MATAUPU AUTŪ | MALO O LE ATUA—E FAAPEFEA ONA E MAUA AI AOGĀ?

Malo o le Atua—E Faapefea Ona E Maua ai Aogā?

E pei ona e iloa mai i mataupu amata o lenei lomiga, e tāua tele le Malo o le Atua i Molimau a Ieova. Atonu ua e fia iloa atili e faatatau i faamanuiaga o le Malo o le Atua lea ua māeʻa ona talanoaina. Peitaʻi i le taimi e tasi, e te ono tomānatu foʻi pe e moni nei folafolaga.

E atamai le iloilo muamua o se mea nai lo le talitonu i mea uma e faalogo i ai. (Faataoto 14:15) O le faia faapea, o le a pei ai oe o tagata Perea anamua.a Ina ua faatoʻā faalogo tagata Perea i le tala lelei o le Malo, na latou taliaina loa. Peitaʻi, e latou te leʻi talia le tala lelei ona na pau le mea na mananaʻo ai ia taunuu folafolaga o le Malo. Nai lo lea, na latou iloiloina ma le faaeteete Tusitusiga Paia “pe e moni nei mea.” (Galuega 17:11) I nisi faaupuga, na faatusatusa e tagata Perea le tala lelei na latou faalogo i ai ma manatu o Tusitusiga Paia. O le iʻuga, na latou talitonu ai o le tala lelei e faavae mai i le Afioga a le Atua.

E fiafia foʻi Molimau a Ieova e valaaulia oe e faia faapea. E ala i talanoaga faale-Tusi Paia ma isi e aunoa ma se totogi, ua matou avatu ai le avanoa i tagata e faatusatusa ai talitonuga o Molimau a Ieova e uiga i le Malo o le Atua, ma aʻoaʻoga a le Tusi Paia.

E lē gata i le aʻoaʻoina e faatatau i le Malo o le Atua, ae o le a fesoasoani foʻi lou suʻesuʻeina o le Tusi Paia e tali ai nisi o fesili tāua o le olaga.

Na faapefea ona tatou iai?
O le ā le māfuaaga na faia ai le tagata?
Aiseā ua lē taofia ai e le Atua puapuaga?
O le ā e tupu iā i tatou pe a tatou feoti?
Po o le a faaumatia lenei lalolagi?
E faapefea ona maua se aiga fiafia?

E sili atu i lenā, o lou suʻesuʻeina o le Tusi Paia o le a fesoasoani iā te oe e ʻmafuta vavalalata atu ai i le Atua.’ (Iakopo 4:8) O le tele o lou mafuta vavalalata i le Atua, o le a atili ai ona e iloa aogā e te maua mai i lona Malo i le taimi lenei ma e oo i le faavavau. Na taʻua e Iesu i lana tatalo i lona Tamā e faapea: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”—Ioane 17:3.

E mafai ona faaaogā e Molimau a Ieova lenei lomiga e suʻesuʻe ai le Tusi Paia faatasi ma oe.

Pe a e fia talosaga mo se suʻesuʻega faale-Tusi Paia e aunoa ma se totogi, fesili atu i se Molimau a Ieova pe faatumu foʻi le pepa talosaga o loo i le www.jw.org/sm. (Tagaʻi i le TALOSAGA SE SUʻESUʻEGA FAALE-TUSI PAIA)

a O Perea o se aai i Maketonia anamua.

Le Māfuaaga e Tāua ai le Malo o le Atua iā te Ia

Talu ai nei, na tusia ai e se teineitiiti aʻoga e 10 tausaga e igoa iā Folake sana tala i le ulutala “O le Mea e Sili Ona Ou Fiafia i ai i Lenei Lalolagi.” Na filifili Folake e faamatala i lana tala, le māfuaaga e fiafia ai e talanoa i isi e uiga i le Malo o le Atua.

Na tusi Folake: “O le Malo o le Atua o se pulega moni lava. Peitaʻi, e lē mafai ona e vaaia e tusa lava pe fai sau matatioata!”

Na faamatala e Folake i lana tala faamanuiaga o le Malo o le Atua o loo ia tulimataʻia i le lumanaʻi. Na ia taʻua nisi o faafitauli o le a foʻia e le Malo, ma faapea mai, “E ese loʻu faanoanoa pe a ou vaai atu i nai tagata o loo nonofo solo i le auala tele,” faapea foʻi “tamaiti ua matelāina i le fia aai i so o se vaega o le lalolagi.” Na ia toe faaopoopo mai, “Ae na ou fiafia ina ua ou faitau i le Isaia 65:21.” Ua taʻua i lenā fuaiupu e faatatau i tagata o le a ola i le pulega o le Malo o le Atua: “O le a latou fausia fale ma nonofo ai; e latou te totō foʻi togāvine ma latou aai i ona fua.”

Na taʻua e Folake o loo ia tulimataʻia foʻi le taimi o le a aveesea ai e le Atua maʻi uma e ala i lona Malo. Na ia tusia i lana tala faaupuga o loo i le Faaaliga 21:4, e faapea o le a soloiesea e le Atua “loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.” Na faaiʻu lana tala i lona toe taʻua, o le talanoa e uiga iā Ieova ma lona Malo o le mea sili lea ona fiafia i ai i lenei lalolagi. E mautinoa, e matuā fiafia lenei teineitiiti i le Malo o le Atua!