E Toatele ua Tautino Mai e Faatuatua

“E LELEI Iesu! E matuā ofoofogia lava o ia!” o le alaga atu lena a se fafine lotu i Pasili. E moni, e lē mafaafitia le mamana o le suafa o Iesu. I le faagasologa o le talafaasolopito, sa loto malilie tagata e puapuagatia ma maliliu mo ia.

Sa talaʻi le aposetolo o Peteru ma Ioane i Ierusalema ‘ona o le suafa o Iesu.’ I le faia o lena mea, na pueina ai i laua ma sasaina. Peitai, ‘na ō atu i laua i lo la ala nai luma o le au Saniterini, ua olioli ona ua taʻuaogaina i laua ia faaleagaina ona o lona suafa.’—Galuega 5:28, 41.

O Anetipa, o le tasi lea Kerisiano i le uluai senituri o lē na ia matuā faaaloalogia le suafa o Iesu. I le tusi mulimuli o le Tusi Paia, le Faaaliga, na faasino ai e Iesu ia te ia e faapea, “o laʻu molimau o le na faamaoni, sa fasiotia o ia na ia te outou i le mea o nofo ai Satani.” (Faaaliga 2:13) Faatasi ma isi Kerisiano faamaoni i Perekamo, sa teena ai e Anetipa le faafitia o lona faatuatua ia Keriso. Sa taofi mau Anetipa i le suafa o Iesu i se tulaga na oo lava ina faaumatia ai lona ola!

I le pe tusa ma se ʻafa senituri mulimuli ane, i le 155 T.A., na fesagai ai foi se tasi na taʻua o se Kerisiano na igoa ia Polycarp ma se tofotofoga faapena ina ua faatonuina o ia ina ia upuleaga ia Keriso. Na ia tali atu e faapea: “E valusefuluono tausaga o oʻu auauna ia te Ia, ma e leai se mea leaga ua Ia faia ia te au. E mafai faapefea ona ou upuvale i loʻu Tupu o lē na faaolaina aʻu?” Ona o lona musu e faafitia Keriso, na faapipii ai Polycarp i se laau ma susunuina.

Sa loto malilie le au aposetolo, o Anetipa, ma isi e faamauina i le oti la latou molimau e uiga ia Keriso! Ae faapefea tagata i aso nei?

Le Suafa o Iesu i Aso Nei

O loo faaauau pea ona avea le suafa o Iesu ma mea e faagaee ai faalogona malolosi. I Amerika Latina i le faitau sefulu o tausaga talu ai nei, ua matuā sili atu ai ona maualuga le faatuputeleina o lotu o ē ua tautino mai e talitonu ia Iesu. E oo lava i nuu aupito laiti, e iai se lotu Penetekoso. I le taimi lava e tasi, ua faatuputeleina foi taaʻiga faapolotiki a na lotu. Mo se faaaoaoga, i le Fono Faitulafono ma le Senate a Pasili, e 31 nofoa o loo nofoia e sui o na lotu.

Ua avea foi Iesu ma taulaiga o gaoioiga a se lotu fou i le Iunaite Setete. Ua taʻua e ona tagata lotu i latou lava e faapea, O Ē Tausisia Folafolaga (Promise Keepers). Na lipotia mai e le mekasini o le Time o le 1997 e faapea, na faatuputeleina ē na auai i a latou fonotaga mai le 4,200 i le 1991 e oo i le 1.1 miliona i le 1996. Ua faapea upu o se tasi o a latou pese lotu: “Oi, le manumalo ia Iesu, loʻu Faaola e faavavau.”

Ae peitai, e lē o faalogona uma na faagaeetia i le suafa o Iesu ua faamamaluina. Sa masani ona tauina taua ona o lona suafa. Sa faataugaina i le oti tagata Siu, o ē na faatuiese sa matuā faaumatia, o ē na fulitua na faapuapuagatiaina, vavae ese ni vaega o o latou tino, ma faamau i latou i laau ma susunuina—o na mea uma na faia i le suafa o Iesu. Ma talu ai nei, ua matuā olaola le faasalalauina faapisinisi o faiga faaevagelia. O nei mea uma o se faaaogaseseina ma le inosia o le uiga moni o le suafa o Iesu!

E lē gata i lea, ua lāgā ai foi ni fesili tāua e faapea: O le ā e aofia ai i le faatuatua i le suafa o Iesu? Ma o le ā le manatu o Molimau a Ieova i lenei mataupu? O le a taliina e le mataupu o loo sosoo mai nei fesili.