?

Ona ua avea ma auauna a Ieova, e toatele ai i tatou e talitonu o loo ia i tatou le loto usiusitai. Atonu tatou te faapea mai, Pe ou te lē o auai ea i le galuega o le talaʻiina o le Malo? Pe ou te lē o mafai ea ona tumau pe a aliae mataupu tetele e pei o le solitū? Ma pe ou te lē o auai pea lava ea i sauniga faa-Kerisiano, e pei ona uunaia mai e le aposetolo o Paulo? (Mataio 24:14; 28:19, 20; Ioane 17:16; Eperu 10:24, 25) O le mea moni, o loo faaalia e tagata o Ieova i se tulaga aotele le loto usiusitai i vala tāua na.

Peitai o faapefea la tatou amio i meafai i aso taitasi, atonu i mea e foliga mai e faatauvaa? Na fetalai Iesu faapea: “O lē faamaoni i le mea itiiti, e faamaoni foi o ia i mea e tele; o lē amioletonu i le mea itiiti, e amioletonu foi o ia i mea e tele.” (Luka 16:10) E lelei ai la mo i tatou taitoatasi ona fesili ifo i le tagata lava ia, Po o ia te au ea le loto usiusitai pe a oo i mea laiti po o mataupu e lē o iloa mai lava e isi?

Na faaalia e le faisalamo e faapea e oo lava i totonu o lona fale, lea sa lē mafai ona iloa mai ai o ia e isi, ‘na savali o ia ma le loto saʻo.’ (Salamo 101:2) A o e nofonofo i lou fale, e te ono kiina le televise ma amata ona matamata i se ata. Iina lava, e mafai ona tofotofoina ai lou usiusitai. E ono lē mamā mea o loo aumaia ai i le ata. Po o le a faaauau ea ona e matamata, i le mafaufau faapea o ituaiga ata lava ia o lea ua faaali mai i aso nei? Po o le mea o le a faagaoioia e lou loto usiusitai oe ina ia gauai atu i le timaiga faale-Tusi Paia, ‘aua le taʻua lava ia te outou le faitaaga ma mea leaga uma’? (Efeso 5:3-5) Po o le a e tapeina loa le TV, tusa lava pe e manaia mai le tala? Po o le mea o le a e suia i se isi ālā ata pe afai e sauā se polokalame? Na pese le faisalamo e faapea: ‘E tofotofo e Ieova i le ua amiotonu atoa ma lē fai amio leaga, a ua inosia e Lona finagalo lē fiafia i le faasaua.’—Salamo 11:5.

O le Loto Usiusitai e Maua ai Faamanuiaga

O le mea moni, e tele lava vala o le olaga e mafai ona tatou iloiloina lelei ai i tatou lava ia iloa po o tatou usiusitai moni lava i le Atua mai le loto. O lo tatou alofa mo Ieova e tatau ona uunaia ai i tatou e faamalie o ia ma faia le mea o loo ia fetalai mai ai ia i tatou i lana Afioga le Tusi Paia. O le loto usiusitai o le a fesoasoani ia i tatou ina ia faatumauina ai se faiā lelei ma Ieova. O le mea moni, afai tatou te usiusitai atoatoa, ‘o le a mālie ia Ieova upu a o tatou gutu ma mafaufauga o o tatou loto.’—Salamo 19:14.

Ona e alofa Ieova ia i tatou, e na te aʻoaʻoina foi i tatou ia usiusitai, mo lo tatou lava lelei. Ma e faamanuiaina tele ai i tatou e ala i le uaʻi atu ma le loto atoa i aʻoaʻoga mai le Atua. (Isaia 48:17, 18) O lea la, seʻi o tatou talia ma le fiafia le fesoasoani ua saunia mai e lo tatou Tamā faalelagi e ala mai i lana Afioga, lona agaga, ma lana faalapotopotoga. Ua matuā aʻoaʻoina lelei i tatou ua pei ai o tatou faalogo atu i se leo i o tatou tua o faapea mai: “O le ala lava lenei, ia outou savavali ai.” (Isaia 30:21) A o aʻoaʻo mai Ieova ia i tatou e ala mai le Tusi Paia, o lomiga faa-Kerisiano, ma sauniga a le faapotopotoga, seʻi o tatou uaʻi totoʻa atu, faatatauina mea o tatou aʻoaʻoina, ma ia “anaana i mea uma.”—2 Korinito 2:9.

O le loto usiusitai e iu i le tele o le olioli ma le tele o faamanuiaga. E maua ai e i tatou le filemu o le mafaufau, auā o le a tatou iloa o loo fiafia Ieova le Atua ia i tatou ma o loo tatou faafiafiaina lona finagalo. (Faataoto 27:11) O le loto usiusitai o le a avea o se puipuiga mo i tatou pe a tofotofoina i tatou e faia se mea sese. E mautinoa lava la, e tatau ona tatou usiusitai atu i lo tatou Tamā faalelagi ma e tatau ona tatou tatalo atu: “Foai mai ai i lau auauna le loto usiusitai.”

[Ē Ana le Ata i le itulau 29]

Mai le Self-Pronouncing Edition of the Holy Bible, o loo iai le King James Version ma le Revised Version